Архив ангилал

Нийслэлийн захирагч Г.Мөнхбаяр “Нийслэлийн ерөнхий боловсролын сургууль, цэцэрлэг, соёл, шинжлэх ухааны байгууллагын эзэмшил газарт өөр зориулалтаар зөвшөөрөл олгохгүй” гэх захирамжийг 2009 онд гаргасан. Гэвч 2010 оны арванхоёрдугаар сард тэрээр “Тэлмүүн Лхам” гэх компанид Хүүхэд асран хүмүүжүүлэх төвийн цэцэрлэгийн хашаанд орон сууцны барилга барих зөвшөөрлийг олгожээ.

Г.Мөнхбаяр даргаас асууя. Таны гаргасан захирамж өнчин хүүхдүүдэд хамаардаггүй гэж үү. Хэрвээ жирийн цэцэрлэгийн хашаанд аль нэг компани хүүхэд тоглох талбайг нь устгаж хаалганд нь тулгах шахуу нүх ухаж орхисон бол тэр бөөн асуудал болох байсан нь ойлгомжтой. Харин өнчин хүүхдүүдийг хэн өмөөрч үг хэлж, хэн тэдний эрх ашгийн төлөө дугарах билээ дээ. Өнчин хүүхдүүдийг ингэж элэг барих хэрэг байсан гэж үү, Г.Мөнхбаяр дарга аа?

Бид энэ асуудлыг тодруулахаар тус цэцэрлэгийн захирал н.Тунгалаг болон Монгол Улсын хүүхэд асран хүмүүжүүлэх төвийн захирал Ж.Дүгэр нартай уулзсан юм.

58-р цэцэрлэгийн захирал н.Тунгалаг:

-Танай цэцэрлэгийн хашаанд гуравдугаар сарын сүүлчээр газар ухаж эхэлсэн гэсэн. Та бүхэн мэдээгүй байна гэж байхгүй байлтай?
-Мэдэлгүй яахав дээ. Энд ажилчдын орон сууц болон манайхаас төгсөж гарсан хүүхдүүдийн дамжин өнгөрөх байр барих гэж байгаа. Бид ажилчдынхаа саналыг аваад дэмжчихсэн. Ажилчид байрныхаа захиалгыг өгчихсөн. Гэрээнд зааснаараа баригдвал болж байна.

-Гэрээнийхээ дагуу баригдах эсэхийг нь мэдэхгүй байна гэсэн үг үү?
-Мэдэхгүй, тэгж л бодож байгаа. Өөр зорилгоор баригдахгүй ш дээ, угаасаа.

-2009 онд Нийслэлийн захирагчийн тушаалаар сургууль цэцэрлэгийн хашаан дотор барилга барьж болохгүй гэсэн шийдвэр гарсан шүү дээ?
-Тэрийг би мэдэхгүй. Ямар ч байсан манай захирал /сурв: Ж.Дүгэрээ/ зөвшөөрлийг нь бидэнд үзүүлээд “ийм асуудал байна” гэхээр нь бид “ямар сайн юм. Бид 36, 37 жил улсад ажиллаад нэг ч орон сууц аваагүй. Өнчин хүүхдүүдийг асран хүмүүжүүлж буй энэ эмэгтэйчүүдийн нийгмийн асуудалд анхаарал тавих цаг болсон” гэдгийг хэлж дэмжсэн.

-Тоглоомын талбайг нь нүх болгочихож. Хүүхдүүд чинь хаана тоглож байгаа юм бэ?
-Хүүхдүүд маань зуслан гарчихсан.

-Ирээд хаана тоглох уу?
-Урд талын талбай дээрээ тоглоно. Урд талын талбайг тоглоомын талбай болгоно гээд энэ компанитай тохирчихсон байгаа.

