2021-03-13Bolod.mn сайд өнгөрсөн долоо хоногт болж өрнөсөн ОНЦЛОХ үйл явдлыг тоймлон хүргэж байна. Эдгээр өдрүүдэд Олон Улсын Эмэгтэйчүүдийн эрхийг хамгаалах өдөр тохиож Ерөнхий сайд Л.Оюун-Эрдэнэ С.Зориг агсны хэрэгт холбогдсон гэх Т.Чимгээтэй уулзлаа.
Түүний өөрийн хүсэлтээр нууц байсан нэг бичлэгийг олон нийтэд хүргэх нь зөв хэмээн үзсэн байна. Мөн дэлхий нийтээр цар тахалтай тэмцэн вакцинжуулалтын ажлыг эрчимжүүлээд буй. Манай улсын хувьд хоёрдугаар сарын 23-ны өдөр вакцинжуулалтын ажлыг албан ёсоор эхлүүлсэн бөгөөд Хотын дарга, Шадар сайд нар БНХАУ-ын Синофарм вакциныг хийлгэлээ.
- Архангай аймагт Улаанбаатараас ирсэн кино багийнхнаас 1 хүн халдвартай нь батлагджээ
Улаанбаатар хотоос Архангай Чулуут суманд очсон 15 иргэнийг халдвар хамгааллын дэглэмийг сахиулан, зургаан автомашинаар Улаанбаатар хот руу тээвэрлэн аймгийн цагдаагийн газрын албан хаагчдын хамгаалалтад явуулжээ. Тодруулбал, Улаанбаатар хотоос кино зураг авалтаар очсон UBS телевиз болон УЭДТ-ын 15 уран бүтээлч ирснээс нэгнийх нь шинжилгээний хариу эерэг гарсантай холбогдуулан сумын Онцгой комиссын бүрэлдэхүүн хуралдаж, тусгаарлах байрны бэлэн байдлыг хангаж ажиллажээ.
"Тус 15 иргэнийг халдвар хамгааллын дэглэмийг сахиулан, Улаанбаатар хот руу тээвэрлэсэн бөгөөд батлагдсан тохиолдлын иргэнийг Яармаг 300 ортой тусгай эмнэлэгт хүргэж, нэн ойрын хавьтлын иргэдийн сорьцыг ХӨСҮТөвийн вируслогийн лабораторид хүлээлгэн өгчээ.
Мөн "Нэгдүгээр хавьтагч болон дам хавьтагчийг тогтоож зураглалыг гаргаж ажиллахад 14 иргэн нэгдүгээр хавьтагчаар, дам хавьтагчаар 20 иргэнийг тогтоож тусгаарлалтад аван ажиллаж байна.
2021 оны гуравдугаар сарын 06-ны өдрийн 21.30 минутад Өлзийт гол багийн Естийн нуураас кино зураг авалт хийгээд ирэхэд нь дөрвөн машинтай 15 иргэнийг тосч аван, сумын Эрүүл мэндийн төвийн хоёр сувилагч халдвар хамгааллын дэглэмийг сахиулж, Хүүхдийн цэцэрлэгийн тусгаарлах, ажиглах байранд бүртгэл хийж байрлуулсан байна.
Сумын төвийн доод пост болох Сумчийн үзүүр, дээд гүүрний пост, Дунд Жаргалантын пост, хөдөлгөөнт эргүүл гу чиглэлд нийт 46 тээврийн хэрэгсэл, 126 гаруй албан хаагчдыг дайчлан ажиллууллаа.
- Сар бүр 1000 хүнийг сая төгрөгийн тэтгэлэгтэй сургана
Гуравдугаар сарын 10-ны өдрийн ЗГ-ийн ээлжит хуралдаанаар энэ жил 5,000 залуусыг сургаж, ажилтай, орлоготой болоход нь дэмжлэг үзүүлнэ хэмээлээ. Тодруулбал, “Залуучуудыг хөдөлмөрт бэлтгэх” төслийг баталлаа. Багц сургалт нэг сарын хугацаатай. Сүүлийн гурван сар ажилгүй байгаа ч ажил хийх, амьдралаа өөрчлөх хүсэлтэй, 18-34 насны, эрэгтэй, эмэгтэй 1,000 хүнийг сар бүр сонгон шалгаруулж, тус бүр нэг сая төгрөгийн тэтгэлэгтэй сургах юм.
