Улсын дээд шүүхээс  өчигдөр “Цэвэр агаар сан”-гийн экс удирдлага Н.Хүрэлсүх, нягтлан бодогч

 М.Хулан, Д.Цэцгээ, Б.Чимэд-Эрдэнэ. Х.Болдмаа нарт холбогдох  хэргийг хянан хэлэлцээд эдлэх ялыг нь буурууллаа. Н.Хүрэлсүхэд ногдуулсан найман жилийг долоо, Д.Цэцгээд ногдуулсан долоон жилийг зургаан жил зургаан сар болгон бууруулав. Мөн  Б.Алтантуяа, Д.Гэрэл нарт холбогдох хэргийг хэрэгсэхгүй болгож, М.Хуланд ногдуулсан долоон жилийн хорих ялыг хоёр жилээр эдлэхээс хойшлуулсан байсныг  цуцалж биечлэн эдлүүлэх тогтоол гарав. Тэгвэл “Цэвэр агаар” сангийн дээрх эрхмүүд хавтаст хэрэгтээ юу ярьсан бол. Тэд бусдын буруу шийдвэрээс болж ял эдэлж байгаа юм биш. Дүгнэлтийг танд үлдээгээд хавтаст хэргийг нь дэлгэж байна. 

Хэн нь хэн бэ

Н.Хүрэлсүх энэ эрхэм Ховд аймгийн Жаргалант суманд төрсөн, эдийн засагч мэргэжилтэй. Хэрэгт холбогдох үедээ “Цэвэр агаар” сангийн гүйцэтгэх захирлын албатай байв. М.Хулангийн хувьд Төв аймгийн Баян-Өнжүүл суманд төрсөн, нягтлан бодогч мэргэжилтэй. Хэрэгт холбогдох үедээ “Цэвэр агаар” сангийн нягтлан бодогч байсан бол Д.Цэцгээ Улаанбаатар хотын унаган бүсгүй. Нягтлан бодогч мэргэжилтэй энэ бүсгүй хэрэгт холбогдох үедээ Байгаль орчин, ногоон хөгжлийн яамны Санхүү хөрөнгө оруулалтын хэлтсийн дарга ажилтай байв. Түүний хувьд мэргэжил нэгтнүүд дундаа нэр хүнд сайтай, бусдад хал буруугүй, ноён нуруутай нэгэн байсныг онцлон ярих хүн олон бий.

