"Miss beauty-2013" тэмцээний тэргүүн мисс /трансжендер/ Б.Солонготой ярилцсан сонирхолтой ярилцлагыг "www.miss.mn" сайт эрхэм уншигч та бүхэндээ хүргэж байна.

-Сайн уу, манай www.miss.mn Сайтын уншигчдад өөрийгөө танилцуулаач?

-www.miss.mn сайтын эрхэм уншигч та бүхэндээ энэ өдрийн мэндийг хүргэе. Намайг Б.Солонго гэдэг.

-Саяхан болж өнгөрсөн "ЛГБТ" буюу бэлгийн цөөнх хүмүүсийн миссийн тэмцээнд түрүүлсэн гэсэн ?

Залуус Эрүүл Мэнд төвөөс зохион байгуулдаг "Miss beauty-2013" тэмцээний тэргүүн миссээр шалгарсандаа маш их баяртай байна.

-Тэмцээнийхээ талаар яриач?

-"Miss beauty" тэмцээн маань "ЛГБТ" хүмүүсийн дундах хамгийн нэр хүндтэй тэмцээн юм. Жил ирэх бүр оролцох хүний тоо өсөн нэмэгдэж, өрсөлдөөн улам ширүүсч, чанаржиж байна. Шалгарч үлдсэн 9 охин Үндэсний хувцас, Үдшийн гоёл, Усны хувцас, авъяас, асуулт хариулт гээд миссийн тэмцээнд тавигддаг албан ёсны шалгууруудын дагуу гоо сайхан, авъяас, ур чадвараараа уралдлаа.

Монголын нийгэм дэх "ЛГБТ" хүмүүсийн талаарх сөрөг ойлголтуудын улмаас хаалттай газар зохион байгуулагддаг, хаанаас зохион байгуулдаг, хэдэн хүн оролцдог, зорилго, ач холбогдол нууцлаг байсан. Тэмцээний ерөнхий зохион байгуулагч, хүмүүсийн эрүүл мэнд эрх зүйн талаас тусалж дэмждэг "ЗЭМ" төв буюу "ЛГБТ", мөн биднийг дэмжиж ажилладаг маш олон байгууллагууд бий. ЛГБТ, Хамтдаа дэмжих төв зэрэг ТББ-ууд, санхүүжүүлэгч олон улсын байгууллагын тусламжтайгаар болж өнгөрдөг. Тэмцээн үзэхээр ирж буй залуусын дунд эрүүл мэндийн судалгаа хийгддэг, "Тэргүүн мисс"-ээрээ төлөөлүүлж нийгмийн ойлголтыг сайжруулах зорилго, зорилттой.

-Та бусад оролцогчдоос юугаараа давуу байсан бэ?

-Миний хувьд гадаад гоо сайхан болоод дотоод мэдрэмж, өөртөө итгэлтэй байдал, дэмжигч найз нөхөд гээд ер нь маш чадвартай хамт олноор хүрээлүүлсэн байсан болохоор маш итгэлтэй тэмцээндээ орж амжилт үзүүлсэн.

-Гадны улс оронд тэмцээнд оролцох эрхтэй болсон гэл үү?

-Уг тэмцээн маань 7 дахь жил зохион байгуулагдлаа. Энэ жилээс олон улсын миссийн тэмцээнд тухайлбал Тайланд улсад болдог "Miss world Queen" зэрэг нэр хүндтэй тэмцээнүүдэд оролцох эрх нээгдэж байгаагаараа давуу талтай байлаа. Өмнөх жилийн миссийн тэмцээнүүдэд ийм боломж хомс байсан . Миний хувьд 2014 онд эх орноо төлөөлж оролцох төлөвлөгөөтэй байна. Мэдээж олон чадварт суралцахаас гадна дэмжлэг маш чухал.

-Гей, гомо, трансжендер, манин гээд янз бүрийн нэр томьёо байдаг. Энэ бүхний ялгаа нь юу юм бол?