Төслийн талаарх мэдээ, мэдээллийг бүртгэл эхлэхээс 10, түүнээс багагүй хоногийн өмнө нийтэд зарлан мэдээлнэ. Залуучууд тухайн үед нь цахимаар болон өөрсдөө очиж бүртгүүлэх боломжтой. Бүртгэлийг аймаг, дүүргийн Хөдөлмөр, халамжийн үйлчилгээний газар, Гэр бүл, хүүхэд, залуучуудын хөгжлийн газар, хэлтэс хариуцах юм.
Бүртгэх, ярилцлага хийх, сонгон шалгаруулахтай холбоотой удирдамжийг Хөдөлмөр, халамжийн үйлчилгээний ерөнхий газрын дарга батална. Сонгон шалгаруулалт, цар тахлын шинжилгээ, эрүүл мэндийн бусад үзлэгт тэнцсэн залуусыг нэгдсэн цэгээс багц сургалт хийх байранд хүргэнэ. Орон нутгийн залууст унааны зардал олгохоор төлөвлөжээ.
Төсөл нь залууст эрүүл, эртэч, амьдралын идэвхтэй хэв маяг, ажил, мэргэжлийн чиг баримжаа олгох, зөвлөгөө өгөх хэлбэрээр ажилтай, орлоготой болоход нь дэмжлэг үзүүлэх зорилготой. Энэ хүрээнд өөрийгөө танин мэдэх, зөв дадал хэвшил, харилцаа хандлага, эх оронч үзэл санааг ойлгуулж, бие бялдрын зөв хүмүүжил, гэр бүлийн эерэг харилцаа, соёл төлөвшүүлэхэд чиглэсэн багц сургалт явуулна.
Мөн ажил хөдөлмөрт бэлтгэх, ажлын ачаалал зэргийг даван туулах чадавхад сургах, хүн бүрийн онцлогт тохирсон ажил, мэргэжлийн зөвлөгөө өгч, хөдөлмөр эрхлэх хувийн төлөвлөгөө гаргахад нь туслах юм.
Энэ жил шаардагдах 11 тэрбум 800 гаруй сая төгрөгийг Хөдөлмөр, нийгмийн хамгааллын сайдын батлагдсан төсвийн багцад зохицуулж, Хөдөлмөр эрхлэлтийг дэмжих сан санхүүжүүлнэ.
Төсөлд хамрагдсан залуусыг нэг жилийн хугацаанд тогтвор суурьшилтай ажилтай болгосон ажил олгогч, ажилтанд хөдөлмөрийн хөлсний доод хэмжээнээс тооцсон нэг жилийн Нийгмийн даатгалын шимтгэл /эрүүл мэндийн даатгалын шимтгэл орохгүй/-тэй тэнцэх нэг удаагийн нөхөн олговор олгохоор төлөвлөлөө. Үүнд шаардагдах хөрөнгийг 2022 оноос эхлэн жил бүрийн улсын төсөвт тусгаж байх юм.
Төсвийн хөрөнгөөр хэрэгжүүлэх төсөл, арга хэмжээг гүйцэтгэхээр шалгарсан аж ахуйн нэгж, байгууллагатай гэрээ хийхдээ залуучуудыг ажилтай болгох талаар тусгаж байхыг төсвийн бүх ерөнхийлөн захирагчид даалгалаа.
Нийт хүн амын 31, хөдөлмөрийн насны иргэдийн 46 хувийг 15-34 насны залуус эзэлдэг. Улсын хэмжээнд ажилгүй байгаа 92 мянга гаруй хүний 51 хувь нь буюу 47 орчим мянга нь 18-34 насныхан гэсэн статистик мэдээ гарчээ.
