Гэвч олны яриа, элдэв таамагт дуучин залуу ямар нэгэн тайлбар хэлж, энэ тэрүүгээр гүйх дургүй юм билээ. Сонсогч фэнүүд хийгээд түүний тухай мэдээллийг сонирхож явдаг хүмүүсийн хувьд, тэрбээр олон талын “өнгөтэй” хүн. Тиймээс дуучин залуутай уулзаж, амьдрал уран бүтээлийнх нь талаар яриа өрнүүллээ.

-Уран бүтээлч хүнтэй уулзсаных, энэ талаар яриагаа эхэлсэн нь дээр байх. Сүүлийн үеийн уран бүтээл хийгээд хийж бүтээж буй ажлынхаа талаар сонирхуулаач?

-Шинэ цомгоо гаргахаар бэлтгэж байгаа, нэрийг нь хараахан өгч амжаагүй. “Гал үндэстэн” холбооны маань үйл ажиллагаа өдөр ирэх бүрт өргөжин тэлж байна. Магадгүй нийгмийн захиалга ч юмуу нийт хүмүүсийн хүсч, дэмжиж буй зүйл учраас үр дүн сайтай байгаа. Бусдад ямар нэгэн зүйл амлаж, дэмжлэг туслалцаа гуйсангүй. “Ахан дүүс минь эвлэлдэн нэгдэж эх орондоо байгаа муу муухай бүхнийг таслан зогсоож, зөв зүйлийг дэлгэрүүлье” гэсэн уриатай ажилладаг. Хоосон амлалтаас илүү бодит зүйлээр үзэл бодлоо илэрхийлж байна.

-Оны өмнөхөн бас нэг цомог гаргасан. Удахгүй гарах цомог тань юугаараа ялгаатай байх бол?

-Тэр бол 15 дуутай “Өмөлзөж харамлах нутаг” цомог байсан. Шинэ цомогт маань ч гэсэн, ийм хэмжээний дуунууд багтсан. Сэдвийн хувьд, янз бүр л дээ. Урьд нь гаргасан хит болон сүүлийн үед хийсэн олон сайхан дуу бий. Тоглолтод оролцох бүрт хүмүүсийн орилж хашгиран байж дуулуулдаг “Өмөлзөж харамлах нутаг”, “Андгай” зэрэг дуунаас гадна ээж аав, хайр харууслын тухай сэдэвтэй дуунууд ч багтсан шүү. Юм юмтай л цомог гарах нь дээ. /инээв/

-Таныг ээж аав, элбэрэл хайрын тухай дуулаасай гэж хүсдэг хүн олон бий. Гэтэл сүүлийн үед эх орон, нутаг усаа харамлан хайрлаж буй сэдэвтэй дуунууд хийх болсноос үүдэн уран бүтээлийг тань хэтэрхий улстөржөөд байна уу даа гэх харыг ч бас дагуулаад байгаа?

-Уран бүтээлийн минь сэдэв хүрээгээ тэлж, даац нь нэмэгдэхийн хэрээр хэсэг хүмүүс айж, ингэж мушгиж байж болох л юм. Түүнээс биш, эх орон, энэ амьдрал, өвөг дээдсээ дуулна гэдэг чинь ээж аавыгаа дуулж байгаагаас огт ялгаагүй. Элэнц хуланц минь хүртэл энэ газар дэлхийтэй холбоотой шүү дээ. Удам угсаагаа судалж үзсэн ч тэр, огт ялгаагүй.

-Мэдээж хэрэг, та энэ үндсэрхэг үзлээрээ олон нийтэд чамгүй зүйл хүргэхийг хүсдэг байх. Харин тан шиг ийм үзэл бодолтой залуус хэр олон байгаа бол?

