Амьдралыг хөнгөвчлөх 10 технологи

2024-12-18

Хиймэл оюун бүтээх хагас дамжуулагчийн эрэлд мордсон улс орнууд худалдааны дайн өдөөж, өндөр технологийн өрсөлдөөн урьд өмнө нь байгаагүйгээр хүч түрсэн нэгэн оныг бид үдэж байна. 2024 онд хүний шууд оролцоог хөнгөвчилсөн өндөр технологийн дэвшил хиймэл оюунаас гадна нийгмийн эрүүл мэнд, гоо сайхан, ногоон эрчим хүчний үйлдвэрлэлд илүүтэй чиглэжээ. Энэ жил шинээр бүтээгдсэн ч ирэх он жилүүдэд бидний амьдралыг эрс өөрчлөх 10 шилдэг технологийг танилцуулъя.

Амьдралыг хөнгөвчлөх 10 технологи

01 | Мэлмий доорх ертөнц

Brelyon компанийн зах зээлд нийлүүлсэн Ultra Reality ширээний дэлгэц нь виртуал бодит байдалтай төстэй. Гол дэвшил нь нүдний шилгүйгээр 110 градусын орчинг ширээн дээрээ үүсгэх боломж олгодог. 122 инчийн дэлгэцээр өнгө гэрэл бүрийг нь бодитоор мэдрэх энэхүү дэлгэцийг IMAX тай төстэй гэж хэлж болно. Айл бүрд шидэт дэлгэцээ хүргэх зорилго тавьсан Brelyon компани хагас жилийн хугацаанд батлан хамгаалах болон автомашины салбарт 2 сая ам.долларын борлуулалт хийгээд байна.

Амьдралыг хөнгөвчлөх 10 технологи

02 | Дараа үеийн гутал

Спорт гутал үйлдвэрлэгчид илүү хөнгөн, ая тухтайн дээр байгальд ээлтэй пүүзний эрэлд гарч супер хөөс зохион бүтээж нүүрстөрөгчийн хаягдлаас ул үйлдвэрлээд эхэлсэн. Тэгвэл Швейцарьт төвтэй On брэнд энэ жил Парисын олимпын үеэр үдээсгүй хөнгөн шаахай танилцууллаа. Кенийн гүйлтийн тамирчин Хеллен Обиригийн өмсөж хурдалсан Cloudboom Strike LightSpray шаахай нь ердөө 30 гр жинтэй болохоор оймс л өмссөн мэт хөнгөн мэдрэмж төрүүлнэ. Робот машинаар 1.5 км урт термопластик утас сүлжиж хийдэг уг загварыг гурван минутад бүтээхийн дээр гутал үйлдвэрлэхэд л гаргадаг нүүрсхүчлийн хийн ялгарлыг 75 хувиар багасгаж чаджээ.

Амьдралыг хөнгөвчлөх 10 технологи

03 | Цэнхэр захтай робот

Үйлдвэрлэл, ложистикийн салбарт ажиллагсдыг биеийн хүчний ажилд дайчлах нь улам бүр төвөгтэй болсон. АНУ-д гэхэд л бараа бүтээгдэхүүнийг агуулах хооронд зөөж, тээвэрлэх нэг сая гаруй ажлын байр бэлэн ч ажиллах хүн олдохгүй байгаа юм. Харин Agil ity Robotics компани биеийн хүчний хөдөлмөрийг орлох хүн дүрст роботыг ажлын байранд гаргаж эхэллээ. Цэнхэр захтай Digit роботууд одоогоор ложистикийн үйлчилгээ үзүүлэгч GXO болон Amazon компаниудад цагийн 30 ам.долларын цалинтай ажлын байран дээр туршилтаар ажиллаж буй. Аюулгүй байдлын шаардлагаар цэнхэр захтнууд хүнээс тусгаарлагдсан нөхцөлд ажилладаг ч 2025 оны сүүл гэхэд хүмүүстэй мөр зэрэгцэн ажиллуулахаар хиймэл оюуны хөгжүүлэлт хийгдэж байна.

