BOLOD ДОЛОО ХОНОГИЙН ТОЙМ: Намрын чуулган хаалтаа хийж, 1072 хувьцаа эзэмшигч иргэн бүр хувь хүртэх болсон ДОЛОО ХОНОГ

2024-01-22

Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлыг тоймлон хүргэдэг. Эдгээр өдрүүдэд болж өнгөрсөн тойм мэдээллийг хүргэж байна.

Намрын чуулган хаалтаа хийлээ

УИХ-ын намрын ээлжит чуулганы хуралдаан хуулийн хугацаанд хуралдаж, өнөөдөр хаалтаа хийлээ. Чуулганы хуралдааныг хааж УИХ-ын дарга Г.Занданшатар үг хэллээ. Тэрбээр "УИХ-ын найм дахь удаагийн сонгуулиар бүрдсэн парламент намрын отгон чуулганаа өндөрлүүлж байна.

УИХ-ын чуулган Үндсэн хуульд зааснаар ажлын 75 хоног хуралдахдаа 224 хууль, УИХ-ын 62 тогтоол баталлаа. Эдгээр баталсан хууль, тогтоол нь эрх зүйн шинэчлэл хийсэн. Энэ чуулганыг шинэчлэлийн чуулган байсан гэж хэлж болох нь. 2023 онд гурван сая 500 мянган хүнтэй болсон сайхан мэдээтэй байна. Тэгэхээр бид 3.5 сая хүнийг төлөөлж байна. Ард түмний төлөөлийн байгуулага УИХ. Тиймээс УИХ ард түмнийг засаглах эрхийг хангах, төлөөллийн ардчилалыг бэхжүүлэхэд чиглүүлэх, цахим парламент болоход чиглүүллээ. Их өөрчлөлтөд тэмүүлсэн цаг үе байлаа. Нийгмийн бухимдалтай тулгарч, цэгцрэх цаг хугацааг туулж байна. Жам ёсны энэ үйл явц манай улсын урт хугацааны урт хугацааны тогтвортой хөгжлийн суурь багана болно гэдэгт итгэлтэй байна. Бидний хүсэл, зорилго төдий зүйл бодит үйл хэрэг болж байгаа юм. Экспорт анх удаа түүхэндээ 15.2 тэрбум ам.долларт хүрч, төлбөрийн тэнцэл 1.4 тэрбум ам.долларын ашигтай гарлаа. Манай улсын вальютын нөөц таван тэрбум ам.долларт хүрлээ. Улсын төсвийн орлого 35.6 буюу зургаан их наяд төгрөгөөр өсөж, эдийн засгийн өсөлт 6.9 хувьд хүрлээ. Амжилт өсөлтийг тоон үзүүлэлтээр хүргэхгүй. Хүртээмжтэй эдийн засгийг ард түмэн хүсэж байна. Нийгэмд бухимдал их байна. Үүнд гурван шалтгаан нөлөөлж байна. Шударга бус байдал, эдийн засгийн хүртээмжгүй байдал нөлөөлж байгаа юм. Судалгаанд оролцсон 10 хүний найм нь ядууралд өртсөн гэжээ. Нэг үеэ бодвол инфляц хоёр оронтой тооноос буурч, 7,9 хувьд хүрсэн байна. Төв банк бодлогын хүүгээ бууруулахыг бид ярилцаж байгаа. Авлига албан тушаалын асуудал ил болж байгаа ч хариуцлага тооцохгүй байгааг ард түмэн шүүмжилж байгаа юм." гэлээ.

1072 хувьцааны ногдол ашиг 233 мянган төгрөгийг иргэдэд олгоно

УИХ-ын Эдийн засгийн байнгын хорооны өнөөдрийн /2024.01.15/ хуралдаанаар “Эрдэнэс Тавантолгой” хувьцаат компанийн хувьцааны талаар авах зарим арга хэмжээний тухай” УИХ-ын тогтоолын төслийн анхны хэлэлцүүлгийг хийлээ. Засгийн газраас өргөн мэдүүлсэн энэхүү тогтоолын төсөлд 2012 оны дөрөвдүгээр сарын 1-ээс хойш мэндэлсэн 1,2 сая хүүхдэд “Эрдэнэс Тавантолгой” ХК-ийн 1072 ширхэг хувьцаа эзэмшүүлэх тухай асуудал багтжээ.

Энэ талаар “Эрдэнэс Монгол” ХХК-ийн гүйцэтгэх захирал С.Наранцогтын өгсөн мэдээллээр ЭТТ ХХК з орчим их наяд төгрөгийн цэвэр ашигтай ажилласан учир үүнийг иргэн тус бүрт хуваарилахад 233 мянган төгрөг ногдож байгаа гэсэн юм.

Нийслэлийн Засаг Даргын Тамгийн газрыг яармаг руу нүүлгэхээр болов

Түгжрэлийг бууруулахын тулд Нийслэлийн Засаг даргын Тамгын газар манлайлж, ирэх гуравдугаар сарын 1-н гэхэд Яармаг руу нүүсэн байна гэдгээ Улаанбаатар хотын захирагч Х.Нямбаатар мэдэгдлээ. Энэ талаар тэрбээр “Нийслэлийн төр захиргаанд 2000 орчим хүн ажилладаг. Түгжрэлийг бууруулахын тулд нийслэл өөрөө манлайлж, Яармаг руу нүү гэсэн. Яармагт баригдсан шинэ байранд нийслэлийн Засаг даргын Тамгын газраас гадна харьяа бүх агентлаг очно. Одоогийн энэхүү барилгад Улсын дээд шүүх, Шүүхийн ерөнхий зөвлөл, Шүүхийн сахилгын хороонд өгөхөөр шийдвэр гарсан.