-Бусдыг тэгээсэй, ингээсэй гэж хүсэхээс илүү би өөрийнхөөрөө байх дуртай. Энэ миний заяа тавилан ч юм шиг. “Дэлхий даяаршиж байгаа, хөгжил нь хурдацтай байна” гээд л гадаад дотоодоор ярих л юм, зарим хүн. Яг энэ даяаршил, хөгжил гэдэг чинь юу юм бэ. Сүүлийн үеийн залуус үүнийг юу гэж ойлгодог бол… Колоничлолын форм буюу харийн хувцас өмссөнөө даяаршил гээд байгаа юм уу. Баахан өндөр байшин барьж, брэнд бүтээгдэхүүнээр өөрийгөө хучаад, паартай балгасанд шигдэж нуугдсанаа хөгжил гэж нэрлэх үү. Уучлаарай, энэ чинь хөгжил биш. Тийм айхтар хөгжилтэй байсан юм бол дэлхий ээжийг ингэж хилэгнэтэл нь бид амьдрах ёстой байсан уу. Японыг хар л даа, бэлээхэн жишээ харагдчихлаа. Бидний өвөг дээдэс энэ хөдөлгөөнтэй байгаа дэлхий дээр хөдөлгөөнгүй байгаа суурин иргэншлийг үзэн ядаж, эх нутгаа хамгаалахын төлөө хэлж явдаг байснаас биш, ийм “соёл” гээчийг шүтэж биширсэн үр садтай болохыг хүсээгүй. Нүүдлийн соёлоос илүү шавар дагзанд амьдрахыг чухалчлаагүй. Хүнээр яривал, эд эс бүхэн нь хөдөлгөөнгүй болчихвол яаж амьдрах юм бэ. Яг үүн шиг үзэгдэл дэлхий дээр болж байгааг монголын залуус анзаарах хэрэгтэй. Өвөг дээдсийнхээ түгээн дэлгэрүүлж явсан зүйлийг бид дэлхийд таниулж чадвал тэр жинхэнэ хөгжил байх болов уу. Дэлхийгээ сөрсөн нь сүйрч, дагасан нь мандан бадарч байна. Тиймээс сүүлийн үед нүүдлийн соёл сэргэж эхэллээ.

-УИХ-ын нөхөн сонгуульд нэр дэвшиж байсан болоод ч тэр үү. Үзэл бодол, үйл хөдлөл бүрийг тань улс төртэй холбох болсон нь нууц биш. Магадгүй, танд 2012 оны УИХ-ын сонгуульд хүчээ сорих бодол байгаа л байх?

-Улстөрч гэдэг чухам юуг хэлээд байгаа юм бэ. Түмэн олныхоо төлөө морь нохой мэт зүтгэж, хийсэн ажил нь миний дуу шиг хүрч чаддаг байвал түүнийг л жинхэнэ улстөрч гэх байх. Энэ бол хуульч, эдийн засагч гэх мэт хэдхэн хүмүүсийн өмч биш. Монголын түмэн олны өмч байх ёстой. Гэтэл ард түмэн маань “Улс төр бол хуульч, эдийн засагч нэртэй, газар шороогоо зарж иддэг бусармаг хүмүүсийн асуудал юм байна” гэж андуурснаас болоод 20 жил зовлоо шүү дээ. Дуучин, цэвэрлэгч, сэтгүүлч, ээждээ мах гурил залгуулахын тулд зах дээр тэрэг түрж байгаа бяцхан хүү, хөдөөний малчин зэрэг бүх хүн л улстөрч байх ёстой. Тэдэнд улс төр хамгийн их хамаатай. Яг өнөөдөр өөрийгөө улстөрч гэж нэрлээд байгаа тэр хүмүүсээс би маш их ялгаатай. Миний хувьд, эх орныхоо газрыг зарсангүй, өвөг дээдсийнхээ өмнө хүлээсэн хариуцлагаа ухамсарлан, иргэнийхээ үүргийг гүйцэтгээд явж байгаа жирийн залуу. Түмэн олныхоо сэтгэл зүрхийг зөөллөн, зовлон жаргалаа хуваалцаж явья гэсэн хүсэл эрмэлзэл минь энэ. Тиймээс намайг битгий улстөрч болгох гээд бай. Хэрвээ дургүй хүргэвэл 2012 оны сонгуульд ганцаараа бус, асар олон хүнтэй хамт нэрээ дэвшүүлнэ. Яагаад гэвэл, энэ олон намыг алга болгох ёстой. Монгол хөдөлгөөнгүй хорт хавдрыг үүсгэсэн тэр нийгмийн байгуулал бол нам. Ард олныхоо төлөө өдөр шөнөгүй ажиллаж, гэр орноор нь орж мэнд усыг нь мэдээд, хамт өсч бас хамтдаа зовж чаддаг тийм хүмүүсийг гарч иртэл нь би хөдөлмөрлөх ёстой гэж бодож байна.

