МАХН-д дайн өрнөж байна

2013-07-18

Улс төрийн амьдрал наадмаас илүү сонирхолтой, халуухан байна. Сонгуулийн

дараахан ялагдсандаа тунирхсан МАН-ынхан шинэчлэл ярьж тэмцэлдэж эхэлсэн бол АН-ынхан эвтэй байгаа царай гаргаж буй хэдий ч дараагийн Засгийн газрын танхимын төлөөх тэмцэл өрнөж байгаа сурагтай.

Тэгвэл хоёр том намаас гадна улс төрийн тавцанд гуравдагч хүчин болж хүч түрэн орж ирсэн МАХН дотооддоо ихээхэн хагаралтай байна. Зөвхөн нэг дүүрэг дээр л гэхэд МАХН хоёр хуваагджээ.

Тухайлбал Сонгинохайрхан дүүргийн МАХН-ынхан МАХН-ын хороо, нөгөө нь МАХН-ын мянгатын хороо гэсэн намын байгууллагатай болсон гэнэ. Тос дотроосоо өтвөл аюултай гэдэг байдаг шиг дотроо хагарсан нам эргэж нийлэхдээ хэцүү баймаар.

Тэр дундаа удирдлагууд нь нам дотроо шударга ёс тогтоохын төлөө ажиллах байтал харин ч эсрэгээрээ тогтворгүй байдал үүсгэж байгаа гэнэ. Тухайлбал, Сонгинохайрхан дүүргийн хяналт ёс зүйн хороо мэдээлэл хийсэн.

Тэд "МАХН шударга ажиллаж чадахгүй байна. МАХН-ын дэд дарга, Шадар сайд Д.Тэрбишдагва, МАХН-ын Ерөнхий нарийн бичгийн дарга Г.Шийлэгдамба нар нам дотор шударга ёс тогтоохын төлөө ажиллах ёстой байтал маш хариуцлагагүй хандаж, хууль ёсыг сахиулахын төлөө бус ойлгомжгүй, тогтворгүй байдал үүсгэж байна.

Сонгинохайрхан дүүргийн Мянгатын хорооны дарга Н.Мөнгөнчимэгийг намаас хөөх шийдвэр гаргасан байгаа. Н.Мөнгөнчимэг нь Сонгинохайрхан дүүргийн АН-ын дарга Г.Эрхэмбаяртай уулзаж 10 орчим хүнийг ажилтай болгох талаар ярилцсаныг нь ёс зүйд нийцэхгүй зүйл гэж үзсэн байдаг.

Гэтэл өнөөдөр МАХН-д Д.Тэрбишдагвыг дагаж, МАН-аас ирсэн. Тэд нь МАХН-ыг хагалган бутаргах ажиллагаа явуулдаг. Харин Д.Тэрбишдагва тэр хүмүүсийг ямагт дэмжиж, ажил албанд татдаг.

Жишээ татвал, МАН-аас хөөгдөж ирсэн Н.Нэргүй, Н.Ганболд нарыг орон нутгийн сонгуульд нэр дэвшүүлсэн. Бүгд сонгуульд ялагдсан, дараа нь хорооны даргын сонгуульд нэр дэвшүүлсэн, бас л унасан. Эцэст нь Д.Тэрбишдагва ажилд томилсон байна лээ.

Сонгинохайрхан дүүргийн МАХН-ын мянгатын хорооны дарга Н.Мөнгөнчимэгийг намаас хөөсөн явдал нь хүний эрх зөрчсөн үйлдэл болсон. Эл асуудлыг бид МАХН-ын Гүйцэтгэх зөвлөлд тавьж, хүний эрхийг зөрчихгүй байхыг сануулж, шийдвэрлэж өгөхийг хүсэхэд өнөөдрийг хүртэл асуудлыг авч хэлэлцээгүй.

Энэ мэтчлэн олон хууль бус шударга бус үйл явдал нам дотор болж байгаа учраас МАХН-ын дэд дарга Д.Тэрбишдагва, ерөнхий нарийн бичгийн дарга Г.Шийлэгдамба нарт хариуцлага тооцох ёстой гэж үзэж байгаа. Мөн МАХН-ын ээлжит бус чуулганыг зарлан хуралдуулахыг шаардаж байна" гэсэн юм.

