Ж.Хүрэлбаатар “Зоригийг хөнөөсөн хэрэг” /Цуст алуурчдын мөрөөр.../ Цуврал 8

2011-04-20

Аллагын зорилго
Тэгэхээр аллагын зорилго тодорхой болж байна. Ерөөсөө л мөнгөө олж авах,

өнөөдрийн өөрийнх нь төдийгүй гэр бүлийнхнийх нь зовж зүдэрч амьдарч байгаагийн гол буруутнуудаас өшөө авах. Тэр үед ардчилсан хүчнийхэн засаг барьж байсан учир..., арбитрийн шүүхийн шийдвэрийг тэд л няцааж үгүйсгэж байсан учир эхнээсээ ардчилагчдаас өшөө авна гэж зарлаж байсан юм. Ер нь яаж ч бодсон алуурчин нь Зууннаст биш байсан ч алуурчин болоод хандаж буй хүний хооронд ямар нэг шийдвэрлэгдээгүй асуудал байгаа төдийгүй хохирогч талд гомдолтой байсаар байгаа нэгэн учир байгааг харагдаж байна. Хохирогч тал асуудлаа өөрсөддөө эерэгээр шийдэж авахын тулд хандаж буй хүнээ нэмначих юм бол хохирсон чигээрээ дуусах болно. Тиймээс гол хүндээ хандаж анхааруулга хийсэн, ерөнхийдөө бол тэд Э.Бат-Үүлийг алах захиалга аваагүй, харин шаардлага гарвал бид энэ мэт үргэлжилнэ гэсэн захиалагчийн санаа бодлыг харуулж байна. Тодорхой хэлбэл С.Зориг хүмүүсийн хооронд үүссэн асуудлын золиос болсон төдийгүй ямар ч гэм буруугүйгээр тогтохгүй тэдний “тэмцлийнх нь” том ашиглагдахуун болоод л өнгөрсөн аж.

Хэлсэн үг, хийсэн үйлдлээс нь харахад...
Ер нь хэлсэн үг хийсэн үйлдлээс нь харахад аллага нь захиалагч, гүйцэтгэгч алуурчин, тэдний хооронд нь холбох зуучлагч гэх зэрэг мэргэжлийн аллагад байх ёстой шинжүүд огт байхгүйгү илтгэж байна. Зүгээр л алуурчдын нэгдсэн баг байна. Ямар сайндаа л захиалагч нь өөрөө тэнд явсан юм болов уу гэмээр “Дараагийнх нь Бат-Үүл, Элбэгдорж”, “Энэ бол Эрдэнэтийн эхлэл” “Та нараас болж бид өлсөж байна” гэх зэрэг үгүүдийг хэлсэн байгаа биз. Алуурчин зүгээр л аллагаа хийгээд гарахын оронд үзэл бодлоо илэрхийлээд, гомдол бухимдлаа тайлагнаад байна гэж үү. Нэг бол баг болж ажилласан хэсэг хүмүүсийн хоёр нь тэнд явж байжээ гэсэн үг. Захиалагч алуурчин хоёр “дүрмээрээ” бол бие биеэ харалгүй, дундын зуучлагчийн тусламжтайгаар холбоо тогтоож тус тусын үүргээ биелүүлдэг ёстой. Гэтэл энд алуурчин нь хэргийнхээ шалтгаан бололтой хэдэн үгийг хэлээд явж байгааг бодоход тэд “нэг тооны мах гурилнууд” гэдэг нь тодорхой байна. “Эрдэнэт” тэдэнд хамаагүй, хэргийг төөрөгдүүлэх зорилгоор тэгж хэлсэн байсан ч аллагаа шуудхан гүйцэтгэхийн оронд эрх ашгаа нэн түрүүнд гаргаж илэрхийлээд байна гэдэг чинь захиалагч гүйцэтгэгч хоёр маш ойр дотны үзэл бодол нэгтэй, эрх ашгийн сонирхол нэгтэй, нэг төвшиний, нэг бүлгийн бие биеэ сайн мэдэх хүмүүс байнаа гэдгийг давтан давтан хэлье. Аллага үйлдэгчийг хаа хамаагүй газраас хайж олоогүй гэдэг нь энд харагдаж байна. Тэгэхээр...
Захиалагч нь энэ мэт үгийг хэлэхийг даалгасан уу, захиалагчийн санаа бодлыг сайтар мэддэг хүмүүс үү? Аль нь ч байлаа гэсэн энд хэдэн зүйл тодорхой байна.
1.   Аллагын байдал нь өшөө авалтын шинжтэй байна.
2.   Хэн нэгэнд анхааруулсан байна
3.   Алуурчид биесээ сайн мэддэг хүмүүс байна
4.   С.Зориг бол асуудлын гол нь биш байна

Тийм бол...
Алсан хүмүүс нь одоо ч амьд байж болох юм, бараг ах дүү, амь амьдрал нэгтэй байсан улс мафийн ёсоор нэгнээр цааш харуулна гэж үү. Тэгээд ч эрх ашгийн төлөө тэд хамтдаа сэтгэл санаа нэгдэн ирсэн хүмүүс болохоос, ажил үүрэг гүйцэтгэх, гүйцэтгүүлэх зорилгоор холбогдсон хүмүүс биш гэж үзвэл үүнийхээ төлөө алуурчид захиалагчаас их мөнгө аваагүй гэдгийг ч хэргийн байдал ойлгуулж байна.

