Гэхдээ дэлхийн II дайнаас ялгаатай нь улс төрийн учир шалтгаанаар эхэлсэнгүй, шууд эдийн засгийн шалтгаанаар дэгджээ. Маш харамсалтай нь турк улс эдийн засгийн дайнд нэрвэгдэж буй бүс нутгийн халуун голомтод оршдог. Туркт эдийн засгийн дарамт шахалт үзүүлж буй улс орнууд байна. Туркийг ОУВС-гаас бүрэн хамааралтай болгохыг тэд хүсчээ гэв.

Tүpэг нөхрийн яриа ч яахав. Их сүржнээр III дайн эхэлчихлээ гэснээс нь эшлээд нийтлэлийнхээ толгойд нь орууллаа.

Одоо Владимир Путинээс эшлэе. Хэрэв тийм дайн дэгдэх юм бол хүн төрөлхтний иргэншлийн төгсгөлд хүргэж магадгүй хэмээн мэдэгдэж байхыг бид сонссон. “Прямая Линия С Владимиром Путиным” гэх нэвтрүүлэгт ярилцаад сууж байсан даа. Альберт Эйнштейнээс тэрбээр эшлэж харагдсан: - Дэлхийн III дайныг ямар хэрэгслээр хийхийг би мэдэхгүй, харин IV дайнаа чулуу, модоор хийх байх даа!

Өнөөгийн иргэншлийн төгсгөл болно, тэгж л ойлгогдож байна. Тийм учраас олон улсын тавцанд эцсийн онцгой, аюултай үйлдэл дээрээ биеэ барьцгаах хэрэгтэй хэмээн оросын төрийн тэргүүн хэлж байв.

Залгуулаад үндсэн сэдвээ Константин Сивковоос эшлэж эвлүүлье. орос хэл дээрх “3mv. ru” гэх нэг сайт байна. “Дэлхийн III дайн: Цэрэг-улс төрийн тойм” гэх булан ажиллуулдаг. Хоёр жилийн тэртээ (2016.10.12) “хэрэв маргааш дайн дэгдвэл” гэх аналитик өгүүлэл тавигдаж байжээ. Түгээмэл сайтыг нь би нэрлэлээ. Түгээмэл боловч хувь хүний блог гэдгээр “zavtra.ru/ blogs/authors” гэдэг рүү ороод үзвэл оросын нэртэй эрдэмтэн футурлогч К.В.Сивков гараад ирнэ. Бичсэн автор нь тодорхой, орос руу халдах зохиомж хэмээн дэд гарчиг өгснийг бодохул тэрбээр үзмэрч-эрдэмтэн болох нь гарцаагүй.

Би Сивковыг уншдаг, эшлэдэг. Орос-Америкийн зэвсэг-зэвсэглэлийн харьцааг “Засгийн газрын мэдээ”, МҮОНТВ-ийн нэвтрүүлэгтээ би эшлэж байсан. Тэрбээр 1954 онд төрсөн, тэнгисийн цэргийн мэргэжилтэй, 1995-2007 онд Жанжин штабт ажиллахдаа цэргийн байгуулалтын асуудлаар цэргийн номлол боловсруулахад оролцсон, тэнгисийн цэргийн хурандаа (нэгдүгээр зэргийн ахмад), геополитикийн судалгааны академийг үндэслэгч, цэргийн нэртэй шинжээч, оросын пуужинт ба артиллерын шинжлэх ухааны академийн сурвалжлагч гишүүн, “Военно-Промышленный Курьер” сонины цэргийн тоймч, телевиз, радиогийн хөтлөгч гэхчлэн намтрын лут шигтгээ байна. Харин одоо III дайны орос руу хандуулсан зохиомжоос нь “ба”, “бэ”-гүй хөрвүүлье. Дараа нь тайлбараа дагалдуулъя.

