BOLOD.MN сайт долоо хоног бүрийн ням гараг бүр улс төр, эдийн засаг, нийгмийн хүрээнд болж буй үйл явдлуудыг тоймлон хүргэдэг уламжлалтай. Эдгээр өдрүүдэд Үндэсний номын баяр 2022 арга хэмжээ 32 дахь жилдээ улс орон даяар нэгэн зэрэг эхэллээ. Мөн түүнчлэн Узбекистан улсад болж буй төрийн дээд албан тушаалтнуудын айлчлал болж байна. Айлчлалаар Ерөнхийлөгч У.Хүрэлсүх, ОХУ-ын Ерөнхийлөгч Владимир Путин, БНХАУ-ын удирдагч Ши Жиньпин нар уулзалт олон талт хэлэлцээр хийлээ. Эдгээр болон бусад онцлох үйл явдлуудыг тоймлон хүргэж байна.

Ерөнхийлөгч У.Хүрэлсүх ОХУ болон БНХАУ-ын ерөнхийлөгч нартай уулзлаа

Монгол Улсын Ерөнхийлөгч У.Хүрэлсүх, ОХУ-ын ерөнхийлөгч Владимир Путин, БНХАУ-ын дарга Ши Жиньпин нарын гурван талт уулзалт энэ сарын 15-нд болсон. Узбекистаны Самарканд хотноо болж байна. ОХУ ба Хятадын удирдагчид Шанхайн хамтын ажиллагааны байгууллагын хуралдаанд оролцохоор Самаркандад ирээд буй. Энэ хүрээнд ОХУ-ын ерөнхийлөгч Иран, Киргиз, Пакистан, Туркменистан, Узбекистаны удирдагчидтай уулзах аж. Харин түүний дараагаар Азербайжан, Энэтхэг, Туркийн удирдагчидтай уулзах юм байна.

Шанхайн хамтын ажиллагааны байгууллагын гишүүн орнуудад Хятад, Казахстан, Киргизстан, Орос, Тажикистан, Узбекистан, Энэтхэг, Пакистан багтдаг. Харин Афганистан, Беларусь, Монгол, Иран улсууд ажиглагч орны тоонд багтаж байна. Армен, Азербайжан, Камбож, Балба, Шри-Ланка, Турк зэрэг нь түнш орнууд юм. Түүнчлэн сүүлийн үед ШХАБ-т элсэх хүсэлтээ илэрхийлсэн улс ч хэд хэд байгааг “Tass” агентлаг мэдээллээ.

Кремлийн хэвлэлийн төлөөлөгч Дмитрий Песков уг уулзалтын талаар мэдээлэхдээ олон улсын чухал харилцаа холбооно тогтооно гэж мэдэгдсэн. Одоогоор илүү дэлгэрэнгүй мэдээлэл өгөөгүй байна.

Үндэсний номын баяр улс орон даяар эхэллээ

Үндэсний номын баярыг энэ жил 32 дахь удаагаа зохион байгуулж байна. Энэ удаагийн номын баярын үндсэн үйл ажиллагаа Д.Сүхбаатарын талбайд энэ сарын 16-нд буюу өчигдөр 13:00 цагт нээсэн юм.
"Илүү их уншъя" уриатайгаар зохион байгуулж буй "Номын баяр 2022" арга хэмжээ нь бүх нийтийн уншлагыг дэмжих, номын сангийн өв санг арвижуулах, үндэсний бичиг соёлыг сурталчлах, хүүхэд залууст ном эрдмийг түгээн дэлгэрүүлэх зорилготой.

Номын баярын хөтөлбөрт:

· “Үндэсний бичиг соёл, номын өдрүүд-2022”,
· “Хүүхдийн номын хүрээ”,
· “Үндэсний бичиг соёл, номын хүрээ”,
· “Соёлын бүтээлч, үйлдвэрлэлийн хүрээ”,
· Шинэ номын үзэсгэлэн, төрөлжсөн ном хэвлэлийн худалдаа,
· Урлагийн тоглолт зэрэг 15 хөтөлбөрийн хүрээнд орон даяар гурав хоног үргэлжилнэ.

