Жунай сайд аа, та хаагуур, яах гээд, ямар юмаа хийгээд яваад байна аа

2011-04-25

-Танаас бусад сайдууд сайн, муу хэлүүлсээр дор бүрнээ ажиллаад л байна. Харин та, танай салбарынхан л чимээ анир алга-

Буян санаж бүтээдэг сургаалтай бурхны нэртэй ганц сайд байдаг нь ХХААХҮ-ийн Т.Бадамжунай. УИХ-ын 2008 оны сонгуулийн булхай луйвар, түүнээс үүдэлтэй долдугаар сарын 1-ний үймээний сүр дуулианд дарагдчихсан л байсан болохоос аль эрт сайдын суудалд нэр нь тодорчихоод байсан хүн нь Жунай сайд байлаа.

МАХН буюу одоогийн МАН-ын нийслэл дэх сонгуулийн штабыг удирдсаныхаа төлөө, хотын фракцийн гол төлөөлөгчийнхөө хувиар ХХААХҮ-ийн сайдын суудлаар шагнуулсан түүнд мэдлэг, боловсрол, туршлага гээд байх юм бараг л үгүй. Зүгээр л “хар зориг”-оороо төрийн албыг залгуулдаг нэгэн.

Бас ов мэх, залийг олон янзаар хөгжүүлж, өөртөө төлөвшүүлж чадсан зайтай эр. Тийм тулдаа М.Энхболдтой шадарлаж хотын захиргаанд байхаасаа эхлэн газрын наймаагаар гаршсан гэдэг. Хотын удирдлагад олон жил ажилласан хүн дугаар хорооны иргэн сонгогчдын нэрсийг тухайн хорооны засаг даргаас нь илүүтэй мэддэг байж болох. Энэ бол ов мэхтэй хүний л чадах ажил.

МАН-ынхан сонгуульд хэнийг нэр дэвшүүлэх, албан тушаалын томилгоо, халаа сэлгээгээ хийхдээ гагцхүү Т.Бадамжунайгүйгээр шийднэ гэж үгүй. Хэнийг дэвшүүлэх, буулгах, хусах, буланд шахах, алдаа дутагдал, ашиг хонжоог тооцоолдог нь зөвхөн Жунай сайд гэнэ лээ. Тиймдээ ч 2004 оны сонгуульд Сонгинохайрхан дүүрэгт ялалт байгуулж, УИХ-д суухаасаа өмнө хотын ерөнхий менежер гэсэн албан ажлын хажуугаар МАН-ын хотын фракцийг толгойлж байсан.

М.Энхболдыг хөдөлгөгч гол хүч болсон Т.Бадамжунай сайд Миеэгийн хүүг Ерөнхий сайдад нэр дэвшихэд ард нь байж л байсан. Цагтаа Н.Энхбаяр ч түүнээс үхтлээ айдаг, жийрхдэг байсан гэдэг.

Тэрбээр ХХААХҮ-ийн сайд болонгуутаа Монгол Улс төмс, хүнсний ногоо, сүү, сүүн бүтээгдэхүүнээ дотооддоо 100 хувь үйлдвэрлэдэг болгоно гэж амласан. Одоо сонгуулийн бүрэн эрхийн хугацаа нь дуусахад ганцхан жилийн хугацаа үлдлээ. Энэ хугацаанд тэр их ажил амжих уу. Мэдээж үгүй. Намрын ургац хураалтын үеэр зурагтаар хаа нэг үзэгддэгээс түүний барааг хэвлэлийнхэн харна гэж үгүй.

Ярилцлага авах энэ тэрд бол тэр үргэлж хаалттай. Түүнээс бусад сайдуудын тухайд их, бага ч хэвлэлийнхэнд нээлттэй, сайн муугаа ярилцаад л явдаг. Харин ХХААХҮ-ийн сайдын хувьд тэр хаалттай хүн. Ажил алба нь хэр сайн муу явааг хэн ч мэдэхгүй. Малчид, тариаланчидтай арай ойр байдгийнхаа хувьд сар шинээр малчин түмэндээ мэндчилгээ дэвшүүлэхийг нь ч цөөхөн харсан юм байна. Эрхбиш Засгийн газрын хуралдаандаа суудаг л байх.