Амьдралыг хөнгөвчлөх 10 технологи

04 | Гэрийн вакцин

Мөдхөн улирлын томуугаас сэргийлэх вакциныг гэрийн нөхцөлд хийдэг болно. FDA буюу АНУ-ын Хүнс, эмийн чанарын хяналтын газар саяхан томуунаас урьдчилан сэргийлэх хамрын дусаалга FluMist бүтээгдэхүүнд зөвшөөрөл олголоо. Эм бэлдмэл үйлдвэрлэгч AstraZeneca компанийн энэхүү бүтээгдэхүүн ердийн вакцин шиг үйлчилгээтэй бөгөөд томуугийн суларсан хэлбэрийг агуулсан дусаалга нь вирусний эсрэг дархлааг идэвхжүүлэх ч халдвар үүсгэхгүй. Ирэх жилээс эмч нар 50-аас доош насны хүн бүрт дусаалгын жор бичих боломжтой. Харин AstraZeneca компани 2025 оны намрын томуугийн улирлаас урьтаж дэлхий даяар хэдэн сая тун дусаалгын захиалга авна гэдэгт итгэлтэй байгаа аж.

Амьдралыг хөнгөвчлөх 10 технологи

05 | Био шүүлтүүр

Өндөр технологийн зэрэгцээ өдөр тутмын хэрэгцээ болсон ундны усны чанарыг сайжруулахад ч ахиц гарлаа. Колумб улсад цэвэр усны хомсдол нүүрлэж бараг дөрвөн сая хүн ус цэвэршүүлэх шаардлагатай цөлөрхөг нөхцөлд аж төрж байгаа тул Ogilvy Colombia компани хямд төсөр шүүлтүүр бүтээхээр зорьж иржээ. Ингээд FILSA болон Baylor Interna tional компаниудтай хамтран бохир усыг бүрэн задалж цэвэршүүлдэг био шүүлтүүрийн таг бүтээсэн байна. 3D-ээр хэвлэсэн тагны үндсэн орц нь эрдэнэшишийн цардуулаас гаргаж авсан давирхай бол бохирдол шүүж, усыг эрдэсжүүлэх металл хийцийн оронд идэвхжүүлсэн нүүрс ашиглажээ. Худаг, цөөрмийн усаар дүүргэсэн лонхоо био шүүлтүүрээр таглахад л хангалттай, нэг таг өдөрт 5 литр ус шүүх боломжтой. Зургаан ам.доллар хүрэхгүй үнэтэй био шүүлтүүр хуванцарын хольц агуулаагүй тул байгальд бүрэн задарна.

Амьдралыг хөнгөвчлөх 10 технологи

06 | Сахар хялбар хэмжигч

Америкийн Dexcom компани өнгөрсөн гуравдугаар сард цусан дахь сахар хэмжигч Stelo бүтээгдэхүүнээ жоргүйгээр худалдаалах эрх авсан. Уламжлалт хэрэгслээс ялгаатай нь өвчтөн ердөө бугуйндаа наагаад ухаалаг утсаар дамжуулж өдөржин цусан дахь сахрын түвшнээ хянах боломжтой. Одоогоор зөвхөн II хэлбэрийн чихрийн шижинтэй хүмүүст зориулсан энэхүү хэмжигч 2026 он гэхэд нийтийн эрүүл мэндийн хэрэглээ болно.

Амьдралыг хөнгөвчлөх 10 технологи

07 | Сэргээгдсэн нэхмэл эдлэл

Жил бүр 92 сая тонн нэхмэл эдлэл хогийн цэгт хаягдаж, тэдгээрт агуулагдах полиэфир нь хөрс болон гүний усыг бохирдуулдаг. Тэгвэл Cycora компанийн боловсруулсан технологи нэхмэл эдлэлийн хаягдлыг шингэрүүлж задлан, дахин боловсруулах арга замыг нээлээ. Хаягдлаас боловсруулан дахин ээрсэн утас, даавуу нь анхдагч материалын чанараас огт дутахгүй. Дэлхийн хамгийн том хувцас үйлдвэрлэгч Zara компани энэ жил Cycora-аас 75 сая долларын үнэ бүхий дахин боловсруулсан материал худалдан авчээ. Хойшдоо 2030 он гэхэд хувцас үйлдвэрлэлд сycora утсаар нэхсэн даавуу зонхилох магадлалтай.