- Ерөнхий сайд Л.Оюун-Эрдэнэ: Т.Чимгээтэй холбоотой зарим нэг нууцын зэрэглэл бүхий мэдээллийг ил болгоно
Ерөнхий сайд Л.Оюун-Эрдэнэ энэ сарын 8-ны өдөр буюу олон улсын эмэгтэйчүүдийг эрхий хамгаалах өдөр хорих 401 дүгээр ангид ажиллаж, С.Зориг агсны хэрэгт яллагдсан Т.Чимгээтэй уулзлаа. Т.Чимгээ нь төр нийгмийн зүтгэлтэн С.Зоригийн амь насыг хөнөөсөн гэх үндэслэлээр Б.Содномдаржаа, Т.Чимгээ нарт гурван шатны шүүхээс ялын дээд хэмжээг оноосон билээ. Ерөнхий сайд уулзалтын дараа олон нийтэд мэдээлэл өгсөн юм. “Хэдийгээр шүүхийн гэм бурууг ярих эрх байхгүй ч шүүн таслах үйл явцад хууль зөрчсөн, хүний эрх зөрчсөн явдал байгааг тэрээр онцлон тайлбарлалаа.
Т.Чимгээтэй уулзаж зарим зүйлийг тодруулсан бөгөөд нууцтай холбоотой бүх зүйлийг олон нийтэд мэдээллэх боломжгүй. Гэхдээ түүний өөрийн зөвшөөрлөөр нэг зүйлийг нууцаас гаргахаар болсон” хэмээсэн юм.
Т.Чимгээтэй холбоотой нууцаас гаргаж олон нийтэд хүргэсэн зүйл бол түүнийг биеэ хянах чадваргүй байхад нь ашиглаж буй бичлэг аж. Уг бичлэгт хууль хяналтын байгууллагын нэр бүхий хүмүүс хувийн харилцаа тогтоож, мансууруулах зүйл уух юманд хийж, нүцгэн зургийн авч гэр бүл рүү нь явуулсан. Түүнчлэн биеэ хянах боломжгүй байхад нь гарын хээг нь авч ашигласан явдлууд гарчээ.
- Шадар сайд, Хотын дарга нар БНХАУ-ын Синофарм вакциныг хийлгэлээ
Энэ сарын 10-ны өдөр Улсын Хоёрдугаар төв эмнэлэгт коронавирусийн халдварын эсрэг дархлаажуулалтын БНХАУ-ын Синофарм вакциныг Шадар сайд С. Амарсайхан, Нийслэлийн засаг дарга бөгөөд Улаанбаатар хотын захирагч Д.Сумъяабазар нар хийлгэлээ.
Энэ тухай хотын дарга С.Амарсайхан : "БНХАУ-ын Синофарм вакциныг Улсын хоёрдугаар төв эмнэлэгт очиж хийлгэлээ. Уг нь Астразеника, Спутник байсан ч Синофарм харшил бага өгдөг гэхээр нь зүүн мөрөндөө тариуллаа.
Одоогоор ямар нэгэн сөрөг урвал үзүүлээгүй, вакцин хийлгэсэн газарт бага зэрэг улайсан,өөр шинж тэмдэг илрээгүй байна.
Эмчийн зөвлөснөөр тухайн хүний биеийн онцлогоос хамаарч толгой өвдөх, дотор муухайрах, халуурах, вакцин хийлгэсэн газарт бага зэрэг хавдах зэрэг шинж тэмдэг илэрч болзошгүйг анхааруулсан.
Нэгдүгээр тунг хийлгээд дархлаа тогтохгүй. Дараагийн тунг хийлгэснээр дархлаа тогтоно" гэлээ.
BBC агентлаг зэрэг дэлхийн томоохон хэвлэлүүд ч өмнө нь Хятадын "CoronaVac" вакцин сөрөг нөлөө үзүүлэх эрсдэл хамгийн бага хэмээн бичиж байсан юм. 2021 оны 02 дугаар сарын 23-ны өдрөөс буюу дархлаажуулалт эхэлснээс хойш нийт 26 мянга гаруй иргэнийг вакцинжуулалтад хамруулжээ.