-Дуучин гэдэг утгаараа, таныг “УИХ-ын дугуй танхимыг Монгол бөхийн өргөөний дугуй танхимтай андуураад байна. Дуугаа дуулаад явж байвал барав” гэсэн шүүмжлэл нэлээд сонсч байлаа. УИХ-ын Н.Бат-Эрдэнэ аваргыг ч анх улс төрд хөл тавихад нь иймэрхүү шүүмж дагасан шүү дээ. Энэ яриаг хэрхэн хүлээж авсан бэ?

-Та бүхэн бодоод үзээрэй. Би өөрийгөө тийм айхтар мундаг хүн гэж цоллож байгаа юм биш. Өнөөдрийн улс төр ямар сулбагар байгааг миний байр сууринаас хараад үз л дээ. Дуу дуулж, урлагийн ертөнцөд танигдах маш хэцүү. Рок поп ч тэр, нийтийн дуу ч тэр. Гэтэл улс төр рүү зүгээр л нэг хэдэн дуу дуулсан Жавхлан гэдэг залуу яваад ороход яасан айхтар цочирдог юм бэ. Тэгэхээр дэндүү сулбагар, дэндүү хар байгаа биз. Уг нь төрийн нэг салбар нь урлаг баймаар. Гэтэл урлагийн нэг салбар нь бараг төр болчих гээд байгаа юм биш үү. Яг үнэндээ улстөрч гэдэг мэргэжил энэ дэлхий дээр ч байхгүй. Янз бүрийн мэргэжлээр цоллож, хэсэг бүлгээрээ нэгдэн байж амин хувиа хичээх цаг дууссан. Дуучин нь ч бай, цэвэрлэгч нь ч бай, хамаагүй. Бүгд эх орон, ахуй гэрийнхээ төлөө зүтгэх цаг ирсэн. Манай их хаад хууль, эдийн засгийн сургуульд сурсан билүү. Харьд доншуучлан, хамгийн заваан зүйлийг эх орондоо авчран ард олноо зовоож байгаа тэр хүмүүстэй харьцуулбал ямар вэ. Бидний өвөг дээдэс бүгд малчин байсан. Дэлхийг засах ухаан энэ нүүдэлчний соёл, малчин ухаан дотор байдаг болохоос биш, бусдыг сармагчин шиг дуурайх үзэгдэлд нэгээхэн ч байхгүй. Миний дуучин байх нь огт хамаагүй. Би дуугаа чин сэтгэлээрээ дуулдаг. Харин та нар тийм л их сүрхий хуульч, эдийн засагч юм бол, наад ажлаа чин сэтгэлээсээ хий л дээ гэж хэлмээр байна. Зөв зүйл хийж, түмэн олноосоо битгий салаач ээ гэдгийг л ухааруулмаар санагддаг. Самандын Жавхлан олбог сандалд дурласандаа тийшээ зүглэх гээгүй. Тэртээ тэргүй, надад олбог сандал, нэр алдар байгаа. Амин хувиа хичээвэл болохгүй зүйл алга. Гэтэл намайг ад үзээд байгаагийн цаана ямар санаархал байдаг юм бол, хөөрхийс. Би тэр хүмүүст “Ингэсээр байгаад хавдар тусав аа. Хавдар гэдэг чинь өөрийгөө хав дарахыг хэлдэг юм. Надаас илүү өөрийгөө эхлээд судлаарай” гэж хэлье. Их л айж дээ, хөөрхийс. /инээв/

-Саяхан гэр бүлийн амьдрал зохиогоод удаагүй байгаа. Гэтэл таныг хөдөө амьдрахаар болсон гэж сонслоо. Багагүй хугацаанд хотод амьдарсан болохоор хөдөөгийн ахуйгаас нэлээд төсөөрсөн байх гэж бодож байна?

