хэд дахин өндөр өртгөөр шахдаг байсан бол одоо бүүр даварч хүн шахдаг болжээ-

Уулын баяжуулах “Эрдэнэт” үйлдвэрийг Монгол Улсын “саалийн үнээ” гэдэг. Арга ч үгүй биз, төсвийн бараг 40 хувийг дангаараа бүрдүүлдэг байсан юм чинь. Гэхдээ сайны хажуугаар саар гэгчээр элдэв хэл ам “Эрдэнэт”-ээс салахгүй. Ашиг хонжоо харсан төрийн томчуудаас эхлээд бизнесийнхэн ОО-ын цаас, шүдний чигчлүүрээс эхлээд элэгдэж хуучирсан машин техник, тоног төхөөрөмжийг зах зээлийн үнээс хэд дахин өндөр өртгөөр шахдаг байсан бол одоо бүүр даварч хүн шахдаг болжээ.

Уулын баяжуулах “Эрдэнэт” үйлдвэрийн дарга Ч.Ганзориг ч мэргэжлийн гэхээсээ илүү хэн нэгэн дарга, сайд нарын шахааны хүмүүсээр багаа бүрдүүлж, өөрийгөө хүрээлүүлэн суудаг болсон гэнэ. Улаанбаатар хотод төрийн алба хашиж байхдаа ажлаа хийж чадахгүй аргагүй эрхэнд чөлөөлөгдаж байсан нөхдүүдэд харьяалагддаг нам нь хариуцлага тооцох нь бүү хэл, харин ч дэвшүүлэн зайлуулж, “Эрдэнэт”-д өндөр цалинтай, боломжийн местэн дээр томилдог гаж зуршил хэдийнэ бий болсон. Үүний бодит жишээ гэвэл, 2008 оны сонгуулийн будлианы гол баатар СЕХ-ны дарга асан Б.Баттулга юм. Тэрбээр ГОК-д Хүний нөөцийн хэлтсийн даргаар ажиллаад эдүгээ хоёрдох жилтэйгээ золгож байна.

Ард түмний сонголтыг луйварлаж, будлиан үүсгэснээс болж таван хүний амь эрсдсэн асуудал одоо ч халуунаараа байхад Б.Баттулга дарга “Эрдэнэт” үйлдвэрт өндөр цалинтай удирдах ажлаа зүгээр ч хийчихгүй сурсан зангаараа “бантан хутгаж” яваа сурагтай. Шуудхан хэлэхэд, үйлдвэрийн ажилчдыг МАН-д элсүүлэх, элсэхгүй нэгнийг нь хавчиж шахдаг талаар амтай болгон ярих болж. Учир юу вэ гэвэл, үйлдвэрийн ажилтан МАН-д элсэх буюу МАН-ын гишүүн байсан тохиолдолд албан тушаал, цалин хангамж нь “гэрлийн хурдаар” өсөх магадлалтай гэнэ. Албан тушаалыг мөнгө дагаж явдаг болохоор Б.Баттулга даргын буянаар үйлдвэрийн 500 ажилчин горьдлого тээн МАН-д элссэн юм байх. Нэг ёсондоо Уулын баяжуулах “Эрдэнэт” үйлдвэрт ажиллах хүсэлтэй л бол МАН-ын гишүүн байх ёстой гэдэг зарчим энд үйлчилдэг гэсэн. Уг нь төрийн албан хаагч аль нэг улс төрийн намын харьяалалгүй байх ёстой гээд хуулиндаа заасан байдаг биш бил үү, Ч.Ганзориг дарга аа.

