Түүний тухай таагүй яриа мэр сэр гардаг ч тодорхой тайлбар хийж, элдэв хэл ам үүсгэж явдаггүй чимээгүй нэгэн. Харин энэ удаад дуучин залуу ямар тайлбар өгөх бол...

-Анхны бие даасан тоглолтоо хийх, шинэ дуунуудаа дүрсжүүлэх гээд нэлээд завгүй яваа сурагтай. Тоглолт тань яг хэдийд болох юм бэ?

-“My Album” нэртэй хоёр дахь бие даасан цомгоо гаргаад удаагүй байна. Цомгийнхоо бүх дууг клиптэй болгож сонсогч фэнүүддээ хүргэнэ гэсэн амлалтаа биелүүлж л явна. Одоогийн байдлаар “Нууцхан гуниг”,”Би уйлж дурласандаа ичихгүй”, ”Гуравхан жил”, “Сүүлчийн зогсоол” зэрэг дуугаа дүрсжүүлсэн. Сүүлийн хоёр дуу нь хүмүүст их таалагдсан юм шиг байна лээ. Санал сэтгэгдлээ мессежээр явуулах нь их юм. “Хайрлаж дурласан хүн чинь таны сүүлчийн зогсоол байх болтугай” гэсэн уриалга дэвшүүлж, бие биедээ үнэнч байхыг хүссэн утгатай дуу нь “Сүүлчийн зогсоол”.

Энэ дууны үгийг дуучин Н.Учрал эхнэртээ зориулж бичсэн юм билээ. “Харанга” хамтлагийн дуучин Х.Лхагвасүрэн найруулга дээр нь ажиллаж, С.Гантөр ая оруулсан. Энэ мэт хоёр цомгийнхоо хит дуунуудыг нэгтгэж, анхны бие даасан тоглолтоо хийхээр төлөвлөсөн. Учиргүй их бэлтгэж эхлээгүй ч, хүмүүстэй уулзаж ярилцаад л явж байна.

-“Хайр-2007”, “My Album” цомгийн тань дуунууд тоглолт хийх хэмжээнд хүрэх үү?

-Хүрэхгүй яах юм бэ. Олон хит дуутай, оролцож байгаа хамтлаг дуучид маань ч гэсэн шилдэг бүтээлүүдээ хүргэх учраас нэлээд чанарлаг тоглолт болох байх гэж бодож байна. “Будаггүй уруулын амт”-аас эхлээд л “Сүүлчийн зогсоол” хүртэл олон дуу маань хит болсон. Тун удахгүй “Би чамайг хайрласан” нэртэй шинэ дуугаа сонсогчдод хүргэнэ. Би урьд нь дандаа гунигийн дуу дуулдаг байсан юм билээ. Сүүлийн үед хүмүүст аз жаргал бэлэглэсэн сайхан дуу хийхээр зорьж явна. Тоглолтоо ирэх сард хийхээр төлөвлөсөн учраас тодорхой мэдээллийг нь танай сайтаар дамжуулан хүргэх болно оо.

-Нэгэн үе тайзнаа хамт гарч байсан хамтлаг, дуучдын чинь ихэнх нь тоглолтоо хийсэн. Та л бараг сүүл мушгих нь дээ?

-Тэр ч үнэн шүү. Надаас бусад нь тоглолтоо хийчихсэн байдаг юм билээ. Би л бараг ганцаараа шахуу үлдсэн байх. Яахав, жаахан чанартайхан шиг тоглолт хийчих юмсан гэж явсаар байгаад энэ. Цаг хугацаа алдаж байгаа мэт боловч хожсон ч байж мэднэ шүү дээ. Ганц хоёр дуу дуулчихаад л тоглолт хийгээд байгаа хүмүүсийг харахаар сонин санагдаад байдаг юм. Үзэгчид дууг нь дагаад дуулахуйц сүртэй сайхан тоглолт хийнэ гэдэг чинь гоё биз дээ. Ингэж бодсоор нэлээд хэдэн жил өөрийгөө бэлтгэлээ. Одоо л тоглолт хийх цаг минь ирж.

-Санхүүгийн асуудлыг ч бас хувиасаа зохицуулах уу?

