Аюултай ачаа тээвэрлэж явахдаа зөрчил гаргасан жолоочийг 160 мянган төгрөгөөр торгов

Олон нийтийн цахим орчинд энэ сарын 28-ны өдөр тавигдсан СХД-ийн 20 дугаар хорооны нутаг дэвсгэрт 22-ын товчоо явах  замд “Зам хашаад байна” гэсэн мэдээллийн дагуу Цагдаагийн байгууллагаас шалгалт явуулахад, "Shaanxi-x3000" маркийн том оврын ачааны автомашины жолооч нь:

-Нийслэлийн гудамж, замын хөдөлгөөнд оролцох маршрутын зөвшөөрөлгүй;

-Монгол Улсын Замын хөдөлгөөний дүрэмд заасан "Замын хөдөлгөөнд оролцогч нь аюул, хохирол учруулахгүй, хөдөлгөөнд осолтой байдал бий болгохгүйгээр зорчино" гэсэн заалтыг зөрчиж бусдын хөдөлгөөнийг саатуулсан;

"Ачааны автомашин, автобусны ар талд түүний овор хэмжээг тодотгох, үзэгдэлтийг сайжруулах зорилгоор гэрэл ойлгох шинж чанар бүхий туузан наалт, эсхүл улаан өнгийн гэрэл ойлгуурыг нэмж байрлуулсан байвал зохино" зэрэг заалтыг тус тус зөрчсөн үндэслэл тогтоогдсон.

Дээрх зөрчилд Зөрчлийн хуулийн 14.7.33 дэх хэсэгт зааснаар 10.000, 14.5.17 дах хэсэгт зааснаар 150.000 төгрөгөөр зөрчил тус бүрд шийтгэл оногдуулж хариуцлага тооцлоо.

С.Батдөл нарт холбогдох хэргийн шүүх хуралдан хойшлогдлоо

Улсын дээд шүүхийн хяналтын шатны эрүүгийн хэргийн шүүх хуралдаанаар С.Батдөл, С.Баттулга, Р.Дашбилэг, Р.Эрдэнэхүү, Д.Адъяацэрэн, Б.Энхмандах, Ж.Багамонгол нарт холбогдох хэргийг шүүгдэгч С.Батдөл, С.Баттулга нар болон тэдний өмгөөлөгчдийн гаргасан гомдлыг үндэслэн 2024 оны нэгдүгээр сарын 31-ний өдөр хянан хэлэлцэв.

Баянгол дүүргийн Эрүүгийн хэргийн анхан шатны шүүхийн 2023 оны долдугаар сарын 7-ны өдрийн шийтгэх тогтоол, Нийслэлийн Эрүүгийн хэргийн давж заалдах шатны шүүхийн 2023 оны 10 дугаар сарын 10-ны өдрийн магадлалтай С.Батдөл нарын 7 хүнд холбогдох дээрх хэргийг хянан хэлэлцэх хугацааг хойшлуулах хүсэлтийг шүүгдэгч нарын өмгөөлөгчдөөс шүүх бүрэлдэхүүнд ирүүлжээ. Тодруулбал, шүүгдэгч С.Батдөлийн өмгөөлөгч Б.Мөнхбат, Д.Амаржаргал нар нь хүндэтгэн үзэх шалтгаанаар шүүх хуралд ирж амжаагүй тул шүүгдэгчийн өмгөөлүүлэх эрхийг хангах үүднээс шүүх хурлыг хойшлуулах шийдвэрийг гаргасан байна.

Тэгш сондгойгийн хязгаарлалтыг сунгахыг иргэд дэмжсэнгүй

Улаанбаатар хотын авто замын түгжрэлийг бууруулахын тулд өнгөрсөн оны арванхоёрдугаар сарын 18-наас эхлэн тээврийн хэрэгслүүдийг улсын дугаарынх нь тэгш, сондгой орноор хязгаарлан хөдөлгөөнд оролцуулж байна.

Хязгаарлалт өнөөдөр дуусах учиртай. Гэхдээ энэ сарын 29-нд нийслэлээс уг арга хэмжээг сунгах эсэх талаар иргэдээс санал авч эхэлсэн юм. Гурван өдөр үргэлжилсэн санал асуулга өнөөдөр 17:00 цагт хаагдлаа. Энэ хугацаанд 7,863 иргэн оролцсоноос 55% нь тэгш, сондгойгийн хязгаарлалтыг дэмжихгүй гэж хариулжээ. Одоогоор ямар нэгэн шийдвэр гараагүй байна. 

