BOLOD ДОЛОО ХОНОГИЙН ТОЙМ: Ч.Маралмаад холбогдох хэргийг прокурорт шилжиж, гэр бүл батлуулахад ДНХ өгдөг болно

2022-11-19

BOLOD.MN сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд гэр бүлийн шинэчилсэн найруулагад өөрчлөлт оруулах тухай мэдээллийг Хууль зүйн сайд Х.Нямбаатар мэдээлсэн. Түүнчлэн долоон машн мөргөж, хоёр хүүхдийг шүргэн бэртээсэн Ч.Маралмаад холбогдох хэргийн мөрдөн байцаалтын ажиллагаа дуусаж, шүүхэд шилжүүлэх саналтайгаар прокурорт шилжүүлжээ.

Тавантолгойт Гашуунсухайт тээврийн хэрэгслийн мэдээлэл шилэн боллоо

“Эрдэнэс Монгол” ХХК Тавантолгой-Гашуунсухайт чиглэлийн хатуу хучилттай авто замаар зорчиж буй тээврийн хэрэгслийн мэдээллийг ил тод нээлттэй болжээ. Өөрөөр хэлбэл хүссэн иргэн, компани аж ахуйн нэгж http://erdenesmongol.mn цахим хуудаст нэвтрэн танилцах боломжтой болсон байна.

Тус компани Тавантолгой-Гашуунсухайт чиглэлийн 239 км хатуу хучилттай авто замын байнгын бэлэн байдал, бүртгэл мэдээллийг хариуцан ажилладаг. Энэхүү авто зам дагуу хоёр байршилд 2022 оны аравдугаар сарын 1-ний өдрөөс тээврийн хэрэгслийн дугаар танигч бүхий ухаалаг камерын систем нэвтрүүлэн, хөндлөнгийн хяналтыг сайжруулж эхэлжээ.

Хяналтын камерын систем байршуулснаар нүүрс тээврийн автомашинууд шалган нэвтрүүлэх цэгийг тойрч гарах, нүүрс тээврийн том оврын автомашиныг жижиг оврын гэж бүртгэх, зарим автомашиныг бүртгэлгүй, хураамжгүй нэвтрүүлэх цаашлаад хууль бус нүүрс тээврийн зөрчлүүд арилах аж. Хяналтын камерын мэдээллийг ЭНД дарж үзэх боломжтой юм байна.

Шөнийн тариф хэвийн үргэлжилж байна

Эрчим хүчний зохицуулах хорооны хурлаар “Гэр хорооллын айл өрхийн орой, шөнийн цагт хэрэглэсэн цахилгааны тарифт хөнгөлөлт үзүүлэх тухай” асуудлыг хэлэлцэж шийдвэрлэжээ. Шөнийн тарифын хөнгөлөлт хэвийн үргэлжлэх бөгөөд 21.00 цагаас өглөөний 06.00 цагийн хооронд дараах байдлаар хөнгөлж байна. Үүнд 220 В-ын хүчдэлийн түвшинтэй хэрэглэгчийн нэг сарын 700 кВт цаг хүртэл хэрэглээг 100 хувь, түүнээс их хэрэглээг 50 хувиар, 380 В-ын хүчдэлийн түвшинтэй хэрэглэгчийн 1 сарын 1500 кВт.цаг хүртэл хэрэглээг мөн 100 хувь, түүнээс их хэрэглээний 50 хувийг хөнгөлнө. Энэхүү хөнгөлөлтийг санхүүжилтийн эх үүсвэртэй уялдуулан 2022 оны арванхоёрдугаар сарыг дуустал болон 2023 оны 1, 2, 3 ба 11, 12 дугаар сарыг дуустал хугацаанд мөрдүүлэхээр шийдвэрлэсэн. ЭХЗХ-ны дээрх тогтоолыг “Захиргааны хэм хэмжээний акт”-д бүртгүүлэхээр Хууль зүйн яаманд хүргүүлсэн байна. Тогтоол нийтлэгдсэн өдрөөс хүчин төгөлдөр хэрэгжих аж.

ДНХ шинжилгээ өгсний дараа гэр бүлээ батлуулдаг болно

Хосууд ДНХ буюу генийн шинжилгээ өгч ураг садны холбоогүй гэдгээ баталсны дараа гэрлэлтээ батлуулдаг болох нь. Тус зохицуулалтыг ирэх онд батлагдах Гэр бүлийн тухай хуулийн шинэчилсэн найруулгад тусгах талаар ХЗДХ-ийн сайд Х.Нямбаатар хэллээ.

