Монголын Ерөнхийлөгч нар тэтгэвэрт гардаггүй нь хачин

2011-04-07

АНУ-ын Ерөнхийлөгч аав, хүү хоёр Буш албаа хүлээлгэн өгөөд төрөлх Техас руугаа хөлгийн жолоо залав.

Эцэг нь дуртгалаа бичээд, хүү нь их сургуульд лекц уншсан шигээ унасан нутагтаа жаргаж байна. Гэтэл манай Ерөнхийлөгч нар нутаг руугаа зүглэхгүй шүү дээ. Хоёр улирсан П.Очирбат, Н.Багабанди хоёр заяа нь Завхан руугаа очихгүй. Н.Энхбаяр эцгийнхээ нутаг Архангай, эхийнхээ төрсөн газар Хэнтийд очих уу. Улаанбаатарт л үхэлдээд байх юм.

Анхны Ерөнхийлөгч П.Очирбатад халаагаа өгснийх нь дараа Хуримын ордны хажууд товхийсэн байшин барьж өгсөн. Одоо тэндээ аж төрж байна. Н.Багабанди тохилог "Royal castle" хотхоны бассейн энэ тэртэй тохилог орон сууцанд амьдардаг. Бодвол байшингийнхаа мөнгийг төрөөс авсан биз дээ. Гурав дахь Ерөнхийлөгч гэж өөрийгөө цоллодог Н.Энхбаяр "Монголросцветмет" нэгдлийн дэргэд өндөр хашаа бүхий хауст суудаг. Өнөөх байрныхаа мөнгөөр энэ харшаа бариулсан уу, худалдаж авсан уу гэдгийг хэлж мэдэхгүй. Ерөнхийлөгч нарыг бүрэн эрхээ хэрэгжүүлж дуусахаар нь орон сууц барьж өгөх хуультай болохоор одоо яая гэхэв.

Бас насан туршид нь сайдын жишгээр цалинжуулна. Эхний хэдэн жилд нь унах машин, тогооч, туслах мэтийг өгнө. Тийм болохоор түүндээ хоргоддог байлгүй дээ. П.Очирбат одоо Үндсэн хуулийн цэцийн гишүүн, хоёр дахиа сонгогдсон нь энэ. Түүнийг хоёр дахь удаа орж ирэхэд нь тэтгэврийн хөгшнөөр яах гээ вэ гэж УИХ-ын зарим гишүүн дурамжхан байсансан. 20 хэдхэн насандаа сайд болж, нэг насаараа дарга даамал явсан түүнд одоо алба хаах хэрэггүй л баймаар даа. Бас уул уурхайн чиглэлээр элдэв лобби хийхдээ гаргууд юм гэсэн. За хө өвгөөн гэж мөрийг нь алгадаад л, онигоо хүртэл ярьж инээж байгаад л санаагаа ойлгуулчихдаг гэж байгаа.

Н.Багабанди "Титэм үг" тэрлэж чимээгүйхэн байж байгаад Оюутолгойн удирдах зөвлөлийн гишүүн болов. Өндөр цалин, эрх дархтай, хангамж сайтай л алба даа. Тэрбээр амандаа орсон шар тосыг хэлээрээ түлхэх тийм маанаг хүн биш л дээ.

Н.Энхбаяр маань ёстой нэг бантанг нь хутгаж, бужигнуулж байна. Ерөнхийлөгч болоход нь элдвээр дэмжсэн ууган намаасаа нүүр буруулж, МАХН гэдэг шинэ намын дарга болов. УИХ-ын гишүүн Ц.Шинэбаяр, Эрүүл мэндийн дэд сайд байсан Н.Удвал, улстөрч гэл үү С.Молор-Эрдэнэ, цагтаа Хууль зүйн сайдын алба хашиж байсан Л.Цог, өмгөөлөгч Ч.Энхээ энэ тэртэй нийлээд Монголын улс төрд жинхэнэ хүчтэй хор найруулж байна.

Тэр гайгүй эрүүл саруул ухаантай хүн боловч хийж буй үйлдэл, баримталж байгаа бодлого, тэмцлийн арга барил нь даанч гэнэн санагдана. Тэтгэвэртээ гарах арай болоогүй л дээ уг нь. Гэхдээ тансаг харшдаа орчуулгаа хийсэн шиг санаа амар сууж болохгүй байгаа юм байх даа. Бас л хар нялхаар шахам сайд, намын дарга болж, Монголын гурван том албан тушаал-Ерөнхийлөгч, УИХ-ын дарга, Ерөнхий сайдын албыг хашсан цорын ганц хүн билээ. Тийм болохоор албан тушаал, эрх мэдлийн төлөө хэтэрхий шунаж, өс санаж явдаг байх.