Дархлаажуулалтыг 1800 ажилтан, сонсогчид урьдчилсан үзлэг, эрүүл мэндийн бүртгэл хийн дархлаажуулж, биеийн байдлыг нь 15-30 минут ажиглаж байна. Одоогоор вакцины сөрөг урвал үзүүлсэн тохиолдол гараагүй байна. Гэхдээ тухайн хүний биеийн онцлогоос хамаарч толгой өвдөх, дотор муухайрах, халуурах, вакцин хийлгэсэн газарт бага зэрэг хавдах зэрэг шинж тэмдэг илэрч болзошгүйг эмч, мэргэжилтнүүд хэлж байна.
- Боловсролын байгууллагын багш ажилчид вакцинжуулалтад хамрагдлаа
Монгол Улсад “COVID-19” цар тахлын эсрэг дархлаажуулалт өнгөрсөн сарын 23-ны өдрөөс эхэлсэн.
Энэ хүрээнд боловсролын байгууллагын багш, ажилтан, албан хаагчид вакцинжуулалтад хамрагдаж эхэллээ. Нийслэлийн 9 дүүргийн төрийн болон төрийн бус сургуулийн нийт 34615 багш, ажилтнууд вакцинжуулалтад хамрагдлаа. Тодруулбал, Баянгол дүүрэг 5405, Баянзүрх дүүрэг 8189, Багануур дүүрэг 823, Бага хангай дүүрэг 102, Налайх дүүрэг 995, Сонгино хайрхан 6128, Сүхбаатар дүүрэг 4674, Хан-Уул дүүрэг 5080, Чингэлтэй дүүрэг 3219 багш, ажилтнууд хамрагдана.
Улсын Онцгой комиссын шийдвэрийн дагуу зарим сургууль, Эрүүл мэндийн төвүүд зэрэг нийт 18 цэгт вакцинжуулалт хийж байна. Боловсролын байгууллагын багш, ажилтнууд 2-3 хоногийн хугацаанд вакцинжуулалтад бүрэн хамрагдах юм.
Мэргэжлийн байгууллагуудын мэдээлж байгаагаар вакцины эхний тунг хийлгэсний дараа 62, хоёр дахь тунгийн дараа 94 хувийн дархлаа тогтдог байна. Вакцин хийлгэсний дараа хүний биеийн онцлогоос хамаарч толгой өвдөх, дотор муухайрах, халуурах, вакцин хийлгэсэн газарт бага зэрэг хавдах зэрэг шинж тэмдэг илэрч болзошгүй. Эдгээр шинж тэмдэг 1-2 хоногоос олон хоног үргэлжилбэл эмчид хандах хэрэгтэйг эмч мэргэжилтнүүд зөвлөж байна.
- Төрийн албан хаагчдын шалгалт эхэллээ
Төрийн албаны ерөнхий шалгалтыг улсын хэмжээнд өчигдөр буюу/2021.03.12/ баасан гарагаас эхлэн зохион байгуулна. Уг шалгалтын бэлтгэл ажлын хүрээнд Төрийн албаны зөвлөл Халдварт өвчин судлалын үндэсний төвтэй хамтран бүх албан хаагчдаа PCR шинжилгээнд хамруулжээ. Улмаар шинжилгээний хариу бүгд сөрөг гарсан байна.
Төрийн албаны шалгалт өгөх иргэд дараах хоёр мэдээллийг анхаарах ёстой ажээ.
1. Шалгалтад орохоор бүртгүүлсэн иргэд Төрийн албаны зөвлөлийн www.csc.gov.mn цахим хуудсанд хандан ерөнхий шалгалтын системд өөрийн нууц үг бүхий эрхээр нэвтрэн орж, шалгалтаа хаана, хэзээ, хэдэн цагт өгөх хуваарь байршлаа мэдэх, шалгалтад ирэхдээ баталгаажилтын хуудсыг хэвлэн авч, шалгалт эхлэхээс 30 минутын өмнө ирж, танхимд суудлаа эзэлсэн байхыг анхааруулж байна.