Тэрбээр "Гэр бүлийн хуулийн том алдаа нь цус ойртолтын асуудлыг шийдэж чадаагүй. Ирэх онд батлагдах Гэр бүлийн тухай хуульд гэрлэгч хосууд өөрийн аймаг, харьяа дүүргийн эрүүл мэндийн байгууллагад очиж ДНХ-ийн шинжилгээ өгөх шаардлагатай болно. Ах дүү, ураг садны холбоогүй гэдгээ баталсны дараа гэрлэгч хосууд гэрлэлтээ батлуулна" гэлээ. Түүнчлэн ойрын хугацаанд хүн амын ДНХ-ийн нэгдсэн мэдээллийн санг үүсгэх юм байна.

Ж.Энхцэцэг Эрүүл мэндийн сайдын тушаалыг үндэслэлгүй гэж үзэж шүүхэд ханджээ

2022 оны аравдугаар сарын 12-нд “Өргөө” амаржих газрын захирал Ж.Энхцэцэгийг ажлаас нь чөлөөлсөн. Түүний оронд “Амгалан” амаржих газрын дарга Ц.Батболдыг түр томилоод буй. Тэгвэл Ж.Энхцэцэг эмч Эрүүл мэндийн сайд С.Энхболдын ажлаас чөлөөлөх тушаалыг үндэслэлгүй хэмээн шүүхэд хандахаар болжээ.

Эрүүл мэндийн сайд С.Энхболд Ж.Энхцэцэг эмчийг чөлөөлснийхөө дараа тайлбар мэдээлэл хийхдээ “Ж.Энхцэцэг дарга ЭМЯ-ны харьяанд ирээд есөн сар болсон. Энэ хугацаанд ес зүйгүй үйлдэл их гаргасан. Тухайн эмнэлэгт ажиллаж байгаа ажилчид ихэнх нь дарамттай байдаг. Мөн манай хяналт шалгалт орох үеэр камертай ярилцлагад оруулсан. Мөн ярилцлага өгсөн алба хаагчдад дарамт шахалт үзүүлсэн гэх мэдээлэл байна” хэмээсэн.

Зогсож байсан машины араас мөргөснөөс болж, хоёр хүн амиа алджээ

Завхан аймгийн Нөмрөг сумын Нуур багийн “Нүхэн хад” гэдэг газар Увс аймгийн Улаангом сумаас Улаанбаатар хотын чиглэлд зорчиж явсан суудлын автомашин автозамын зорчих хэсэгт зогсож байсан ачааны автомашины хойд талаас мөргөжээ. Ослын улмаас суудлын автомашины бүхээгт хоёр хүн хавчуулагдаж нас барсан байна. Тодруулбал, “Приус-20” загварын суудлын автомашин, “Титан” загварын ачааны автомашины хойд талаас мөргөж, суудлын автомашины бүхээг дотор иргэн Т /29 настай, эрэгтэй/, Б /17 настай, эрэгтэй/ нар хавчуулагдаж нас баржээ.

Хүүхэд гэмтээж, долоон машин мөргөсөн Ч.Маралмаад холбогдох хэргийг прокурорт шилжүүлжээ

Урсгал сөрж долоон машин мөргөж, 12 настай хүүхэд гэмтээсэн осол гаргасан Ч.Маралмаад холбогдох хэргийн мөрдөн байцаалтын ажиллагаа дуусаж, шүүхэд шилжүүлэх саналтайгаар прокурорт шилжүүлжээ. Түүнд холбогдох хэргийн явцын талаар албаны эх сурвалжаас тодруулахад "Тээврийн Цагдаагийн албаны Мөрдөн шалгах хэлтсээс иргэн М нь 2022 оны аравдугаар сарын 10-ны өдөр Баянзүрх дүүргийн 26 дугаар хороо, “Олимп” хотхоны хойд замд Land cruiser 200 маркийн тээврийн хэрэгслийг жолоодож замын хөдөлгөөнд оролцохдоо урсгал сөрж бусдын автомашиныг болон явган хүний замаар явж байсан насанд хүрээгүй С, Э нарыг мөргөсөн хэрэгт мөрдөн байцаалтын ажиллагаа явуулж, хэргийг шүүхэд шилжүүлэх саналтай Тээврийн прокурорын газарт ирүүлсэн, одоо прокурор хянаж байна" гэлээ.

Харин хохирогч охины шүүх шинжилгээний хариу ямар гарсныг Шүүхийн шинжилгээний үндэсний хүрээлэн болон ЦЕГ-аас тодруулахад, энэ тухай прокурорын зөвшөөрөлгүй мэдээлэл өгөх боломжгүй гэдэг хариултыг өгөөд байна. Сануулахад, осол гаргасан 29 настай дээрх иргэн нь жолооны курс төгсөөгүй, жолооч биш гэдэг нь тогтоогдсон бөгөөд тэрбээр найз залуугаа согтуугаар жолоо бариулахгүйн тулд түүний төрсөн ахынх нь машиныг унаж осол гаргасан тухай Цагдаагийн байгууллагаас мэдээлж байв. Мөн түүнийг шүүхээс Монгол Улсын хилээр гарахыг хориглох хязгаарлалт тогтоох таслан сэргийлэх арга хэмжээ аваад буй.