УИХ-ын чуулганаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төслийн хэлэлцүүлгийг хийн баталсан. Нийтээр тэмдэглэх баярын болон тэмдэглэлт өдрүүдийн тухай хуулийн 5.1.17-д "Үндэсний бичиг соёл, номын өдрүүд: тав болон есдүгээр сарын гурав дахь долоо хоногийн Бямба, Ням гариг” гэж тусгасны дагуу энэхүү өдрүүд албан ёсны тэмдэглэлт өдөр болсон юм.

Монгол Улсын Ерөнхийлөгчийн 2012 оны “Номын баярын өдөр тэмдэглэх тухай” 158 дугаар зарлигаар жил бүрийн есдүгээр сарын гурав дахь долоо хоногийн Бямба гаригт “Номын баярын өдөр”-ийг улс орон даяар тэмдэглэхээр шийдвэрлэсэн. Харин энэ жилийн хувьд номын баярын онцлог нь бүх нийтээр тэмдэглэх хуультай болсон гэдгээрээ илүү өргөн цар хүрээг хамарсан аж. Жил бүр уламжлал болгон зохион байгуулдаг тус үйл ажиллагаа цар тахалтай холбоотойгоор аймгуудад харилцан адилгүй зохион байгуулахаар болсон байна. Зарим аймагт задгай талбай, цахим гэх мэтчилэн байхаар зохицуулалт хийжээ. Номын баярын албан ёсны нээлт маргааш буюу есдүгээр сарын 16-18-нд болох бөгөөд олон шинэ ном нээлтээ хийхээр хөтөлбөрт тусгагджээ.

Хүүхдээ тэжээж чадахгүй байгаа тул өргүүлнэ гэх зарыг цагдаагийн байгууллага шалгаж байна

Хоёр настай хүүхдээ тэжээж чадахгүй байгаа тул өргөж авах айл хайсан зарыг фэйсбүүк группт нийтэлжээ. Зар нийтэлсэн эмэгтэй хүүхдээ өргүүлэх болсон шалтгаанаа "Хоёр нас долоон сартай хүүгийн аав нь өөр хүнтэй суугаад хаяад явсан. Төрөл садан нь ч хүүг ад үзэж байгаа тул би хүүхдээ тэжээж чадахгүй байна. Тиймээс өргөх айл хайж байгаа" хэмээн тайлбарласан байна.

Энэхүү асуудлын дагуу цагдаагийн байгууллагаас тодруулахад "Холбогдох мэдээллийг тухайн аймгийн цагдаагийн хэлтэс рүү явуулсан. Мэдээллийн дагуу Эрүүгийн цагдаагийн алба шалгаж байгаа гэх мэдээллийг өгсөн" гэлээ.

Машинд зам тавьж өгсөнгүй хий буудаж танхайрсан хэрэг гарлаа

Шороон зам дээр зам тавьж өгөөгүй гэх шалтгаанаар маргалдаж, "Сайга" загварын галт зэвсгээр айлгах зорилготой дээшээ хий буудсан хэрэг бүртгэгджээ. Тодруулбал, Цагдаагийн байгууллагад энэ оны есдүгээр сарын 11-ний өдрийн 12:31 цагт Баянзүрх дүүргийн 20 дугаар хорооны нутаг дэвсгэрт “Бурхантын аманд машинтай хүн буудсан” гэсэн дуудлага, мэдээлэл бүртгэгджээ. Дуудлага, мэдээллийн дагуу тус дүүрэг дэх цагдаагийн газрын гуравдугаар хэлтсээс шалгахад 47 настай, эрэгтэй "Б" гэгч нь Nissan X-Trail маркийн тээврийн хэрэгслээр замын хөдөлгөөнд оролцох үедээ Corolla Fielder маркийн тээврийн хэрэгсэл жолоодож явсан 44 настай, эрэгтэй "Б" гэгчийг шороон зам дээр зам тавьж өгсөнгүй гэх шалтгаанаар маргаж, "Сайга" загварын галт зэвсгээр түүнийг айлгах зорилгоор дээшээ нэг удаа буудсаныг шуурхай илрүүлэн галт зэвсгийг хураан авч, мөрдөн шалгах ажиллагааг явуулж байна.
Иймд иргэд та бүхэн галт зэвсгийг хуулийн дагуу ашиглаж, анхаарал болгоомжтой байхыг Цагдаагийн ерөнхий газраас сэрэмжлүүлж байна.