Орос руу халдах нь амиа хорлохтой адил. Учир нь орост цөмийн потенциал байна. Тэгэхээр орост халдаж бүрмөсөн бутцохихын тулд орост хаос дэгдээхээс эхэлнэ. Өөрөөр хэлбэл, төрийн удирдлагыг нь нураана, цэргийн удирдлагын систем, цөмийн хүчний удирдлагын системийг устгана. Тэгж байж л цэргээр халдана хэмээн бүтээлийнхээ толгойд тусгайлан бичжээ.

Ямар үе шатаар явагдах вэ гэвэл, эхнийх нь орост яг одоо явагдаж байгаа аж. Энэ бол сонгодог гибрид дайн. Тавдугаар цуваа болон томхон бизнесүүдээс харж болно. Тавдугаар цуваа бол тэр чигтээ америкийн талыг баримтлагч хүчнүүд. Тэд орост элит болоод сандайлчихсан, хамаг хөрөнгө, өмч, нуган үрс, хүргэнүүд нь Европ, АНУ-д буй. Тэд Засгийн газарт эдийн засгийн блок байгуулсан, өрнөдийн талыг баримтлагч хэвлэл мэдээлэлтэй. Либерал үзэлтэй гудамжны сөрөг хүчин ажиллана. Либералчууд бол улс орноо нураагаад, америкчуудад захирагдах хүсэлтэй нийгмийн тэр хэсэг.

Энэ схемээр бол гол зэвсэг нь эдийн засгийн арга хэрэгсэл болно. Ямар ч үнээр болов амьдралын түвшинг доод шатанд бариад байх хэрэгтэй. Эдийн засагт илт тэнэг тэнэг шийдвэр гаргуулна. Жишээ нь москвагийн эрх баригчдын үйл ажиллагаа үүний сонгодог жишээ. Москвагийн үлэмж хэсгийг хамраад байсан жижиг бизнесийг хэргээр нураасан.

Энэ схемээр цааш явбал оросын мөнгийг гадагш нь зөөвөрлөж, түүнийгээ их гоё тайлбарлана. Орос рублиэ доллараар орлуулахгүй, орост доллар өсөхийг зөвшөөрөхгүй, долларыг зах зээлээс шахая гэсэн уриатай. Доллараар хийгддэг бараа үйлчилгээнд янз бүрийн шинэ татвар тавина. Өргөн хэмжээнд хувьчлал явуулах нь хамгийн чухал ажиллагаа юм. Үр дүнд нь үй түмэн хүн гудамжинд гарна.

Тэгвэл Орос руу халдах гадаад улс төрийн үйл ажиллагаа юу байх вэ? гадаадын халдан түрэмгийлэгчид хэрэглэж болох хувилбар юу байх вэ? Орос, америкийн хоорондын мөргөлдөөн шууд цөмийн зэвсгээр эхэлчихгүй, дайн өрнөж буй аль нэг гуравдагч улсын нутаг дэвсгэрт шууд мөргөлдөнө хэмээн америкийн командлал үздэг юм билээ. Энэ мөргөлдөөнд хоёулаа харилцан ялна гэсэн итгэлтэй байвал мөргөлдөөн өрнөнө. Энэ хаана байж болох вэ? өөрөөр хэлбэл, дэлхийн III дайн эхлэх цэг? Эхний хувилбар Сири. одоогоор мөргөлдлөө гэе, орос нөгөөхөө бутцохих нь бодитой харагдаж байна. Хэрэв америкчууд 10 дахин их хүч хуралдуулаад дайтвал тэд ялна. Оросоос алслагдсан энэхүү дайны театрт бид араасаа хангалт хийнэ гэдэгт л гол асуудал байна.

Сирийн дайны онцлог юу вэ? маш харгис явагдаж байна. Орос урагшилсан нь шалихгүй. Орост өөрт нь зэвсэг, галт хэрэгсэл хангалттай байна. Гэвч маш үрэлгэн хэрэглэж байна. Харин байнга нөхөн хангалт хийлгээд байх нь асуудалтай. Орост тэр бүхнийгээ тасралтгүй үйлдвэрлээд байх нь хангалтгүй. Энд л маш ноцтой бэрхшээл учирна. Америкчуудыг алгуурлаж байх хойгуур алеппог оросын туслалцаатайгаар эргүүлж авахаар Сирийн Засгийн газар шийдээд байлдахад л тэнд 2-3 сарыг зарцуулжээ.

