“Сүхбаатар” хэвлэх үйлдвэрийг хувьчлах үед 500 сая төгрөгийн хөрөнгө оруулаад алдсан “Хангарьд” авиа компанийн захирал Л.Сэргэлэнтэй ярилцлаа.

-Хэвлэх үйлдвэрийн хувьчлалтай холбоотой асуудлыг Улсын мөрдөн байцаах газраас шалгаж эхэлсэн байна. Тухайн үед чухам юу болсон юм бэ?

-Энэ талаар би хамаагүй юм ярьж болохгүй. Мөрдөн байцаалтын нууц задруулсан хэрэгт орно. Яахав, өөрийнхөө зүгээс товчхон тайлбар хийж болох юм. “Сүхбаатар” хэвлэх үйлдвэрийг хувьчилсан нь үнэн. Би тодорхой хэмжээний хөрөнгө оруулсан. Хэвлэлээр гараад байгаа зүйл худлаа гэж хэлэхгүй. Хөрөнгө оруулах санал ирсэн, би зөвшөөрсөн. Эцэст нь намайг тоглоомноос гаргасан. Тэр үеийн 500 сая төгрөг гэдэг их мөнгө шүү дээ.

-Тоглоомноос гаргасан гэдэг нь юу гэсэн үг вэ. Менежментийн багаас гаргасан гэж үү?

-Тийм. Анх надтай гэрээ хийгээд хэвлэх үйлдвэрийг хувьчилж авбал тодорхой хэмжээний хувьцаа эзэмшүүлнэ гэсэн. Надад тухайн үед боломжийн санагдсан учир хөрөнгө оруулагчаар орж ажилласан. Гэтэл менежментийн багийн ахлагч Ж.Саруулбуян өөрчлөгдөж, оронд нь До.Чулуунбаатар ирсэн. Энэ хүн намайг шууд багаас хассан. Ингээд хэвлэх үйлдвэр болон “Улаанбаатар” сонинд хөрөнгө оруулсан миний хөдөлмөр талаар болсон юм. Үүний дараахан менежментийн хувьчлалаар тэр баг хэвлэх үйлдвэрийг авсан.

-Тухайн үед танд гомдолтой санагдаагүй юм уу. Хувьчилж авсан хүн нь хэн байсан юм бэ. Ерөнхийлөгч асан Н.Энхбаяр гэдэг үнэн үү?

-Нэгэнт хуулийнхан шалгаж байгаа болохоор удахгүй далд эзэн нь тогтоогдоно биз. Н.Энхбаяр хэвлэх үйлдвэрийн эзэн мөн, бишийн тухай яримааргүй байна. Банкнаас зээл аваад хөрөнгө оруулалт хийлээ гэж бодож яваад хууртсан хүн гомдолтой байлгүй яах вэ дээ. Тэгээд “Хөрөнгө оруулсан мөнгийг минь гаргаж өг” гэж удаа дараа хэлсэн, уулзсан. Намайг хуурч тухайн үедээ их олон юм амлаж байсан. Өдий болтол тэдэнд хууртаж, нөхцөл байдалд хүлээцтэй хандаж ирсэн.

-Та хэнтэй уулзаж мөнгөө нэхдэг байсан гэж?

- Хэн юу байх вэ. Хувьчилж авсан хүмүүст хандаж байсан.

-Тухайлбал?

-До.Чулуунбаатар.

-Н.Энхбаяртай өглөг авлагын талаараа ярьж байсан уу?

-Энэ тухай цаг нь болохоор ярина гэж би хэлсэн шүү дээ. Хэлэх юм байгаа, гэхдээ би хэлэхгүй.

-Хэвлэх үйлдвэр үнэхээр Н.Энхбаярынх мөн юм уу?

-Би түрүүнд хэлсэн шүү дээ. Энэ тухай би ярихгүй, тэгээд л болоо.

-Таныг одоогийн Хүнс, хөдөө аж ахуй, хөнгөн үйлдвэрийн сайд Т.Бадамжунай хувьчлалын багт орж, хөрөнгө оруулах санал тавьсан гэдэг. Т.Бадамжунайгаас мөнгөө нэхэж үзсэн үү?

-Энэ асуулт бас л мөрдөн байцаалтын нууцад хамаарах байх. Тэгэхээр хариулж болохгүй. Цаг нь болохоор хариулъя.