-Надаас нэг залуу асууж байсан юм. “Та хотынх уу, хөдөөнийх үү. Би өөрөө хотын залуу, брэнд хэрэглэх дуртай” гэж. Нөгөө л нэг харийн соёлыг шүтдэг нөхөр байна лээ, тэр. Үүнийх нь хариуд “Хотынх ч биш, хөдөөнийх ч биш. Би Монгол хүн” гэж хэлсэн. Монгол хүн хаана ч байсан хамаагүй, Монгол ахуй амьдралаараа явах ёстой. Гэхдээ монголчууд дэлхий ээжийн хилэгнэлийг анхаарч, болгоомжлох хэрэгтэй. Японд болсон энэ гамшгийн дараа өөр бусад орнуудад ч багагүй сүйрэл болно гэдгийг зөн билэгчид хэлсэн шүү дээ. Энэ үед биднийг дөрөвдүгээр цахилгаан станц ч юм уу энэ шавар байшингууд аврахгүй. Дэлхий шилгээж, газар хөдлөх үед энэ сайхан тал хээр хэзээ ч дээрээс нөмөрч ирээд дарахгүй нь ойлгомжтой. Биднийг зөвхөн Монгол гэр л аварна. Тиймээс би тун удахгүй хөдөө нутгаа зорьж, эцэг өвгөдийнхөө зааж сургаж захисан ёсоор гал голомтоо жинхэнэ утгаар нь асаана. Ийм л зүйл надад мэдрэгдэж байна.

-Машинаа хүртэл мориор солих нь дээ?

-Цөвүүн цаг ирэхэд дэлхий дээр шатахууны хомсдол гарна. Тэр үед яах юм бэ. Бидний хэрэглэж байгаа машин, онгоц чинь юу ч биш шүү дээ. Зүгээр л нэг амьгүй төмөр. Эд юмаар засаглуулж, мөнгөнд дарлуулан, мөнгөөр нэгнийгээ боолчилдог цаг өнгөрсөөн. Сэтгэлийн гал, оюун ухааныг шүтэж, шунал тачаалыг үгүйсгэдэг тэр цаг үе ирсэн гэдгийг л ойлгох хэрэгтэй. Энэ бүхнийг түмэн олондоо дуулгаж, уриалах хувь тавилан надад олдсон.

-Гэзэг тавьж, дээл өмсөөд л үндэснийхээ соёлыг сурталчилж явна. Үүнтэй зэрэгцээ, дуучин Д.Болд хүртэл хөгжмийн төрөлд Монгол поп урсгалыг оруулж ирсэн. Бүр үндэснийхээ хувцсыг орчин үеийн хэв маягтай хослуулаад өдөр тутам хэрэглэж байна?

-Баахан брэнд ярьдаг болчихсон энэ залуусыг Монгол ёс заншил руу нь уриалан дуудах тэнгэрийн тавилан төөрөг Болдыг хүлээж байж магадгүй. Миний хувьд, маш их үнэлж хүндэтгэж явдаг залуу шүү дээ. Тодорхой хэмжээгээр олонд танигдсан, их хөдөлмөрч дуучин. Хэзээ нэгэн өдөр эх орноо гоё болгочихоод бид хоёр тэврэлдээд уулзах байх. Хүнээс юм гуйж, дээрэлхүүлдэггүй, илүү хардаггүй, харин ч бүр бусдад зааж сурган байлдан дагуулж чаддаг болсон цаг үед нэг их сайхан уужим амьсгаа авах боломж байгаа байлгүй дээ. Болдод баяр хүргэмээр байна, бас хайрламаар байна. Эр хүний ёсоор дэмжмээр байна.

-Тэгэхээр таны хувцасны хэв маяг энэ хэвээрээ л байх нь дээ?

-Монголоороо л байна. Би дуулж олсон эзэн Чингисийн зурагтай мөнгөө Монгол хүний хийж бүтээсэн зүйлд л зориулна. Тэд намайг яаж хувцаслахаа мэдэж байгаа байх. Энэ л миний хэв маяг байх болов уу.

-“Жавхланд хэдэн сая төгрөг амлаад ч дуулуулж чадахааргүй болж. Хөрөнгө мөнгөө хангалттай хураасан юм байх даа” гэсэн яриа томчуудын амнаас унах нь бий. Үнэхээр та их мөнгөнөөс татгалзах хүртлээ баяжсан хэрэг үү?