Алуурчдын баг
Зууннаст, Туяа гэж нэрээ худал хэлсэн хүүхэн, басхүү хамт буудлын нэг өрөөнд байсан хүүхнээсээ намхан залуу. Эдний дээр өөр хүн нэмэгдэх үү?
Яг гүйцэтгэсэн нь бол Туяа, намхан залуу хоёр гэж бодож байна. Зууннаст машинаа барьж явсан уу, үгүй юу. Барьж явлаа гэхэд гай нь дайраад цагдаа зогсоовол асуудал дээр асуудал болох нь тодорхой. Машин барихад жолооны үнэмлэх хэрэгтэй бол түүнд монгол жолооны үнэмлэх байхгүй нь ойлгомжтой. Эндээс үзэхэд жолооч гэж нэг хүн нэмэгдэх   магадлалтай.

С.Зоригийн гэрээс авч гарсан зүйлс
Тэдгээр алуурчид 310 ам.доллар, 15.000 төгрөг, дөрвөлжин талсттай, 750 сорьцтой, 18.5 хэмжээтэй эрэгтэй хүний 1 ширхэг алтан бөгж, хар өнгийн дөш чулуу шигтгээтэй 17.0 хэмжээтэй монетон бөгж, ээмэгний хослол, 750 граммын савтай, улаан эрээн шошготой, тал жан хэмээх хятад цуу, 750 граммын савтай эрээн шошготой япон цуу, кетчуп зэргийг авч гарсан байна.
Жан болон цуу, кетчупыг тэд яах гэж авч гарсан бэ?
Үүнд 3 янзын хариулт байна.
1.   Мөр баллах зорилготой. Хэрвээ тэдний үнэрч нохойгоор мөшгүүлвэл иймэрхүү хурц үнэртэй зүйлсийг явсан зам дээрээ асгаснаар мөрдөлтийг зогсоох боломжтой болдог
2.   Хэргийг дээрмийн сэдэлтэй гэж ойлгуулах
3.   Зориулалтаар нь буюу хүнсэндээ хэрэглэж

Эхний хариулт
Тийм ч ортой гэж бодохгүй байна. Яагаад гэвэл тэд аллага үйлдсэн газраасаа алхсаар яваад байрандаа ирэх нь юу л бол. Цагдаа нар тэднийг микро юмуу пургонтой явсан гээд байгаа, бас нэг улаан машины ч сураг байгаа. Алхсан байсан ч энэ хотын хөл хөдөлгөөнтэй газар ямар ч нохой эцсийг нь хүртэл үнэрлээд явна гэх боломжгүй.
Хоёр дахь хариулт
Хэргийг дээрмийн сэдэлттэй гэж харагдуулах ямар ч шардлага байхгүй. Тэртэй тэргүй үг үйлдлээрээ өөр зорилготой хүмүүс гэдгээ хэлсэн шүү дээ. Жишээлбэл, “Энэ бол Эрдэнэтийн эхлэл, дараагийнх нь Бат-Үүл” гэх зэрэг. Тэдгээр ч тэгж харагдуулахын тулд тиймэрхүү “хогийн” зүйл авах нь юу л бол.
Дараагийн хариулт
Энэ бол хамгийн боломжтой нь. Өөр юунд ашиглана гэж? Кетчупыг хүний нүд рүү цацахгүй жан хэмээх шилтэй хятад цуугаар барих гэж оролдсон нэгнийг цохино гэж сэтгээгүй. Түүний оронд орхисон сүхээ аваад гарах нь мэдээж.
Гурав дахь хариулт хамгийн боломжтой нь гэж үзвэл аллага үйлдсэн хүмүүс маань маш энгийн хэрэглээтэй, тодорхой хэлбэл ядуу давхаргын хүмүүс байж таарах нь. Жан хэмээх хятад хоолны цуу, кетчуп, мөнгөн аяга, алтан бөгж авч гарсан байдаг. Мөнгөн аяга, алтан бөгжийг ямар ч хулгайч аваад гарах зүйл. Харин хоол амтлагчууд нь тухайн хүмүүсийн талаархи зарим мэдээллийг өгөөд байгаа бус уу. Нөгөөтөйгөөр хоол амтлагч аваад гарнаа гэдэг чинь эдийн засгийн хувьд тийм ч сайнгүй нөхдүүд байгаа биз. Эдгээр нь аллагыг дээрмийн сэдэлтэй харагдуулах гэсэн оролдлого гэж цагдаа нар тайлбарладаг. Харин зүгээр л ходоодны хар рефлексээрээ авч гарсан зүйл гэж бодож байна. Монгол хүн жан гэдэг цуугаар яах вэ дээ. Монгол хүний рефлекс жан цуунд хөдөлдөггүй юм. Гэхдээ жан цуу, кетчупны савыг ойр байх траншайнаас олсон гэдэг. Үнэн бол хэрэггүй зүйл авч гарснаа мэдээд хаясан, эсвэл машинд хүлээж байсан хүмүүс нь хаяулсан. Тэгээд ч тэр үед монгол хүн хятад цуу буюу жан гэдэг амтлагчийг огт мэддэггүй байсан үе, харин хятад хүмүүс бол энэ амтлагчаа ус ундаа мэт хэрэглэдэг юм. Тиймээс энэ амтлагчийг авсан нь тэдний цэвэр рефлексээрээ хийсэн зүйл.

"Масс мн"