Орос, Америк хоёр халз тулгарч тулалдаагүй нөхцөлд ийм их хугацаа зарцуулсан байгаа юм. Гэтэл америк бол өөрөөр хөдлөх байсан байх. Зохиомж нь ч бэлэн. 2-3 нисэх онгоц тээгчээ ойртуулж авчраад туркийн нутаг дэвсгэрээс нисэх жигүүр хөдөлгөөд байлдуулж болно. Хэрэв ийм алхам хийвэл Сири дэх оросын цэргийн хүчнээс 10 дахин хүчтэй болчихож байна. Орос өөрийн цэргийн баазаа С-300, С-400 пуужин бүхий зенитийн пуужингийн дивизионоор мануулж байна. Америк тийшээ 200-300 далавчит “томагавк” пуужин харвачихна. Орос хариуд нь төдий тооны С-300, С-400 гаргаад амдан сөнөөгөөд байж чадах уу? Бүрэн сөнөнө гэсэн үг. Америк дараа нь яах вэ? агаарын цэргийн сонгодог байлдаанаа хийчихнэ. Ердөө гурван өдөр л агаараас хүч хуралдуулсан ончтой цохилтоо 5-6 удаа пуужин бөмбөгөөр хийнэ. Оросын ба Сирийн цэргийн авиацаас юу үлдэх вэ? Сирийнх бол бүр юу ч үлдэхгүй болтлоо бөмбөгдүүлнэ.

Орос, Америкийн хоорондын мөргөлдөөн шууд цөмийн зэвсгээр эхэлчихгүй

Сирийг орхиод орос руу халдах өөр хувилбарыг ойроосоо хайя. Приднестровьед цэргийн мөргөлдөөн өрнөлөө гэхэд өрнөдийнхөн ялахаа тун түвэггүй төсөөлчихөөд байгаа. Ердөө гар сунгахад л цаахна нь НАТО-гийн гишүүн румын байж байна. Румын, Болгарын флотоор хар тэнгисээс хашиж байгаад молдаваар днестр мөрнийг гатлуулахад л тун эвгүй үр дүн гарна. Калининград муж руу төсөөлөөд үз. Энэ муж газар зүйн хувьд оросоосоо тусдаа хашигдсан. Бүслэгдсэн гэсэн үг. “Эх газраас” нь харилцаа холбоог нь тасалчихад тун түвэггүй.

Оросын тэнгисийн ба агаарын хөлгүүдийн хөдөлгөөнийг хаалгачих элдэв хувилбараа тэд аль хэдийнэ боловсруулчихсан. Курилийн арлуудын районд мөргөлдөөн дэгдлээ гэж төсөөл дөө. Тийм хувилбар өрнөдийнхөнд байж л таарна. Оросын хувьд хамгийн аюултайгаар татагдан орж мэдэх маш ноцтой, хүнд бэрх, өргөн хэмжээний дайн төв азийн стратегийн чиглэлд өрнөх бүрэн магадлалтай. Орос ийшээ олон жил татагдаж байна. Тэнд америкчууд лалын улсынхныг эмхлэн байгуулаад оросын холбоотон улсуудын эсрэг хаявал яах вэ? тэр нь шууд орос руу чиглэлээ гэсэн үг.

Дараагийн талбар байна. Тэр бол умард Кавказ. Тэнд дотоодын ээлжит зэвсэгт мөргөлдөөн дахин дэгдэж болзошгүй. Тэртэй тэргүй тэнд нөхцөл байдал түвэгтэй байгаа. Энэ үзмэрээр бол тэнд бүс нутгийн дайны солонго аль хэдийнэ татаад байна.