Охидод бэлгийн дарамт үзүүлсэн боксын шигшээ багийн дасгалжуулагч Б.Пүрэв-Очирыг үүрэгт ажлаас нь чөлөөлжээ

Монгол Улсын боксын шигшээ багын тамирчин охидод бэлгийн дарамт үзүүлж, хэл амаар байнга доромжилж байсан гэх асуудал 2017 оноос үүсчээ. Энэ талаарх гомдлыг тус холбооны тамирчин охид хамтран Олимпийн холбоонд хүргүүлсэн байна. Энэ дагуу Монголын боксын холбооны ахлах дасгалжуулагч Б.Пүрэв-Очирыг 9-р сарын 15-ны өдөр

3 / 3

ажлаас нь чөлөөлсөн талаар ХЗДХ-ийн сайд Х.Нямбаатар өөрийн твиттер хуудсандаа жиргэжээ.

Ингэхдээ, "Боксын холбооны Удирдах зөвлөл хуралдаж эмэгтэй багийн дасгалжуулагчийг чөлөөлсөн. Мөн Боксын холбооны зүгээс түүнтэй холбогдох хэргийг холбогдох хууль тогтоомжийн хүрээнд шалгуулахаар цагдаагийн байгууллагад хандсан болно" хэмээн жиргэжээ.

Эрээн хотод хөл хориог цуцалж, хэвийн нөхцөлд шилжжээ

Эрээн хотод өнгөрсөн наймдугаар сард хөл хорио тогтоосонтой холбоотойгоор Замын-Үүдийн боомтын ачаа тээврийн эргэлт саарсан. Есдүгээр сарын 12-нд Эрээн хотын хэмжээнд Covid-19-ийн халдвар, тархалтын шинжилгээ хийж, гарсан үр дүнд үндэслэн Мягмар гаригийн 17:00 цагаас эхлэн тус хотын дунд эрсдэлтэй гурван бүсээс бусад газрын хөл хориог цуцлах, хот хоорондын зорчигч тээврийн үйлчилгээг сэргээх шийдвэр гаргасан юм.

Тэгвэл өнөөдрөөс дунд эрсдэлтэй байсан бүсүүдийн зэрэглэлийг бууруулж бага эрсдэлтэй бүс болгон зарлаж, Эрээн хотыг хэвийн нөхцөлд шилжсэн шийдвэрийг гаргажээ.

Дээрх шийдвэртэй холбоотойгоор Эрээн хотын Шуурхай штабаас зохион байгуулалтын дараах арга хэмжээг авахаар болсон байна. Тухайлбал:

· Хотоос гарах иргэд 48 цагийн ПСР шинжилгээ хийлгэж нэвтрэх
· Өндөр эрсдэлтэй бүсээс ирж буй иргэд долоо хоног нэгдсэн тусгаарлалтад байх
· Дунд эрсдэлтэй бүсээс ирсэн иргэд долоо хоног гэрийн тусгаарлалтад байх
· Бусад газраас ирсэн иргэд оршин суугаа газраа гурав хоногт хоёр удаагийн шинжилгээ хийлгэсний дараа гарах,
· Хотын бусад олон нийтийн үйлчилгээний газруудыг Шуурхай штабын шийдвэр гартал түр хугацаагаар нээхгүй байх гэжээ.

BOLOD ДОЛОО ХОНОГИЙН ТОЙМ: Гурван улсын төрийн тэргүүн нарын айлчлал боллоо
Tweet
Bolod.mn