“Мөнхийн залуу гоо үзэсгэлэн” гэсэн тодотголыг нэрнийхээ өмнө “зүүсэн” топ модель Э.Одгэрэл өдгөө 44 насыг зооглоод байгаа. Тэрээр загварын тайзан дээр залуу охидын дунд гоо үзэсгэлэн болон чавараараа онцгойрч чаддаг чадварлаг модель юм. Мөн Э.Одгэрэлийг модель гэдэг энэ нэр хүндийг мэргэжлийн түвшинд авч явж чаддаг “топ” гэж хэлэхэд хэн ч маргахгүй байх. 16 настай том болсон охины ээж, төдийгөөс өдий хүртэл ганц бие явахдаа хувийн болоод хувьсгалын талбарт ч амьдаараа “домог” болсон билээ. Одоог хүртэл эрүүл чийрэг залуухан харагдаж, гоо үзэсгэлэн гэгч ямар урт настайг харуулж чаддаг түүний нууц нь тайван орчинг өөртөө бүрдүүлэхээс гадна амралт, эрүүл хооллолтыг эрхэмлэдэгт оршдог гэнэ.

2. Д.Болормаа- 2001 оны топ модель

Азийн топ модель Д.Болормаа чадварлаг моделиос гадна сайн багш гэдгээрээ олонд танигдсан нэгэн. Тэрээр 14 настайгаас эхлэн загварын ертөнцөд хөл тавьж 1997 онд “Азийн топ модель” гэх алдрыг хамгийн анх эх орондоо авчирсан юм. Харин 2001 онд Э.Одгэрэлтэй зэрэг топ модель болж байжээ. Одоогоор загварын шоунд тэр болгон оролцохоо больсон ч жил болгон зохиогддог монголдоо хамгийн том наадам болох “Гоёл” наадмын тайзыг чимсээр байгаа билээ. Харин түүний хувийн амьдралын тухайд бас л гундуухан, ганц бие амьдралыг туулж яваа. Анхны нөхөр, хүүгийнх нь аав нэгэн чөлөөт хэвлэлд ажилладаг Цолмон хэмээх залуу байсан бөгөөд харамсалтай нь бурханы оронд явсан. Ганц бие, үргэлж олны нүдэнд ил, хэзээд хэтэвчний хүүхнүүд хэмээх нэр алдраас зүүгддэгийг хэлэх үү, тэр олон ч эрчүүдтэй нэр холбогдож байсан. Үнэндээ тэр бусдын хэтэвчинд гэхээсээ илүү бизнесийн сүйхээ, өөрийн хөдөлмөрөөр амьдралаа авч яваа бүсгүй гэдгийг ойр дотныхон нь ярьдаг юм.

Тэрээр одоо өөрийн байгуулсан “Монгол модель” агентлагтаа багшилж олон арван чадварлаг загвар өмсөгчийг бэлтгэсээр байгаа. Загварын ертөнцийнхөн дундаа ахмадад тооцогдох болсон “Топ” маань сүүлийн үед загварын тайзнаас илүүтэйгээр телевизийн нэвтрүүлэг, реклам клипээр үзэгчидтэйгээ уулзах нь ихэссэн. Тэрээр саяхнаас “Монгол стандарт тогтооё” гэсэн уриатай рекламанд тоглосноор энэ үгийг нэлээдгүй “моод” болгоод байгаа.

3. Д.Цолмон- 2002 оны топ модель

“Том” гэсэн тодотголтой топ модель Цолмон Монголын загварын ертөнцийн “акул”-уудын нэг. Тэрээр өөрийн тэгш сайхан бие галбир, өөгүй цэвэрхэн царайгаараа гайхуулж явсан ч загварын тайзаа орхиод багагүй хугацаа өнгөрлөө. Түүнтэй нэгэн цаг үед мөр зэрэгцэн алхаж явсан моделиуд “Цоомоо бол үнэхээр чадварлаг, мэдрэмжтэй модель бас сайн багш, мөн тэр хүн чанартай, аядуу зөөлөн зангаараа ялгардаг байсан” гэж ярьцгаадаг. Тэрээр “Шилмэл загвар” компанид олон жил багшилсан. Хэдийгээр өөрөө загварын тайзаа орхиж хувийн амьдралаа хөөсөн ч түүний шавь нар болох топ модель О.Уянга, О.Пүрэвдулам, Э.Сэлэнгэ, Б.Гэрэлчулуун гээд одоогийн загварын ертөнцөд цахиур хагалж яваа олон чаварлаг моделиуд байдаг нь түүнийг сайн модель төдийгүй сайн багш байсны тодорхойлолт юм.

