BOLOD.MN сайт өнгөрсөн ДОЛОО хоногт болж өрнөсөн ОНЦЛОХ үйл явдлыг ТОЙМЛОН хүргэж байна. Эдгээр өдрүүдэд Засгийн газраас ард иргэдэдээ бодит дэмжлэг үзүүлэх үүднээс ирэх оны долоодугаар сарын 1-ныг хүртэл ус, цахилгаан зэрэг хэрэглээний зардлыг тэглэх болсон нь эдгээр өдрүүдэд ОНЦЛОХ үйл явдал байлаа. Түүнчлэн сайжруулсан шахмал түлшний үнийг 50 хувь хүртэл хямдруулах шийдвэрийг гаргаж байсан бол ирэх оны долоодугаар сар хүртэл 70 хувь хүртэл хямдралтай иргэдэд олгогдохоор болсон.

- ЗГ: Улсын нөөцөөс 3800 тонн өвс, 1900 тонн тэжээлийг малчдад үнэгүй олгохоор шийдвэрлэлээ

12-р сарын 16-ны өдрийн Засгийн газрын хуралдаанаар хөдөө орон нутгийн иргэдэд хүрэх шууд тусламжийн талаар Шадар сайд Я.Содбаатар, ХХАХХҮЯ-ын сайд З.Мэндсайхан нар мэдээлэл өглөө. Өнгөрсөн намраас хойш хөдөө орон нутгуудад зудын эрсдэлийн үнэлгээ хийсэн бөгөөд үнэлгээгээр 10 аймгийн 72 суманд өвөлжилт хүндрэх эрсдэлтэй байгаа талаар мэдээлсэн юм. Ялангуяа Баянхонгор аймаг хамгийн эрсдэлтэй аймагт тооцогдож байгаа аж.

Тиймээс Засгийн газар оторт явж буй малчдад дэмжлэг үзүүлэхээр шийдвэрлэн зарим бараа бүтээгдэхүүнийг гааль, НӨАТ-аас чөлөөлөх хууль батлагдсан билээ. Уг хууль нь өнгөрсөн долоо хоногоос эхлэн хэрэгжиж эхэлсэн. Түүнчлэн бүх төрлийн Улаанбуудай , ургамлын тосны жагсаалт батлах асуудлыг уг хуралдааны үеэр шийдвэрлэсэн билээ. Улсын нөөцөөс 3800 тонн өвс, 1900 тонн тэжээлийг малчдад үнэгүй олгох ажлыг эхлүүлсэн талаар дурдлаа.

Мөн Баянхонгор, Өвөрхангай, Говь-Алтай, Өмнөговь аймгийн зарим сум, отроор яваа малчдад зориулж ХХААХҮЯ дээр хэрэгжиж байгаа Дэлхийн банкны мал аж ахуйн эргэлтийг нэмэгдүүлэх төсвөөс таван сая долларын буцалтгүй тусламж үзүүлэхээр болсон тухайн ХХААХҮ-ын сайд З.Мэндсайхан мэдээлсэн юм.

- Зарим ААН, иргэдийн ус, дулаан, цахилгааны төлбөрийг ТӨР ДААНА

Монгол Улсын засгийн газар энэ сарын 13-ны өдөр ээлжит бусаар хуралдаж өмнө нь улсын түүхэнд гарч байгаагүй шийдвэрийг гаргасан юм. Цар тахлын үед айл өрх, зарим аж ахуй нэгжүүдийн хэрэглээний эрчим хүч, ус дулаан, хогын төлбөрийг төр хариуцах боллоо. Ингээд монгол улсын бүх айл өрхийн цахилгаан, дулаан, хогны мөнгийг төр хариуцах болсон бөгөөд 100 хүртэлх метр кватратаас илүү талбайтай орон сууцтай айл өрхийн зөрүү төлбөрийг иргэд өөрсөддөө төлөх аж.

Энэхүү шийдвэр нь арванхоёрдугаар сарын 1-ээс ирэх оны долоодугаар сарын 1-ныг хүртэл хэрэгжих юм. Харин төсөвт байгууллага, төрийн болон орон нутгийн өмчит түүний оролцоотой хуулийн этгээд, уул уурхайн олборлох, боловсруулах үйлдвэр, ББСБ, криптовалюттай холбоотой үйл ажиллагаа эрхлэгч, газрын тосны бүтээгдэхүүн үйлдвэрлэх, бөөний болон тусгай зөвшөөрөл эзэмшигчид, интернет, үүрэн холбооны үйл ажиллагаа эрхлэгч тусгай зөвшөөрөл эзэмшигч, өнгөт метал, цементийн үйлдвэр зэрэг дараах 9 үйл ажиллагаа эрхлэгч байгууллагуудаас бусад аж ахуй нэгжүүдийн цахилгаан, дулаан, хогны мөнгийг төр хариуцна.

