Архив ангилал

салбарын нээлттэй хаалганы өдөрлөг болсон юм. Энэхүү өдөрлөгт Монголын барилгын материал үйлдвэрлэгчдийн холбоо, Барилгын зураг төсөл зохиогчдын холбоо, Барилга, хот байгуулалтын яам, Төрийн орон сууцны корпораци, Барилгын хөгжлийн төв зэрэг байгууллагууд оролцсон юм. Үүнээс гадна барилгын үйл ажиллагаа явуулдаг аж ахуйн нэгжүүд ч иргэдэд үйл ажиллагаагаа тайлагнаж байлаа.

Мөн холбогдох байгууллагууд барилга, хот байгуулалтын салбарын үйл ажиллагааны талаар нээлттэй мэдээлэл өгсөн юм.

504 айлын түрээсийн орон сууц ашиглалтад орно
Энэхүү өдөрлөгт ирсэн иргэдийн сонирхлыг хамгийн их татах сэдэв нь түрээсийн орон сууц болон ипотекийн зээл байсан юм. Иргэдийг орон сууцжуулах талаар авах арга хэмжээний тухай шийдвэрийг Засгийн газрын тогтоолоор баталж, "Орон сууцны ипотекийн зээлийн ерөнхий журам"-ыг өнгөрсөн оны зургадугаар сарын 17-ны өдрөөс эхлэн хэрэгжүүлж эхэлсэн. Энэ оны тавдугаар сарын байдлаар өндөр хүүтэй зээлтэй 18 мянга гаруй иргэнийг найман хувийн хүүтэй зээлд шилжүүлж, 520 тэрбум төгрөгийн санхүүжилтийг хийжээ. Үүнээс хойш нэг жилийн хугацаанд 19 мянга гаруй иргэнд нэг их наяд 78 тэрбум төгрөгийн зээлийг олгосон тухай албаны зүгээс мэдээлсэн юм.

Харин ипотекийн зээлээр орон сууц худалдан авах боломжгүй иргэдэд зориулж 1300 айлын түрээсийн орон сууцыг барих ажил эхлүүлээд байгаа юм. Үүнээс 504 айлын орон сууц нь энэ онд ашиглалтад орох юм байна. Энэхүү орон сууц Баянзүрх дүүрэгт байрлах гэнэ. Иргэд энэ талаархи мэдээллийг сонсоод "Ахмадын орон сууц хэмээх түрээсийн орон суу-цанд орох сонирхолтой иргэд олон бий. Нийслэлийн зүгээс ч түрээсийн орон сууцыг барина гэсэн. Ялангуяа гэр бүлүүд орон сууц худалдан авах боломжгүй байдаг. Тиймээс энэ төрлийн орон
сууц олныг баривал одоогийн орон сууцны түрээс ч буурна" хэмээж байсан юм.

Барилгын салбарт ажиллах боломж залууст нээлттэй байгаа гэв
"Ажилтай орлоготой Монгол хүн" хөтөлбөрийн хүрээнд барилгын салбарынхан тодорхой байнгын ажлыг бий болгох зорилтыг дэвшүүлжээ. Энэ хүрээнд салбар хоорондын уялдааг хангах, мэргэжил, ур чадварыг дээшлүүлэх ажлыг хийх юм.

Энэ онд барилгын салбарт улсын төсвийн хөрөнгө оруулалт болон төсөл хөтөлбөрийн ажилд 12 мянга гаруй хүнийг шинээр ажилд авчээ. Мөн 30 орчим барилгын материалын үйлдвэр ашиглалтад орсон бөгөөд эдгээр газарт 30 мянга гаруй ажлын байр шинээр бий болсон байна.

Улсын төсвийн хөрөнгөөр 88 ажил хийгдэж, 665 хүн ажлын байраар хангагдсан байна. Харин дэд бүтэц, төслийн хүрээнд 17 ажил хийгдэж 1580 ажлын байр шинээр бий болжээ. Түүнчлэн улсын хэмжээнд 28 барилга ашиглалтад орж, 795 хүнийг шинэ ажлын байраар хангасан тухай холбогдох хүмүүс мэдээллээ.

Барилгын чиглэлийн үйл ажиллагаа явуулдаг компа-ниуд ажиллах хүчин хомс учраас гаднын ажилчдын авч ажиллуулдаг тухай хэлдэг. Харин албаны хүмүүсийн мэдээлснээр Мэргэжил, сургалт үйлдвэрлэлийн төв болон түр сургалтын байгууллагууд 5000 гаруй залуусыг жил бүр төгсгөдөг гэнэ. Тиймээс ажлын байраар хангагдсан залуусын төлөөлөл болох хүмүүст батламж гардуулсан юм. Мөн энэ үеэр барилгын салбарт ажиллах сонирхол, хүсэлтэй хүмүүсийг Барилга, хот байгуулалтын асарт бүртгэж байсан юм. Үүнээс гадна зарим компаниуд өөрсдийн асарт нээлттэй ажлын байрны зараа иргэдэд танилцуулж байсан. Анкет авч байгаа хүмүүсийн хэлж буйгаар ажилд орох хүсэлтэй хүмүүс хөдөлмөрийн наснаас дээгүүр хүмүүс байгаа ажээ. Түүнчлэн Мэргэжил сургалт үйлдвэрлэлийн төв болон сургалт төгссөн хүмүүс мэр-гэжлийн чиглэлээр ажиллах боломж нээлттэй байгаа тухай ч хэлсэн. Мөн тэд "Барилгын салбарт туслах ажилчнаар орж ирээд нэртэй инженер болсон хүмүүс ч бий. Аливаа зүйлийн хөгжлийн үед оролцсон хүнд илүү боломж олддог. Тиймээс залуусыг их бүтээн байгуулалтад оролцоосой гэж уриалмаар байна" гэсэн.