-Дэлхий уйлаад эхэлчихлээ. Тэр чинь хүнтэй л адилхан бүтэцтэй. Дэлхийд таван тив байхад хүнд таван цул бий. Дэлхийн гадаргын 70 хувь нь ус байхад хүн ч бас түүнтэй адилхан. Дэлхийн өр зүрх буюу толгой нь Монгол газар нутаг. Бусад орнууд бол эд эрхтэн нь гээд бодчих. Хүний бие өвчиндөө баригдаад эс нь хавдар болоод үхдэг шиг, дэлхий хүртэл амь тэмцээд эхэллээ. Үүнийг ойлгож ядсаар байтал асар их хэцүү байдал үүсэх нь. Эх дэлхий минь уйлаад түмэн олон маань зовж байхад би дуулаад явж чадахгүй нь. Тиймээс би дуугаа хязгаарласан. Эд мөнгөнд дарагддаг хүмүүсийн сэтгэлзүйгээр л намайг мөнгөнд дургүй болчихож гэж хараад байх шиг байна. Мөнгөнд дарлуулаад бодол нь хүртэл ахархан болж. Жавхлан мөнгөнд дургүй, хахаж цацталаа баяжсан учраас ингээд байгаа юм биш. Надад ямар ч мөнгөнөөс илүү сэтгэлийн гал хэрэгтэй.

-“Шуранхай” хамтлагийн дуучин Б.Эрдэнэчимэгтэй гэр бүл болсныг тань хүмүүс мэднэ. Эхнэр тань уран бүтээлээ үргэлжлүүлэх болов уу, үүнээс болоод таны хөдөө амьдрах хүсэл хэрхэх бол гэж сонирхох нэгэн ч байгаа байх?

-Мэдээж, гэргий маань миний амьдралыг хүлээн зөвшөөрсөн учраас л тийм шийдвэр гаргасан. “Дугуй дугуйгаа олно” гэж ярьдаг даа, хүмүүс. Нэг дугуй нь хөдөө, нөгөө дугуй нь хотод өнхрөөд байвал тэрэг салж унана. Хоёулаа цаашдын амьдрал, уран бүтээлээ ярилцаж тохирсон.

-“Эхнэрээ араг түшүүлж төрүүлсэн, охиндоо вакцин хүртэл хийлгэдэггүй” гэсэн яриа олны дунд гарсан. Энэ хэр зэрэг үнэний ортой вэ?

-Сүүлийн үед хамар нармай, тагнай нь цоорхой хүүхэд их төрж байна. Одоо бүр уушгины хавдартай хүүхдүүд ч олширлоо шүү дээ. Энэ суурин иргэншлийн буруу амьдралаас чинь л вакцин гэдэг муухай зүйл гарсан. Өвөг дээдсийн үед эхчүүд араг түшиж төрдөг байсан. Дэлхийд гайхуулаад байсан тэр ухаан дотор чинь хамгийн эрүүл саруул ухаан байгааг л би олж мэдсэн юм. Хүүхдийнхээ эхэсийг хүртэл төрсөн нутгийнхаа газар шороонд аваачиж булдаг болж, энэ хүмүүс. “Унасан газар, угаасан ус чинь юм шүү” гэж үр хүүхэддээ хэлэх тэр сайхан түүхийг залуус ойлгож эхэлсэн. “Үлгэрлэхгүй бол үглээд хэрэггүй” гэсэн үг бий. Өвөг дээдсийнхээ уламжлалыг би бүх л зүйлээрээ үлгэрлэхийг хүсч байгаа. Худлаа хуурамч дүр эсгэж, хоосон яриа гаргаад байвал миний хүүхэд хүндрэлтэй төрж мэднэ. Миний хүүхдүүд цаашид өндөр өвөг дээдсийнхээ өтөг бууцан дээр төрөх байх гэж боддог. Ингэж байж л бид буруу амьдралаас сална. Хөрс нь нурчихсан, хоёр талдаа шарилын газраар хашигдсан энэ нийслэлээ бид хотын соёл, амьдралын хөгжил гэх үү. Ирээдүй минь ийм эрэмдэг зэрэмдэг биш байгаасай гэсэн үүднээс би ярьж байна.