-Үгүй ээ, энэ тал дээр олон хүнтэй уулзаж байгаа. Дэмжиж тэтгэх, хамтарч ажиллах хүмүүс цөөнгүй бий. За, тэгээд болох байлгүй дээ. “Сайн санааны үзүүрт шар тос” гэдэг шиг. Уран бүтээл дээр минь хамтарч ажиллаж байсан байгууллагууд туслах нь тодорхой. Өмнө нь ивээн тэтгэгч олох гэж хөлөө эцтэл гүйдэг байсан бол, одоо тэд өөрсдөө надад санал тавьж байгаа нь сайхан санагдсан. Намайг тодорхой хэмжээгээр үнэлдэг болчихсон юм байна. “Энэ хөөрхий дуулах гээд зүтгэдэг юм шүү дээ, яахав” гээд л... Энэ маягаараа байвал цаашид хэдэн ч тоглолт хийж чадна.

-Тантай зэрэгцэн уран бүтээлээ хийж байсан зарим дуучид урлагийн тайзаа орхиж, өөр салбарт хүч сорьж эхэлсэн. Энэ талаар тоймтой зүйл бодож байв уу?

-Яахав ээ, би яалт ч үгүй залуу уран бүтээлчид тооцогдоно. Найзууд маань өнгөрсөн хугацаанд хоёр, гурван ч тоглолт хийлээ. Гэхдээ дуучны ур чадвар, хөдөлмөр олон тоглолт хийснээрээ хэмжигдэхгүй. Хамгийн гол нь, чанартай байх ёстой. Сүүлийн үед гарч ирж байгаа хамтлаг, дуучид нэг дуу бичүүлээд л “Тоглолт хийнэ” гэж ярьдаг болж. Гэтэл намайг тоглолт хийж байгаагүй гэхээр хүмүүс огт үнэмшдэггүй. “Юу гэсэн үг юм бэ. Одоо хурдан тоглолтоо хийгээч ээ. Ийм чанартай уран бүтээл хийсэн байж” гээд л шөвөгдөөд байна.

-Одоо бараг анхны тоглолт дагаад л “Соёлын тэргүүний ажилтан” цол тэмдэг ирдэг болж. Битүүхэндээ хүлээж байна уу?

-Өө, тэр талаар бодохгүй шүү. Тоглолт хийчихээд л цол авна гэж юу байсан юм бэ. Үнэхээр хийж бүтээснээрээ бахархуулж чадах үедээ л авбал сонирхолтой. Тэгэхгүй бол үнэ цэнэ нь буурна. Тухайлбал, жүжигчин Бооёо ахын дэргэд намайг “Соёлын тэргүүний ажилтан” гэж дуудвал би ичнэ. Үүнийг зарим хүн бодож баймаар санагддаг. Миний хувьд, дуучин Д.Болд гавьяат цол авах хэмжээнд хүрчихсэн хүн. Гэтэл одоо болтол “Соёлын тэргүүний ажилтан” цолтой хэвээрээ байна. Хажууд нь би ийм цол зүүх ч эвгүй шүү дээ. Ер нь би шагналын төлөө хэзээ ч дуулахгүй. Уран бүтээлийг минь хүмүүс сонсох дуртай байвал боллоо.

-Тэмцээн уралдаанд оролцоод уран бүтээлийнхээ гарааг эхэлж байсан дуучин залуу өдгөө ажил, амьдралын хувьд байр сууриа бүрэн олсон гэж боддог уу?

-За, яахав дээ. Миний ажил, амьдрал бол уран бүтээл. Аль ч тал дээр болоод л байдаг юм. Хүнээс гуйхгүй амьдарч явна. “Хоёр идэхгүй, хоосон хонохгүй” гэдэг шиг болж бүтэх байлгүй дээ. Хүмүүс надад “Зохиолын дуу дуулаач. Мөнгө олох боломжтой юм биш үү” гэж хэлдэг. Энэ миний зам биш ээ. Би дуртай зүйлээ л хийж чадна. “Их гоё дуучин болох юмсан” гэж бодож урлагийн сургуульд орж байхдаа ч мөнгө бодоогүй. Ийм уран бүтээлчид их урт насладаг юм шиг байна лээ. Мөнгө хөөж, уран бүтээл хийвэл мөхнө гэсэн үг. Үнэхээр уран бүтээлээ хийж чадаж байвал тэр мөнгө чинь аяндаа л хүрээд ирнэ.

-Зохиолын дуу дуулбал яана гэж. Рок поп гэхээр л нэг зүйлд хэтэрхий туйлширч болохгүй байх?

