МҮОНРТ-ийн нэр барьж, хөлжигсдийг Д.Цоодол, Г.Чоглоонамжил нарын хөтлөгчид тэргүүлдэг хэрэг үү

2023-06-06

МҮОНРТ-ийн захирал А.Бүрэнбаатарыг энэ оны тавдугаар сарын 25-нд МҮОНРТ-ийн Үндэсний зөвлөлийн шийдвэрээр үүрэгт

ажлаас нь чөлөөлсөн тухай мэдээлэл гарсан. А.Бүрэнбаатар ч ажлаас чөлөөлсөн гэдгийг надад дуулгасан.Гэхдээ тогтоолоо хүлээж аваагүй байна хэмээн хэлсээр лав 10 гаруй хоножээ. Одоогоор түүнийг тамгаа аваад зугатсан гэх мэдээлэл байгаа ч өөрөө нэр төртэйгээр ажлаа хүлээлгэж өгнө гэдгээ илэрхийлсэн. Тэрээр 2021 оны гуравдугаар сард сонгон шалгаруулалтаар захирлын албанд томилогдсон ч 2022 онд АТГ-т шалгуулж байсан. Нийт хоёр жил гаруй МҮОНРТ-ийн захирлаар ажиллаад ажлаа өгч буй. Тус телевизийн хувьд сүүлийн жилүүдэд сахил хүртээд шал дордов гэгчээр Үндэсний зөвлөлийн гишүүд нь бүрэн шахуу солигдож, удирдлага нь шинэчлэгдсэн ч хуучин арга барил, хуучирсан тоног төхөөрөмж, буг болсон хэдэн эрх мэдэлтнээсээ салж чадаагүй гэдгийг багт нь ажиллаж байсан хүмүүс эхнээсээ илчилж байна.

Ердөө гурав хоногийн өмнө Монгол Улсын Гавьяат жүжигчин Ж.Алтанцэцэг Үндэсний телевизэд ажилласан гурван сарынхаа талаар өөрийн сошиал хуудсанд мэдээлэл оруулсан.

Түүний бичсэнээс харвал А.Бүрэнбаатар захирлаас илүүтэйгээр МҮОНРТ-ийн Үндэсний зөвлөлийн дарга М.Наранбаатар тэргүүтэй Үндэсний зөвлөлийн гишүүдийг шүүлтүүрт оруулах нь зүй болжээ.

Гавьяат жүжигчин Ж.Алтанцэцэг ч УИХ-аас томилсон Үндэсний зөвлөлийн гишүүнийг УИХ-аар шалгуулах хүсэлтэй байна гэдгээ илэрхийлсэн. Тэрээр энэ оны нэгдүгээр сарын 27-ноос 4 дүгээр сарын 27-ныг хүртэлх гурван сарын хугацаанд МҮОНРТ-ийн маркетингийн албыг ахалж ажилласан байна. Гэвч Үндэсний зөвлөлийн гишүүн хөтлөгч Д.Цоодолд дарамтлуулсан учраас ажлаас гарах өргөдлөө өгсөн хэмээн бичжээ. Зөвхөн Д.Цоодол төдийгүй “МҮОНРТВ бол бүрдчихсэн хамт олон. Бид ажлаа маш сайн мэддэг авьяаслаг хамт олон гээд хурал хуй дээрээ дарга нараа загнаад байдаг хэсэг хүмүүсээс ч жийрхсэн гэсэн байв. Мөн Үндэсний зөвлөлийн гишүүн нь том хангамжтай, жолооч, цалинтай өрөөтэй. МАН-ын дарга нарын арга хэмжээнд л очдог хүн шүү гээд аймаар том хэмээн үнэхээр нүд нь бүлтийж, чих нь дэлдийж, гайхшаа баржээ. А.Бүрэнбаатар захирлыг ч баримтаа гаргаад зоригтой бай. Ийм хүмүүсээс ангижирч л байж өөрчлөгдөнө. Үндэсний зөвлөлдөө олон нийтийн төлөөллийг оруулж шударга ёс тогтоох хэрэгтэй хэмээн бичсэнийг харвал МҮОНРТВ дотоод зохион байгуулалт, удирдлагын баг гээд бүх л шатандаа явуургүй болсон нь тодорхой харагдаж байгаа юм.

Ж.Алтанцэцэг гавьяатын бичсэнийг нотлох шиг Маркетингийн албаны ажилтан бүсгүй С.Минсэл МҮОНРТВ-ийн маркетингийн албанд ажилласан хоёр жил гаруй хугацаанд өөрт тохиолдсон шударга бус зүйлийн талаар ч үзэл бодлоо илэрхийлсэн байна.

Шинэ хүнийг хэрхэн шоглож, бужигнуулдаг тухай хуучин албаны дарга ТВ-тэй хийсэн бартерээр дуртай газар руугаа нисдэг, идэж уудаг тухай ч хөндөв.

С.Минсэл “Их багагүй бүгд л шат шатандаа хулгай нүүрлэсэн байгууллагаа бодох биш өөрсдийгөө л бодож ажиллах нь их сонин санагдаж гайхдаг. Шударга бус энэ үйлдлүүдээ өөхшүүлээд явж байх сонирхолтой хэсэг бүлэг хүмүүстэй. Нийтийн хурал дээр сонсход тэр хүмүүсийг халж болохгүй гэж Үндэсний Зөвлөл нь ерөнхий захирлаа дарамталдаг ч байх шиг.