Түүнчлэн сайжруулсан шахмал түлшний үнийг ирэх оны дөрөвдүгээр сарын 1-ныг хүртэл 50 хувиар бууруулсан. Харин засгийн газрын хуралдаанаар сайжруулсан шахмал түлшний үнийг 75 хувиар бууруулах шийдвэрийг давхар гаргалаа. Энэхүү шийдвэр нь мөн адил долоодугаар сарын 1-ныг хүртэл хэрэгжих юм.

Дээрх бүх зардлын эх үүсвэрийг Эрдэнэт үйлдвэр хариуцах бөгөөд ойролцоогоор 680 орчим тэрбум төгрөгийн санхүүжилтийг гаргах аж.

- Эрчим хүчний зөрүүг хэрэглэгчид төлнө

Засгийн газраас гаргасан шийдвэрээс цахилгааны төлбөрийг 100 хувь төр хариуцах болсонтой холбогдуулан цахилгаан эрчим хүчний хэрэглээ хэвийн хэмжээнээс 18 хувиар өсжээ. Шийдвэр гарсан эхний гурав хоногийн дотор цахилгааны хэрэглээ ийнхүү өссөн нь цаашид дахин илүү өсөх магадлал их байгаа хэмээн холбогдох албаныхан мэдээлсэн юм. Түүнчлэн хэрэглээ цаашил нэмэгдмэл дамжуулах станцууд ачааллаа дийлэхгүйд хүрч, тоног төхөөрөмж гэмтэн, цахилгааны саатал үүсэх магадлалтайг Эрчим хүчний зохицуулах хорооны дарга мэдээлсэн билээ. Түүнчлэн эрчим хүчний хэрэглээ улам нэмэгдвэл хязгаарлахаас өөр аргагүй хэмээж байв.

Гэхдээ аль болох хэрэглээний цахилгааныг хязгаарлахгүй байхыг зорих бөгөөд журам гаргах тухай дурдаж байв. Тухайлбал, хэрэглээний төлбөрийн зардал өмнөх сарынхаас илүү гарвал зөрүү төлбөрийг иргэдээс өөрсөдөөр нь төлүүлэхээр ярилцаж байна хэмээх мэдээллийг өгсөн юм.

- “Эрэл”-ийн Б.Эрдэнэбат 120 сая төгрөгийн торгууль төлөөд батлан даалтад гаргахаар болжээ

Эрэл компанийн ТУЗ-ын дарга Б.Эрдэнэбатын давж заалдах шатны шүүх хурал энэ сарын 16-ны өдөр Нийслэлийн Эрүүгийн хэргийн давж заалдах шатны шүүхэд үргэлжиллээ. Улмаар шүүхийн хэргийг прокурорт буцаах шийдвэр гаргасан байна.

Б.Эрдэнэбатыг бусдаас 20 тэрбум төгрөг залилж авсан, мөнгө угаасан хэмээн үзэж 7 жилийн хорих ял оногдуулж 20 тэрбум 6 сая, 375 мянган төгрөгийг гаргуулах зэрэг оногдуулж байсан ч ийнхүү давж заалдах шатны шүүх хэргийг прокурорын байгуулагат буцаажээ.

- УИХ-ын гишүүн асан Д.Гантулга жилийн дараа магадлангаар суллагдлаа

УИХ-ын гишүүн асан Д.Гантулгыг анхан болон давж заалдах шатны шүүхээс хүчиндэх болон хүчиндэхийг завдсан гэмт хэргүүдийг үйлдсэн гэм буруутайд тооцож, хоёр жил хорих ял оногдуулсан ба Улсын Дээд шүүхээс тус ялыг хэвээр үлдээн шийдвэрлэж байсан билээ.

Тэгвэл түүнийг шүүхээс энэ сарын 11-нд буюу өнгөрсөн долоо хоногын тав дахь өдөр магадлангийн хурлаар оруулж сулласан байна. Тэрээр ийнхүү нэг жил гаруй хоригдоод магадлангаар суллагджээ.