Жунай сайд өөрийгөө ард түмэндээ танигдсан том улстөрч, тулгатай сайд гэж боддог биз. Харин ард түмэн таныг танихгүй, нэг тийм хотын захиргаа хавьд ажилтай, хэзээнээсээ хөдөөнийх болов уу гэмээр төрхтэй хижээл эр байсан, тэтгэвэртээ гарчихаагүй байгаа юм уу гэж бие биеэсээ асуудаг болсон гэнэ лээ. Харагдаж байгаа шигээ гэмгүй царайтай нэгэн биш гэдгийг нь архангайчууд хэлдэг.

“Хадгаламж” банкны 14 тэрбум төгрөгийн хэргийг Ц.Чимэдцэрэн ганцаараа үүрсэн л болохоос хамт “идэлцсэн” нь тэр. Гэхдээ өөрийгөө хэргээс сугалж үлдээд, хамсаатнаа шоронд явуулсан өөдгүй эр ч гэлцдэг.

Түүнийг нэгэн цагт МАН-ын Ерөнхий нарийн бичгийн дарга асан Л.Энэбиш гуай “Т.Бадамжунайг нам руу ойртуулж хэрхэвч болохгүй хүн шүү. Ялангуяа хотын менежер болгож бүр ч болохгүй” гэж байсан ч дийлээгүй гэдэг.

Юу түүнийг ингэж хүчтэй болгов. Мэдээж хөрөнгө мөнгөнөөс өөр юу байхав. Хотын хамаг өнгөтэй өөдтэй газруудыг Миеэгийн хүүтэй нийлээд “хусчихсан” юм чинь хөрөнгө, мөнгөөр хэнээс ч дутахгүй болчихсон хүн.

Удахгүй хаврын тариалалт эхэлнэ. Зээлээр буудай авч тарьдаг тариаланчдын зовлон эхэлнэ гэсэн үг. Сайд болонгуутаа “Буудай” санг ашиг сонирхлын зөрчилтэй хүнээр удирдуулах томилгоо хийснээрээ тэр салбарынхандаа сайнаар хэлэгдэлгүй өдий хүрсэн.

Хүнс, хөдөө аж ахуйн салбар бол Монгол Улсын амин чухал объект. Насаараа мал дагаж, малаа адгуулж, хэдэн 10 жилийн тэртээгээс тариагаа тариад амьдраад сурчихсан Монголчуудын хувьд бол энэ нэг их толгой гашилгаад байх шаардлагагүй салбар ч гэдэг. Ямар шинэ юм санаачилж, шинэ бүтээн байгуулалт энэ тэр гэх биш. Бадамжунай сайдын хувьд бүрэн эрхийнхээ хугацаанд хийсэн, гялтайсан юм нэгээхэн ч үгүй. Тэртэй тэргүй “Атрын III аян” гэдгийг нь С.Баяр Ерөнхий сайд байхдаа эхлүүлчихсэн, одоо тэр эрчээрээ явж байна. Ямаа, ноолуур хоёрыг Жунайтай, Жунайгүй төр засаг ивээлдээ авчихсан. Хүнсний салбарынханд хяналт шалгалт тавьдаг хангалттай олон байгууллага байна.

Манай Засгийн газрын гишүүд Т.Бадамжунайг бодвол юм хийж байна аа. Сайншандад шинэ бүтээн байгуулалтын ажил эхлүүлж, эмчилгээ оношилгооны шинэ төв барьж, оюутны хотхоны ажлыг эхлүүлж, хоёр толгойг сайн муу хэл ам дагуулсан ч гэлээ эдийн засгийн эргэлтэд оруулахаар шийдэж, иргэдээ ажилтай хоолтой байлгах гэж зүтгэж л байна. Алдаа, оноо аль алинд нь бий. Гэхдээ бусад сайдууд юм хийх гэж оролдоод л байна. Харин ХХААХҮ-ийн сайд л чимээгүй.

Хэн хаагуур ямар юмаа хийгээд яах гээд яваад байна аа гэдэг шиг Т.Бадамжунай сайд аа, та хаагуур, ямар юмаа хийгээд яах гээд л яваад байна даа. Сонгууль айсуй. Нэг юм бодох цаг болсон юм биш үү. Эсвэл эндээс “хусагдвал” шууд тэтгэвэртээ гарч, хувийн бизнес эрхлэхээр зориг шулуудаа юу. Тэгвэл ч харин болж байна шүү.

Б.Оюу