4. Э.Туяацэцэг-2003 оны топ модель

Туяацэцэг 2003 онд “Топ” болсон. Ерөнхийдөө загвар өмсөгч хүнд байх ёстой хувирах чадвар, өндөр нуруу, бие хаа түүнд харамгүй заяасан. Эрлийздүү өвөрмөц бор арьс, өөртөө итгэлтэй эршүүд дүр төрх түүний бусдаас ялгарах онцлог ертөнц. Загварынхан дундаа мэдлэг боловсролоороо дээгүүрт ордог энэ бүсгүй стюартс хийдэг байсан бөгөөд харин одоогоор MSC компанийн борлуулалтын албанд ажилладаг гэнэ. Тэрээр сүүлийн жилүүдэд “Гоёл” наадам болон “Торго”-ын шоунд л орж харагдах болсон.

5. Х.Ундраа-2004 оны топ модель

Х.Ундраа харьцангуй залуугаараа “топ” болсон. 14 настайгаасаа эхлэн загварын тайзнаа хөл тавьсан тэрээр одоо 26 настай. Монголжин, даруу төлөв зангийнх нь цаана бүсгүй хүний адтай, сэргэлэн араншин бүгд байдаг төдийгүй үүгээрээ сайн зэвсэг хийдэг хэмээн энэ тогооныхон шивэр авир хийдэг. Бусдыгаа бодвол элдэв хов живэнд бага өртдөг тэрээр өнөөдөртөө ганц бие амьралаар амьдарч байгаа юм.

6. Т.Баярзул-2005 оны топ модель

Загварынхны дунд даруу зан, донжтой яриагаараа өөрийн имижийг тодорхойлсон тэрээр тайзан дээр ч бусдаас өөр эрхэмсэг, ихэмсэг, байж чаддаг байсан. Т.Баярзул бүсгүй олны хараанд тэр бүр өртөөд байдаггүй. 2005 оны “Гоёл” наадмаас “Топ модель” гэсэн шагналыг хүртэж байсан төдийгүй бүжигчин мэргэжилтэй бөгөөд “Шилмэл загвар” компанид бүжгийн багшаар ажилладаг байсан. Мөн “Жамух” чуулгад харъяалагдаж, Чингисийн хүрээ жуулчны баазад бүжиглэж, үндэсний урлагийн гайхамшгийг гадныханд мэдрүүлж явсан. Харин нэг л өдөр “Монголньюс” компанийн захирал, хэвлэлийн магнат Ц.Балдоржийн хүү, “Улаанбаатар” зочид буудлын захирал Мөнхтүшигтэй ханилан загварын тайзнаа цэг тавьсан юм. Түүний хувьд одоо гэр бүлийн амьралд, тэр дундаа бизнесмэн залуугийн цайг чанаж, хоёр хүүхдийн ээж болсноор энгийн нэгэн гэрийн эзэгтэй болж туйлын даруухан амьдарч байгаа билээ.

7. Д.Пүрэвсүрэн-2006 оны топ модель

Анх телевизийн дэлгэцээр “Giv” савангийн рекламанд тоглож өөрийн бие галбир, гоо үзэсгэлэнгээрээ олны танил болсон Д.Пүрэвсүрэнг тэр үед мэддэггүй байсан хүмүүс “Монгол газар”-ын Мянгаагийн нялх амраг гэдгээр мэддэг болсон. Тэр цагаас хойш загварын тайзнаа “од” болон гялалзаж олон арван эрчүүдийн харц, хайр сэтгэлийг булааж, бүсгүйчүүдийн атаархал, гайхширлыг зэрэг төрүүлж чадсан азтай, адтай бүсгүй бол топ модель, жүжигчин Д.Пүрэвсүрэн юм. Тэрээр сүүлийн үед хэд хэдэн кинонд гол ба туслах дүрийг бүтээж чамгүй сайн жүжигчин гэдгээ ч олон нийтэд харуулаад амжсан. Пүүжээ 2010 оноос Монголдоо ноос, ноолууран бүтээгдэхүүнээр толгой цохьдог “Говь” компанитай гэрээ хийн ажиллаж байгаа бөгөөд өдөр бүр айл бүхний хойморт зочилдог болсон юм.

8. Г.Уранцэцэг-2007 оны топ модель

Монголын загварын ертөнцөд Европ алхаа гишгээ, өөрийн гэсэн имиж, аальгүй, зоримог харцаараа олны анхаарлыг татаж хүчтэй гарч ирсэн загвар өмсөгч бол Г.Уранцэцэг. Түүнийг загварын ертөнцөд хаалга тогшилгүй хүч түрэн орж ирсэн ч залуу топууд дундаа европ стандартад хамгийн ойр цорын ганц загвар өмсөгч ч гэж ярьцгаадаг. Сингапурын загварын агентлагт суралцаж байсан болохоор монголын загварын ертөнцөд цахиур хагалах түүний хувь амархан байсан байж болох юм. Нэг хэсэг “Мон-Эрдэнэ”-ийн Пунцагбалжир агсны хүү П.Энхмөнхтэй нэр холбогдож явсан ч хэсэг хугацааны дараа хэвлэл мэдээллээр хэрүүлийн алим шидэлцэж багагүй шуугиантайхан салсан. “Урт хөл, урт эрүү” гэж хочлон ярьдаг ч тэрээр дизайнеруудын урласан бүтээлийг гайхамшигтай “амилуулж” хүмүүст хүргэж чаддагаараа загварын ертөнцөд хүлээн зөвшөөрөгдсөн модель юм. Тэрээр маш өндөр мэдрэмж, чадвартай учир загварынхан түүнд ам сайтай байдгаас гадна түүнээс суралцах зүйл ч их байдаг байх.