-Манин гэж байдаггүй. Энэ нь нэг ёсны бие эрхтэний согогтой хүнийг нэрлэдэг. Бисекс буюу аль ч хүйсийг сонирхдог хүмүүс бий. ДГБТ хүмүүсийн эрх, дан ганц Монголын нийгэмд тулгараад буй асуудал биш юм. Дэлхийн бүхий л орнуудад тулгардаг, хүн төрөлхтөний түүхэнд эрт дээр үеэс одоог хүртэл үргэлжилж буй хүний жам ёсны асуудал юм.

Монголд байгаа "ЛГБТ" хүмүүс олон жил маш тэвчээртэйгээр нийгмийнхээ байдлыг даган нуугдмал амьдарсаар ирсэн. Аливаа зүйл нууцлаг байх тусам хор хөнөөл их байдаг. Жишээ нь гэй залуучууд маань "ХДХВ"- ийн вирус авсан байлаа гэж бодоход нийгмийн ташаа ойлголтоос болж өөрийгөө нуун, эрүүл мэндийн тусламж үйлчилгээнээс хоцорч, бусдад халдвар тараах магадлалтай. Гэхдээ "ЛГБТ" хүмүүс бусад хүмүүсийг бодвол хяналт сайтай. Ер нь энгийн хүмүүс ч байнга сайн дурын зөвлөгөө шинжилгээнд хамрагдвал ямарч өвчин илрэхийг үгүйсгэхгүй. Аливаа зүйл 2 талтай байдаг шүү дээ. Монголчууд маань гадаад, дотоодод ажиллаж сурч, нийгмийн харилцаа эерэг болж байна. Үзэн ядах хүмүүс нь олон ч биднийг ойлгох хүмүүсийн тоо нэмэгдсээр байна. Эр, эм гэдэг асуудлыг биш "Чиний дотор хэн байна вэ" гэдгийг харах хүмүүс нэмэгдэж байгаа нь таатай явдал юм.

Манай улсад "ЛГБТ" хүмүүсийн эрх ашгийг хамгаалсан хуулийн заалт байдаггүй. Хууль маш хүчтэй. Дэлхийн дийлэнх орнууд "ЛГБТ" хүмүүсийн эрхийг хуулийн хүрээнд зөвшөөрсөн байдаг , манай улс олон жилийн турш хаалттай хандаж ирсэн. Өнгөрөгч зун Монголын "ЛГБТ төв" санаачилан төр засгийн түвшинд Монгол улс, "ЛГБТ" олон нийтийн эрхийг хангасан хууль батлана гэдгээ олон улсын хэмжээнд илэрхийлсэн нь нэг шат ахисан амжилт байлаа. Сүүлийн жилүүдэд гадны Донор орны санхүүжилттэй олон төсөл хэрэгжиж "ЛГБТ" хүмүүсийн эрүүл мэнд эрх зүйн байдал сайжирч байгаа гэж боддог. Уг нь олон улсын санхүүжилт биш Монгол Улс маань эдгээр иргэддээ чиглэсэн бодлого боловсруулах шаардлагатай.

-Та бүхний эрх яг юун дээр хамгийн их зөрчигддөг вэ?

Өдөр тутамд ЛГБТ гэлтгүй, нийт Монгол хүний эрх, их бага хэмжээнд зөрчигдөж байгаа. Бидний хувьд бие эрхтэнд үзүүлэх дарамтаас илүү сэтгэл зүйн дайралтад их өртдөг гэж үздэг. Ер нь зарим хүмүүс ажил мэргэжилээ, хувь хүний зан характертай хольдгоос болж төрийн байгуулагийн болон бизнесийн зарим үйлчилгээнээс хоцордог. Гэхдээ бид өөрсдөө чадамжтай байж чадвал бусдадаа нөлөөлж эерэг үр дүнг гаргах байхаа.

-Танд болон таны мэддэг "ЛГБТ" хүмүүст тохиолдож байсан хамгийн хүнд хэцүү гадуурхалт юу байсан бэ?