 Н.Хүрэлсүх нар ямар хэрэгт холбогдов

Хавтаст хэрэгт ингэж тоочжээ. Чингэлтэй дүүргийн 4-р хорооны нутаг дэвсгэрт байрлах Монгол улсын Засгийн газрын тусгай сан буюу Байгаль орчин ногоон хөгжлийн яамны харьяа “Цэвэр агаар сан”-ийн гүйцэтгэх захирлаар 2011 оны 04 дүгээр сарын 06-ны өдрөөс 2013 оны 06 дугаар сарын 27-ны өдрийг хүртэлх хугацаанд ажилласан.  2012 онд 116.000.000 төгрөгийг сургалт зохион байгуулах нэрээр “Хорчихуйн булаг “ХХК-ийн дансаар, 21.440.000 төгрөгийг ажлын хөлс нэрээр “Орхон сайхан булаг” ХХК-ийн дансаар авсан.  1.454.079.500 төгрөгийг түлш нийлүүлэх гэрээ нэрээр “Тара“ ХХК-ийн дансаар, 100.000.000 төгрөгийг зар сурталчилгаа нэрээр “ДЗТМ“ ХХК-ийн дансаар, 2011 онд 240.000.000 төгрөгийг түлш нийлүүлэх гэрээ нэрээр “Шар голын дулаан” ХХК-ийн дансаар гаргаж төсвийн хөрөнгийг зориулалтын бусаар зарцуулж, 1.931.519.500 төгрөгийн буюу онц их хэмжээний хохирлыг улсад учруулсан гэмт хэрэгт холбогджээ. Түүнээс гадна Н.Хүрэлсүх нь “Цэвэр агаар сан”-гийн хөрөнгийг захиран зарцуулах, түүнд хяналт тавих үүргээ зохих ёсоор биелүүлэлгүй албан үүрэгт ажилдаа хайнга хандаж, тус сангийн нягтлан бодогч М.Хуланд өөрийн гарын үсгийг хоосон цагаан цаасан дээр зурж үлдээснээс М.Хулан нь уг гарын үсгийг ашиглан төлбөрийн хүсэлт үйлдэж, 5 удаагийн үйлдлээр 2.726.500.000 төгрөгийг “Шар голын энерго Болд” ХХК-ийн дансанд 2011-2012 онд шилжүүлж, үүний улмаас улсад хүнд хор уршиг учруулсан гэмт хэрэгт холбогдсон гэжээ. Харин М.Хулан “Хорчихуйн булаг“, “Орхонсайхан булаг”, “Анандложистик“ компаниудын гэрээг хуурамчаар үйлдэн, гэрээ байгуулж, уг “Хорчихуйн булаг “ХХК-ийн дансаар гаргасан 116.000.000 төгрөгөөс 36.500.000 төгрөг, “Орхонсайхан булаг” ХХК-ийн дансаар гаргасан 21.440.000 төгрөгөөс 5.144.000 төгрөгийг, “Шар голын Дулаан” ХХК-ийн дансаар гаргасан 240.000.000 төгрөгөөс 86.000.000 төгрөгийг,  “Анандложистик“ ХХК-ийн дансаар гаргасан 429.760.000 төгрөгөөс 380.000.000 төгрөгийг, мөн Д.Цэцэгээ, Х.Болдмаа нартай бүлэглэж “Шар голын энерго Болд” ХХК-ийн дансаар 2011-2012 онуудад удаа дараагийн үйлдлээр 2.726.500.000 төгрөгийг гаргаж, үүнээс 771.000.000 төгрөгийг тус тус хувьдаа завшиж, улсад 1.278.644.000 төгрөгийн хохирол учруулсан гэмт хэрэгт холбогджээ.  Нягтлан бодогч Д.Цэцгээгийн хувьд албан тушаалын байдлаа урвуулан, “Цэвэр агаар” сангийн нягтлан бодогч М.Хулан болон түүний найз Х.Болдмаа нартай үгсэн тохиролцож “Шар голын энерго Болд” ХХК-ийг үүсгэн байгуулж, уг компанийн нэрээр түлш нийлүүлэх хуурамч гэрээг үйлдэн “Цэвэр агаар” сангаас уг компанийн дансаар 2.726,500,000 төгрөгийг гаргуулж , үүнээс 1.500.000.000 төгрөгийг авч хувьдаа завшсан гэмт хэрэгт холбогдсон гэжээ.  “Цэвэр агаар” сангийн нярав, “Шар голын энерго Болд” ХХК-ийн захирал үүсгэн байгуулагч Х.Болдмаа нь 2011 онд “Цэвэр агаар” сангийн нягтлан М.Хулан болон Д.Цэцгээ нартай бүлэглэж “Шар голын энерго Болд” ХХК-ийн нэрээр “Цэвэр агаар” сантай хуурамч гэрээг үйлдэн, байгуулж улмаар тус сангаас гаргасан 2.726,500,000 төгрөгөөс 30.500.000 төгрөгийг хувьдаа авч завшсан гэмт хэрэг үйлдсэн гэжээ.