2.Шадар Сайдын “Иргэдээс 72 цагийн хүчинтэй PCR-ын шинжилгээг зөвхөн:
- Хөдөө орон нутаг руу явах
- Эмнэлгийн эмчилгээ, үйлчилгээ авах тохиолдолд шаардана” гэсэн шийдвэрийн дагуу төрийн албаны ерөнхий шалгалт өгөх иргэдээс PCR-ын шинжилгээ шаардахгүй боллоо.
Төрийн албаны шалгалтыг нийслэлийн төр захиргааны тавдугаар байр буюу нийслэлийн Инновацийн төвийн байранд хуваарийн дагуу авах юм байна. Нийслэлийн хэмжээнд найм хоногийн хугацаанд нийт 5788 иргэн шалгалт өгөх ажээ.
- Ашиггүй ажиллаж байгаа төрийн өмчит компаниудад өөрчлөлт хийнэ
Төрийн өмчит болон төрийн өмчийн оролцоотой компанийн өмчлөлийн хэлбэр, чиг үүрэг, бүтэц, зохион байгуулалтыг оновчтой болгох зэрэг чиглэлээр хийж байгаа ажлын талаар сайд Б.Жавхлан Засгийн газрын хуралдаан дээр танилцуулав.
Засгийн газар олон жил ашиггүй, үр дүнгүй, алдагдалтай, зардал ихтэй ажилласан төрийн өмчит компаниудтай холбоотой асуудлыг эхний 100 хоногтоо багтаан эцэслэхийг зорьж байна.
2019 оны байдлаар төрийн өмчит 107, орон нутгийн өмчит 339 компани 37 их наяд төгрөгийн өр төлбөртэй, 1.5 их наяд төгрөгийн ашигтай ажиллажээ. Тодруулбал “Эрдэнэт үйлдвэр” 1.1 их наяд, “Эрдэнэс таван толгой” компани 440 тэрбум төгрөгийн ашигтай, бусад нь алдагдалтай байсан гэсэн үг юм.
Цаашид:
- Стратегийн ач холбогдол бүхий компаниудыг олон нийтэд зарлаж, 100 хувь төрийн өмчит хэлбэрээр үйл ажиллагааг нь тогтвортой үргэлжлүүлэх
- Олон жил үр ашиггүй, алдагдалтай ажиллаж байгаа, чиг үүргийг нь хувийн хэвшил гүйцэтгэх боломжтой компаниудыг татан буулгах, нэгтгэх
- Зарим компанийн 34 хүртэл хувийг нээлттэй арилжих замаар олон нийтийн хяналтад оруулж, зөв засаглалтай болгох
- Шилэн дансны тухай хуулийг бүрэн хэрэгжүүлэх зэрэг арга хэмжээ авах юм байна.
- Сэлэнгэ, Хэнтийн аймгууд ковид-19 бүртгэгдсэн газраас ирэх хөдөлгөөнийг хязгаарлалаа
Сэлэнгэ, Хэнтий аймгууд Улаанбаатар хот болон Ковид19-ийн халдвар бүртгэгдсэн аймгуудаас ирэх хөдөлгөөнийг хязгаарласнаа мэдэгдлээ.
Тухайлбал, Сэлэнгэ аймгийн ЗДТГ-аас Улаанбаатар хотод коронавируст халдвар /COVID-19/-ын өвчлөл буурахгүй байгаатай холбогдуулан, аймгуудруу өвчлөл тархах магадлал өндөр байгаа тул Аймгийн Онцгой комиссын 2021 оны 03 дугаар сарын 10-ны өдрийн 05 дугаар тогтоолоор 3 дугаар сарын 11-ний өглөөний 06.00 цагаас 3 дугаар сарын 14-ний өдрийн 06 цаг хүртэл Улаанбаатар хот болон өвчлөл бүртгэгдсэн аймгуудаас ирэх хөдөлгөөнийг аймгийн хэмжээнд түр хязгаарлахаар шийдвэрлэсэн гэв.
Харин эрүүл бүс болон аймаг дотроо асуумж, зөвшөөрлөөр нэвтрэх бөгөөд гарах хөдөлгөөн нээлттэй байгаа аж.