/Дээрх зургийн тайлбар: Энэ талбай дээр нүх ухсан шороогоо овоолсон байлаа/

-Танай “Хүүхдийг асран хамгаалах төв”-ийн удирдлага энэ компанитай харилцан тохиролцоонд хүрчихсэн гэж ойлгож болох нь ээ?
-Манай удирдлага энэ компанитай гэрээ хийгээд бүх зүйлээ авчихсан гэсэн. Үнэхээр бидэнд хэрэгтэй зүйл хийнэ гэвэл бид дэмжиж байгаа. Улс манай төвийг төгсөж байгаа хүүхдүүдэд ажлын байр, орон сууцаар хангахгүй байгаа. Хүүхдийн эрхийн конвенцид хүүхдийн төвөөс гарч байгаа хүүхдийг байраар хангана гээд заачихсан байдаг. Гэтэл энэ заалтаа хангадаггүй.

-Гэхдээ танайх чинь цэцэрлэг биз дээ?
-Цэцэрлэгээ төгсөөд хүүхдүүд чинь сургууль руугаа очно ш дээ. Сургуулиа төгсөөд тэр хүүхдүүд орох оронгүй байдаг.

-Хэдэн давхар байшин юм бол?
-12, 5 давхар хоёр байшин гэсэн.

-Танайх хэдэн хүүхэдтэй вэ?
-Манайх 2-6 насны бүтэн болон хагас өнчин 85 хүүхэдтэй. Нийт 48 ажилтантай. Тэдний 80 хувь нь гэр хороололд амьдардаг. 18 өрх толгойлсон ээж, аав нар байдаг. Ингээд бодвол бидний нийгмийн асуудлыг хөндөж байгаа нь болж байна гэж ойлгож байна. Ер нь сүүлийн үед манай энэ газрыг хүмүүс эргээд байгаа юм. Том том машинтай хүмүүс эргэж тойроод л яваад байгаа. Тийм болохоор бусдад алдаж байхаар гээд л ийм алхам хийсэн.

-Тэгээд яг хэдэн ажилтныг орон сууцанд оруулъя гэж ярьсан юм бол?
-270 айлын орон сууц баригдана гэж байгаа. Түүнээсээ манай ажилчдыг урт хугацааны зээлд хамруулж, орон сууц санал болгоё гэж ярьж байгаа.

-Үнэ төлбөргүй өгөх биш зээлээр өгөх юм уу?
-Яаж үнэ төлбөргүй өгөх юм бэ.

-Газрыг чинь авчихсан байна шүү дээ?
-Юу гэсэн үг вэ, бид нарт харин хөнгөлөлттэй үнээр, урт хугацааны зээлээр өгөх гэж байгаа юм. Бидэнд зах зээлийн үнээс 30-40 хувиар бууруулж өгье гэж ярьсан байна лээ. Тэр компанийх нь захирал эмэгтэй хүн байдаг гэсэн. Манай захиралтай уулзаад хурлаа хийсэн байна лээ. Тэгээд бидний шаардлагыг гэрээндээ тусгаж өгсөн.

Ингээд бид гэрээ байгуулсан гэх Хүүхэд асран хүмүүжүүлэх төвийн захирал, Монгол Улсын ардын багш Ж.Дүгэрээтэй уулзсан юм.

-Танай харъяа 58-р цэцэрлэгийн хашаанд “Тэлмүүн Лхам” гэх компани газар аваад, нүх ухчихсан байх юм?
-Өнгөрсөн оны арванхоёрдугаар сард цэцэрлэгийн хашаан дотор манайх ажилчдынхаа орон сууц болон төгсөөд гарч байгаа өнчин хүүхдүүдийн дамжин өнгөрөх байрыг бариулж байгаа. Бид асуудлыг “Тэлмүүн Лхам” гэдэг компанид өөрсдөө тавьсан юм. Тэгээд нийслэлийн засаг даргын захирамжаар 2010 он арванхоёрдугаар сард барилга барих зөвшөөрлийг өгсөн. Тэр хавийн айлууд манай цэцэрлэгийн хашаанд хогоо хаядаг, сахилгагүй архичид цугладаг, орчмынх нь сургуулиудын хүүхдүүд хашааг нь эвддэг гэх мэт үйлдлийг бид таслан зогсоохын тулд ийм арга хэмжээ авсан. “Тэлмүүн Лхам” компани эргэн тойронд нь хүн давахааргүй онцгой сайхан хашаа барьж өгөөд, олон жил болсон моднуудыг цэцэрлэгийн “өрөөсөн” талд нь хийлгэхээр зураг төслийг нь гаргаад ажилдаа орж байсан юм. Одоогоор энэ асуудал түр хүлээзнэсэн байгаа.