Хангарьд ордон дээр аль дээр шийдвэр гарсан, хөрөнгийн менежмент хийхээр олон нийтэд нээлттэй тендер зарлана” гэлээ.

Улаанбаатар хотын захирагчаар Су.Батболд ажиллаж байхдаа нийслэлийн төр захиргаан байгууллагыг Яармаг руу нүүлгэхээр шийдэж, шинэ барилга бариулсан юм. Нийтдээ 100 гаруй тэрбум төгрөг зарцуулж уг барилгыг ашиглалтад оруулсан ч дараа, дараагийн удирдлагууд нь нүүлгүй, Төрийн ордны баруун талд байрлах Хангарьд ордонд суурьшсаар өнөөдөртэй золгосон. Олон нийтийн зүгээс "өчнөөн зуун тэрбум төгрөг зарцуулж барьсан байраа ашиглахгүй байна" гэдэг шүүмжлэлийг дайж ирсэн бол ирэх гуравдугаар сар гэхэд Нийслэлийн Засаг даргын Тамгын газраас эхлээд бүхий л харьяа агентлагууд шинэ байрандаа суурьших нь ээ.

Эрэн сурвалжлагдаж байсан гадаадын иргэнийг илрүүлэн албадан гаргалаа

Монгол Улсад 2013 оноос хойш хууль бусаар орогнож, эрэн сурвалжлагдаж байсан БНХАУ-ын иргэн Zhou Jian-ыг Гадаадын иргэн, харьяатын газраас илрүүлж, албадан гаргалаа. Тодруулбал, Уг иргэн нь 2010 онд БНХАУ-д онц хүнд гэмт хэрэгт холбогдон эрэн сурвалжлагдсан байсан бөгөөд 2013 онд бусдын баримт бичгийг ашиглан Монгол Улсад хууль бусаар нэвтэрч, өнөөдрийг хүртэлх хугацаанд оргон зугтаж, орогнож байсныг хяналт шалгалтыг ажиллагааг тасралтгүй явуулсны үр дүнд ийнхүү илрүүлээд байна.

Мөн БНХАУ-ын иргэн Zhou Jian нь хууль бусаар орогнож байх хугацаандаа Монгол Улсад ажиллаж, амьдарч байсан гадаадын иргэдийг удаа дараа залилан мэхэлж, их хэмжээний хохирол учруулсан нь хяналт шалгалтаар тогтоогдоод байна. Иймд Гадаадын иргэний эрх зүйн байдлын тухай хууль, Зөрчлийн тухай хуулийн дагуу торгох шийтгэл ногдуулан Монгол Улсад дахин оруулахгүй байх хугацаа тогтоон албадан гаргаж, харьяалах улсынх нь хууль, хяналтын байгууллагад шилжүүллээ.

Хилчид осгох эрсдэлд орсон иргэдийг авран хамгаалжээ

Хилийн наймдугаар заставт өчигдөр /2024.01.17/ 19.18 цагийн орчимд “Ховд аймгийн Үенч сумын Цагаантүнгэ багийн иргэн Б.Баярсайханы машин эзгүй хээр явж байгаад эвдэрсэн” гэх дуудлага мэдээлэл иржээ. Дуудлага мэдээллийн дагуу Отрядын штабаас шуурхай эрлийн баг гаргаж, ажилласнаар хилчид заставаас 30 км-т орших замд машин нь эвдэрч өвлийн хүйтэнд осгох эрсдэлд ороод байсан Үенч сумын иргэн Б.Баярсайхан, Б.Мандухай, 5 сартай охин Үжингоо, Ховд аймаг Алтай сумын иргэн н.Даваажаргал, н.Отгонцэцэг, н.Ариунболд нарын 6 иргэний халуун амийг аварчээ. Эрлийн багт хилийн наймдугаар заставын салбарын захирагч ахлах дэслэгч Д.Билгүүн, харуулын дарга, нохой хөтлөгч, ахлах ахлахгч Г.Алтанбагана, жолооч, ахлах ахлагч Х.Дүйсенбек нар ажилласан байна.

Бага насны охиныг нохойных нь хамтаар өшиглөсөг иргэнийг 300 мянган төгрөгөөр торгожээ

Олон нийтийн цахим сүлжээнд “Хошуувчтай нохойгоо хөтлөөд лифтенд суух гэсэн охиыг загнаж, өшиглөжээ” гэх мэдээлэл нийтлэгдсэн. Энэ талаар ЦЕГ-аас тодруулахад Цагдаагийн байгууллагад Хан-Уул дүүргийн 20-р хороонд байрлах орон сууцны орцонд “Зээ охиныг байрны оршин суугч” өшиглөсөн гэх гомдол, мэдээлэл энэ оны нэгдүгээр сарын 16-ны өдөр бүртгэгдсэн.

Тус дүүргин цагдаагийн газрын нэгдүгээр хэлтсээс шалгалтын ажиллагаа явуулж, тус байрны оршин суугч иргэн нохой хуцаж хүүхэд айлгалаа гэх шалтгаанаа насанд хүрээгүй хүүхдийн бие махбодод халдсан үйлдэл тогтоогдсон тул Зөрчлийн тухай хуулийн 6.20 дугаар зүйлийн 7 дахь хэсэгт зааснаар 300 нэгжээр торгож, арга хэмжээ авсан хэмээн мэдээллээ.