Саяхан л гэхэд Эдийн засгийн үр ашгийг дээшлүүлж байгаа гэдэг нэрийн дор баахан хүмүүсийг халж, сольсны дотор МАН-ын гэх тодотголтой дарга нарын хүүхдүүд, хамаатан саданг тушаал дэвшүүлэн цалинг нь нэмжээ. Удирдлагуудын энэ увайгүй үйлдэл олон жил ажилласан туршлагатай ажилчдын гомдол, бухимдлыг ч төрүүлсэн байна. Өнөөдрийн байдлаар “Эрдэнэт”-ийн ажилчдын дундаж цалин 1,4 сая төгрөг. Өнгөрсөн жил тус үйлдвэр ажилчдынхаа цалинг 30 хувь нэмсэн. Он гарсны дараа нэмэгдсэн цалинг дахин 25 хувиар нэмсэн тул бусад салбарыг бодвол харьцангуй өндөр. Тиймээс их мөнгөнд амаа үдүүлдсэн ажилчид нь дарга даамлынхаа хууль бус үйлдлийн эсрэг үг хэлэх эрхгүй гэсэн үг. Хэрэв эсэргүүцвэл “сэлэм гялс, толгой бөндгөс” гэдэг шиг ажилгүйчүүдийн тоогоор улсдаа тэргүүлж буй армийнхныхаа араас орох аюул нүүрлэнэ биз. Ингээд л цалингаараа амаа үдүүлсэн ГОК-ын ажилчдад эрх чөлөөний тухай ярих нь бараг илүүц биз.

Мөн Зам тээврийн яамны Төрийн нарийн бичгийн дарга байхдаа хүн зодсон гэх хэрэгт холбогдож явсан “Симба” Б.Батаагийн дүү Б.Бат-Энх “Эрдэнэт” үйлдвэрийн Хөгжил хариуцсан орлогч захирлын албанд очжээ. Хөгжил хариуцсан захирал гэдэг нь зэс хайлуулах үйлдвэр байгуулах, ирээдүйн 10-20 жилд үйлдвэрийг хэрхэн хөгжүүлэх зэрэг стратегийн томоохон зорилтуудыг тодорхойлох, түүнийхээ төлөө ажиллах үүрэгтэй албан тушаалтан. Харин өнөөдөр Б.Бат-Энх үйлдвэрийн ажилчдынхаа дунд “шоумэн” гэдэг нэр авчихаад явж байна. Хэний хөөрөг үнэтэй, хэний морь хурдан бэ гэдгийг Б.Бат-Энх захирал андахгүй. Иймэрхүү урлаг, спортын арга хэмжээнд нугасгүй болохоор нь үйлдвэрийнхэн түүнд “шоумэн” гэдэг нэр өгсөн аж. Уг нь үйлдвэрт Нийгмийн асуудал хариуцсан захирал гэж байдаг боловч Б.Бат-Энх захирал үндсэн ажлаасаа илүүтэй иймэрхүү ажилд гол анхаарлаа хандуулдаг төдийгүй үйлдвэрийн шахааны гэх бизнесийг түлхүү хариуцдаг нэгэн болж хувирчээ.

Тус үйлдвэрт 30-150 жилийн бараа материал, сэлбэг хэрэгсэл шахсан гэдэг шүүмжлэлийг үе үе УИХ-ын гишүүд ярьж байдаг. Гэхдээ яг хэний шахаа болох нь тэр бүр илэрдэггүй нь баримттай холбоотой аж. Учир нь, хэн нэгний шахааны бизнес болох тухай яригддаг ч шал өөр нэртэй компанийн нэрээр бараагаа шилжүүлээд сурчихсан байдаг гэнэ.

Ер нь, УИХ-ын сонгуулиар ялсан намын хүмүүс л Монгол Улсыг тэжээж буй “Эрдэнэт” хэмээх “саалийн үнээ”-г эзэлдэг нь нууц биш. Харин 2000 оноос хойш МАН-ынхан, тэр дундаа МАН-ын шийтгэл хүлээсэн хүмүүс тэнд очиж “шагнал”-ын албан тушаал хашдаг болсон нь нууц биш болжээ. Ийнхүү Уулын баяжуулах “Эрдэнэт” үйлдвэр хөгжлийн зангидсан бодлогогүй, алдаа гаргасан албан тушаалтнуудыг хамгаалах халхавч болоод зогсохгүй эрх баригч намын тоглоомын нэг хэсэг болж байгаад эрдэнэтчүүд халаглаж байна.

Г.Нар

МАН-ын “угшилтай” шахааны хүмүүсээ багтааж, шингээгээд л байна уу Ч.Ганзориг дарга аа
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
наад алний гуйлагчингууд чин идэжил байг хэзээ нэгэн одор шийтгэлээ амсах байлгуй ха ха ха тэ эрдэнэтчүүдээ

2012-07-16 | 19:10:52 | 27.123.213.11 |

Мэдээ
Гадаад мэдээ
Видео