2013 оны сүүлчээр эхэлсэн Украины үл ойлголцол, зөрчил энэ онд ч үргэлжилсээр улам хурцдаж, Украины зүүн мужуудад Оростой нэгдэхийг хүссэн салан тусгааралагчид, армийнхны хооронд мөргөлдөөн эхэлсэн юм.

Донецк, Луганск мужууд тусгаар улс хэмээн өөрсдийгөө зарлан тунхаглаад удирдагчаа хүртэл сонгож амжсан билээ. Зүүн Украинд өрнөж байгаа үйл явдлаас дүрвэсэн 900 мянга гаруй иргэн ОХУ-д, тэр дундаа Ростов хотод голдуу амьдарч байгаа юм. ОХУ-ын засаг захиргаа тэдэнд зориулан хоргодох байр, түр орогнох газар барьж, хоол хүнсээр хангаж буй. Дүрвэгч иргэдийн хүүхдүүдийг сурч боловсроход нь ч анхаарах болно гэдгээ Оросын Ерөнхий сайд Дмитрий Медведев мэдэгдсэн билээ.

Харин Украины Засгийн газар, босогчдын хооронд хийсэн гал зогсоох гэрээ төдийлөн хэрэгжихгүй байгаа юм.

Украин улсад өрнөж байгаа мөргөлдөөнийг санхүүжүүлж, дэмжиж байгаа хэмээн дэлхийн олон улс ОХУ-ыг буруутгаж буй. Түүнчлэн Украины харьяанд байсан Крымийн хойг өнгөрсөн гуравдугаар сард ОХУ-д нэгдсэн явдал АНУ, Европын холбоо тэргүүтэй олон орны эсэргүүцэлтэй тулгарч, тус гүрнүүд Оросын эсрэг эдийн засгийн болон бусад хоригуудыг тавьсан юм. Эдгээр хоригийн эсрэг ОХУ-ын зүгээс АНУ, Европын холбооны эсрэг аж үйлдвэрийн хориг тавьснаар тус улсууд нэлээдгүй алдагдал амссан гэх.

Хориг тавиулж, “Их-8” орноос хасагдсан ОХУ эдийн засгийн хямралд ороод байгаа ч үүнийг даван туулах хангалттай хүч чадал, нөөц бий гэж Ерөнхийлөгч Владимир Путин онцолсон юм.

“Гадуурхагдсан Сочи” ганган болов

Энэ оны хоёрдугаар сард ОХУ-ын Сочи хотноо болсон өвлийн олимпийн 22 дугаар наадам эхлэхийн өмнө зэвсэгт бүлэглэлүүд “Сочи-2014”-ийг бойкотлоно, тус хотод халдлага үйлдэнэ гэж мэдэгдэн мөн дэлхийн зарим гүрэн Сочи хотыг олимпийн хотоор сонгосныг эсэргүүцэх зэргээр нэлээдгүй “гадуурхаж” байв. Гэсэн ч Орос улс өвлийн олимпийг амжилттай зохион байгуулсан. Спортын наадмын үеэр халдлага, үймээнээс гайхалтай сэргийлж, “Сочи-2014”-ийн зохион байгуулалт, нээлт, хаалтын үйл ажиллагаа олон улсын сэтгэлд нийцсэн нь Оросын Ерөнхийлөгч Путин ямар удирдагч болохоо дэлхий нийтэд харуулж чадсан гэж олон улсын ажиглагч, шүүмжлэгчид дүгнэсэн юм.

300 гаруй хүний амь насыг авч одсон “Севол”

Өнгөрсөн дөрөвдүгээр сарын 16-нд Чежү арлыг зорин явсан БНСУ-ын “Севол” хөлөг онгоц осолдон живж, 300 гаруй хүний амь насыг авч одсон юм. Энэхүү хөлөгт ахлах сургуулийн сурагчид, багш нар явсан билээ. Харамсалтайгаар амиа алдсан 300 гаруй сурагчийн ар гэрийнхэн хөлгийн ахмад болон багийн гишүүдэд ял оноохыг шаардаж жагсаал хийсэн юм.

“Севол”-ын ослын шалтгаан нь даацыг нь хэтрүүлсэн явдал хэмээн шинжээчид үзсэн. Энэхүү хэрэгт буруутай, хөлгөө орхин зугтсан ахмадад болон багийн буруутай гэх гишүүдэд 36 жилийн хорих ял оноосон юм.

Том гарз амссан Малайзын нисэхийн салбар

Малайзын иргэний нисэхийн салбар өнгөрч буй онд томоохон хохирлыг хоёр удаа амссан. Өнгөрсөн дөрөвдүгээр сард тус улсын нийслэл Куала-Лумпураас Бээжинг зорин хөөрсөн “Боинг-777-200R” онгоц учир битүүлгээр сураггүй болж, Энэтхэгийн далайд сүйрсэн гэх дүгнэлтийг олон улсын хамтарсан шинжилгээний баг хийж буй. Тус онгоцонд 239 зорчигч явсан юм.