Энэ бүх сценар хэрэгжлээ гэж үзье. Эрх баригчид байдгаа бараад нэр хүндээ унагаад дуусна. Одоо ч орост эрх баригчдын нэр хүнд сайнгүй байгаа. Эдийн засгийн элдэв бэрхшээлийг ард түмэндээ учруулаад, өөрсдөө ард түмнээ шулж сайн сайхан явж байна гэх сэтгэгдэл орост түгээмэл байдаг. Хэрэв байдал бүр дордоод байх ахул хувьсгал дэгдэж таарна. Тэр нь “майдан”-ы загвар байх болов уу. Эсвэл өөр нэг загвар ч байж болно. хаос дэгдэнэ. Оросын нутаг дэвсгэр рүү АНУ тусгай ажиллагааны хүчнээ хаяна. “Зах зээлийн орос сөрөг хүчин” гэгчидтэй нийлэн тэд оросын зэвсэгт хүчний Жанжин штабын байрыг эзлэн авахыг оролдох болно. Бусад чухал байрлалууд, цөмийн зэвсгийн удирдлагын төв зэргийг авахыг хичээнэ.

Ингэхэд л оросын батлан хамгаалах хүчний удирдлага бүрэн самуурна. НҮБ-ыг ашиглана. Орос дахь цөмийн зэвсэг террористуудын гарт ороход тун ойртсон байна, террористууд чөлөөтэй холхиж явна гэдэг яриа НҮБ-аас гаргана. Тэгж тэгж НАТО-д хүмүүнлэгийн ажиллагаа явуулах мандат олгуулчихна. Орост НАТО-гийн хүчин ороод ирнэ, ноцтой эсэргүүцэл тулгарахгүй. Энд тэнд салангид байдлаар эсэргүүцэж болно, зохион байгуулалттай хамгаалах дайн хийгдэхгүй. Ингээд оросын нутаг дэвсгэрт НАТО-гийн хуягт танкийн механикжсан ангиуд орж ирээд оросыг захаас нь эзэлж эхэлнэ. Ийм нөхцөлд бид (оросууд) ямар арга хэмжээ авч, энэ аюулын эсрэг ямар хариу барих вэ? Сирид нөхцөл байдал маш энгийн. Дайныг гэтлэн сэрэмжлэх талаар америкчуудтай дипломат арга хэмжээ авах хэрэгтэй.

Хэрэв дипломатын арга хэрэгсэл үүргээ гүйцэтгэж чадахгүй бол бид тактикийн цөмийн зэвсэг хэрэглэнэ хэмээн заналхийлээд үзнэ. Америкчууд үүнд бэлтгэчихсэн шиг байгаа юм. Турк, Сири дэх цэргийн албан хаагчиддаа сэрэмжлүүлэг өгчихсөн гэх мэдээлэл байна. Гэр бүл, үр хүүхдээ нутагт нь буцаа, өөрсдөө бол оросын зүгээс тактикийн цөмийн зэвсэг хэрэглэхэд бэлтгэ гэж. Оросын либералууд өөр хувилбар бодоод эхэлсэн. Тэд Сириэс, Украинаас гар хэмээн ятгахад бэлэн байна. Энэ нь Путиний нэр төрийг шалан дээр унагачихна гэсэнтэй адил. Харин тэр өөрөө сулрах биш, бүр чангарна. Дахиад л хувьсгал дэгдэх аюул. Оросууд бид холбоотон хайгаад үзье. АНУ-ын шинэ төр засгийг тооцоолоод үзье. Харилцаа тогтооё. Бурханы авралаар энэ нь трамп л болоосой, Хиллари л бүү байгаасай. 2016 оны аравдугаар сарын 12-ны орос сайтаас эшлэж байгаа шүү дээ. Хэрэв хатагтай Клинтон гараад ирвэл муу хувилбартайгаар бэлтгэлээ базаая. Оросын өнөөгийн засаг төр өөрийгөө хиймлээр сульдаагаад байх шиг байна. Зүйрлэвээс II Николай хааны замаар л замнаад байх шиг. Үндэслэлгүй улс төрийн шийдвэр гаргаж байна. Геополитикийн нөхцөл байдал өөрчлөгдөхөд тэр дор нь хариулах чадамж алга.