Б.Ганхуяг, Т.Аюурсайхан нарт хорих ял оноолоо

“Нүүрсний” гэх тодотголтой, хамгийн их олны анхаарал татаж байсан хэргийг Чингэлтэй дүүргийн Эрүүгийн хэргийн анхан шатны шүүх хэд хоногийн турш хаалттай хэлэлцээд, өнөөдөр үдээс өмнө шүүгдэгч 11 хүнийг гэм буруутайд тооцож, үргэлжлүүлээл ял оноох хурлаа хийгээд шийтгэх тогтоолоо танилцууллаа. Хэрэгт холбогдогчдыг зохион байгуулалттай гэмт бүлэглэл байгуулсан гэж яллах дүгнэлт үйлдсэн хэргийг шүүх хэрэгсэхгүй болгосон байна. Бас Б.Отгонжаргалын 30 000 ам.доллароо тайлбарлаж чадаагүй үйлдлийг нь гэмт хэргийн бүрэлдэхүүнгүй гэж дүгнэсэн.

Харин УИХ-ын гишүүн асан Т.Аюурсайханыг үндэслэлгүй хөрөнгөжсөн гэм буруутайд тооцож нээлттэй хорих ангид гурван жил хорих ял шийтгэж, нийтийн албанд томилогдох эрхийг таван жил хаслаа. Мөн үндэслэлгүй хөрөнгөжсөн 1.8 тэрбум гаруй төгрөгийн үнэлгээтэй эд хөрөнгүүдийг хурааж улсын орлого болгохоор шийдсэн. Улмаар таслан сэргийлэх арга хэмжээг өөрчилж, хорихоор болсноор өнөөдөртөө багтаж ШШГЕГ-ын харьяа 461 дүгээр анги руу хүргүүлэхээр боллоо.

“Эрдэнэс Тавантолгой” ХК-ийн гүйцэтгэх захирал асан, Аж үйлдвэрийн гавьяат ажилтан Б.Ганхуягийг үндэслэлгүй хөрөнгөжсөн, хахууль авсан гэмт хэргийн зохион байгуулж оролцсон гэм буруутайд тооцож, үйлдэл тус бүрт нь оноосон хорих ялуудыг нэмж нэгтгэн биеэр эдлэх ялын таван жил есөн сарын хугацаагаар хорихоор тогтоож, нийтийн албанд ажиллах эрхийг долоон жил хасав. Мөн 9.9 тэрбум төгрөгийн үнэлгээтэй эд хөрөнгийг хурааж улсын орлого болгохоор боллоо.
“Эрдэнэс Тавантолгой” ХК-ийн Худалдан авалтын албаны дарга бөгөөд ерөнхий аудитор асан Б.Отгонжаргалыг үндэслэлгүй хөрөнгөжсөн, албан тушаалаа урвуулсан гэм буруутайд тооцож, нийтийн албанд ажиллах эрхийг дөрвөн жил хасаж, хоёр жил зургаан сар хорихоор болсон байна. Бас 400 гаруй сая төгрөгийн эд хөрөнгийг хураах нэмэгдэл ял оноов.