Хүнд сайн, муу зүйл адилхан ээлжилж ирдэг. Гэхдээ уншигчидаа хүндэтгээд зарим явцуу сэтгэхүйтэй хүмүүсийн бусармаг үйлдлийг олон нийтэд цацах нь эвгүй санагдаж байна. Ер нь бүхий л цаг хугацаанд жаргал зовлонгийн алинд ч хүн чанартай байж сэтгэлийн тэнхээтэй байх нь чухал.

-Жишээ дурдвал Төрөлхийн "ЛГБТ" хүмүүс байхад сүүлийн үед залуус сонирхож, сониучхан зангаасаа болж ийм чиг хандлагатай болоод байгаа юм шиг санагддаг. Энэ тал дээр та санал нийлэх үү?

-Үгүй. Олдмол гэж огт байдаггүй. Олдмол гэдэг нь хуулиар эрхээ хасуулсан хүмүүсийн дунд яригдах асуудал болов уу. Зарим хүмүүс гадаад өнгө үзэмж хардагтай шууд холбоотой. Жишээ нь нэг нарийхан өмд өмссөн, үсээ будсан ч юмуу, нэг тийм Солонгос стильтэй залуучууд явж байлаа гэж бодоход дийлэнх хүмүүс гомо гэж хардаг байсан цаг саяхан. Одоо Монгол эр хүн гэхээр тамхи татсан, биеэ муухай авж явдаг, ухамсаргүй байхыг хэлэхгүй болов уу. Нийгэм өдөр ирэх бүр өөрчлөгдөж, биднээс маш их чадамж, дорно дахины хүндлэл, найрсаг харилцааг хүсч байна. Бид амьтанаас ухамсраараа ялгардаг, бид дасан зохицох чадвар сайтай, хүмүүс бид аль ч талаараа өөрчилөгдөж болдог.

-Ирээдүйн амьдралаа хэрхэн төсөөлдөг вэ?

-Зарим олонд танигдсан хүмүүсийг бодоход би залуу хүн. Нийгэмд эерэг хандлагууд ажиглагдаж байна. Үүнтэй зэрэгцэж би маш олон чадварт суралцах хэрэгтэй болов уу. Урдаа тавьсан зорилго минь намайг хурцалж байдаг тул өмнөө тулгарсан бүхий л жаргал зовлонг бусадтайгаа хуваалцаж, би гэхээсээ илүү, бид маш том эерэг өөрчилөлтийг нийгэмдээ гаргана гэдэгт итгэлтэй байдаг.

-Хайр сэтгэлтэй хүнтэй л байх ?

-Тиймээ. Хүний амьдралд хайрлах, хайрлуулах эрх маш чухал орон зайг эзэлдэг. Сүүлийн үед нийгмийг цочроосон зарим хэргүүдийг хайр дутагдсантай холбоотой гэж хардаг. Маш олон жишээн дээр "ЛГБТ" хүмүүс хамтын амьдрал зохиож, аз жаргалтай амьдарсаар байгаа. Ер нь хайр гэдэг зүйл миний бодлоор хосууд харилцан нэг нэгнээ ойлгож, хүндэлж чадвал ямар ч насны, ямар ч хүмүүс хамтын амьдрал зохиож болно гэж үздэг. Хайр сэтгэлийг гомдоох тэр хайр хуурамч бол ТАЖ МАХАЛ-аас аваад дэлхий дээрх бүхий л гайхамшигууд худал болно шүү дээ. /Инээв/ Гэр бүл зохионо гэдэг зүрх сэтгэлээ сонсож, нухацтай хандах асуудал, маш том хариуцлага. Төлөвлөж байж үр хүүхэдтэй болно. Үүнээс өмнө нийгэмд дуу хоолойгоо хүргэх, хийх ажил их байна.

-Ярилцсанд баярлалаа.

Ярилцахад таатай байлаа. www.miss.mn Сайтын уншигчиддаа эрүүл энхийг хүсэе.