 Шүүхийн хэлэлцүүлэгт хэн юу гэж мэдүүлэв

 Н.Хүрэлсүх: М.Хуланд өс хонзон санаж яваагүй юмсан

- “…Энэ хэрэгт зайлшгүй тодруулах зүйлс нилээн хэд байгаа. Агаарын бохирдол бууруулах Монгол Улсын Ерөнхийлөгчийн зарлиг гарч хууль тогтоомжид өөрчлөлт орж мөн шинэ хууль батлагдсаны дагуу “Агаарын бохирдлыг бууруулах үндэсний хороо” байгуулсан. Шаардлагатай агентлагийн дарга нараас бүрдсэн 34-35 хүний бүрэлдэхүүнтэй байгуулагдсан. Үүнээс үүдээд “Цэвэр агаарын сан” 2011 онд байгуулагдсан. Бүтэц орон тооны хувьд Ерөнхий сайд баталдаг. Энэ байгууллагыг би 2 жил буюу 772 орчим хоног удирдсан. Улаанбаатар хотын захирагч “Агаарын бохирдлыг бууруулах үндэсний хороо”-ны дэд даргаар ажилладаг. Дүүргийн дарга нар салбар хороодын даргаар ажилладаг. “Цэвэр агаарын сан”-ийн гүйцэтгэлийг үндэслэж санхүүжилтийг баталдаг. Нийт бүх дүүрэгтэй ажилладаг буюу 1 мянга гаруй ажилтантай. Түлшний ангилал салгах, түлш хүлээн авсны дараа санхүүжилт ордог. Шүүх хурал дээр би зөвхөн үнэнийг хэлнэ. Удирдах зөвлөл, Төрийн нарийн бичгийн дарга, дэд сайдаас бүрдсэн удирдах зөвлөлтэй. Удирдах зөвлөлийн дарга нар төсвийн хөрөнгийг юунд зарцуулахыг зааж өгч баталдаг. Энэ хуваарийн дагуу би санхүүжилт хийдэг. Сонгон шалгаруулалт Улаанбаатар хотод зохион байгуулагддаг. Энэ дүнг үндэслэн гэрээ байгуулж санхүүжилт хийдэг. 2011 оноос Засгийн газрын тогтоолоор энэ байгууллагыг эхнээс нь удирдаж байгууллагад хэрэгтэй бүх зүйлсийг бэлтгэсэн. Энэ ажил миний эрхэм зорилго байсан. 2011 оны 04 сард энэ ажилд томилогдсоноос хойш өөрөөсөө гадна 4 ажилтантай болсон. Нягтлан бодогч яаж авсныг яллах дүгнэлтэд зөв бичигдсэн. Засгийн газрын заавраар мэргэшсэн нягтлан бодогч ажиллуулах шаардлагатай байсан. М.Хулан мэргэшсэн нягтлан бодогч байсан тул түүнийг ажилд авсан. ...Энэ хэрэг 2011 оны 5 дугаар сарын 30-ны өдрөөс эхэлсэн. Нягтлан Хулан намайг байх үед болон байхгүй үед төлбөрийн даалгаврыг ашиглаж мөнгө шилжүүлдэг байсан. Энэ хэрэг надад хамаагүй. Хүрэлсүх захирал мэдэж байсан тул тусгайлсан данснаас мөнгө шилжүүлсэн гэж Хулан ярьсан байдаг ч тийм боломж байхгүй. “Шар голын энерго Болд” ХХК-ийн төлбөрийн даалгавар шалгуулахыг хүсэж байна. Болд гэдэг нэрийг нэмж бичсэн нь харагддаг. Манай байгууллагын нягтлан ажилд ороод 30 хонолгүйгээр эхний мөнгөнүүдийг гаргаж эхэлсэн. Цаг хугацааг нь харахад намайг томилолтоор явсан үед хийгдсэн гүйлгээнүүд байдаг. Нягтлан бодогч дарга хоёрын хооронд итгэлцэл явагддаг. Цалин, нийгмийн даатгал, татварт зориулж төлбөрийн даалгавар үлдээсэн. Томилолтоор явах үедээ 2-3 төлбөрийн даалгавар үлдээдэг байсан. Эдгээр нь хаана байгааг шалгуулахыг хүсч байна. “Шар голын энерго Болд” ХХК-ийн гэрээг хуурамчаар үйлдсэн гэдэг нь Болдмаагийн мэдүүлгээс харагдаж байгаа. Үүнийг нотлохын тулд “Хас” банкны захирлыг гэрчээр оруулах гэж өмгөөлөгч маань дуудсан боловч ирсэнгүй. Хуурамчаар гэрээ үйлдсэн гэдэг нь тодорхой болох байх. Хуурамч гарын үсэг гэдэг нь криминалистикийн дүгнэлтээр тогтоогдсон. Төлбөрийн даалгавар үлдээх үедээ төлбөрийн даалгаврын доод буланд ягаан өнгийн бэхээр тусгай тэмдэглэгээ буюу 1 2 3 гэж дугаарладаг байсан. Хулангийн хийсэн хуурамч төлбөрийн даалгаварт эдгээр тэмдэглэгээ байхгүй. “Шар голын энерго Болд” ХХК-д хийсэн шалгалт миний хувьд эргэлзээтэй. Үндэсний аудитын газар, улсын мэргэжлийн газруудаас нийт 300 орчим хоног шалгасан байдаг. Шалгалтын үр дүнд сэтгэл хангалуун биш байдаг. Төлбөрийн даалгаврыг хавтас