-Гачууртад асар том өргөө бариулаад хаад ноёд шиг амьдарч байгаа гэж дуулсан. Үнэхээр тийм гэж үү?

-Жавхланд нэг их илүү юм хэрэггүй дээ. “Хүн нэмбэл хүнс нэмэгдэнэ” гэдэгчлэн, өөрийнхөө хүчинд таарсан зүйл байх ёстой. Гэрийн эзэн гэдэг чинь ханхар том гэр барьчихаад л өөрөө гэдсээ илж хэвтэн, гэрээ баахан хүнээр ачуулж явахыг хэлдэггүй юм. Гэрээ өөрөө ачиж, аваад явдаг байх ёстой. Жавхлангийн гэр нэг их том биш ч, амьдрахад хангалттай. Үнэтэй хөөрөг, манжийн хантаазанд дарагдаад бараг гацуур мод шиг болчихсон энэ хэдэн уяачид л тийм гэр барьдаг юм шиг байна лээ. Булга, чонын дах нөмөрч хурдан морио үргээгээд явж байдаг тэр хүмүүс эд мөнгөндөө дарагдаж дуусах нь, хөөрхий. Жавхлан тийм хүн биш. /инээв/

-Арай ч дээ?

-Арабаас авчирсан хэдэн морио өөрөөсөө илүү эрхлүүлж, хамаг мөнгөө соруулж байдаг шүү дээ, тэд чинь.

-Та өөрөө эмнэлэгт хэр зэрэг үзүүлдэг вэ. Вакцин бол хийлгэхгүй биз?

-Би өөрийнхөө бодож санаснаар явж чаддаг, тэгээд ч залуу байна. Ямар нэгэн өвчин хууч байхгүй. Таван жилийн өмнө автын осолд орсны дараа л эмнэлэгт хэвтэж байсан удаатай. Түүнээс хойш өвдөж зовсонгүй. Ер нь би хар багаасаа эм тариа, энэ тэр гэсэн элдэв дээдийн юм хэрэглэж яваагүй. Эд зүйл, элдэв шунал тачаалыг хурааж, хав дарах тусам өвчин хууч орооно шүү дээ. Үгийн үндэс болгоныг задалж үзэж байгаарай. Галзуу хүн хэзээ ч хавдар тусдаггүй гэсэн. Тархиндаа ачаалал үүсгэж, янз бүрийн зүйлийг хав дарж боддоггүй учраас тэр. Гэхдээ би бүх хүнийг галзуур гэж байгаа юм биш. Хамгийн гол нь, муу зүйл бодохгүй, өөрийнхөөрөө чөлөөтэй, өвөг дээдсийнхээ нутгийг хайрлаж, тархины түгжээгээ тайлж амьдрах нь чухал.

-Тархины түгжээ гэснээс та “Донж” төвийн тэргүүн Б.Төгөлдөртэй хамтарч ажиллаж байгаа хэвээрээ юу?

-Би Төгөлдөр байтугай монголын бүх хүнтэй хамтарч ажиллана. Бүгдэд нь нээлттэй. Бусдыг сэтгэл дотроо хав дарж, дугаарладаг хүн би биш.

-Эхний охиноо Юм-Агь гэж нэрлэсэн. Сая мэндэлсэн нялх охиндоо Үжин-Гүнж гэж нэр хайрласан гэсэн. Дараагийн хүүхдүүддээ хүртэл хаад ноёдын нэр хайрлах уу?

-За, яахав дээ. Миний сэтгэл зүрхэнд орсон нэр ус нь тэр. Бас дээд тэнгэрийн хайрласан нэр байх гэж боддог. Монголчууд үр хүүхдээ яриандаа хавчуулах дургүй. Заяа тавилан нь ямар ч байх юм билээ. Одоохондоо нялх балчир байгаа учраас энэ талаар нэг их яриад байх хүсэлгүй. Хүмүүс намайг сонирхоод, муулаад явж байгаа. Миний үр сад Монголын л хойч үе шүү дээ. Миний хүүхдүүд их олон сэтгүүлчийг тэжээж байна даа. Зураг хөргийг нь хүртэл ил гаргаад тавьчихсан байх юм, хөөрхий. Ханиад томуу, цагаан хэл амнаас өгсүүлээд янз бүрийн гай бий. Тэдэнд маань ямар ч буруу байхгүй шүү дээ.