Геополитикийн нөхцөл байдал өрнөхийг 3-4 жилээр тооцоолж, төсөөлж чадахгүй байна. Эрс шийдвэртэй зайлшгүй арга хэмжээ авах зориг зүрх дутаж байна. Улс орны удирдлага дахь ил дайснуудаасаа салж чадахгүй байна. Тэд нь оросын эсрэг, төрийн бодлогын эсрэг ажиллаж л байдаг. Гэтэл тэднээсээ салдаггүй ээ. Америкийн улс төрийн элитэд ч ноцтой хагарал мэдрэгдэж байна. Дээд улс төрийн элит нь илт доройтлоо. Пентагон АНУ-ын улс төрийн элитээсээ үл хамааран ажилладаг болж байна. Цэргийн асуудлаар аюул заналыг нь ойлгож байгаа ч шийдвэр гаргахад нь татгалздаг болж байна. АНУ-д үндэсний элит, үндэстэн дамжсан элитийн хооронд хагарал гарч байна. Үндэстэн дамнасан гэдэгт мондиалист нэгдмэл ертөнц байгуулах сонирхолтой хэсэг орно. Америкийн элит нэгдмэл, нэг дорынх биш боллоо. Дотоодынхоо энэ мэт зөрчлөөс болж америк дээрх сценарыг хэрэгжүүлэх боломжгүй хэмээн би найдаж байна. Тэгэхээр оросын хувьд АНУ-ын дотоод улс төрийн элитийн хагарлыг улам л дэвэргээд дэм үзүүлээд байхаас өөр гарц алга. Цэргийн шинжээч Константин Сивков яг ингэж бичиж байжээ. Хоёр жилийн тэртээ юм. Гэхдээ тэрбээр үзэл бодлоо тээсээр яваа гэдэгт эргэлзэх юм алга.

Тэрбээр оросын үндэсний эх оронч хүчин (Национально-Патриотических Сил россии буюу товчилбол НПСР) гэдэгт харьяалалтай бололтой. НПСР гэдэг нь өмнөө тавьсан зорилго, үйл ажиллагаагаараа бол коммунистэх оронч маягийн хөдөлгөөн аятай. Оросын ард түмний ёс суртахууны үндсэн дээр орос эх орондоо оросын ард түмний засгийг сэргээхийн тулд оросын ард түмнийг эвлэлдэн нэгтгэх хэмээн зорилгоо тодорхойлжээ. Оросын ард түмний ёс суртахуун гэдэг юу юм бэ гэвэл национализм, патриотизмыг хэлнэ. Национализм гэдэг нь ард түмнээ хайрлахыг хэлнэ, патриотизм гэдэг нь эх орноо хайрлахыг хэлнэ гэжээ. Ийм өнцгөөс авч үзвэл өнөөгийн орост зөв, эерэг, дэвшилтэт нэг ч юмс үзэгдэл байхгүй. Хувьчлагдсан нийгэм, хувьчлагдсан эдийн засаг, зах зээлийн харилцаа, олигарх, барууныг шүтэх үзэл, барууны гял цал юмс, дуу хөгжим, америк кино, англи хэл гэхчлэн. К.Сивковын бичсэнийг авах гээхийн ухаанаар монгол уншигчид хүлээн авах биз ээ. Заавал унш судла хэмээн хэн ч хэнд ч албадах гээгүй. орчуулга хийж тайлбар дагалдуулж буй олхонуд Баярхүү би оросын эсрэг үзэлтэн огтоос биш, оросын ард түмнийг хүндэтгэх сэтгэлтэй. Монгол-Оросын харилцаанд эл нийтлэл огтхон ч хамааралгүй. автор нь орос хүн байгааг эрхбиш бодолцох биз ээ.

Олхонуд Баярхүү