- Япон улс 1.3 сая хүнд шаардлагатай вакциныг хандивлалаа
Япон Улсын Засгийн газрын буцалтгүй тусламжаар Монгол Улсад 1,3 сая хүнд шаардлагатай вакциныг хандивлахаар боллоо.
Тус улсын буцалтгүй тусламжийн хүрээнд НҮБ-ын Хүүхдийн сан (UNICEF)-аар дамжуулан Монгол Улсад хэрэгжүүлэх “КОВИД-19 цар тахал болон нийгмийн эрүүл мэндийн онцгой байдлын үеийн чадавхыг бэхжүүлэх төсөл”-ийн солилцох ноот бичигт гарын үсэг зурах ёслолын ажиллагаа өчигдөр Гадаад харилцааны яаманд болжээ.
КОВИД-19 цар тахал болон нийгмийн эрүүл мэндийн онцгой байдлын үеийн чадавхыг бэхжүүлэхэд чиглэсэн 21.5 сая ам.долларын буцалтгүй тусламжийн энэхүү төсөл нь 2 үе шаттай хэрэгжиж, 1.3 сая хүнд шаардлагатай тун вакциныг Япон Улсын Засгийн газар НҮБ-ын Хүүхдийн сан (UNICEF)-аар дамжуулан нийлүүлж, вакцины “хүйтэн хэлхээ”-г бүрдүүлэх тоног төхөөрөмжийн хангамжийг шийдвэрлэх юм.
ГХЯ-ны Төрийн нарийн бичгийн дарга Н.Анхбаяр дэлхийн улс орнууд КОВИД-19 цар тахалтай тасралтгүй тэмцэж буй энэ цаг үед манай Стратегийн түнш бөгөөд гуравдагч хөрш Япон Улсын Засгийн газар Монгол Улсад нэн хөнгөлөлттэй зээл олгох, эрүүл мэндийн тогтолцоог бэхжүүлж, шаардлагатай тоног төхөөрөмж нийлүүлэх, эрүүл мэндийн салбарын боловсон хүчинг бэлтгэх зэргээр хоёр талын болон олон талт хамтын ажиллагааны хүрээнд өргөн хүрээтэй, бодит дэмжлэг туслалцаа үзүүлж байгаад талархал илэрхийлэв. Мөн Япон Улсын Засгийн газар болон НҮБ-ын Хүүхдийн сан (UNICEF)-гаас хамтран хэрэгжүүлэх энэхүү төслийн хүрээнд тусламжийн вакциныг аль болох хурдан Монгол Улсад оруулж ирж, хүн амыг дархлаажуулах чиглэлд онцгой анхаарч ажиллана гэв.
- Европын дөрвөн улс “Astra Zeneca” вакциныг хэрэглэхээ тзр зогсоожээ
Исланд улс Их Британи, Шведийн "AstraZeneca” компанийн коронавирусний вакцинаар хийх дархлаажуулалтыг түр хугацаанд зогсоожээ. Данид тус вакцинаар тариулсан хүнд тромб буюу цусны бүлэн үүссэний улмаас нас барсан тохиолдол бүртгэгдсэн гэх мэдээлэл гарсантай холбогдуулан ийнхүү зогсоосон байна.
Исландын эрүүл мэндийн газрын захиргаанаас мэдээлснээр, "AstraZeneca”-н вакцинаар тариулсны дараа цусны бүлэн үүссэн тохиолдол бүртгэгдээгүй аж. Тийнхүү Исланд “AstraZeneca”-н бэлдмэлээр иргэдийг вакцинжуулахаа зогсоосон Европын дөрөв дэх улс болжээ.
Өмнө нь Дани, Норвегиос гадна Италийн эрх баригчид мөн ийм шийдвэр гаргасан байна. Европын эмийн агентлаг вакциныг судалж байгаа ч вакцин, цусны бүлэн хооронд холбоо хамаарал байгаа гэсэн дүгнэлтэд шууд хүрч болохгүй хэмээн Данийн эмч нар мэдэгджээ.
.jpg "Томруулж харах")
.jpg "Томруулж харах")
