Bolod.mn сайт долоо хоног бүрийн ням гарагт нийгэм, улс төр, эдийн засгийн хүрээнд болж өрнөсөн онцлох үйл явдлыг тоймлон хүргэдэг уламжлалтай. Эдгээр өдрүүдэд улсын хэмжээнд ЭЕШ эхэлсэн ба энэ жилд 15783 сурагч шалгалт өгч байгаа аж. Түүнчлун ЗГ-аас хэрэгжүүлж буй “шувуу” ажиллагааны үйл явц удаашралттай байгаа хэмээсэн ба эрчимжүүлэх ажлыг холбогдох албаны хүмүүст даалгасан байна. Эдгээр болон бусад онцлох мэдээ мэдээллийн тоймыг хүргэж байна.

Шөнийн нийтийн тээврийн үйлчилгээг эхлүүллээ

Зуны улирал эхэлсэнтэй холбогдуулан Улаанбаатар хотын иргэдийн шөнийн цагаар зорчих эрэлтийг хангасан, аюулгүй найдвартай тээврийн үйлчилгээ үзүүлэх зорилгоор зургаан чиглэлд шөнийн нийтийн тээврийн үйлчилгээг эхлүүлэхээр нийслэлийн Нийтийн тээврийн газраас төлөвлөөд байна. 2023 оны зургаадугаар сарын 15-ны өдөр буюу маргаашаас шөнө 02 цаг хүртэл дараах зургаан чиглэлд шөнийн нийтийн тээврийн үйлчилгээг эхлүүлэх юм

Үүнд:

ШҮ:1 “5 шар-Сүхбаатарын талбай” чиглэлийн үйлчилгээг,
ШҮ:2 “Сүхбаатарын талбай-Ботаникийн эцэс” чиглэлийн үйлчилгээг,
ШҮ:3 “Шархад-3, 4-р хороолол” чиглэлийн үйлчилгээг,
ШҮ:4 “3, 4-р хороолол-Өнөр хороолол-ХМК” чиглэлийн үйлчилгээ,
ШҮ:5 “Зунжин худалдааны төв –Ард кино театр” чиглэлийн үйлчилгээ,
ШҮ:6 “МУБИС-Архивын Ерөнхий газар” чиглэлийн үйлчилгээг Иймд иргэд зорчич та доорх зураглалын дагуу зорчино уу.

Чиглэлийн үйлчилгээтэй холбоотой санал хүсэлтийг 7004-4040 дугаарын утсанд 24 цагийн турш хүлээн авч байна.

Сэлэнгэ аймгийн орлогч даргын хэргийн шалгаж дуусчээ

Монголын нэр бүхий төрийн албан хаагч ажлын айлчлал хийж байх үедээ бэлгийн хүчирхийллийн хэрэгт сэжигтнээр татагдсан болохыг Өмнөд Солонгосын "KBS"телевиз /2023.06.05/ мэдээлсэн. Солонгос иргэдийн зүгээс Монголын төрийн албан хаагчдыг Солонгост нэвтрүүлэхгүй байх санал сэтгэгдлийг олон нийтийн сүлжээнд бичиж байв. Энэ хэргийн явцын талаар Монгол Улсаас БНСУ-д суугаа Элчин сайдын яамны Консулын хэлтсийн дарга Б.Тэнүүнээс тодруулахад "Сэлэнгэ аймгийн орлогч даргатай холбоотой хэргийг шалгаад дуусч байна. Хохирогчийн мэдүүлгээс их зүйл шалтгаална. Суугаа орны хуулийн дагуу шийдвэрлэнэ. Энэ хэргээс болж монгол иргэдийн виз гаргахгүй байх асуудал үүсээгүй. Тийм асуудал огт байхгүй. Манайд албан ёсоор энэ асуудлаар хандсан иргэн байхгүй" гэв.

Хэргийг тодруулбал, Сэлэнгэ аймгийн Мандал сумын Засаг даргын орлогчийг Чэжү аралд хийсэн айлчлалынхаа үеэр бэлгийн хүчирхийлэл үйлдсэн хэрэгт буруутган цагдаа нар баривчилсан.

Монголын язгуур урлагийн тоглолт, үзүүлбэрийн хамт зочилсон албаныхныг тус арлын удирдлагууд хүндэтгэлтэй хүлээн авч уулзсан байна. Тэд үйл ажиллагаа дуусаад буудалд амрахдаа архидан согтуурч улмаар орлогч дарга орчуулагчаар ажиллаж байсан монгол эмэгтэйд бэлгийн хүчирхийлэл үйлдсэн хэрэгт буруутгагдаад байгаа юм.

