BOLOD.MN сайт өнгөрсөн ДОЛОО хоногт болж өрнөсөн ОНЦЛОХ үйл явдлыг тоймлон хүргэж байна. Эдгээр өдрүүдэд Нийслэл хотын иргэд XVII Жарны "Цөөвөр" хэмээх цагаагчин төмөр үхэр жилийн сар шинийн баярыг хатуу хөл хорион дунд, өнгөрүүллээ. Иргэдийн хөл хөдөлгөөнийг хянахын тулд Улаанбаатар хотын зургаан дүүрэгт цэрэг, цагдаагийн алба хаагч болон эргүүлийн алба хаагчид ээлжээр ажиллан хяналт хийж байна.

Түүнчлэн баяр наадмын уур амьсгалтай зэрэгцэн, цэргийн ангийн алба хаагч болон Нийслэл хотын иргэн Төв талбайд амиа хорлосон харамсалтай үйл явдлууд эдгээр өдрүүдэд боллоо.

Илүү дэлгэрэнгүйг дараах бичлэгээс үзээрэй.

- Засгийн газраас цар тахлын үеийн төрийн бүх худалдан авалтыг АТГ-ыг шалгуулахаар болжээ

Цар тахлын үед хийгдэж байгаа төрийн бүх шатны худалдан авалтыг шалгуулахаар Засгийн газар АТГ-т ханджээ.

Учир нь халдварт өвчинтэй холбоотойгоор худалдан авалтуудыг богино хугацаанд зарлаж байгаа тул ашиг сонирхлын зөрчил байх магадлалтай хэмээн үзэж байна.

Нийслэлийн Эрүүл мэндийн газар 20,000 ширхэг N95 амны хаалтыг 400 сая төгрөгөөр худалдан авах тендерийг гурав хоногийн хугацаатай зарласан нь олон нийтийн бухимдлыг төрүүлсэн. Үүнтэй холбоотойгоор нийслэлийн Засаг дарга Д.Сумъяабазар мэдээлэл өгч, тендерийг ЭМЯ-нд буцаахыг нийслэлийн ЭМГ-т даалгаад хувийн ашиг сонирхол байгаа гэж харж байгаагаа хэлсэн.

Тиймээс хуулийн байгууллагаар шалгуулахаа хэлээд зогсохгүй хотыг даргын ажил авахаас өмнө хийгдсэн бүх худалдан авалтыг шалгуулах үүргийн өгсөн юм.

- Тэтгэврийн зээлгүй ахмадуудад 1 сая төгрөг олгох ажлыг эхлүүлнэ

Эрдэнэс Силвер Ресурс” ХХК хоёрдугаар сарын 8-ны өдөр буюу өнөөдөр 105 тэрбум төгрөг буюу 37 сая ам.долларыг Монгол банканд тушааж, тэтгэврийн зээлгүй байсан ахмадуудад нэг сая төгрөг олгох ажлыг эхлүүлнэ. Ерөнхийлөгч өнгөрсөн бямба гарагт Дундговь аймагт ажиллаж, “Салхитын алт, мөнгөний орд”-ын үйл ажиллагаатай танилцах үеэр “Эрдэнэс Силвер Ресурс” ХХК-ийн Гүйцэтгэх захирал Т.Мөнхбаяр дээрх мэдээллийг өгсөн гэж Ерөнхийлөгчийн Тамгын газраас мэдээлжээ. Өөрөөр хэлбэл 2019 онд тэтгэврийн зээл тэглэх үеэр зээлгүй байсан ахмадуудад энэ оны тавдугаар сард багтаан нийт 210 орчим тэрбум төгрөгийг олгоно гэсэн байна. “Салхитын алт, мөнгөний орд”-ыг 2043 он, 2047 он хүртэл ашиглах тусгай зөвшөөрлүүдийг 2018 онд цуцалж, төрийн мэдэлд шилжүүлсэн. Улмаар 2019 онд тус ордод хайгуул хийх, ашиглах тусгай зөвшөөрлийг “Эрдэнэс Силвер Ресурс” ХХК-д шилжүүлж, төсвийн хөрөнгө оруулалтгүйгээр олборлолтын үйл ажиллагааг нь эхлүүлжээ.

