Ч.Мөнхтуяа удирдах хугацаанд ИНЕГ, ИНҮТ-өөс ₮5 тэрбумын зөрчил илэрч, он гарснаас хойш ₮410 саяыг тендергүй зарцуулжээ

2024-08-29

ИНЕГ-ыг Ч.Мөнхтуяа түр статусаар удирдсан жил хагасын хугацаанд энэ байгууллага үргүй зардал ихээр гаргаж, энэ оны эхний

найман сарын хэмжээнд л гэхэд 410 сая төгрөгийн шууд худалдан авалт хийсэн байна. Тэдний заримыг аудитын байгууллага дүгнэлтдээ онцлон хавсаргажээ.

Бид өмнөх дугаартаа Ч.Мөнхтуяа удирдсанаас хойш ИНЕГ-т архидалт, танхайрал газар авч, дотоод дэг жаягийн хувьд уруудан доройтсон талаар мэдээлэл бэлтгэсэн.

Энэ удаа үргүй зардлын сэдэвт илүү анхаарал хандууллаа.

Жаргалантын амралт, дарга нарын хэрэгцээнд гэх мэтээр 410 сая төгрөгийн тендергүй зарцуулалт хийжээ

ИНЕГ 2024 он гарснаас хойш төлбөрийн баримттай тулгасан дүнгээр, дээр дурдсанчлан 33 удаагийн гүйлгээгээр 410 сая төгрөгийг хувийн ААН-ийн данс руу шилжүүлжээ.

Тэдгээрээс онцолбол,

Жаргалантын амралтын төлбөр гэж 4.7 сая
Таблетны төлбөр гэж 3.5 сая
ИНҮТ-ийн хэрэгцээнд хайрцагтай тэмдэг гэж 15 сая
Зүүлт, тэмдэг, бал захиалах төлбөр гэж 19.5 сая
ИНҮТ-ийн даргын албан хэрэгцээнд гэж 8.2 сая
Шүүгчийн сандал болон спорт хэрэгслийн төлбөр гэж 17 сая төгрөг
100 ширхэг мод гэж 19.5 сая
ХНУГ-ын даргын албан хэрэгцээн дэх таблет гэж 4.9 сая
ҮҮГ-ын албан хэрэгцээнд гэж 10.3 сая төгрөгийг тус тус зарцуулсан байна.

Эдгээр нь шууд худалдан авалт буюу тендер зарлаагүй харилцааны дагуух гүйлгээнүүд юм. 100 ширхэг модыг 19.5 сая төгрөгөөр худалдан авсан гэхээр, нэгжийн үнэ 195 мянга болж байна. Түүнчлэн хамгийн сүүлд дурдсан 10.3 сая төгрөг зориулагдсан ҮҮГ-ын талаар өмнөх дугаартаа хөндөж байсан.

Оны эхэнд ҮҮГ-ын менежерээр томилогдсон Б.Гантулга гэхэд ажилдаа ирж үзэгддэггүй нэгэн гэх. Авчиг байхгүй хугацаанд нь үргэлж томилолтын мөнгө бодогддог бөгөөд, түүнд он гарснаас хойш 20 орчим сая төгрөгийн томилолтын зардал олгосон гэдэг мэдээллийг эх сурвалжууд өгч байгаа юм.

Б.Гантулгын орлого энэ албан тушаалд томилогдоод хоёр дахин нэмэгдсэнийг ХОМ-ээс нь харж болно.

2023 оны санхүүгийн тайланд ТАВАН ТЭРБУМ төгрөгийн зөрчил илэрчээ

Түүнчлэн, ИНЕГ болон түүний харьяа ИНҮТ-ийн 2023 оны үйл ажиллагаанд Үндэсний аудитын газраас шалгалт хийжээ.

Ингэхэд ИНЕГ-ын хувьд,

Нийт 2.7 тэрбум төгрөгийн ДОЛООН ЗӨРЧИЛ илэрчээ.

Харин ИНҮТ-ийн Улаанбаатар хот дахь харьяа байгууллагуудын хүрээнд нийт 2.4 тэрбум төгрөгийн 15 зөрчил илэрсэн байна.

2023 оны санхүүгийн тайланд хийсэн шалгалтаа ҮАГ-аас нэгтгэж, "Нийт 5.182 тэрбум төгрөгийн 28 зөрчил илэрснээс, 157.3 сая төгрөгийн зөрчилд таван төлбөрийн акт тогтоож, 2.3 тэрбум өгрөгийн зөрчлийг арилгах найман албан шаардлага хүргүүлж, зөрчлийг арилгах, давтан гаргахгүй байх 2.7 тэрбум төгрөгийн 15 зөвлөмж өглөө" гэжээ.