БНСУ-ын томоохон хэвлэл мэдээллийн хэрэгслээр уг хэргийн талаар мэдээлэхдээ “Тухайн үед хохирогч өрөөнөөсөө гарч буудлын ажилчдаас тусламж хүссэн бөгөөд тэр даруй цагдаа дуудсан. Сэжигтэн нь өнгөрсөн дөрөвдүгээр сард болсон Чежү арлын чуулганд айлчилсан Монгол Улсын Сэлэнгэ аймгийн Засаг даргын төлөөлөгчдийг мөн дагалдан явсан хүн юм. Тэрбээр үйлдвэрлэл, соёлын солилцоог өргөжүүлэхэд манлайлан оролцож байсан хүн“ гэж мэдээлж байв.

БНСУ-ын виз мэдүүлэх болон тус улсад зорчиж буй иргэдийн анхааралд:

БНСУ-ын виз мэдүүлж байгаа иргэн нэн тэргүүнд өөрийн зорилгод нийцсэн ангиллын визийг мэдүүлэх, баримт бичгийн бүрдлийг үнэн зөв, сайтар хангаж, зорчих зорилгоо бүрэн тодорхойлох шаардлагатай /Виз мэдүүлэхтэй холбоотой дэлгэрэнгүй мэдээллийг БНСУ-ын ЭСЯ-ны цахим хуудаснаас авна уу/.
Виз мэдүүлж байгаа иргэний гэр бүлийн гишүүн, ойрын төрөл садан нь БНСУ-д визийн хугацаа хэтрүүлж оршин сууж байгаа эсхүл оршин сууж байсан, аливаа гэмт хэрэг, зөрчилд холбогдож байсан тохиолдолд виз мэдүүлэгчид виз олгохоос татгалзах магадлалтайг анхаарна уу.
Зохих ангиллын виз авч БНСУ-руу зорчиж буй иргэд өөрийн аяллын зорилгыг нотлох баримт бичиг, тус улсад байх хугацаандаа байрлах газар, зочид буудлын баталгаажсан захиалга, хаягийг сайтар бэлтгэн биедээ авч явахыг анхаарна уу. Виз мэдүүлэх үедээ өгсөн мэдээллээ өөрчлөх, очоод байрлах хаягаа тодорхой хэлж чадахгүй байх, аяллын зорилгоо тодорхойлж, нотолж чадахгүй зэрэг нь БНСУ-ын хилээр гадаадын иргэдийг нэвтрүүлэхгүй байх үндэслэл болдог.
БНСУ-ын ЭСЯ-наас олгосон виз нь тус улсын хилээр нэвтрэх бүрэн баталгаа биш бөгөөд аливаа улсын Хилийн шалган нэвтрүүлэх алба, Цагаачлалын алба нь гадаадын иргэнийг өөрийн улсын хилээр нэвтрүүлэх эсэх асуудлыг газар дээр нь буюу хилийн шалган нэвтрүүлэх цэгт шийдвэрлэх бүрэн эрхтэй байдаг. Өөрийн улсын дотоодын хууль, тогтоомжийн хүрээнд хийж буй энэхүү ажиллагаанд аливаа гадаад улсын төрийн байгууллага, хувь хүн хөндлөнгөөс оролцох боломжгүй.
БНСУ-ын Цагаачлалын албаны мэдээллээр 2023 оны тавдугаар сарын байдлаар Монгол Улсын 55.329 иргэн тус улсад оршин сууж байгаагаас 17.749 иргэн буюу 32 хувь нь визийн хугацаа, нөхцөлийг зөрчин оршин сууж байна. Түүнчлэн, өдөрт дунджаар 70 орчим монгол иргэн БНСУ-д оршин суух визийн хугацаагаа хэтрүүлж байгаа нь тус улсыг зорих, виз мэдүүлэх манай иргэдэд сөргөөр нөлөөлж байгаа талаар мэдээлсэн болно.

Иймд, БНСУ руу зорчиж буй иргэд зорчих зорилгодоо нийцүүлэн, визийн хугацаагаа хэтрүүлэхгүй зорчиж, суугаа улсын хууль тогтоомж, дүрэм журмыг чанд дагаж мөрдөхийг уриалж байна. Гадаад харилцааны яамны зүгээс иргэдийнхээ БНСУ-д зорчих нөхцлийг хөнгөвчлөх чиглэлээр солонгосын талтай үргэлжлүүлэн хамтран ажиллаж, шат дараатай арга хэмжээг авч хэрэгжүүлж байна гэжээ.