“Салхитын алт, мөнгөний орд”-ыг эдийн засгийн эргэлтэд оруулснаар тэтгэврийн зээлтэй өндөр настнуудын тэтгэврийн зээлийг нэг удаа чөлөөлж, зээлгүй байсан ахмадуудад сая төгрөгийн ваучер олгох хуулийг УИХ баталж байв.

- Бүх нийтийн бэлэн байдлын зэрэгт шилжүүлэхээр эцэслэн шийдвэрлэв

Засгийн газрын хуралдаанаар 2021 оны 02 дугаар сарын 11-ний өдрийн 06.00 цагаас 02 дугаар сарын 23-ны өдрийн 06.00 цаг хүртэл нийслэлд Гамшгаас хамгаалах бүх нийтийн бэлэн байдлын зэрэгт хэсэгчлэн шилжүүлэх Улсын онцгой комиссын шийдвэрийг дэмжлээ. Энэ хугацаанд нийслэлээс гарах, орох зорчигч тээврийн хөдөлгөөнийг хязгаарлаж, иргэдийн хөдөлгөөнийг 90 хүртэл хувь бууруулна. Мөн “Нэг хаалга-Нэг шинжилгээ”-ний хүрээнд хоногт 35-40 мянган хүнийг шинжилгээнд хамруулах юм. Өмнө нь хязгаарлалт тогтоох үед гарч байсан алдаа дутагдлаа давтахгүй, иргэдийг чирэгдүүлж, бухимдуулахгүй байхыг Ерөнхий сайд Л.Оюун-Эрдэнэ холбогдох албан тушаалтнуудад онцгойлон анхаарууллаа.

- Монгол Улс Оросын “Спутник V” вакциныг бүртгэлээ

Монгол Улсын Эрүүл мэндийн яам ОХУ-ын “Спутник V” коронавирусний вакциныг бүртгэсэн тухай Оросын шууд хөрөнгө оруулалтын сан мэдэгдэв. "Коммерсант" агентлагийн мэдээлснээр, Монгол Улс "Спутник V" вакциныг хэрэглэх зөвшөөрөл олгосон 23 дахь орон болжээ. “Монголын Эрүүл мэндийн яам Оросын “Спутник V” коронавирусний вакциныг бүртгэсэн тухай Оросын шууд хөрөнгө оруулалтын сан мэдэгдэж байна. Бүртгэх шийдвэрийг тус улсад эмнэлзүйн нэмэлт туршилт явуулахгүйгээр онцгой байдлын үед ашиглах журмаар гаргасан” хэмээн тус сангийн мэдэгдэлд дурдав.

- Нийт хүн амын 60 хувь буюу 2 сая иргэнийг гуравдугаар сарын 1-ээс өмнө үе шаттайгаар вакцинжуулна

ДЭМБ-ын зөвшөөрөгдсөн вакцин оруулж ирэхийн тулд гэрээ хэлцүүд хийгдэж байгаа талаар Ерөнхий сайд Л.Оюун-Эрдэнэ онцоллоо. Тодруулбал, Хүн амынхаа 60 хувь буюу 18-аас дээш насны 2 сая иргэнийг 2021 оны 3-р сарын 1-нээс өмнө үе шаттайгаар вакцинжуулна. Гуравдугаар сарын 1-нээс өмнө вакцин тээвэрлэх, хадгалах ажлыг зохион байгуулна.

Хамгийн түрүүнд эрүүл мэндийн байгууллагын ажилчид буюу халуун цэг дээр ажиллаж байгаа хүмүүс. эрсдэлтэй бүлэг болох ахмадууд, суурь өвчтэй хүмүүсийг вакцинжуулна. Эхний ээлжид 300 мянган тун вакцин оруулж ирэх чиглэлээр ажиллаж байгаа аж.