Т.Аюурсайханы шадар туслах, Хөгжлийн бэрхшээлтэй хүний хөгжлийн ерөнхий газрын даргаар томилогдож байсан И.Даваадоржийг хахууль авсан гэм буруутайд тооцож, нийтийн албанд ажиллах эрхийг таван жил хасаж, хоёр жил хорихоор болов. Мөн 400 гаруй сая төгрөгийн эд хөрөнгийг хураахаар шийдвэрлэлээ.
“Лаки лайф” ХХК-ийн удирдах албан тушаалтан Г.Гантөмөрийг хахууль өгсөн гэм буруутай гэж дүгнэн 10 сая 950 мянган төгрөгөөр торгох ял шийтгэсэн.
“Хишиг арвин индустриал” ХХК-ийг үүсгэн байгуулагч Б.Хишигдоржийн хүү Х.Батхишигийг хахууль өгсөн гэм буруутайд 2 жил хасаж 14 сая төгрөгөөр торгов.
ЭТТ ХК-ийн Санхүүгийн албаны дарга асан Б.Эрдэнэбаяр, “МД трейвэл” ХХК-ийн хувьцаа эзэмшигч О.Дагвадорж нарыг мөнгө угаасан, хахууль авахад хамтран оролцсон гэм буруутайд тооцоод зорчих эрхийг зургаан сар, нийтийн албанд ажиллах эрхийг гурван жил хасаж, 10 сая 950 мянган төгрөгөөр торгох ял оноолоо.
Б.Ганхуягийн эхнэр П.Бадамхандыг гэрчээр зориуд худал мэдүүлэг өгөх зорилгоор ятгасан гэм буруутайд тооцож нэг сая төгрөгөөр торгосон бол
Говийн IX ноён хутагт Данзанлувсантүдэвийг зориуд худал мэдүүлэг өгсөн гэм буруутай гэж дүгнэн 450 мянган төгрөгөөр торгоод түүнийг төлөхөөс чөлөөлөв. Мөн Т.Аюурсайхан дүү Т.Түвшинбаатарыг мөн худал мэдүүлэг өгсөн гэм буруутайд тооцож 450 мянган төгрөгөөр торгосон ч хариуцлагаас чөлөөлсөн юм. Хэрэгт битүүмжилсэн болон хязгаарласан хөрөнгүүдийг хохирол, төлбөрт тооцуулахаар шүүхийн шийдвэр гүйцэтгэх байгууллагад шилжүүлэхээр боллоо.

ЭТТ-ын 1072 хувьцааны ногдол ашиг иргэдийн дансанд шилжиж эхэллээ

"Эрдэнэс Тавантолгой" ХК-ийн 2022 оны ногдол ашиг болох 116 мянган төгрөгийг иргэдийн дансанд шилжүүлнэ гэдгийг мэдээлсэн. Нэгж хувьцааны ногдол ашгийг 108 төгрөгөөр тооцсоноор 1,072 хувьцаатай иргэн 104,000 төгрөг авна. Харин зарим иргэн хувьцааны тодорхой хувиа зарсан, сургалтын төлбөртөө суутгуулсан зэрэг шалтгаанаар тоо ширхэг нь харилцан адилгүй байна.

2012 оны дөрөвдүгээр сарын 11-ээс хойш мэндэлсэн 893 мянган иргэн “Эрдэнэс Тавантолгой” ХК-ийн 1072 ширхэг хувьцааны шинэ хувьцаа эзэмшигч болсон. Энэ нь 12 нас хүртэлх хүүхэд шинэ хувьцаа эзэмшигч болж байгаа гэсэн үг.

“Эрдэнэс Тавантолгой” ХК-ийн 2022 оны цэвэр ашиг 1.3 их наяд төгрөг ба 3,4 сая хувьцаа эзэмшигчдэд хуваарилахад нийт дүнгээрээ 351 тэрбум төгрөгийг иргэдэд ногдол ашиг болгон өгч байна.

Нэгж хувьцааны ногдол ашиг нь 108 төгрөг. Татварын өмнөх дүнгээр яривал 116 мянган төгрөг болохоор ба татвар суутгагдсаны дараа 104 мянган төгрөг иргэдийн дансанд шилжиж эхэлсэн. Улмаар шинээр хувьцаа эзэмшигч болсон хүүхдүүдийн мөнгө Хүүхдийн мөнгөний дансаар нь орсон. Харин 2.5 сая хувьцаа эзэмшигчийн мөнгө өөрсдийн брокерын компаниудад нээлгэсэн хувьцааны дансанд шилжиж орохоор зохицуулагдсан.

2023 оны жилийн эцсийн тайлан хоёрдугаар сарын 10-нд эцэслэгдэн гарна. Аудитын байгууллага аудит хийснээр 2024 оны гуравдугаар сарын сүүл дөрөвдүгээр сарын эхэн үед 2023 оны ногдол ашиг ард иргэдийн дансанд шууд орно. Татвар суутгагдаж, нэг иргэнд олгогдох дүн нь 257.000 төгрөг болж байна.