Элсэлтийн ерөнхий шалгалт эхэллээ

Улсын хэмжээнд Элсэлтийн ерөнхий шалгалт зургадугаар сарын 14-нд нэгдсэн журмаар эхэллээ. Нийслэлийн хэмжээнд 24 шалгалтын байранд 15,783 сурагч шалгалт өгөх юм. Элсэлтийн ерөнхий шалгалт зургаадугаар сарын 14-18-нд үргэлжлэх бөгөөд Улаанбаатар хотод их, дээд сургуулийн 90 гаруй хувь нь байдаг тул энэ өдөр замын ачаалал нэмэгдэх, түүнээс шалтгаалж элсэгчид шалгалтаас хоцрох зэрэг асуудал үүсдэг тул дараах зохицуулалтыг хийхээр болжээ.

Элсэлтийн ерөнхий шалгалт өгч буй сурагчдыг шалгалтаа амжилттай өгөхөд нь дэмжлэг үзүүлэх зорилгоор дараах зохицуулалтыг хийнэ.

Элсэлтийн ерөнхий шалгалт авах сургуулийн байруудад цагдаа ажиллаж, аюулгүй байдлын болон замын түгжрэлийн зохицуулалт хийнэ.
Элсэлтийн ерөнхий шалгалт авах сургуулийн тог цахилгаан, ус дулааны хангамжийн аюулгүй байдлыг нийслэлийн холбогдох байгууллагууд анхаарч ажиллана.
Шалгалтын төвүүдийн ойролцоо дуу чимээ гаргахгүй байх, зам засварын ажил гүйцэтгэхгүй байх, усны хязгаарлалт хийхгүй байх зэрэгт анхаарч ажиллана.
Шалгалт өгч буй сурагчид шалгалтын батламж хуудсаа үзүүлээд тухайн өдрөө нийтийн тээврээр үнэ төлбөргүй зорчих зохицуулалтыг хийнэ гэлээ.

GS-25 дэлгүүрт бага насны хүүхдээ орхиж явсан эмэгтэйг олжээ

Цагдаагийн байгууллагад 2023 оны зургадугаар сарын 06-ны өдөр Чингэлтэй дүүргийн 5 дугаар хорооны нутаг дэвсгэрт байрлах “GS25” дэлгүүрт бага насны хүүхдээ орхиж явсан гэх дуудлага, мэдээлэл бүртгэгдсэн.

Чингэлтэй дүүргийн цагдаагийн газрын алба хаагчид хүүхдээ орхиж явсан гэх эмэгтэйг өнөөдөр /2023.06.12/ Сонгинохайрхан дүүргийн нутаг дэвсгэрээс олж тогтоожээ. Эрүүгийн хуулийн 16.3 дугаар /Хүүхдийг хаях, төөрүүлэх, тэнүүчлэлд хүргэх/ зүйлд зааснаар “Хуулиар хүлээсэн асран хамгаалах, харгалзан дэмжих үүргээсээ зайлсхийж хүүхдийг хаясан, орон гэрээ олох боломжгүй газар зориуд орхисон, хүүхдийг оршин суугаа газраас нь хөөж тэнүүчлэхэд хүргэсэн бол нэг жилээс таван жил хүртэл хугацаагаар хорих, хохирогчийн эрүүл мэндэд хүнд хохирол учирсан, хохирогч нас барсан бол таван жилээс арван хоёр жил хүртэл хугацаагаар хорих ял шийтгэхээр хуульчилсан байдаг. Иймд эцэг, эх, асран хамгаалагч нар Гэр бүлийн тухай хуулийн 10 дугаар зүйлийн 10.3 дахь хэсэгт заасан “Гэрлэгчид нь бие биедээ үнэнч байх, хүүхдээ өсгөн хүмүүжүүлэх, гэр бүлийн гишүүд нь бие биеэ халамжлах, хүндэтгэх, тэжээн тэтгэх, туслах, гэр бүлд шаардагдах эдийн засгийн нөхцөлийг бүрдүүлэх, хэн нэгнийхээ эрхийг зөрчихгүй, бие биеэ аливаа хэлбэрээр хүчирхийлэхгүй байх” зэрэг хууль тогтоомжоор хүлээсэн эрх, үүргээ хэрэгжүүлж, хүүхдийн эрхийг хангахыг уриалж байна.