- Томоохон худалдааны төвүүд ажиллахгүй, хүнсний дэлгүүр хэвийн ажиллана

Энэ сарын 11-ний 06.00 цагаас 23-ны 06.00 цаг хүртэл Улаанбаатар хот бүх нийтийн бэлэн байдлын зэрэгт шилжсэн. Хатуу хөл хорионы үеэр ямар, ямар арга хэмжээ авах талаар УОК-оос мэдээлсэн юм.

Мэдээллийн үеэр томоохон зах, худалдааны төвүүд энэ сарын 16-н хүртэл ажиллахгүй. Харин жижиг хүнсний дэлгүүр хэвийн ажиллана. Дэлгүүрүүд бараа татан авалтаа урьдчилан байдлаар хийчихсэн, бараа татна гэж замын хөдөлгөөнд оролцохгүй гэдгийг УОК-оос мэдээлж байв.

Хатуу хөл хориогоор зөвшөөрөлтэй 14 салбарын ажилтан албан хаагчид л нийтийн тээврээр зорчих бөгөөд Нийтийн тээврийн хэрэгслийн тоо өмнөх үеийнхээс ихээхэн буурсан аж.

Нийслэл хотод хатуу хөл хорионы үеэр хотоос орох гарах хөдөлгөөнийг бүрэн хаасан бөгөөд гачигдал болон ямар нэгэн асуудал гарсан тохиолдолд иргэд УОК-руу хандан, өргөдөл гаргах боломжтой юм.

- Монгол Улсын Ерөнхийлөгч Х.Баттулга зарлиг гаргаж, Төрийн дээл цол хүртээлээ

Тулгар төрийн 2230 жил, Их Монгол Улс байгуулагдсаны 815 жил, Үндэсний эрх чөлөө, тусгаар тогтнолоо сэргээн мандуулсны 110 жил, Ардын хувьсгалын 100 жил, Ардчилсан хувьсгалын 32 жилийн ой, Монголын үндэсний уламжлалт Цагаан сарын баярыг тохиолдуулан эрхэлсэн ажилдаа олон жил үр бүтээлтэй ажилласан аж үйлдвэр, эрүүл мэнд, боловсрол, хөдөө аж ахуй, барилга, соёл урлаг, нийгэм үйлчилгээний салбарын хүмүүст Монгол Улсын Ерөнхийлөгч Халтмаагийн Баттулга шагнал гардууллаа. Тухайлбал, нэвтрүүлэгч С.Чимгээ Соёлын гавьяат зүтгэлтэн, найруулагч Н.Наранбаатар урлагийн гавьяат зүтгэлтэн цолоор энгэрээ мялаалаа.

Өнөөдөр Ерөнхийлөгчийн зарлигаар

· Монцамэ агентлагийн ахмад сэтгүүлч Гажидын Баатарчулуун

· Саунд оф Монголиа ХХК-ийн продюсер Хүрэлбаатарын Дамдинсүрэн

· Монголын зохиолчдын эвлэлийн хорооны гишүүн, яруу найрагч Долгорын Доржготов

· Монголын үнэн сонины ахмад сэтгүүлч Цэнд-Аюушийн Мишигдорж

· Зууны мэдээ сонины ахмад сэтгүүлч Дуламын Цэрэннадмид нар мөн Соёлын гавьяат зүтгэлтэн цолоор шагнууллаа.

- Нийслэлийн амаржих газруудаас нийт 56 эх, нярайг гэрт нь тээвэрлэн хүргэж өгчээ

Гамшгаас хамгаалах бүх нийтийн бэлэн байдлын зэрэгт шилжсэнтэй холбогдуулан хоёрдугаар сарын 11-нээс эхлэн нийслэлийн амаржих газруудад амаржсан эх, нярайг Нийслэлийн Түргэн тусламжийн төвийн автомашинаар эмч нар гэрт нь гаргаж байна.