-Хэчнээн орон сууцыг танай ажилчдад ямар нөхцөлтэйгээр өгөх болсон юм бэ?
-60 орон сууцыг төрийн албан хаагчдын хөнгөлөлттэй зээлд оруулж өгье гэж ярьсан.

-Хэрвээ эцэг, эхтэй хүүхдүүдийн цэцэрлэг байсан бол нэлээн хэл ам хийх байсан байх даа?
-Тийм юм байхгүй. Хүүхэд асран хүмүүжүүлэх төвийг төгсөж байгаа хүүхдүүдэд дамжин өнгөрөх байр, ажилчдын байр болж байгаа юм.

Тэд ийнхүү ярьсан юм. Үүний дараа бид асуудлыг тодруулахаар Нийслэлийн газрын албанд хандлаа. Тус цэцэрлэг БЗД-ийн 1-р хороонд байрладаг. Тиймээс бид 1-р хорооны дарга Тунгалагтай утсаар холбогдоход “Нийслэлийн газрын албаны дэд дарга Б.Төрхүү албан ёсны зөвшөөрөлтэй гэж хэлсэн” хэмээсэн юм. Тиймээс Б.Төрхүү даргатай уулзъя гэтэл тэрээр томилолтоор гадагшаа явсан байж таарсан юм. Ингээд түүний оронд дэд дарга Ариунгэрэлтэй холбогдтол тэрээр “ахлах мэргэжилтэн Дашмаатай холбогд” гэлээ. Дашмаатай холбогдтол тэрээр “би өвчтэй байгаа. БЗД-ийг хариуцсан Загдсамбар гэж хүнтэй уулз” гэсэн юм. Загдсамбар гэдэг хүнтэй нь уулзах гээд очтол тэрээр ажлаасаа чөлөө авсан тул ирэх долоо хоногоос ирнэ гэлээ. Ёстой л өнөө дээс томж найзыгаа авардаг үлгэртэй адил зүйл болох нь ээ энэ.

Асуудал нэгэнт ийм болсон тул бид АТГ-т очиж зөвлөгөө авлаа. Тэдний зүгээс гомдол гаргавал шалгаад өгч болно гэсэн юм. Нэгэнт цэцэрлэгийнх нь захирал, төвийнхөө захирлын хамтаар газраа өгчихсөн тул өнчин хүүхдүүдийг өөр хэн гомдол мэдүүлэх билээ. Ингээд сэтгүүлч миний бие асуудлыг тодруулж өгөхийг хүсэн АТГ-ын Гомдол мэдээлэл хүлээн авах 1969 гэх утсанд хандсан юм. Энэ асуудлыг тус газраас шалгаж 19 хоногийн дараа хариуг өгнө гэлээ. Тэр үед бид та бүхэнд дахин сурвалжлан хүргэх болно.

Одоогоор тус “Тэлмүүн Лхам” компанийн явуулж буй барилгын ажлыг түр зогсоогоод байгаа юм байна. Гэсэн ч ухсан нүхээ таглах нь бүү хэл дахин барилга барих ажлаа явуулах нь дэндүү тодорхой энэ асуудлыг цаашид хэрхэн шийдэх бол. Өмөөрөх хүнгүй өнчин хүүхдүүдийн тоглоомын газрыг булааж чадсан хатуу сэтгэлтнүүд ийнхүү улсын өмчийн цэцэрлэгийн хашааг хувийн компанид өгчихөөд “бид ажилтнууддаа зээлээр орон сууц авч өгөх гэж байна” хэмээн дур мэдэн аашлах нь хэр зөв бол. Цэцэрлэг, сургууль бүр хашаандаа орон сууцны газар өгөөд байвал юу болох бол гэх мэт асуултууд урган гарна.

Юутай ч бид энэхүү мэдээллийн мөрөөр эргэн сурвалжлах болно.

О.Ариунбилэг "Гого мн''

Ариун Урсулагийн нутаг дэвсгэр дээр археологийн малталт хийж байгаа бөгөөд анхны амжилтын талаар мэдээлсэн
Tweet
Bolod.mn