Дээрх хэргийн мөрдөн шалгах ажиллагаа үргэлжилж байна.

Хахууль авч байгаад үйлдэл дээрээ баригдсан “ДЦС-3” ТӨХК-ийн захирал Л.Эрхбаатарт холбогдох хэрэг прокурорт шилжүүлжээ

Эрүүгийн цагдаагийн албаны Эдийн засгийн гэмт хэрэгтэй тэмцэх газраас өнгөрсөн оны есдүгээр сард /2022.09.06/ ДЦС-3 -ын гүйцэтгэх захирал Л.Эрхбаатарыг бусдаас их хэмжээний мөнгө авч байсныг газар дээр нь илрүүлэн баривчилсан талаар бид тухайн үед мэдээлж байсан билээ.

Тодруулбал, ДЦС-3 -ын гүйцэтгэх захирал Л.Эрхбаатар нь "Хасу Эрчим" ХХК-ийн гүйцэтгэх захирал Б.Бат-Эрдэнээс тендер сонгон шалгаруулалтад тэнцүүлж өгсний авлигалд их хэмжээний мөнгө авч байгаад хуулийнханд баригдсан байдаг. Улмаар түүнийг прокурорын зөвшөөрлийн дагуу 461-р хорих ангид цагдан хорьж, шалгалтын ажиллагааг үргэлжлүүлж байсан юм.

Тэгвэл түүнд холбогдох хэргийг АТГ-аас шалгаж дуусаад хэргийг шүүхэд шилжүүлэх саналтайгаар прокурорт шилжүүлсэн байна.

Шувуу ажиллагааны хүрээнд эрэн сурвалжлах ажлыг эрчимжүүлнэ

Оршин суугаа улс, хаяг нь тогтоогдсон 25, оршин суугаа улс нь тогтоогдоогүй байгаа 22 этгээдийг эрэн сурвалжлах ажлыг эрчимжүүлэхийг даалгав.

Авлигатай тэмцэх таван Ш ажиллагааны нэг “Шувуу” ажиллагааны хүрээнд авч хэрэгжүүлсэн арга хэмжээний талаар Хууль зүй, дотоод хэргийн сайд Х.Нямбаатар Засгийн газрын хуралдаанд танилцуулжээ. Үүнтэй холбогдуулан Бүгд Найрамдах Киргиз Улсад хэрэгт холбогдон хоригдож байгаа нэг, Бүгд Найрамдах Казахстан Улсад хэрэгт холбогдон шалгагдаж байгаа гурав, БНСУ-д байгаа зургаа, БНХАУ-д байгаа хоёр зэрэг оршин суугаа улс, хаяг нь тогтоогдсон нийт 25 этгээдийг шилжүүлэн авч ирэх болон оршин суугаа улс нь тогтоогдоогүй байгаа нийт 22 этгээдийг эрэн сурвалжлах ажлыг эрчимжүүлж ажиллахыг даалгасан байна.

Койн, токены арилжааг зогсоожээ

УИХ-аас “Виртуал хөрөнгийн үйлчилгээ үзүүлэгчийн тухай хууль” баталж, өнгөрсөн оны 2 дугаар сард мөрдөж эхэлснээс хойш 66 хуулийн этгээд 66 койн, токен гаргаж 970,1 тэрбум төгрөг анхдагч зах зээлээс татан төвлөрүүлжээ.

Энэхүү 66 койн, токеноос 41 нь 12 виртуал хөрөнгийн үйлчилгээ үзүүлэгч биржүүдэд арилжаалагдсанаас койн, токений 25 арилжааг зогсоогоод байгааг Цагдаагийн ерөнхий газрын Эрүүгийн цагдаагийн алба мэдээлэв.

Криптовалютын өндөр нууцлал, аюулгүй байдал нь олон улсын мөнгөн гүйлгээг хялбаршуулж, шимтгэлийг багасгасан хэдий ч дундын зуучлагчгүй хийж буй гүйлгээ нь гэмт этгээдүүдийн бохир мөнгөө шилжүүлэх арга хэрэгсэл болж байгаа. Энэ төрлийн гэмт хэргийн нөхцөл байдал манай улсад хүндэрч байгаагаас гадна гадаадын гэмт бүлэглэл, террорист этгээдүүд улс дамнасан зохион байгуулалттай гэмт хэргийг криптовалют ашиглан үйлдэх эрсдэл, аюул занал олон улсын түвшинд тулгамдсан асуудал болсныг “Криптовалют ашиглаж үйлдсэн, гэмт хэргээс урьдчилан сэргийлэх арга зам” хэлэлцүүлгийн үеэр онцолжээ.