Энэ дагуу өчигдөр нийслэлийн Өргөө, Хүрээ амаржих газраас нийт 56 эх, нярайг халдвар хамгааллын дэглэмийг чанд баримтлан, аюулгүй байдлыг нь бүрэн хангаж, гэрт нь тээвэрлэн хүргэж өглөө.

- Бусдын шинжилгээний бичгээр Дорноговь аймагт нэвтэрчээ

Улаанбаатар хотоос Дорнод аймагтаа ирэх хүсэлт гаргасан иргэдийг сар шинийн баяраас өмнө татан авах ажлыг Аймгийн Онцгой комисс, Шуурхай штабын шийдвэрээр хоёрдугаар сарын 7, 9-ний өдрүүдэд автобусаар нийт 85 иргэнийг гэрт нь ирүүлсэн. Гэвч хоёрдугаар сарын 9-ний өдрийн автобусаар ирэх зөвшөөрөлтэй 45 иргэдийн дотор шинжилгээний хариу гараагүй дөрвөн иргэнийг тухайн үед автобусанд суулгалгүй үлдээсэн.

Харин нэг иргэн өөр хүний нэр, бичиг баримт, шинжилгээний хариуг ашиглан автобусанд сууж, Улаанбаатар хотоос гарчээ. Түүнчлэн Хөлөнбуйрын постоор нэвтрэх үедээ ч хуурамч нэрээр мэдээлэл, гэрийн тусгаарлалтын баталгааг бөглөж орж ирснийг хоёрдугаар сарын 10-ны өдөр тандалтын бүлэг илрүүлж, Шуурхай штабт яаралтай мэдээлж, цагдаагийн газарт шилжүүлэн шалгалтын ажил явагдаж байна.

Тухайн иргэн нь хоёрдугаар сарын 9-ний өдөр Баянзүрх дүүргийн гуравдугаар байнгын цэгт шинжилгээ өгч, хариу 10-ны өдрийн 15:58 цагт сөрөг гарсан. Шинжилгээний хариу гараагүй байхад Дорнод аймаг руу нэвтэрсэн иргэн Н-ийн PCR шинжилгээний хариу нь эерэг гарсан бол түүнтэй нэг автобусанд ирсэн 41 иргэнд халдвар тараагаад зогсохгүй аймгийн хэмжээнд халдварын голомт үүсгэх маш том эрсдэл дагуулах байлаа. Иймд тухайн иргэнд хариуцлага тооцох талаар Аймгийн Онцгой комиссоос мэдээлэв.

- Сүхбаатарын талбай дээр нэг иргэн өөрийгөө шатааж амиа алдлаа

Ерөнхийлөгчийн зарлигаар одон медаль хүртээх баярт үйл явдалтай зэрэгцэн энэ сарын 8-ний өдөр Сүхбаатарын талбай дээр нэгэн харамсалтай үйл явдал боллоо. Тодруулбал, 34 настай иргэн 5 литрийн савтай бинзенийг өөр дээрээ асган, өөрийгөө шатааж амиа алдсан ноцтой хэрэг гарлаа. Яаралтай түргэн тусламж ирэн тухайн иргэнд анхны тусламж үзүүлэхээр үзлэг хийтэл тухайн иргэн нас барсан байсан аж. Талийгаач өөрийгөө шатаах үедээ “Намайг хараарай” хэмээн хашхирч амиа егүүтгэсэн гэдгийг, галыг унтраах гэх оролдсон хоёр иргэн хэлсэн юм.

Уг золгүй явдлын асуудлаар МУ-ын Ерөнхийлөгч Х.Баттулга Тагнуулын Ерөнхий газрын дарга П.Одонбаатар болон, Дотоодын цэргийн командлагч, Цагдаагийн Ерөнхий газрын дарга Ж.Болд нартай уулзлаа.