Үнэхээр удирдлагууд шударга бус ажиллаад байна уу, тэдний хийж буй үйлдэл жирийн гишүүдэд таалагдахгүй байна уу. МАН доторх хэсэг залуус яаралтай намын бага хурал, их хурлаа хийхийг шаардаж байгаа шиг МАХН-ынхан ч ээлжит бус чуулганыг зарлан хуралдуулахыг шаардаж эхлэв.

МАХН-ынхан Засгийн газраас гарах гэж байгаа гэсэн шуугиан нийгэмд тархах болов. Энэ талаар МҮАН-МАХН-ын "Шударга ёс" эвслийн Удирдах зөвлөлийн гишүүн, улс төр судлаач Л.Эрдэнэтуул "МАХН-ын гүйцэтгэх товчоо наадмын өмнөхөн хуралдсан.

Энэ хурлаар Н.Энхбаяр даргыг суллуулах биш эмчлүүлэх тухай асуудлыг ярилцаж, хэрвээ үүнийг нь хүлээж авахгүй бол Засгийн газарт байгаа Д.Тэрбишдагва, Н.Удвал, Ч.Улаан, М.Сономпил нарын дөрвөн сайдаа эргүүлэн татна гэдгээ төрийн тэргүүнд мэдэгдсэн байгаа.

Зөвхөн сайд нараар ч тогтохгүй төрд өндөр албан тушаал хашиж байгаа хүмүүсээ ч эргүүлж татахаа хэлсэн" хэмээн хэвлэлд ярилцлага өгсөн байдаг. Гэтэл хэвлэлийн албанаас нь энэ бүхэн худал хэмээн мэдэгдсэн.

Тэгэхээр МАХН-ыг төлөөлөх хэмжээний хүмүүсээс зарим нь засгаас гарах болсон гэдгийг үгүйсгэж байгаа нь намынхан дотооддоо эв нэгдэлгүй хагаралтай байгаагийн шинжийг илтгэж байна.

Могой гурав хуваагдавч гүрвэлийн дайтай гэгчээр МАН-аас тасарсан энэ нам дахин хуваагдалд ороод байгаа шинжтэй. Ер нь МАХН-ын дотоод зөрчил, тэмцэл орон нутгийн сонгуулиас хойш эрчимтэй эхэлсэн гэнэ.

Намын ёс зүйн хорооныхон намынхаа шударга бус зүйлийн талаар олон нийтэд мэдээлэхийг хүссэн ч Ерөнхийлөгчийн сонгууль зэрэгцээд чадаагүй гэдгээ ч сэтгүүлчдэд дуулгаад авсан.

Ганцхан Н.Энхбаярын төлөө ажилладаг нам хэмээсэн яриа олны дунд байдаг. Эрүүл мэндийн сайд Н.Удвал нь Н.Энхбаярын телөө сайд нарын гэгдэх хоёрдугаар эмнэлгийн бяцхан хэсгийг хоригдлуудыг эмчилдэг эмнэлэг болгосон.

Мөн МАХН-аас угшилтай гишүүд даргаа суллуулахын төлөө Өршөөлийн хуулийг батлуулахын төлөө уйгагүй зүтгэж яваа. Гишүүд нь ч даргыгаа суллахын төлөө олон хоногоор эрүүл мэндээ үл хайхран өлсгөлөн зарлаж байдгаас нь харахад үнэхээр л нэг хүний төлөө ажилладаг намынхан яагаад дотооддоо халуухан тэмцэлтэй байна вэ гэж гайхшрал төрмөөр.

Албан тушаал эрх мэдпээр амаа үдүүлсэн дарга нар нь жижиг фракцийнхандаа таалагдахгүй байна уу. МАХН дотор үүссэн бужигнаан газар авбал удирдлагуудаа буруушааж албан тушаалаас нь буулгах гэж тэмцэхийг үгүйсгэх аргагүй юм.

Сүүлийн үед МАХН-ынхан удирдлагууддаа хариуцлага тооцуулахыг шаардаж, Н.Энхбаяр даргын биеийн байдал улам бүр муудаж байгаа талаар ойр ойрхон хэвлэлийн хурал хийж, мөн МАХН-ын сайд нар Засгийн газраас гарна гэх мэтээр олон түмний анхаарлыг ихэд татаж байгаа. Тиймээс ч энэ бүх асуудлаа цэгцэлж, улс төрийн гуравдагч хүчнийхэн ирэх сарын дундуур бага чуулганаа хийж намынхаа алдаа оноог ярилцах сурагтай.

Г.Хишигсүрэн

Эх сурвалж : Нийгмийн толь