хавтсаар авч явж шалгадаг байсан. Энэ үед засгийн эрх өөр намд шилжсэн тул намайг ажлаас чөлөөлөх тухай яригдсан. Шалгалтын дүнд ямар нэг байдлаар оролцоогүй. Шалгалтын эхэнд буюу төгсгөлд зохих этгээдүүдтэй нь 2 удаа уулзаж болж байгаа зүйл болон болохгүй байгаа зүйлийг хэлж танилцуулсан. Шалгалтын тайланг надад өгөөгүй. Тухайн үед шалгалтаар сайн байна, зөрчилгүй гэх дүгнэлт гаргаж өгсөн. Тухайн ондоо багтааж ажлын гүйцэтгэл хийгдээгүй ажил, томилолтын зардал илүү зарцуулсан, гадны байгууллагын зардал давсан байна гэж үзсэн. Үүнээс өөр мөнгөн хөрөнгөтэй холбоотой акт хүлээн авч байгаагүй. Цаг хугацааны хувьд өвлийн улиралд, он дамжиж хийгдэх ажил их байсан. “Цэвэр агаарын сан” байгуулагдаад 6 сар болсон байхад санхүүгийн тайланд дэндүү хайнга хандсан. Цаг хугацаа, хэргийн сэдэлт, санаа зорилго тодорхойлогдоно. Шалгалтын ажил дууссаны дараа 240 сая төгрөг “Шар голын Дулаан” ХХК-д шилжсэн. Энэ нь түлшний компани. “Цэвэр агаар сан” 10 компанитай гэрээ байгуулсан. Хууль ёсны дагуу гэрээ байгуулсан байгууллагад урьдчилгаа төлбөр өгдөг. Гэрээний үүргээ биелүүлээгүй байгууллагаас урьдчилгаа төлбөрийг алдангитай нь авч байсан. Шалгалт хийсний үр дүнд “Шар голын дулаан” ХХК түлшээ нийлүүлж чадаагүй тул урьдчилгаа төлбөрөө буцаан байршуулсан гэж үзэж байгаа. Энэ асуудлаар шүүх, цагдаагийн байгууллагаар шийдвэрлүүлж байсан тул урьдчилгаа төлбөр олгохоо больсон. Гэрээ байгуулдаг дарааллын хувьд аж ахуйн нэгж байгууллага эхлээд Улаанбаатар хотын захиргаагаар дараа нь “Цэвэр агаар сан”-аар гарын үсэг зурдаг. Улаанбаатар хотын захиргаа тухайн түлшийг үзэж шалгасны үндсэнд чанарыг тодорхойлж өгдөг. Нийт тэрбум төгрөгийн гэрээ байсан. Шалгалтын үетэй давхацсан тул эдгээр гэрээг хүчингүй болгосон. Түлшний нийлүүлэлт хийх боломжгүй байсан тул мэргэжлийн хяналтын дүгнэлтээр буцаан оруулсан гэж ойлгосон. Тухайн компанитай гэрээ байгуулж урьдчилгаа шилжүүлсэн ч эдгээр мөнгө буруу тийшээ явсан. Тиймээс Хулангийн гэгдэх 240 сая төгрөг хаанаас “Цэвэр агаарын сан”-д орсныг дахин шалгуулах хүсэлтэй байна. Мөрдөн байцаалтын шатанд тусгайлсан сангаас орсон гэж хэлсэн. Түлш нийлүүлэх гэрээтэй холбоотой гэж үздэг. Эрдэнэбаатар, Батсайхан, Мөнхцог нарын гарын үсэг байх ёстой боловч зөвхөн Эрдэнэбаатарын гарын үсэг байдаг. Тиймээс Эрдэнэбаатар, Хулан нарын хооронд ашиг сонирхлын зөрчилтэй гэж үзэж байгаа. Түлш хүлээн авсан гэж итгүүлэх замаар хуурамч бичиг баримт бүрдүүлж удирдлагадаа итгүүлж Хулан 2 тэрбум төгрөг авч идсэн байх. Ийм хэмжээний мөнгө авсан хүн байрны зээлээ төлөөгүй байх боломжгүй. 240 сая төгрөгийн төлбөрийн даалгавар хаанаас орж ирснийг шалгах хэрэгтэй байна. Зайлшгүй төлбөрийн өр, авлага байсан тул оны эцэст төлбөр хийгдсэн байна гэж эдийн засагч хүний хувьд бодсон. Шалгалт дууссаны дараа буюу 2012 оны 4, 5 дугаар сард “Хорчихуйн булаг“ ХХК болон “Орхонсайхан булаг” ХХК-ийн данс руу мөнгө орсон байдаг. Эдгээр байгууллагаар дамжуулан мөнгө гаргаж авсан гэх үйлдлийг  хүлээн зөвшөөрөх боломжгүй. Ямар байдлаар энэ дүнг гаргасныг мэдэхгүй. Чимэд-Эрдэнэ  энэ хэрэгт ямар ч хамаагүй. Хавтаст хэрэгт авагдсан баримтыг үзэхэд гэрээг Хулан хуурамчаар хийсэн байдаг. Үүнд миний гарын үсэг байхгүй. Төлбөрийн даалгавруудыг ихэвчлэн 10 цагт хийсэн байдаг. Хуланд гэрээ байгуулах эрх байхгүй. “Хорчихуйн булаг“ ХХК болон “Орхонсайхан булаг” ХХК нь Хулангийн ах, дүү нарын компани байсныг хавтаст хэрэгтэй танилцах үед мэдсэн.

