BOLOD.MN сайт долоо хоног бүрийн ням гарагт улс төр, эдийн засаг, нийгмийн хүрээнд өрнөж буй үйл явдлуудыг тоймлон хүргэдэг уламжлалтай. Эдгээр өдрүүдэд 10 гаруй жилийн турш гацаалтад байсан Тавантолгой-Төмөрзамын бүтээн байгуулалтын нээлтийг хийж анхны тээвэрийн эхлүүлсэн онцгой үйл явдалтай долоо хоног байв. Түүнчлэн БШУ-ны яамнаас хэрэгжүүлсэн хуурамч дипломын шалгалтын үйл ажиллагааны хүрээнд 700 гаруй хуурамч дипломыг илрүүлсэн бол үүний цаана 2000 гаруй сэжигтэй диплом байгаа болохыг салбарын сайд мэдээлсэн. Эдгээр болон бусад онцлох үйл явдлуудыг BOLOD.MN сайт тоймлон хүргэж байна.

Монголын анхны хүнд даацын нэгдүгээр зэрэглэлийн Тавантолгой-Гашуунсухайт төмөр зам нээлтээ хийж, анхны тээвэрлэлтээ хийлээ

Тавантолгой-Гашуунсухайтын төмөр замын бүтээн байгуулалт дуусаж, анхны тээвэрлэлтээ хийлээ. Уг төмөр замыг 2012 онд буюу одоогоос 10 жилийн өмнө эхэлсэн юм. Гэвч 2018 оныг хүртэл зогсонги байдалтай байсан бол тус онд одоогийн Ерөнхийлөгч У.Хүрэлсүх манай улсын нүүрс, зэсийн экспортын гол боомт болох Гашуунсухайтын боомтыг Тавантолгойн бүлэг ордтой төмөр замаар холбох ажлыг эхлүүлсэн юм. Иймд Өмнөговь аймгийн Цогтцэций суманд болж буй төмөр замын нээлтэд Ерөнхийлөгч У.Хүрэлсүх болон “Бодь интернэшнл” компаний ажилчид, сайд нар, хэвлэл мэлээллийн ажилтнууд зэрэг 700 орчим хүн төмөр замын бүтээн байгуулалтын нээлтэд оролцсон юм.

Төмөр зам ашиглалтад орсноор Дотоодын нүүрс тээврийн зардал дөрөв дахин буурч жилд 30-50 сая тонн нүүрс экспортлох юм байна. Мөн түүнчлэн бэлчээр сүйтэх, тоосжилт, дуу шуугиан, хөрс агаарын бохирдол эрс багасах ба Тавантолгойн бүлэг орд орчмын уурхайнуудын олборлолтын хэмжээг 2-3 дахин нэмэгдүүлэх боломжтой болохоос гадна байнгын 2000 орчим ажлын байр бий болохоос гадна жилд 20-28 сая ам.долларын татван төлнө гэсэн тооцоо гарчээ.

Артист Davaidasha, Morningstar нар хар тамхины хэргээр шалгагдаж байна

Цагдаагийн ерөнхий газрын Хар тамхитай тэмцэх газрын алба хаагчид шалгалтын ажиллагаа явуулж, хар тамхи, мансууруулах бодис хэрэглэж, хадгалсан бүлэг этгээдүүдийг илрүүлжээ. Өнгөрсөн бямба гарагт буюу есдүгээр сарын 3-ны өдөр нийслэлийн Сүхбаатар дүүргийн нутаг дэвсгэрээс артист Davaidasha, Morningstar нарыг хар тамхи, мансууруулах бодисын төрөл, сэтгэцэд нөлөөт ургамал хэрэглэсэн гэх үндэслэлээр түр саатуулжээ.

Дээрх иргэдээс биологийн дээж авч шинжлэхэд, хар тамхи мансууруулах бодис хэрэглэсэн болох нь тогтоогдсон гэх бөгөөд Хар тамхитай тэмцэх газарт хэрэг үүсгэн, үргэлжлүүлэн шалгаж байна.

БСШУЯ: Хуурамч дипломын асуудлыг шалгаж байх хугацаанд гол бичиг баримт, компьютерийн хард диск алга болсон

Боловсрол, Шинжлэх Ухааны Яамнаас багш нарын боловсролын баримт бичигт хийсэн шалгалтын үр дүн, үүнтэй холбоотой цаашид хэрэгжүүлэх ажлын талаар мэдээлэл хийж байна.

БШУ-ны сайдын мэдээлснээр хуурам дипломын асуудлын тухай эцэг эхчүүдээс олон хүсэлт өргөдөл ирүүлсэн гэсэн юм байна. Шалгалтыг 3-р сарас эхлүүлэн зургаан сарын хугацаанд хийсэн аж. Шалгалт хийж байх хугацаанд шалгалтыг зогсоох, ажлын хэсгийн хүмүүсийг дарамтлах, мөн 400 гаруй хуурамч дипломын мэдээлэл байж магадгүй гэсэн цаасаар баталгаажуулсан цаасан хайрцаг алдагдсан бол өнгөрсөн амралтын өдрүүдэд бичиг баримт, компьютерын хард диск алга болсныг онцолсон юм.