Энэ үеэр ажилд орохоор анкет бөглөж байсан Н.Батболдын сэтгэгдлийг сонссон юм. Тэрээр энэ жил 45 нас хүрч байгаа аж. Тэрээр "Ажилд бүртгэж байгаа тухай өдөрлөгт ирээд л мэдлээ. Нэг үеэ бодвол барилгын салбар эрчимтэй хөгжиж байна, Ажлын байр нь ч нэмэгдэж. Ямартай ч анкетаа бөглөөд өгчихлөө. Өмнө нь би хэд хэдэн удаа барилгын туслах ажил хийж байсан. Амаараа тохиролцоод л ажилд орчихож байсан болохоос албан ёсоор анкет бөглөж байгаагүй. Энд үйлчилж байгаа албан хаагчид анкет бөглөх болон бусад асуудлын талаар сайн үйлчилж байна. Яам болон бусад газруудаас хийж байгаа ажлыг сонирхлоо. Хэрэв телөвлөж байгаа ажил бүр нь амжилттай болбол нийслэл хот маань хэдхэн жилийн дараа гэр хороололгүй болох юм байна" хэмээж байсан юм.

Байрны үнийг өсгөхгүй байх үүднээс л зарах хугацааг хязгаарласан
Мөн өдөрлөгт ирсэн хүмүүс "Төрийн орон сууцны корпораци"-аас барьж байгаа "Буянт-Ухаа" хорооллын эргэн тойрон дахь асуудлыг лавлаж байлаа. Зарим хүмүүс найман хувийн ипотөкийн зээл анх удаагаа хүрэх ёстой хүндээ хүрч байгаа гэсэн бол зарим нь урьдчилгаа, сугалаа гэх мэт асуудлын талаар бухимдалтай байсан юм,
Тиймээс энэ талаар Төрийн орон сууцны корпорацийн Тэргуүн дэд захирал Д.Алтанхуягаас тодрууллаа.

-Зарим иргэд банкны зээлийн талаар бухимдалтай хандаж байна. Энэ талаар мэдээлэл өгөхгүй юү?
-Иргэд байрны үнийн 30 хувийг урьдчилан төлөед 70 хувьд нь банкнаас зээл авах ёстой. Гэтэл ипотекийн зээлийн журам болон манай журам хоорондоо зөрчилдеөд байгаа юм.

-Тодруулбал?
-15 жилийн хугацаанд тухайн байрыг зарж, борлуулж болохгүй гэсэн Засгийн газрын тогтоол байдаг. Үүнтэй холбоотой хүндрэлтэй асуудал үүсээд байгаа юм. Манай гаргасан журмын дагуу 60 хоногийн хугацаанд зээлийн асуудлаа шийдэх боломжтой. Бид банкны зээлийн асуудлаа шийдэх хугацааг бодолцож байгаа.
Мөн ипотекийн корпораци болон манайх энэ асуудлыг хэрхэн шийдэж болох вэ гэдгийг шийдэх зорилгоор ажлын хэсэг гарган ажиллаж байгаа.

-Урьдчилсан байдлаар дэвшүүлж байгаа санал бий юү?
-15 жил гэдэг аль аль талдаа хүнд юм гэдэг ойлголтод хүрээд байгаа. Хамгийн гол бид байрыг хямд өртгөөр өгч байгаа. Уг нь бид барилгын үнийн өсөлтөд өртөхгүй, хүрэх ёстой эзэндээ хүрээсэй гэдэг үүднээс л байрыг тодорхой хугацаанд зарах эрхийг нь хязгаарласан. Тэгэхгүй бол байрны үнэ буурахгүй байна.

-Буян-Ухаа-II хорооллын ажлын явц ямар байна вэ?
-Эхний ажлаа эхэллээ. Бид ирэх сараас эхлэн зураг төсөл гэх мэт ажлыг нь эхлүүлнэ. Нийтдээ 6000 гаруй орон сууц баригдах учиртай юм. Мөн Хан-Уул дүүрэгт нийслэлээс зарласан дахин төлөвлөлтийн ажилд Төрийн орон сууцны корпораци оролцохоор батламж авсан. 16 га газарт дахин төлөвлөлтийн ажлыг хэрэгжүүлэхээр ажиллаж байна.
Энэ мэтээр иргэд өөрсдийн сонирхсон асуултдаа хариулт авч байлаа. Дашрамд дурдахад барилга угсралтын ажил улирлын хамаарлаас гарах гэнэ. Тодруулбал, иргэдийг орон сууцжуулах төслийн хүрээнд Засгийн газрын тогтоолоор "Байшин үйлдвэрлэх комбинат-I төслийг батлуулж, угсармал хавтгаалжин барилгын үйлдвэр байгуулах гэрээ хийсэн. Гэрээ эхний ээлжийн санхүүжилтийг өнгөрсөн онд хийсэн юм. Харин уг үйлдвэр энэ онд ашиглалтад орох талаар эх сурвалж мэдээллээ. Ингэснээр барилга угсралтын ажил улирлын хамааралтай байхаа болих юм байна.

Г.БАЯРЦЭЦЭГ /НИЙСЛЭЛ ТАЙМС/

ХАВТГААЛЖИН БАРИЛГЫН ҮЙЛДВЭР АШИГЛАЛТАД ОРВОЛ БАРИЛГА УГСРАЛТЫН АЖИЛ УЛИРЛЫН ХАМААРЛААС ГАРНА
Tweet
Bolod.mn