Үнэ хөөрөгдсөн “Номин” сүлжээ дэлгүүрийг 6.9 тэрбум төгрөгөөр торгоно

Шударга өрсөлдөөн, хэрэглэгчийн төлөө газраас 2022 оны 11 дүгээр сард “Номин тав трейд” ХХК-д Өрсөлдөөний тухай хуулийн 11 дүгээр зүйлийн 11.2.2-т “барааг гуравдагч этгээдэд худалдах,

худалдан авахыг хязгаарлах” гэж заасныг зөрчсөн гэж үзэн Зөрчлийн тухай хуулийн 10.7 дугаар зүйлийн 8 дахь хэсэгт зааснаар тухайн бараа бүтээгдэхүүний борлуулалтын орлогын 6 хувьтай тэнцэх хэмжээний төгрөг болох 6.991.078.398 төгрөгөөр торгох шийтгэл ногдуулсан.

Нийслэл дэх Захиргааны хэргийн анхан шатны шүүхээс “Номин тав трейд” ХХК-ийн бараа бүтээгдэхүүн нийлүүлэгч аж ахуй эрхлэгч нартай хийдэг худалдааны хамтран ажиллах гэрээний 6.3-т “нийлүүлэгчийн тогтоож өгсөн жижиглэнгийн үнэ нь ижил төстэй үйл ажиллагаа явуулдаг дэлгүүр болон үйлчилгээний газрын үнээс хямд эсвэл адил байх /хямдралтай үеийн үнэ мөн хамаарна/ хямд үнийн баталгааг хангасан байна” гэж, мөн гэрээний 6.4-т “хэрэв гэрээний 6.3-т заасан хямд үнийн баталгаа хангагдаагүй тохиолдолд борлуулагч нь жижиглэнгийн үнийг илүү хямд үнэтэй зах зээл дээрх бусад өрсөлдөгчидтэй адил хэмжээнд шинэчлэн тогтоож, тухайн үеийн өөрийн нөөцөд байгаа үлдэгдэл тоо эсвэл сүүлийн 10 хоногийн бараа татан авалтын тоо хоёрын аль өндрийг тооцооны хуучин, шинэ үнийн зөрүүгээр үржүүлсэн дүнг 2 дахин өсгөн нийлүүлэгчээр төлүүлэх эсвэл борлуулалтын орлогоос суутган авна” гэж заасан нь өрсөлдөөнийг хязгаарлахад чиглэгдсэн гэж дүгнэсэн, мөн борлуулалтын орлогыг сайтар нягтлан зөв тооцоолох шаардлагатай, зөрчлийн хэргийн бусад холбогдогч (”Моннидэр” ХХК, “Боса” ХХК, “Дижитал концепт” ХХК) нарт зөрчил шалган шийдвэрлэх ажиллагааг дахин явуулж, дахин шинэ акт гаргах хүртэл улсын байцаагчийн шийтгэлийн хуудсыг 6 сарын хугацаагаар түдгэлзүүлж шийдвэрлэсэн.

“Номин тав трейд” ХХК-аас Захиргааны хэргийн давж заалдах шатны шүүхэд анхан шатны шүүхийн шийдвэрийг эс зөвшөөрч гомдол гаргасан боловч давж заалдах шатны шүүхээс шийдвэрийг хэвээр үлдээсэн, мөн Улсын дээд шүүхийн захиргааны хэргийн танхимын 2023.06.06-ны өдрийн нийт шүүгчдийн хуралдаанаар тус компанийн хяналтын шатны шүүхэд гаргасан гомдлыг хүлээн авахаас татгалзан шийдвэрлэсэн байна.

Иймд Шударга өрсөлдөөн, хэрэглэгчийн төлөө газраас нийслэл дэх Захиргааны хэргийн анхан шатны шүүхийн шийдвэрийн биелэлтийг хангаж, зөрчил шалган шийдвэрлэх ажиллагааг дахин хийж гүйцэтгэхээр ажиллаж байна.

BOLOD ДОЛОО ХОНОГИЙН ТОЙМ: Шөнийн тээврийн үйлчилгээг эхлүүлж , Элсэлтийн шалгалт эхэлсэн ДОЛОО ХОНОГ
Tweet
Bolod.mn