Эдгээрийн ихэнх нь зохих төлбөрийг Төрийн санд төвлөрүүлээгүйтэй холбоотой зөрчил байх аж.

Тодруулбал,

Шинэ нисэх буудлын дэргэдэх А кемп байгууламжийн төв оффисын долоон байрыг түрээслүүлж, 235.5 сая төгрөгийн орлого олсон ч 40 хувийг нь улсын төсөвт төвлөрүүлээгүй.

ИНЕГ-ын даргын тушаалаарх бүтцийн өөрчлөлтийн дагуу орон тоо нь хасагдсан шалтгаанаар зургаан ажилтанд 507.8 сая төгрөгийн тэтгэмж олгосон нь хуульд нийцээгүй.

ИНҮТ болон түүний харьяа байгууллагуудад бүтцийн өөрчлөлт хийсэнтэй холбогдуулан, хөрөнгө бүртгэхдээ 534 сая төгрөгийн 390 ширхэг хөрөнгийг дутуу бүртгэсэн. 381 ширхэг хөрөнгө огт бүртгэлгүй.

Чанадаг кофе худалдан авахад 1.4 сая төгрөг, Жаргалалтын амралтад сургалт зохион байгуулахад 1.7 сая төгрөг зарлагадсанаа Төрийн хэмнэлтийн тухай хуулийг зөрчсөн.

37 иргэн, хуулийн этгээдэд холбогдох он удаан жил болсон 810 сая төгрөгийн авлагыг барагдуулаагүй.

"Чингис хаан" олон улсын нисэх буудалд хийсэн шалгалтаар 51 тонн шатахуун илүү байгааг илрүүлсэн. Агуулахын бүртгэл хангалтгүй буюу шатахууны тооцоог тухай бүр хийж, шийдвэрлээгүй зэрэг зөрчил гаргажээ.

Улмаар ҮАГ-аас ИНЕГ болон ИНҮТ-д хийсэн аудитдаа "Хязгаарлалттай" дүгнэлт өгсөн байгаа юм.

Зөвхөн нэг жилийн санхүүгийн үйл ажиллагааны тайлангаас 5 тэрбумын зөрчил гарна гэдэг өндөр тоо. Мөртлөө энэ нь Ч.Мөнхтуяагийн удирдсан хугацаа юм.

Ч.Мөнхтуяаг ЗТХЯ-наас түр шилжин ажиллуулах тушаалаар, ИНЕГ-ын даргаар түр томилсон. Энэ хугацаанд түүнийг жинхэлсэнгүй, мөн жинхэнэ даргыг нь ч томилсонгүй. Мөн түүний тэтгэврийн нас ч болжээ.

Гэвч "Түр орлон гүйцэтгэгч" статустай ИНЕГ-ыг удирдсан хугацаанд нь аудитаар 5 тэрбумын зөрчил илэрч, зөвхөн 2024 оны эхний найман сарын байдлаар дахин 410 сая төгрөгийн шууд худалдан авалт байгууллагын дансаар хийчхээд байгаа нь анхаарал татна.

Аудитын зөрчлүүдээс түрээсийн орлогоо төрийн санд бүрэн төвлөрүүлдэггүй, 1.4 сая төгрөгөөр кофе авдаг, зургаахан хүнд 510 сая төгрөгийн тэтгэмж олгодог, нисэх буудлын агуулахад 51 тонн шатахуун илүү үлддэг болохыг харж болж байна.

Ч.Мөнхтуяа өмнө нь ЗТХЯ-нд газрын даргаар ажиллаж байхад л ашиг сонирхлын зөрчил нь маргаан дагуулж байсан. ИНЕГ-ын "түр" дарга болоод орлого нь хоёр дахин өсөж, 127 сая төгрөг болсныг ч өмнөх дугаартаа хөндсөн билээ.

М.ТЭНГИС

https://eguur.mn/523863/

Ч.Мөнхтуяа удирдах хугацаанд ИНЕГ, ИНҮТ-өөс ₮5 тэрбумын зөрчил илэрч, он гарснаас хойш ₮410 саяыг тендергүй зарцуулжээ
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
hun sain muu bj bolno.teriig n shiiddeg baiguullaga n bgaa. tanai site ene zahialgat niitlelee bolih heregtei.

2024-08-30 | 14:35:11 | 202.131.251.98 |

Зочин
Монголын Иргэний Агаарын Тээврийн Удирдах Газар нарийн бичгийн мэдлэгтэй хүнээр Удирдах Газрыг толгойлуулдаг Боловсон хүчний ноцтой дутагд******** Өөр томилчих хүн олдоогүй юм уу?Анхнаасаа Хүний боломж хулгайлсан хулгайч авгай шүү дээ

2024-08-29 | 21:27:29 | 139.5.217.37 |