Хулантай өс хонзон байхгүй мөн түүнийг дарамталсан зүйлгүй. Түүнийг ийм үйлдэл хийсэнд харамсч байна. Намайг гүтгэхэд миний улс төрийн карьер хаагдсан. Үүнд гомдолтой байна. Түүний ах, дүү нарын эзэмшлийн 7-8 жип машин, 92 ширхэг брэндийн гутал, 300 сая төгрөгийн ээмэг, бөгж, барьж байгаа гар утасны хамгийн доод үнэ нь 15-45 сая төгрөг байдаг мөн түүний эдэлж хэрэглэж байгаа зүйлс нь 1 тэрбум 500 сая төгрөг болох байх. Намайг албан тушаалдаа хайнга хандсан гэдэгт тодорхой зүйл сонсох байх. Зайлшгүй гарын үсэг зурахаас өөр аргагүй байдалд хүргэж намайг татан оруулсан. Намайг байсан ч байгаагүй ч намайг ашигладаг байсан. Нийт 600 орчим хоног Хулан жүжигчилсэн тоглолтондоо худал мэдүүлэг өгсөн. Яавал МИАТ-ын хэргийн хүмүүст хувааж ногдуулах вэ гэх аргыг Хулан судалсан гэж бисонсож байсан.” гэв.