-Дээрх асуулт мөрдөн байцаалтын нууцад хамаарна гэж би үзэхгүй байна. Мэдээж хөрөнгө оруулахдаа та энэ хувьчлалын цаана нь хэн байна гэдгийг мэдэж байсан биз дээ. Т.Бадамжунай “Н.Энхбаяр хэвлэх үйлдвэрийг авах гэж байгаа. Хөрөнгө оруулчих” гэж хэлсэн гэсэн?

-Хэн тэгж байна.

-Тухайн үед хамт ажиллаж байсан менежментийн багийнхан чинь тэгж ярьж байсан гэдэг?

-Нарийн, дэлгэрэнгүй ярих зүйл их байна. Одоохондоо ярих хэрэггүй байх. Тэгээд ч энэ хэрэгтэй холбоотойгоор зарим хүмүүсийг шалгаж эхэлсэн байна. Хоёр, гурван хүнийг “Ганц худаг”-т хорьсон гэнэ. Хүнийг ядарч явахад нь мууг нь үзээд яах вэ. Би өөрөө иймэрхүү зан чанарт дургүй хүн. Шалгах зүйл байгаа болоод Улсын мөрдөн байцаах газрынхан шалгасан биз. Шаардлагатай учир зарим хүнийг хорьсон байх.

-Менежментийн баг томилогдох үед тэр дотор орж ажиллаж байсан. Хувьчлал хууль ёсны дагуу явагдаагүй гэдэгтэй та санал нийлж байна уу?

-Хувьчлал ямар журмаар явагдсан, яасан ийснийг би сайн мэдэхгүй юм. Ямар ч л байсан хөрөнгө оруулсан. Мөнгөө алдсан, хохирсон.

-Улсын мөрдөн байцаах газрынхан энэ хэргийг шалгаж танаас тайлбар авсан уу. Хохирогчоор албан ёсоор тогтоогдсон уу?

-Тодруулж надаас зарим нэгэн зүйлийн талаар тайлбар авсан. Намайг хохирогчоор тогтоосон үгүйг сайн мэдэхгүй байна.

-Зарим хүн энэ хэргийг сөхөж эхэлсэн нь Н.Энхбаярыг баараггүй “аав“-ын хаалга татахад хүргэж байна. С.Баяр, Н.Энхбаяр хоёр бие бие рүүгээ үг шидэлцээд байгаа. С.Баяр АНУ-аас ирсний дараа Н.Энхбаярын “но“-г хуулийн байгууллагынхан дэлгэж байна гээд байгаа. Цаанаа улс төржөөд байна уу?

-Цаанаа улс төрийн ямар шалтгаантайг би мэдэхгүй. Ганцхан миний хэлж чадах зүйл бол энэ хэргийн талаар прокурорын байгууллагад өнгөрсөн зун би гомдол гаргасан. Тухайн үед миний хөрөнгө оруулсан мөнгийг өгчихсөн бол ийм асуудал болохгүй л байсан. Хохирсон юм чинь би хуулийн байгууллагад хандах нь зөв биз дээ. Өнгөрсөн оны сүүлээр энэ хэргийг Улсын мөрдөн байцаах газар шалгаж эхэлсэн. Тэгээд саяхнаас л буруутай байж болох хүмүүст эрүүгийн хэрэг үүсгэж, хорьсон. Үйл явдал ингэж таарч байгаа учир хүмүүс Н.Энхбаяр МАХН байгуулж тусдаа гарсан, С.Баяр АНУ-аас ирсэн. Тэд таарамжгүй байгаа гэдэг үндэслэлийг гаргаад улс төржүүлж ойлгоод байж болох юм л даа. Түүнээс С.Баяр нь Н.Энхбаярыгаа унагана уу, үгүй юу надад падгүй. Би хувьдаа хохирлоо барагдуулахын тулд хуулийн байгууллагад хандсан. Шударга ёс бий гэж итгэдэг учраас тэр. Ардчилсан нийгэмд амьдарч буй намайг хууль цааз хамгаална гэж найдаж байгаа.

-Өмнө нь гомдол гаргаж байгаагүй юм уу?

-Тэдний худал үгэнд хууртаж явсаар байгаад л өдий хүрчихлээ.

-Тэгэхээр энэ хэргийг таны гаргасан гомдлын дагуу шалгаж байгаа гэж үзэж байна уу?