Амьдралыг хөнгөвчлөх 10 технологи

08 | Тэргэнцэртэй хүмүүст зориулсан гүйлтийн зам

Эмчийн алдаанаас болж саажилт тусан тэргэнцэрт хадагдсан аавдаа туслах гэсэн солонгос залуугийн оролдлого хөгжлийн бэрхшээлтэй хүмүүст спортоор хичээллэх шинэ боломж олголоо. Өмнөд Солонгосын Kangsters стартапыг үүсгэн байгуулагч Жон Чогийн зохион бүтээсэн Wheely-X гүйлтийн замыг 2024 оны паралимпын үеэр олон нийтэд анх танилцуулсан. Тэргэнцэрт суурилуулсан дэлгэцийн тусламжтайгаар уралдаж, йог хийн тэр бүү хэл эгц толгод өөд авирч буй мэт дасгал хийх боломжтой энэхүү төхөөрөмжийг үйлдврлэгч хэдхэн сарын дотор захиалгадаа дарагдан өдгөө дэлхийн 50 гаруй орны эмнэлэг, нөхөн сэргээх төвүүдэд ашиглаж байна.

Амьдралыг хөнгөвчлөх 10 технологи

09 | Байгалийн гамшгийг урьдчилан таамаглана

Өмнө нь байгалийн гамшгийн цар хүрээг тодорхойлохын тулд агаараас тандалт зураг авч, өгөгдөл дамжуулан дүн шинжилгээ хийхэд багадаа л 12 цаг зарцуулдаг байв. Google-ийн толгой компани болох Alpha bet сарны гадаргууг ажиглахад ашиглаж буй хиймэл оюуны технологиор дэлхийн шим мандлыг тандаж эхэллээ. X.Bellwether нэртэй энэхүү систем нь дэлхийн гадаргын 600 өөр давхаргын хөрсний агууламж, ургамлын түвшин, салхины хурд, хур тунадас зэрэг мэдээлэлд тулгуурлан ойрын 20 жилд тохиолдох цаг уурын өөрчлөлтийг тодорхойлох юм. Ойн түймэр, үер зэрэг байгалийн гамшгийг богино хугацаанд таамаглах боломжтой энэхүү систем руу улс орнуудын Засгийн газраас гадна даатгалын компаниуд хошуурах боллоо.

Амьдралыг хөнгөвчлөх 10 технологи

10 | Нүүрстөрөгчийн “цэцэрлэг”

Агаарын бохирдлоо бууруулж, нүүрстөрөгчийн давхар ислээс ангижрах тэмцэлд хүн төрөлхтөн нэг алхам урагшиллаа. Spiritus компани Америкийн Вайоминг мужид нүүрстөрөгчийн давхар ислийг шингээж задалдаг анхны фирм байгуулсан юм. Orchard One хэмээх фирмийн ажиллах зарчим нь нүүрстөрөгчийг өөртөө шингэдэг хатуу сорбент материал дээр тулгуурлана. Теннисийн талбайтай тэнцэх хэмжээний нэг байгууламж жилдээ агаар мандлаас хоёр мегатон хүртэл нүүрстөрөгчийг шингээх чадвартай. Шингээгч дүүрсэн тохиолдолд хөрсөн дор хадгалж задална. Улмаар сорбентон баганаа дахин ашиглах боломжтой энэхүү төсөл одоогоор тэрбм долларын хөрөнгө оруулалт татаж 2026 онд илүү олон “цэцэрлэг” нээхээр төлөвлөж буй аж.

Эх сурвалж: Үндэстний ТОЙМ сэтгүүл