Үндсэндээ 2022, 2023 оны 1072 хувьцааны ногдол ашиг болох 362.000 төгрөгийг татварын дараах байдлаар ард иргэдийн гар дээр олгох юм. Цаашдаа иргэд ногдол ашгаа заавал бэлэн мөнгөөр нь шууд авдаг биш дотоодын бонд гаргадаг, хэрэгжүүлэх гэж буй төсөл хөтөлбөрүүдэд иргэдтэй хийсэн гэрээний үндсэнд санхүүжилт хэлбэрээр оруулдаг болно. Ингэснээр Банкны хадгаламжийн хүүтэй дүйцэхүйц хэмжээний хүү төлдөг байх боломж “Эрдэнэс Тавантолгой ХК-д бүрэн байгаа” хэмээн Засгийн газраас мэдээлсэн.

Газ дэлбэрсэн осолд өртөн түлэгдэж эмнэлэгт эмчлүүлж байсан дахин нэг иргэн нас барлаа

Нэгдүгээр сарын 24-ний 01:06 цаг орчимд Баянзүрх дүүргийн 26 дугаар хороо Дүнжингарав худалдааны төвийн уулзвар дээр их хэмжээний шингэрүүлсэн хий буюу газ тээвэрлэж байгаа том оврын автомашин суудлын автомашинтай мөргөлдөж, их хэмжээний гал дэгдэж Онцгой байдлын гурван аврагч болон нэг энгийн иргэний аминд хүрсэн томоохон осол болсон билээ. 

Тэгвэл энэ ослын улмаас ГССҮТ-д 90-95 хувийн түлэгдэлтэй эмчлүүлж байсан иргэн Б 2024.01.31-ний 10:30 цагт нас барсан харамсалтай мэдээ ирлээ. Ингэснээр галын ослоос үүдэлтэй түлэгдэж, гэмтсэн 2 үйлчлүүлэгч эмнэлгийн тусламж үйлчилгээ авах явцдаа нас барсан тохиолдол боллоо.

Мөн 4 хүн хүнд, Түлэнхийн тасагт эмчлүүлж байсан 1 хүн эмнэлгээс гарсан, 3 хүний биеийн байдал тогтвортой, БЗДЭМТ-д эмчлүүлж байсан 2 хүн эмнэлгээс гарсан, 1 хүний биеийн байдал тогтвортой, Цэргийн төв эмнэлэгт эмчлүүлж байсан 1 хүн эмнэлгээс гарсан. Эмчлүүлж байгаа 8 хүний биеийн байдал тогтвортой, эмчилгээ үргэжлэн хийгдэж байна. Тус ослын улмаас амиа алдсан нийт хүний тоо ТАВ болоод буй юм. Үүний гурав нь Онцгой байдлын аврагч бол хоёр нь энгийн иргэн. 

Өмнөговьд аймагт 3.7 магнитудын хүчтэй газар хөдөлжээ

Өмнөговь аймгийн Цогтцэций сумын төвөөс баруун зүгт 18 километрийн зайд 02 дугаар сарын 02-ны өдрийн 05:10:07 цагт 3.7 магнитудын хүчтэй газар хөдлөлт боллоо.

Хэдхэн хоногийн өмнө Архангай аймгийн Ихтамир сумаас баруун урд зүгт 71 километрийн зайд өнөөдөр буюу нэгдүгээр сарын 26-ны 08:12:06 цагт 4.1 магнитудын хүчтэй газар газар хөдлөлт болсон гэж Онцгой байдлын ерөнхий газраас мэдээллээ. Мөн Хөвсгөл аймагт газар хөдөлж, сумуудад чичирхийлэл мэдрэгдсэн. Тодруулбал, нэгдүгээр сарын 24-ний 12:15 цагт Хөвсгөл аймгийн Улаан-Уул сумын нутагт 4,1 магнитуд хүчтэй газар хөдлөлт болжээ. Газар хөдлөлтийн төвөөс ойр орших аймаг сумд:

• Хөвсгөл аймгийн Улаан-Уул сумын төвөөс Баруун зүгт 67 км,
• Хөвсгөл аймгийн Цагааннуур сумын төвөөс Баруун урд зүгт 87 км,
• Хөвсгөл аймгийн Баянзүрх сумын төвөөс Баруун хойд зүгт 91 км.

Магнитуд гэдэг нь газар хөдлөлтийн төвд багажаар хэмжсэн үзүүлэлт бол, газрын хөрсөн дээр хүн болон барилга байгууламжид нөлөөлөх хүчийг баллаар хэмждэг. 3-4 баллын газар хөдлөлт жилд дэлхийн хэмжээнд нийт 49000 орчим бүртгэгддэг байна.