Анх ажилд ороод удаагүй байхад эмэгтэйчүүдийн эрхийг хамгаалах өдөр гээд газрынхаа 10 хүнтэй нэг ресторанд орсон. Эхлэл мэдээж гайхалтай заа манай тэр минь энэ минь гээд л.. Эхний хундага бла2 уучлаарай би уухгүй ээ гэтэл албаны дарга маань нэг том харав. Бөөн хөл хөөрцөг болж хорвоогийн хамгийн сайн хүний дүрд тоглоод байж байснаа Та нарт мэнд хүргэх гээд манай ах ирлээ гээд нэр бүхий төрийн өндөр албан тушаалтай хүнийг дагуулаад ороод ирсэн. Тэгснээ Минсэлээ- босоод ир бүжиглэе гэж хэлэхээр нь Үгүй ээ баярлалаа гээд эелдэгээр татгалзтал Архи ууя гэхээр уухгүй, тоглоом шоглоом даахгүй, бүжиг дуу ч байхгүй гээд чанга дуугарахаар нь айсандаа цочоод л боссон. Тэгээд 10 хүний нүдэн дээр (10 уулаа намайг нүдэнд нь нулимс цийлэгнээд суухыг харсан гэрчилнэ дээ тэр үед байсан хүмүүс ) бүжиглэж байхдаа чихэнд Манай ахыг очоод бүжиглүүл гэхээр нь чадахгүй ээ би ширээний хүүхэн биш гээд л хэлээд тавьсан. Гар чанга атгаад чамайг энэ байгууллагад үлдэх эсэхийг би шийддэг шүү. Аятайхан байгаарай. Буруу л харьцаад байна даа гэж инээж байхдаа сүрдүүлсэн үгэнд нь Энэ бол ажлын байрны дарамт шүү та намайг танихгүй хүнтэй хүсэхгүй байхад бүжиглэ гэж хүчээр тулгаж болохгүй гэж хэлээд бушуухан сууж билээ. Хэлтэй амтай тулдаа л тэр дарамтнаас өөрийгөө авч гарсан гэж боддог. Тухайн үедээ уйлмаар л санагдсан дарга болохоор ийм муухай байдаг юмуу Хар багаасаа ТВ-ээр үзэж өссөн MNB гэсэн 3 үсэгний буянд бид бүхний танил болсон нэртэй сүртэй хүмүүсийн муухай нь муухай л хүн байдаг юм байна гэж бодсон доо” гэж бичжээ.

Нэрийг нь бичээгүй болохоос хуучин албаны дарга гэхээр Г.Чоглоонамжил болж таарах нь. Хотын дарга асан өдгөө Турк улсад суугаа Элчин сайд Г.Мөнхбаярын төрсөн дүү. Мөн л МҮОНРТВ-д хөтлөгчөөр ажиллаж байсан нэгэн. Тус байгууллагын сайт дээр Маркетингийн алба гээд Г.Чоглоонамжил даргатай багийн зураг өдгөө ч хэвээр байна.

Хамгийн харамсалтай нь, шинэ үеийн залуус Д.Цоодол, Г.Чоглоонамжил мэт шиг нүүрээ үнэлж, бөгс долоодоггүй гэдгийг гүнээ ухамсарлах цаг нь болсон.

Хэдийгээр хуулиараа МҮОНРТВ нь нийт эфирийн цагийнхаа 2 хувиас илүү зар сурталчилгаа явуулах эрхгүй байдаг ч хамгийн өндөр үнээр сурталчилгаа явуулдаг, тэр байтугай төрийн бүхий л байгууллагын мэдээ мэдээллийг төлбөртэй явуулдгийг хэн хүнгүй мэднэ.

Олон нийтийн гэх хаяг шошготой ч ярилцлагын цагт нь төлбөргүй орно гэж бараг л үгүй. Төрийн албаны хэвлэлийнхэн үүнийг хялбархаан батлаад өгнө.

С.Минсэл бүсгүйн хөндсөн өөр нэг ноцтой асуудал бол байгууллагынхаа мөнгөөр аялсан, зугаалсан, гэрээ тохижуулсан, хувийн дансандаа авсан хүмүүсийн баримт нь байхад энэ нь яагаад хууль бус энгийн зүйл шиг байгааг бүр их гайхдаг шүү гэх үг байлаа.

Гэтэл 800 хүнийхээ цалин мөнгийг хүчрэхгүй байна, нийгмийн даатгал, татварын өртэй гээд санхүүгийн түмэн асуудлынхаа цаана гарч чадахгүй, олигтой контент, нэвтрүүлэг ч бэлтгэдэггүй хэмээн байнга адлуулсаар байгаа тус байгууллагын толгойд хачиг шиг шигдэж, хаан шиг заларсан энэ мэт нөхдийг УИХ, Засгийн газраас шүүрдэнэ үү, шигшэнэ үү ямартай ч үтэр түргэн цэвэрлэхгүй бол шим шүүсийг нь сорсоор, шинэ ирсэн хүмүүсийг үргээсээр суух нь шударга уу.

Байдал иймдээ тулчихсан байхад Үндэсний зөвлөлд салбар, салбарыг төлөөлж сонгогдсон нүд чих болох ёстой гишүүд нь яагаад нүдээ таглаад чихээ бөглөөд сууна вэ.

Ерөнхийлөгч, УИХ, Засгийн газраас томилсон хүмүүстээ анхаарал хандуулахыг хичээнгүйлэн хүсмээр байна.

http://www.toim.mn/article/64591fba