М.Хулан: Н.Хүрэлсүх намайг гүтгэж байна

- “…Хийсэн хэрэгтээ чин санаанаасаа гэмшиж байна. Хүрэлсүхийн мэдүүлгийг нотлох баримтаар няцаана. Цэцэгээ, Чимэд-Эрдэнэ, Хүрэлсүх нарыг гүтгээгүй. Шинжээчийн дүгнэлтээр миний мэдүүлэг батлагдсан гэж үзэж байна. “Хорчихуйн булаг“ ХХК, “Орхонсайхан булаг” ХХК, “Анандложистик“, “Шар голын дулаан” ХХК, “Шар голын энерго Болд” ХХК, “Тара“ ХХК, “ДЗТМ“ ХХК-ний нийт 11 гэрээ, 30 төлбөрийн даалгавар, 29 нэхэмжлэлд нийт 70 гарын үсэг, тамганы хаагуур нь Хүрэлсүх өнгөрсөн бэ?. Сангийн яамнаас “Цэвэр агаар” сангийн төлбөрийн хуулгыг интернэтээр харах хүсэлт явуулсны үндсэнд нууц дугаартай факс ирсэн. Үүнийг Хүрэлсүх өөрөө хувилж өгсөн. Ингэснээр “Цэвэр агаар” сангийн орлого, зарлага хянах эрхтэй болж эдгээр орлогын хуулбарууд Хүрэлсүхийн өрөөнөөс хураагдсан. “Шар голын энерго Болд” ХХК-ийн дансанд шилжсэн мөнгөний баримтын гарын үсгийг шинжлүүлмээр байна гэхэд энэ баримт Хүрэлсүхийн өрөөнөөс хураагдсан. Хулан бичигдсэн төлбөрийн даалгаварт нэг орон тоо нэмж бичсэн байсан гэх Хүрэлсүхийн мэдүүлгийг үгүйсгэж байна. Төлбөрийн даалгаварт мөнгөн дүнг үсгээр бичдэг. “Хорчихуйн булаг“ ХХК, “Орхонсайхан булаг” ХХК-тай гэрээ хийж мөнгө шилжүүлсэн. Энэ гэрээний маягтыг манай байгууллагын гэрээний загвар биш гэж Хүрэлсүх хэлсэн. “Пума империал“ ХХК-тай зар сурталчилгааны гэрээ хийсэн гэрээний загвараар эдгээр гэрээнүүдийг хийсэн. Аудитын шалгалтын өмнө “хоолны мөнгө гэж их мөнгө гаргаж болохгүй байна. Тиймээс зар сурталчилгааны зардал болгоод гаргуулчих” гэж байсан. Чимэд-Эрдэний өгсөн гэрээний загварын дагуу хийж байсан. Чимэд-Эрдэнэ, хуульч Соёлмаа, Хулан бид дөрөв “Хорчихуйн булаг“ ХХК-ийн дансанд шилжүүлсэн мөнгөөр Сингапур улсад 2 хоног амарсан. Энэ нь мөрдөн байцаалтын шатанд тогтоогдсон. Ард иргэдээс авсан нүүрсний татаасны мөнгө дутсан тул намайг тооллогод явуулсан. Дансны аргаар “Хорчихуйн булаг“ ХХК руу 50.000.000 төгрөг шилжүүл гэж хэлээд Хүрэлсүх 30.000.000 төгрөгийг нь авсан би 15.000.000 төгрөгийг нь авсан. Намайг ганцаараа бүгдийг хийсэн гэх мэдүүлгийг үгүйсгэж байна. “Шар голын энерго Болд” компанийн дансанд 465.500.000 төгрөг шилжүүлээд буцааж “Цэвэр агаар” сангийн дансанд авсныг Хүрэлсүх өөрөө мэдэж байсан. Би өөрийн гарын үсэгтэй хуулгыг түүнд оруулж өгсөн. “Сонгууль болж байна мөнгө хийнэ” гэж хэлж байсан. Санхүүжилт олгоход эхлээд захиалагч дараа нь нийлүүлэгч, санхүүжүүлэгч байгууллага, Нийслэлийн засаг даргын тамгын газар гарын үсэг зурж тамга дардаг боловч байгуулсан гэрээнд захиалагч болон Нийслэлийн засаг даргын тамгын газар гарын үсэг зураагүй. Тиймээс хүчин төгөлдөр бус гэрээнд тамга дарсан нь харагдаж байгаа. Гэрээ хүчин төгөлдөр болсны дараа баталгааждаг. Гэрээ хүчин төгөлдөр болоогүй байхад урьдчилгаа төлбөрийн баталгаа болгож 100.000.000 төгрөг шилжүүлсэн. Засаг дарга батлаагүй байхад Хүрэлсүх баталсан. Хэнээр ч хамаагүй гарын үсэг зуруулдаг байсан. Хоосон тамга ч дардаг байсан. Намайг худлаа гүтгэж байна.