Шалгалтын ажлын хүрээнд улсын хэмжээнд нийт 71 мянган дипломыг шалгасан байна. Энэхүү 71 мянган диплом нь боловсролын салбарын ЕБС, СӨБ-ын хэмжээнд 51 мянга гаруй багш сурган хүмүүжүүлэгч нар байгаа ажээ. Шалгалтаар 724 хуурамч дипломыг илрүүлсэн бол 2000 гаруй сэжигтэй диплом байгаа хэмээн үзэж байгаа аж. Зөрчилтэй хэмээн үзсэн дипломыг ангилахад дипломын дугаар давхардсан 454, Бүртгэлд огт байхгүй дугаар бичиж хуурамчаар үйлдсэн 139, өмнөх болон дараагийн шатны боловсролын бичиг баримтийн зөрчил 109, Боловсролын байгууллага буюу сургуулийн буруутай үйлдлээс үүдсэн болон боловсролын удирдах дээд байгууллагын алдаанаас үүдсэн зөрчлүүд түгээмэл байжээ.

Орон нутгийн машин Улаанбаатар хотод зорчихдоо км тутамд 45 төгрөг төлнө

Улаанбаатар хотын авто замын түгжрэлийг бууруулахаар 420 тэрбум төгрөгийг нийслэлийн төсөвт суулгаж байгаа буюу улсын төсөвт төвлөрүүлэх мөнгийг үлдээж буй юм. Энэ хүрээнд 36 цогц ажил хэрэгжүүлж байгаагийн нэг чухал ажил нь улсын хэмжээнд тээврийн хэрэгслийн гэрчилгээг цахим болгож байгаа юм байна. Ингэснээр түгжрэлийг бууруулах эдийн засгийн хөшүүрэг ашиглах олон боломж гарч ирж байгааг Нийслэлийн Авто замын түгжрэлийг бууруулах нэгдсэн төслийн захирал Ч.Батзориг танилцууллаа.

Өөрөөр хэлбэл, Улаанбаатар хотын бүртгэлтэй бүх тээврийн хэрэгслийн гэрчилгээг цахимжуулж, тагжуулах ажлыг 2023 оны нэгдүгээр сар гэхэд хэрэгжүүлж дуусгахын зэрэгцээ зам тээврийн ухаалаг системийг хийх ажил ид хийгдэж байгаа аж.

Үүний үр дүнд Улаанбаатар хотын замын хөдөлгөөнд оролцсон километр тутамд нийслэлд бүртгэлтэй автомашин 15 төгрөг, орон нутгийн автомашин 45 төгрөг төлдөг байх зохицуулалтыг Түгжрэлийг бууруулах үндэсний хороонд удахгүй өргөн барихаар төлөвлөжээ.

Улаанбаатар хотын иргэд жилд дунджаар 11,000 км орчим явдаг гэсэн тооцоололтой аж. Харин нийслэлд ойр орон нутгийн машинууд амралтын өдрүүдэд хотод таксинд явах тохиолдол нэлээд байгааг хэллээ.

Иймд түгжрэлийг бууруулах ажлын хүрээнд орон нутгийн автомашинуудыг Улаанбаатар хот руу орохдоо машинаа үлдээх нөхцөлийг хангах үүднээс их багтаамжийн зогсоолуудыг барьж байгаа ба 110 га газрыг улсын тусгай хэрэгцээнд авахаар Засгийн газарт оруулж байгаа аж.

Ингэснээр хөдөө орон нутгаас таван буюу чиглэлээс ирж байгаа дөрвөн хэсэг газарт орон нутгийн машиныг үнэгүй зогсоож хот руу орох боломжийг бүрдүүлсэн том зогсоол хийж, тэр чиглэлд богино эргэлтийн автобус явуулахаар төлөвлөжээ.

Захирал Ж.Соронзонг үүрэгт ажлаас нь чөлөөлжээ

БШУ-ы сайд Л.Энх-Амгалан өнгөрсөн лхавга гарагт Монгол-Оросын хамтарсан III сургуулийн захирал Ж.Соронзонг үүрэгт ажлаас нь чөлөөлөх тушаал гаргажээ. Энэхүү тушаалын хэрэгжилтийг хангах үүргийг НИТХ-ын дарга, III сургуулийн удирдах зөвлөлийн дарга Ж.Батбаясгаланд өглөө. Тушаалыг Оросын талд хүргүүлэн, зөвшилцөж, Ж.Соронзон захирлын хөдөлмөрийн гэрээг энэ өдрөөр дуусгавар болохыг даалгалаа.

Түүнийг хүний үндсэн эрхийг зөрчиж, сэтгүүлчийг гарал үүсэл, яс үндэс, нийгмийн байдлаар нь ялгаварлан гадуурхсан хэмээн үзэж, үүрэгт ажлаас нь чөлөөлөхөөр болжээ.

BOLOD ДОЛОО ХОНОГИЙН ТОЙМ: Улс төрчдийн маргааны сэдэв болсон Тавантолгойн төмөр зам ашиглалтад орж, 700 гаруй хуурамч дипломыг илрүүлсэн ДОЛОО ХОНОГ
Tweet
Bolod.mn