Улмаар Сүхбаатарын талбайд харамсалтайгаар амиа алдсан иргэний нас барсан явдлыг яаралтай шалгаж, учир шалтгааныг нэн даруй олж тогтоохыг даалгалаа.

- Дорноговь аймгийн 0129-р цэргийн ангид алба хаагч боомилсон байдалтайгаар амиа алджээ

Дорноговь аймгийн 0129-р цэргийн ангид алба хааж байсан Говь-Алтай аймгийн Шарга сумын харьяат иргэн 21 настай ахлах байцаагч зэс уяагаар хоолойгоо боомилж нас барсан байдалтайгаар 2021. 02. 07-ны өдөр олдсон. Амиа алдсан цэргийн цогцсыг Шарга суманд хүргүүлсэн ч ар гэрийнхэн болон сумын иргэд цуглаж ийнхүү эсэргүүцэл зарлаад байна. Тэд талийгаачийн нас барсан шалтгаан, гэрээсэл, шүүх эмнэлгийн шинжилгээний дүгнэлтийг шаардаж байгаа ажээ. Ар гэрийнхний мэдээллээр талийгаач хэд хоногийн өмнө утасдаж "Намайг ирж аваач, үнэхээр их дарамттай байна" гэж хэлж байжээ.

Талийгаач ээжээ хоёулаа бөгөөд айлын бага хүү байсан байна. Тэрээр хугацаат цэргийн албаа Ховд аймгийн Үенч суманд хаасан бөгөөд Дорноговь аймгийн 0129-р цэргийн ангид Гэрээт цэргийн алба хаагч байжээ. Талийгаачийн шүүхийн шинжилгээний хариу энэ сарын 20-ны өдөр гарна хэмээн хэмээн мэдэгдсэн байна.

Уг хэргийн талаар Дорноговь аймгийн Засаг Даргын Тамгын газраас: Цагдаагийн байгууллага учир шалтгааныг тогтоохоор ажиллаж байгаа болохоор мэдээлэл өгөх боломжгүй байна. Талийгаач, амиа хорлосон гэрээслэл үлдээсэн айдалтай олдсон. Цэргийн ангиас ямар нэг шийтгэл оногдуулах, хатуу арга хэмжээ авах зэрэг ямар нэгэн дарамж, шахалт үзүүлээгүй гэлээ.

- Гэр шатаж, гурван хүүхэд амиа алдлаа

Энэ сарын 9-ны өдөр Нийслэлийн Сонгинохайрхан дүүрэгт бага насны гурван хүүхэд харамсалтайгаар амиа алдсан хэрэг гарчээ. Тодруулбал, Сонгинохайрхан дүүргийн 33-р хороонд оршин суух иргэн, эхнэрийнхээ хамт PCR шинжилгээ өгөхөөр явахдаа гурван хүүхдээ гэртээ үлдээжээ. Харамсалтай нь гэр нь шатаж, 5-13 насны хоёр хүү, нэг охин түймэрт өртөн амь насаа алдсан байна. Гал түймрийн дуудлагын дагуу Гал унтраах 26-р ангийн аврагчид очсон ч тусламж үзүүлж амжаагүй байна.

- Баянхошуунд зам тээврийн ноцтой осол гарч 11 машин мөргөлджээ

Нийслэлийн СХД 9-р хороо “Жанцан” дэлгүүрийн урд уулзвар дээр энэ сарын 10-ны өдрийн 12.30 цагийн орчимд зам тээврийн ноцтой осол гарчээ. Тодруулбал "Хово" маркийн том оврын автомашины тоормос ажиллагаагүй болж, 11 автомашинтай мөргөлдсөн байна. Ослын улмаас хоёр хүн хүнд гэмтэж, эмнэлгийн тусламж үйлчилгээ авчээ.

BOLOD.MN

BOLOD ДОЛОО ХОНОГИЙН ТОЙМ: Цагаагчин төмөр үхэр жилийн Цагаан сарын баярыг хөл хорионд угтсан ДОЛОО ХОНОГ
Tweet
Bolod.mn