-Монгол ахуй, ёс заншлыг эрхэмлэж яваа хүний хувьд, гэргий тань энэ тал дээр хэр санагддаг вэ. Унд хоол, оёдол үйлэнд сайн болов уу гэж боддог маань ч нууц биш?

-“Адгийн тэнэг авгайгаа магтдаг” гэсэн үг бий. Яг үнэндээ эхнэр минь ямар ч үед өрх гэрийнхээ төлөө явах байх гэж боддог юм. Жавхлан нөгөө л нэг улиг болсон амьдралаа ярих гээгүй. Ямар ч байсан, миний сүүлийн үед өмсч байгаа Монгол цамцыг эхнэр маань оёж өгсөн шүү.

-Таныг энэ хавар томоохон хэмжээний тоглолт хийх гэж тухай яриа гарсан. Хэдийд хийхээ товлосон юм уу?

-Ойрын хугацаанд хийхээр төлөвлөсөн. Тухайн үед нь л цаг хугацааг нь хэлэх байх. Болох гэж байгаа зүйлээ урьдчилж донгодоод байвал юу ч хийгээгүй байж хоосон амладаг тэр хүмүүстэй адилхан болчих гээд байна. Намайг дэмжиж, идэвхтэй ажилладаг 2500 орчим фэн байгаа. Тэд маань олон нийтэд мэдээлэл хүргэх биз ээ. Гэхдээ тоглолт хийхэд маш их саад тотгор байна. Тиймээс маш их хөдөлмөрлөж, тоглолтынхоо чанарт анхаарч явна.

-Фэн клубтэй билүү, та. Энэ хүмүүсийн тоог яаж гаргасан хэрэг вэ?

-Ер нь бол, намайг дэмждэг хүмүүсийн фэн клуб бий. Жавхлангийн дуу гэдэг муухан намын хэмжээнд очсон шүү дээ, зайлуул. Би уран бүтээлээрээ тэр олон хүний сэтгэлийг татаж чадсандаа баярладаг. Тэдний зөвлөмж, мэдрэмжийг цуглуулж чадсан учраас сүүлийн үеийн уран бүтээл, үйл ажил минь их чамбай болж байгаа.

-“Гал үндэстэн” холбоонд их олон хөдөлгөөн багтдаг юм билээ. Та нарыг гадаадын хөрөнгө оруулалттай алтны уурхайн эздэд дарамт шахалт үзүүлэх гэж байгаа тухай мэдээлэл гарсан нь ямар учиртай юм бол?

-Бид нар шахаж гаргахаас илүү тэд нарт гэсгээл ирнэ. Дэлхийн өр элгийг цөмлөж байгаа юм чинь хариугаа хүртэж л таарна. “Гал үндэстэн” холбоо бол гэсгээгч байгууллага биш. Аюулаас урьдчилан сэргийлж, ухааруулах зорилготой ажилладаг юм. Зөн билэгчдийн зүүдэнд дэлхий ээжийг уурлуулж буй тэр хүмүүсийн элэг задарч байна гэж орсон гэсэн. Би ч бас тэгж зүүдэлсэн. Их л таагүй зүйл мэдрэгдсэн. Одоо яахав дээ, харийнхантай нэгдэж газар шороогоо зараад л бай. Яахыг нь хар даа.

Р.МӨНГӨН

yanaa:

С.Жавхлан: Би өрөөсөн дугуйгаа олсон, цаашид хөдөө амьдарна
Tweet
Bolod.mn

Сэтгэгдэл (6)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
аав ээж элбэрэл хайрийн тухай дуу дуулаач гэнээ тэнэг сэтгүүлчээ тэрийг чин хун бухэн дуулж байна. харин жавхлангийн дуулж бга эх орноо гэсэн дуунууд унэхээр сайхан...

2012-10-11 | 10:56:17 | 203.91.119.242 |