Дээрх хэргийн ул мөр илрээгүй байхад өнгөрсөн долоодугаар сарын 17-нд Нидерландын нийслэл Амстердамаас Куала-Лумпурыг зорин хөөрсөн 298 зорчигчтой “Боинг-777” онгоц Украины зүүн хэсэгт унаж, сүйрсэн нь Малайзын агаарын тээврийн хувьд хоёр дахь том хохирол байв. Тус онгоцыг сөнөөсөн хэрэгт Орос, Украиныг буруутгаж байгаа юм. 298 зорчигч бүгд амиа алдсан энэхүү эмгэнэлтэй хэргийг Нидерландаар ахлуулсан олон улсын шинжилгээний баг мөрдөж буй. “Боинг”-ийг пуужингаар сөнөөсөн гэсэн дүгнэлтэд хүрээд байгаа билээ.

Хэт даврагчдын эсрэг дайн

Иракийн хэт даврагч “Халифын вант улс” бүлэглэлийн үйл ажиллагаа хэрээс хэтэрч олон улсыг түгшээсэн жил байлаа. Тус бүлэглэл Ирак, Сирийн нэлээд хэсэгт хяналтаа тогтоож, тусгаар улс байгуулахыг эрмэлзэн өөрсдийн гэсэн мөнгөн тэмдэгттэй хүртэл болоод байгаа билээ. Хотуудыг дайран эзэлж, халдлага үйлдэн олон мянган хүний амийг хөнөөсөн дээрх бүлэглэлтэй АНУ тэргүүтэй олон улсын эвсэл тэмцэж буй. Гэвч “Халифын вант улс” бууж өгөлгүй, гишүүд нь ч олшрон өөрсдийнх нь эсрэг явуулж байгаа цэргийн ажиллагааг зогсоохыг шаардан олзонд байсан АНУ, Их Британи, Францын сэтгүүлчдээс цаазалсан юм.

“Шүхэрт хувьсгал”

Хонгконгийн оюутан залуус өнгөрсөн есдүгээр сарын сүүлчээр захирагчаа өөрсдөө сонгох эрхийг олгохыг Бээжингээс шаардан жагсаж эхэлсэн юм. Ардчиллын төлөөх энэхүү тэмцэл өргөжсөөр “Шүхэрт хувьсгал” хэмээх давалгаа өрнөсөн. Гэвч Хятадын захиргаан дор байдаг тус улсын захирагчийг Бээжингээс томилно гэсэн байр суурь дээрээ Хятадын удирдлагууд хатуу зогссон юм. Оюутнуудын тэмцэл олон сар өрнөсний эцэст энэ сарын эхээр тэднийг хүчээр шахуу тарааж, Хонгконгийн гудамж талбайг чөлөөлсөн билээ. Гэвч залуус ардчиллын төлөөх тэмцэлдээ тууштай байж, эргэж ирнэ гэдгээ мэдэгдсэн юм.

Дэлхийг түгшээсэн Эбола

Африкийн орнуудад анхлан дэгдсэн Эбола хэмээх үхлийн аюулт вирус дэлхийг түгшээсээр байна. Энэхүү вирусийг бүрэн төгс эмчлэх вакциныг хараахан гаргаж аваагүй байгаа юм. Эболагаар амиа алдсан хүний тоо 7000 тун дөхсөн бол халдварласан хүний тоо 9000 давсан юм. Энэхүү вирус эрчимтэй дэгдсэн үеэ бодвол одоогоор харьцангуй буурч байгаа талаар ДЭМБ-аас мэдээлсэн билээ.

АНУ даяар жагсаал хийлгэсэн Фергюсоны явдал

АНУ-ын Миссури мужийн “Фергюсон” хотод өнгөрсөн долоодугаар сард цагдаагийн ажилтан Даррен Уилсоны гарт амиа алдсан өнгөт арьст хүүгийн хэрэг Америк төдийгүй дэлхий даяар эсэргүүцлийн давалгаа өрнүүлсэн юм. Өнгөт арьст хүүг буудсан цагдаагийн ажилтныг гэм буруугүй гэж үзсэн шүүхийн шийдвэрийг олон мянган иргэн эсэргүүцэж, Фергюсон хотод онц байдал зарлахад хүргэн Нью-Йоркийн Брүүклиний гүүрийг хааж, АНУ төдийгүй олон улсад эсэргүүцлийн жагсаал өрнөсөн билээ. Дээрх хэрэг намжаагүй байхад Нью-Йорк хотод мөн үүнтэй адил хэрэг гарч, иргэдийн дургүйцлийг дээд цэгт нь хүргэсэн юм. Америкчууд өнгөт арьст иргэнийг баривчлах үедээ хүч хэрэглэж, аминд нь хүрсэн цагдааг бүх насаар нь хорихыг шаардаж буй.

Орчуулсан О.Чанцалдулам BOLOD.MN