-Хааяа зохиолын дуу сонсдог л доо. Гэхдээ ихэнх дуу нь адилхан хэмнэлтэй, хуучирсан сэдэвтэй санагддаг. Залуу хүн рок поп хөгжим л сонсох хэрэгтэй шүү дээ.

-Эмэгтэй дуучидтай хамтарч дуулахад таны хоолойны өнгө нэлээд зохицдог юм шиг санагддаг?

-Яг зөв. Би ч бас тэгж боддог юм. Тухайн дууныхаа утга санаанаас хамаарна л даа. “Гуравхан жил” дууг Сэлэнгээтэй хамтарч дуулахад үнэхээр сайн зохицсон. Хосуудын харилцан яриа маягийн дуу л даа. Одоогоор онцолсон уран бүтээлч алга байгаа ч цаашид хэн нэгэнтэй хамт дуулахыг үгүйсгэхгүй.

-Саяхан хоёр дахь үрийнхээ зулайг үнэрлээд баахан шоудсан гээд л шуугиад авсан. Үнэн юм уу?

-Үгүй ээ, худлаа байхгүй юу. “Амны билгээс ашдын билэг” гэдэг шиг яахав ээ, хө. Эхнэр бид хоёр ганцхан охинтой. Дараагийнхаа хүүхдийг төрүүлэх болоогүй. Ажил ихтэй учраас энэ талаар бодсон юм алга. Би уг нь их өнөр өтгөн айлын хүүхэд шүү дээ. Цаашид олон хүүхэдтэй болох байх аа. Намайг дөнгөж төрсөн нялх охиндоо угжны сүү авах гэж гараад долоо хоног шоудаад алга болчихсон гэж гүтгэсэн байна лээ. Охинтой минь хамт бичсэнд нь уур хөдлөөд тухайн үед нэлээд эмзэглэсэн. Одоо яая гэхэв дээ. Сайн муугаар бичиж л байг. Үүнээс ч аймаар бичүүлдэг хүмүүс байдаг шүү.

-Уран бүтээлээрээ амьдралыг босгож, авч явна гэдэг хэцүү. Хажуугаар нь бизнес хийх талаар боддог уу?

-Хэцүү гээд бизнес хөөвөл би “алуулна” шүү дээ. Юу ч хийх юм билээ. Дуулахаас өөр зүйл хийж үзээгүй юм чинь. Дотроо бодсон зүйл байгаа ч хэрэгжүүлэх цаг нь хараахан болоогүй. Хэсэг хугацаанд чимээгүй суухдаа жаахан юм оролдсон л доо. Бага сага зүйл хиймээр санагдаад... (инээв)

-Машинтай болсон уу?

-Байхгүй. Дуучин хүн гэхээр л заавал машинтай байх ёстой юм уу. Машины хэрэглээ нэг их чухал биш байсан байж болно шүү дээ. Явган алхахад эрүүл мэндэд ч тустай. Янз бүрийн яриаг би тоодог ч үгүй. Од гэж нэрлэгдээд байгаа ахмад уран бүтээлчид маань ч гэсэн явган явж л байдаг юм чинь. Монголын нийгэм ондоо, зах зээл багатай. Машин авах мөнгө цуглуулах боломж надад байсан уу гэвэл, байсан. Би нэлээд үрэлгэн хүн. Олсныхоо хэрээр л цацдаг гэх үү дээ. Цаашид машин авах нь тодорхой. Тохироо нь бүрдсэн үед юу ч уначихсан явах юм билээ, хэн мэдэх вэ. Яг амьдрал дээр өөрийнхөө хөдөлмөрөөр л олсон зүйл амттай. Хэзээ нэгэн цагт надад энэ байтугай сайхан юм олдох биз. Үүндээ ч их итгэлтэй явдаг шүү.

-Рок попынхон маань кинонд тоглож эхэлсэн. Зарим нь ч бүр өөрсдөө кино хийлээ. Танд ийм санал ирж байв уу?

-Ирсээн. Гэвч дүр нь таалагдаагүй. Нэг студийнхэн намайг алиа марзан хэрнээ хор найруулах дуртай, юм юм руу үсчиж явдаг, хүүхэмсэг маягийн далдганасан залуугийн дүрд тоглуулах гэж ирсэн. Үнэнийг хэлэхэд, кино дэлгэцэнд дүрээ мөнхлөх юмсан гэж бодолгүй яах вэ.

-Дүрээ голсон гэхээр энэ бүх араншин танд байхгүй гэсэн үг үү?

-Байхгүй ээ, байхгүй.(инээв)