Солонгын долоон өнгө Монголд ирэх хүслийг төрүүлсэн

2013-12-12

Үндэсний мэдээллийн МОНЦАМЭ агентлагийн дарга А.Баатархуяг тус агентлагийн дээд шагнал

болох “Алтан дүрмийн эзэн” шагналыг “Монгорү Цүүшин” сонины мэргэжилтэн Кон Аяад өнөөдөр гардуулав.

Тэрбээр шагнал гардуулахдаа, “Таныг мэдээллийн МОНЦАМЭ агентлагийг хөгжүүлэн бэхжүүлэхийн төлөө хүчин зүтгэж “Монгорү Цүүшин” сонинд амжилттай ажилласны учир агентлагийн дээд шагналыг хүртээж байна. Монголыг дэлхийд мэдээлэх, сурталчлахад үнэтэй хувь нэмэр оруулсан гадаадын иргэнд жилд нэг удаа олгодог уг шагналын хоёр дахь эзэн нь та болж байна. Монголын тухай мэдээ мэдээлийг сурталчлах цаашдын ажилд тань өндөр амжилт хүсье” гэв.
“Монгорү Цүүшин” сонины мэргэжилтэн Кон Аяа, “Монгол Улсын Засгийн газар болон МОНЦАМЭ агентлаг энэхүү шагналыг надад гардуулсанд талархаж байна. Өнгөрсөн жил Япон Улсын ЭСЯ-наас Монгол, Япон улсыг холбох гүүр болон ажилласан хэмээн хүндтэй шагнал гардуулсан. Энэ удаа МОНЦАМЭ агентлагийн шилдэг сэтгүүлчид олгодог шагналыг авч байгаа гадаадын хоёр дахь сэтгүүлч болж байгаадаа баяртай байна” гэв.

Энэ үеэр тус сонины мэргэжилтэн Кон Аяатай уулзаж түүний сэтгэгдлийг сонсов.
-Та Монголд хэд дэх жилдээ амьдарч байна вэ. Анх хэзээ Монгол нутагт хөл тавив?
-Монголын холбогдолтой зураг үзэж байтал давхар солонго татсан зураг их сонирхол татсан. Тэндээс л анх Монголд ирэх санаа төрсөн. Тэр үе социализмын үе байсан учраас ирж чадаагүй. Түүнээс хойш нэлээд хугацааны дараа бүр тодруулбал ардчиллын хөрс Монголд бий болсон цаг үед 1996 онд анх ирж байлаа. Ирээд үнэхээр тийм сайхан солонго байдгийг нүдээр үзсэн. Тэр солонгыг үзчихээд явна аа гэж нөхөртөө хэлсэн ч “Солонго ерөөсөө гарахгүй байна” гэж худлаа хэлсээр олон жил болсон доо. Би Гачууртад монгол гэрт амьдардаг, шөнө од харах дуртай. Миний хажууд монгол хүн байшинд, харин би япон хүн мөртлөө гэрт амьдардаг. Тэгээд ч монгол гэр ЮНЕСКО-д бүртгэгдлээ. Монголын брэнд бол гэр. Дийлэнх Япончууд монголчуудыг дээл өмсөж, морь унаж, гэрт амьдардаг хэмээн боддог. Гэтэл энд ирээд өндөр барилгатай, орчин үеийн хот болохыг үзээд алмайрдаг нь нууц биш. Би Монголд 2001 оноос эхлэн амьдарч байна.
-Монголд 10 гаруй жил амьдарсан хүний хувьд манай улсын хөгжлийн талаарх таны бодол?
-Би Монгол улсыг жуулчдын хамгийн гол бүс болно гэж боддог. Манай найзууд Европоор аялж, Монголд ирээд үнэхээр сайхан унаган байгальтай юм гэж бахархдаг. Улаанбаатарыг бизнесийн нүүр царай болсон орчин үеийн хот, Хархориныг уламжлалт соёлын төв, мөн тал нутаг гэсэн гурван бүс болгон хөгжүүлэх боломжтой юм шиг санагддаг.

-Монголын хичнээн аймгаар аялав. Очиж үзээгүй нутаг бий юу. Монголчуудын талаарх сэтгэгдлээ хуваалцана уу?

-Ихэнх нутгаар явсан. Баян-Өлгий, Хөвсгөл, Өмнөговь аймагт хэд хэдэн удаа очиж үзлээ. Очиж үзээгүй хоёр гурван аймаг л бий. Монгол оюутнууд Японд очоод “Тэнгэрт нь ямар ч од алга” гэдэг. Харин тэд нутагтаа ирээд шөнийн одыг харж ямар гоё юм бэ гэж эх орноороо бахархах сэтгэл төрдөг. Тиймээс Монголчуудыг үнэт зүйлээ мэдрээсэй гэж боддог. Би эртнээс Монголын тал нутгийг ЮНЕСКО-д бүртггүүлээсэй, залуучуудыг японы техник технологиос суралцаасай гэсэн бодолтой явдаг.
-“Кон байна уу” сэтгүүл эрхлэн гаргадаг гэж сонссон. Сэтгүүлийнхээ талаар танилцуулна уу?
-Энэхүү сэтгүүлээ жуулчид их ирдэг цагаар буюу жилд нэг удаа эрхлэн гаргадаг. Нийт 1000 ширхэгийг хэвлүүлдэг. Сэтгүүлийнхээ зардлаар явуулын номын сан ажиллуулж, хөдөө орон нутгийн хүүхдэд ном түгээдэг. Явуулын номын сандаа Япон номыг Монгол хэлээр орчуулж хөдөөний хүүхдэд япон соёлыг таниулдаг.
-МОНЦАМЭ агентлагтай хэзээнээс ажил, амьдралаа холбов?
-МОНЦАМЭ агентлагт 2003 оноос ажиллаж байгаад, түр хугацаагаар завсарлаад 2011 оноос нийт долоон жил ажиллалаа. Энэ хугацаанд соёл урлагийн чиглэлээр түлхүү сурталчлан мэдээлдэг. Цаашид энгийн хүмүүсийн аж амьдралын талаарх мэдээ мэдээллийг хүргэхийн төлөө ажиллана.

Ж.Болор MONTSAME