Монголын төрийн томчууд албаа өгөөд янз бүрээр л амьдарч байж. Арай эртхэнээс яривал маршал Х.Чойбалсан, энэ улсыг 44 жил толгойлсон Ю.Цэдэнбал нар одоогийн Засгийн газрын 30 дугаар байр буюу нэгдүгээр сургуулийн зүүн талын байранд даруухан аж төрж байжээ. Хоёулаа Орост очиж бурхан болсон эмгэнэлт хувь заяатай улс даа. Тэр ч байтугай, Ю.Цэдэнбал Сангийн яамны сайд байхдаа яамныхаа нэг жаахан өрөөнд өөрийн найз, Л.Цогзолмаа гуайн нөхөр, Н.Сувдын аав Ц.Намсрайтай хамт амьдарч байсан гэнэ лээ. Хоёулаа гэрлээгүй залуухан байжээ.

Монгол төрийн мэргэн өвөө Ж.Самбуу тухайн үед төрийн тэргүүний алба хашиж байсан ч Уулын аманд Монгол гэр бариулчихаад гурилтай шөл халбагадаж, шатар нүүж суусан гэх. Ж.Батмөнх МАХН-ын ерөнхий нарийн бичгийн дарга, АИХ-ын тэргүүлэгчдийн даргаас огцорсныхоо дараа Дамбадаржаад хашаа байшинд сууж, ногоо тарьж амьдарч байгаад тэнгэрт халив. Нам нэгт нөхөд нь ардчиллынханд бууж өгсөн гээд нэг нүдээр ч харж үзээгүй юм билээ. Д.Бямбасүрэн зусландаа мод, ногоо тарьж эрх тааваараа байна. Ерөнхий сайд асан П.Жасрай гуай гэртээ даруухан амьдарч, намынхаа төлөө зүтгэж яваад нас эцэслэсэн юм. Д.Содном Ерөнхий сайдаас буугаад "Монголын алт" компанид зөвлөх хийгээд хажуугаар нь дурсамжаа бичээд л явж буй.

Ш.Гунгаадорж Ерөнхий сайдын албаа өгөөд нэг хэсэг Байгаль орчны сайдын зөвлөхөөр ажиллаж байв. Одоо гэр зуураа бүтээлээ туурвиж байх шиг байна. МАХН-ын дарга Б.Даш-Ёндон Философийн хүрээлэнд ажиллаж буй аж. Тус намын дарга асан Г.Очирбат мөн л бүтээл туурвиж, саяхан хөдөлмөрийн баатар цол хүртлээ. Ерөнхий сайд асан М.Энхсайхан АН-даа гомдохдоо ҮШН гэдэг нам байгуулсан, намынх нь нэр хүнд тийм сайнгүй л байх шиг. Ном бичиж байгаа дуулдав. Одоо ирэх жил сонгуульд өрсөлдөнө гээд л суугаа биз. Р.Амаржаргал парламентын гишүүн гэх ажилтай, хууль боловсруулж байгаа. Бас эдийн засгийн сэдвээр ном бичжээ. Эрүүл мэндийн шалтгаанаар ажлаа өгсөн С.Баяр эмчилгээ сувилгаандаа голлон анхаарч байгаа бололтой, үе үе Америк, Солонгос руу удаан хугацаагаар явчих юм. УИХ-ын гишүүн боловч хууль тогтоох ажиллагаандаа санаа тавих боломж тааруу байдаг биз дээ.

Эдэн шиг хязгааргүй эрх мэдэлтэй том дарга Монголд байгаагүй. Гэвч тэд шинэ цагийн улс төрчид шиг орд эзэмшиж, ордон бариулсангүй.

Ерөнхийлөгчөөс эхлээд төрийн том албан тушаалтнуудаа төрийн албаа хааж дуусгаад хуулийн насанд хүрэхээр нь тэтгэвэрт гаргачихаж байх юмсан.

Том албатай нь жар хүрсэн ч, дал дөхсөн ч алба хашаад байдаг, жирийн иргэн болохоор тэр дор нь тэтгэвэрт хөөгөөд гаргачихдаг байж таарамгүй. Монгол чинь иргэн бүр хууль шүүхийн өмнө тэгш эрхтэй гэж Үндсэн хуульдаа тунхагласан улс шүү дээ.

Б.Батбилиг