Д.Цэцгээ: Дэндүү нэг талыг барьж байна

-Албан тушаалаа урвуулан ашиглах боломж надад байгаагүй. Яагаад гэвэл угаасаа Засгийн газрын тусгай сангийн тухай хуульд сан нь өөрөө удирдах зөвлөлтэй, удирдах зөвлөл нь сангаа удирддаг. Удирдах зөвлөлд би ордоггүй. Удирдах зөвлөлөөс гаргаж байгаа шийдвэрт бас нөлөөлдөггүй. Дараагийн үйлдэл бол намайг компани байгуулсан гээд байгаа юм. Би “Шар голын энерго болд” ХХК гэж байдгийг огт мэдэхгүй. Байгуулсан хүн нь Болдмаа, түүний өөрийнх нь мэдүүлгээр нотлогдоно. Хавтаст хэрэгт байгаа нотлох баримтуудаар хангалттай нотлогдох байх. Дараагийн нэг заалт нь хуурамч гэрээ байгуулсан гэсэн. Хуурамч гэрээ байгуулсныг би огт мэдэхгүй. Гэрээнд гарын үсэг зураад тамга дарсан гэсэн. Гэрээний талаар болон компани байгуулсныг би мэдэхгүй. 2.726.500.000 төгрөгийг гаргуулсан гэсэн байна. Надад шийдвэр гаргах ямар ч эрх зүйн үндэс байхгүй. Сангийн яам нь төрийн сан руу гүйлгээ хийхдээ тушаал, шийдвэр зэрэг бүх юмыг нь хянаж гүйлгээ хийдэг. Гүйлгээ хийхэд миний оролцоо гэж ерөөсөө байхгүй. Энэ нь төрийн сангийн гүйлгээ хийсэн мэргэжилтэн А.Саранзаяагийн мэдүүлгээр нотлогдоно. 1.500.000.000 төгрөгийг хувьдаа завшсан гэсэн. Би 1.500.000.000 төгрөгийг хувьдаа завшсан зүйл огт гаргаагүй. Хулан, Болдмаа хоёр яагаад өөрсдийнхөө хийсэн хэргийг намайг хийсэн мэтээр мэдүүлэг өгч гүтгэж байгааг би ойлгохгүй байна. Хавтаст хэрэгтэй танилцаж байхад Хулангийн мэдүүлэг хоорондоо их зөрүүтэй байдаг. Намайг 850.000.000 төгрөгийг шалгалтыг аргалах гэж авчирч өгсөн гэдэг. Би тэр их мөнгийг яаж Хулангаас авсан байх уу. Хулан намайг мөнгө аваад ир гэхээр авчраад өгөх ямар үндэслэл байдаг юм бэ. 2014 оны санхүүгийн тайланд улсын аудитын газраас Даваажаргал, мэргэжлийн хяналтын газраас Алтантуяа, Гэрэл нар шалгалт хийсэн. 850.000.000 төгрөгийг шалгалтыг аргалах гээд өгсөн эсэхийг үнэнээр нь хэлээд өгнө. Би Хуланг 1995 оноос хойш танина. Би нефть концернд ажилладаг байсан. Тэгэхэд Хулан Багахангай, Дарханы салбарт ажиллаж байсан. Ер нь бол Хулан хүнд тусархуу сайн эмэгтэй гэж тухайн үедээ дүгнэж байсан. Ах, дүү нараараа баян чинээлэг, баян компанитай, алтны уурхайтай, нөхөр нь алтны уурхайтай, эгч нар нь дэлгүүр ажиллуулдаг ер нь л баян чинээлэг, мөнгөнд умбасан тийм л амьдралтай байсан. Миний амьдралыг Хулан маш сайн мэддэг байсан. Дүү нарын маань амьдралыг бас мэддэг байсан. Би удирдах ажлыг 16 жил хийсэн. Нэг удаа ч буруу зүйл хийж зөрчил гаргаж байгаагүй. Дэндүү нэг талыг баримталсан мэдүүлгээр яллаж болохгүй” гэв. Энэ хэрэгт нийтдээ 11 хүн холбогдож их, бага хэмжээгээр шийтгэл сонсоод байгаа юм.