9. Алимаа- 2008 оны топ модель

90-ээд оны сүүлээр бараг сурагчийн ширээнээс босч загвар өмсөн 2000-аад оны эхээр Ирээдүйтэй загвар өмсөгчөөр шалгарчихаад хэвлэлд ярилцлага өгөхдөө “А.Сүхбат аварга балын амт мэддэггүй эрвээхэй” гэж эрээ цээргүй ярьсан нь Алимаагийн “даацтай” эхлэл байсан юм. Харин дараа нь хэсэг хугацаанд сураг алдарсан модель 2007 онд гэнэт л загварын тайзнаа эргэн ирсэн нь топ модель хэмээх өргөмжлөлийн төлөө гэхэд хилсдэхгүй. . Ёстой нөгөө битүү морь гэдэг шиг Алимаа топ болсон нь олон хүний нүдийг орой дээр нь гаргаад зогсохгүй топ модель хэмээх өргөмжлөлийн нэр хүндийг гудамжинд гаргасан явдал юм.

10. О.Уянга-2009 оны топ модель

Олны танил болсон “топ”-уудын араас маш богинохон хугацаанд хүч түрэн орж ирсэн модель бол О.Уянга юм. Тэрээр 2003 онд “Шилмэл загвар” компанийн загварын дамжаанд орж “том” Цолмонгийн шавь болсноор түүний загварын ертөнц дэх түүх эхэлжээ. Бусдыгаа бодвол хар хэл аманд өртөөд байдаггүй тэрээр загварын ертөнцийнхөн дундаа хамгийн өндөр боловсролтой модель гэнэ. Мөн 2007 оноос эхлэн “Шилмэл загвар” компанийн дамжаанд загварын багшаар ажиллаж байсан. Сайн багшийн шавь, сайн модель гэсэндээ хичээл заах арга барил сайтай гэж салбарынхан нь түүнд ам сайтай байдаг. О.Уянга 2009 онд Хүмүүнлэгийн Ухааны Их Сургуулийг Олон Улсын Сэтгүүлч мэргэжлээр төгссөн. Одоогоор Сингапур улсад магистраар суралцаж байгаа. Мэдлэг боловсролдоо ихээхэн анхаардаг модель маань ойрын хоёр жилдээ л загварын тайзан дээр гарахгүй гэж байсан ч “Гоёл” наадамд ирж оролцсон байлаа.

11. Ч.Уранбилэг-2010 оны топ модель

Ч.Уранбилэгийн хувьд өнгөрсөн жил болсон "Miss global city" шалгаруулалтад амжилттай оролцож, "Дорнын тэргүүн мисс" өргөмжлөл хүртэж байсан. Мөн "Мисс Монголиа" тэмцээнд фото миссээр өргөмжлөгдөж, "Гоёл 2006" наадмын тэргүүн дэд байрт шалгарч байжээ. тэрээр загварын ертөнцөд хэдийгээр эмэгтэйлэг эрхэмсэг харагддаг ч амьдрал дээр эмэгтэй хүнд ахдахаар ажилд тооцогддог барилгын компани удирддаг, бас спортоор хичээллэдэг нь бусдын анхаарлыг татдаг. Тэрээр гольф тоглох дуртай бас хурдан морины “хобби”-той болохоор ирэх зуны наадамд морь уях гэнэ.

12. Э.Сэлэнгэ- 2011 оны модель

“Эра” моделийн агентлагаас загвар өмсөгч болох гараагаа эхэлсэн Э.Сэлэнгэ “Гоёл 2011” наадмын топ модель болсон. 17 настай байхаасаа “Look” агентлагт ажиллан ирээдүйн загвар өмсөгч болон фото моделиудыг сургаж байгаад хоёр жилийн дараагаас Монголын дизайнеруудын холбоотой гэрээ байгууж, “Шилмэл модель” агентлагт багшлах болжээ. 15 настайдаа “Гоёл 2005” наадмын тайзнаа алхаж байсан Э.Сэлэнгэ загвар өмсөгч төдийгүй “Мисс Монголиа 2008” наадмын “Мисс модель” өргөмжлөлтэй. Тэрээр “топ”-ууд дундаа энэ өргөмжлөлийг хамгийн залуугаараа авсан модель юм. Сэтгүүлч мэргэжилтэй болохоор ч тэр үү, их нээлттэй илэн далангүй, бас их сэргэлэн гэж “ахмадууд” нь үнэлдэг юм билээ.

Н.Зол