- ОХУ-д найм хүртэлх насны хүүхэдтэй гэр бүлд 5 мянган рубль олгох захирамжид гарын үсэг зуржээ

ОХУ-ын Ерөнхийлөгч Владимир Путин найм хүртэлх насны хүүхэдтэй гэр бүлүүдэд таван мянган рубль нэг удаадаа олгох зарлигт гарын үсэг зуржээ. “Хүүхэдтэй гэр бүлүүдэд дэмжлэг үзүүлэх зорилгоор найм хүртэлх насны хүүхэдтэй эцэг эхүүд, үрчилж авсан эцэг эхүүд, асран хамгаалагч, харгалзан дэмжигч ОХУ-ын иргэдэд таван мянган рубль нэг удаа олгохыг үүрэг болгож байна” хэмээн ОХУ-ын төрийн тэргүүний хэвлэлийн алба мэдээлсэн байна.

Захирамжийг хэрэгжүүлэхтэй холбоотой зардлыг Засгийн газар гаргахыг, нэг удаагийн төлбөр олголтыг Тэтгэврийн сан хангахыг үүрэг болгосон байна.

- 24 цагийн дотор Улаанбаатарт 18 тохиолдол нэмж бүртгэгдэн, улсын хэмжээнд 941 тохиолдол бүртгэгдлээ

12-р сарын 18-ны өдрийн ЭМЯ-ны мэдээллээр Улаанбаатар хотод 18 шинэ тохиолдол бүртгэгдсэн болохыг мэдээллээ. Эдгээр тохиолдлууд бүгд Баянзүрх дүүргийн нэгдсэг эмнэлэгт хэвтэн эмчлүүлж байсан иргэдээс илэрсэн ба шинэ голомт үүссэн байж болзошгүй хэмээн мэдээлж байв. Түүнчлэн Баянзүрх дүүргийн нэгдсэн эмнэлгийн ажилтан, өвчтөн, сахиур болох 376 хүнийг тусгаарласан бөгөөд 24 цагийн 90070 хүнд шинжилгээ хийхэд дээрх 18 тохиолдол батлагдсан байна.

Эдгээр батлагдсан 18 хүний ойрын болон хоёрдогч хавьтлын 645 хүнийг олж, 266 хүнийг ажиглах байранд тусгаарлаж, 469 хүн гэрийн ажиглалтад байгаа бөгөөд эдгээр иргэдээс халдвар илрээгүй байгаа аж.

- АНУ-гаас Монголд хандивласан амьсгалын 50 аппарат ирлээ

Коронавирусний халдвартай тэмцэн, туслахад зориулан АНУ-аас амьсгалын 50 ширхэг аппарат хандивласан нь Монголд энэ сарын 17-ны өдөр иржээ. Эрүүл мэндийн сайд Т.Мөнхсайхан энэ сарын 7-нд төрөлжсөн төв эмнэлгүүд болон дүүргүүдэд нэмэлтээр амьсгалын 175 аппарат гардууулах үеэр, “Цар тахлын үед эмнэлгийн тусламж, үйлчилгээг өндөржүүлсэн бэлэн байдалд ажиллуулж, болзошгүй эрсдэлээс урьдчилан сэргийлэх зорилгоор бүх эмнэлгийн эрчимт эмчилгээний тасгийг амьсгалын аппаратаар хангаж байгаа. Энэ хүрээнд Дэлхийн Банк, Азийн Хөгжлийн банкнаас 400, ДЭМБ-аас 125, АНУ-аас амьсгалын 50 аппарат авч байгаа. Мөн Цэргийн төв эмнэлэг, ХӨСҮТ-ийн амьсгалын аппаратын тоог нэмээд байна. Удахгүй аймгуудын нэгдсэн эмнэлгүүдэд амьсгалын аппаратыг нэмж хуваарилан өгнө гэх мэдээллийг өгч байв.

- Бага насны хоёр хүүхэд, гэртэйгээ шатаж энджээ

Бага насны хоёр хүүхэд гэртээ шатаж амь насаа алдсан харамсалтай хэрэг гарчээ. Тодруулбал, Баянзүрх дүүрэг, Хужирбуланд монгол гэр шатаж байна гэх дуудлага тус дүүргийн цагдаагийн хэлтэст ирсэн байна. Дуудлагын дагуу шалгахад 6 настай эрэгтэй, 5 настай эмэгтэй хүүхдүүд монгол гэрт шатаж амиа алдсан байжээ.

Гэр гаднаасаа цоожтой байсан талаар цагдаагын байгууллага мэдээлсэн бөгөөд галын шалтгааныг тодруулахаар ажиллаж байгаа аж. Иймд нийт эцэг эхчүүдийг баг насны хүүхдээ хараа хяналтгүй орхихгүй байхыг албаны байгууллагаас анхааруулж байна.