Үүний дараа 1959 онд 11-р сарын 20-ны өдөр НҮБ-ын Ерөнхий ассамблей “Хүүхдийн эрхийн тунхаглал”-ыг баталсан ба энэ нь Хүний эрхийн түгээмэл тунхаглал бусад хүний эрхийн талаарх болон олон улсын эрх зүйн баримт бичигтэй уялдаатай байлаа.

Дээрх тунхаглалд “Хүүхэд нь бие бялдрын болон оюун ухааны хувьд төгс боловсроогүй байдлыг харгалзан, түүнийг төрөхийн өмнө ч, төрсний дараа ч тусгай асрамж, хамгаалалтыг, үүний дотор эрх зүйн зохих хамгаалалтыг шаарддаг” гэж заасныг НҮБ анхааралдаа авч хүүхдийн эрхийн тусгай конвенц байх шаардлагатай хэмээн үзсэн байна.

Ийнхүү Хүүхдийн эрхийн тухай конвенц 1989 оны 11-р сарын 20-нд НҮБ-ын Ерөнхий ассамблейн чуулганаар батлагдаж, түүнд дэлхийн 191 орон нэгдэн орсон нь эдүгээ хамгийн олон оронд хүлээн зөвшөөрөгдсөн Конвенц болж чадсан юм.

Манай орны хувьд хүүхдийн байгууллага, хөдөлгөөн анх 1925 оны 5-р сарын 8-нд Их зохиолч Д.Нацагдорж болон тухайн үеийн хүсэл зориг нийлсэн хэсэг залуучуудын санаачилгаар байгуулагдаж байсан түүхтэй.

Монгол улс Хүүхдийн эрхийн конвенцид 1990 онд 5 дахь орон болон нэгдэн орж, конвенцийн үзэл санаанд нийцүүлэн “Хүүхдийн эрхийг хамгаалах тухай” хуулийг боловсруулан, 1996 оны 5-р сарын 8-нд батлан гаргасан бөгөөд 6-р сарын 1-ний өдрөөс мөрдөж эхэлжээ.
2002 онд “Хүүхдийн төлөө За гэж хэлье” дэлхий нийтийн хөдөлгөөнийг эхлүүлсэн НҮБ-ын Ерөнхий ассамблейн хүүхдийн асуудлаарх Тусгай чуулган 5-р сарын 8-ны өдөр хуралдсан бол Монгол улс 2002 оны 6 сарын 1-нд үндэсний кампанит ажлаа орон даяар зохион байгуулж байлаа.

Үүний үр дүнд Хүүхдийн хөгжил, хамгааллыг сайжруулах Үндэсний арван жилийн Хөтөлбөрийг /2002-2010/ Монгол Улсын Засгийн газар хэлэлцэн баталж, хэрэгжүүлсэн юм.

    Монгол улс жил бүрийн зуны сарын эхэн буюу 6-р сарын нэгнийг Хүүхдийн баярын өдөр болгон 1952 оны тэртээгээс тэмдэглэж эхэлсэн бөгөөд дэлхийн ихэнх улс орнуудад хүүхдийн баярыг энэ өдөр тэмдэглэдэг.

    Манай орон хүүхдийн баярыг үндэсний хэмжээнд, амралтын өдөр болгон хуульчлан тэмдэглэдэг цөөн орны нэг юм. Өнгөрсөн 1952 оны түүхэнд 6-р сарын 1-нийг 1995 оноос Эх үрсийн баяр болгосон ба иргэдийн санал хүсэлтийн дагуу 2003 оноос дахин Хүүхдийн баяр болгон тэмдэглэсээр өнөөг хүрсэн.

    2008, 2009 онуудад хүүхдийн баярыг нийтийг хамарсан халдварт өвчний улмаас хүүхдүүдийнхээ эрүүл мэндээ хамгаалах үүднээс гэр бүлийн хүрээнд тэмдэглэн өнгөрүүлсөн бөгөөд 2010 оны хувьд 2 жил завсарласны дараа орон даяар хүүхдийн баярын арга хэмжээг албан ёсоор зохион байгуулснаараа онцлогтой байлаа.

    2011 оны тухайд энэ удаагийн хүүхдийн баяраас эхлэн хүүхдийн эрх, хамгаалал, оролцооны тулгамдсан нэг гол асуудлыг сонгон олон нийтийн анхаарлыг хандуулахыг эрмэлзэж буй бөгөөд “Хүүхэд насыг хайрлая” хүүхдийн чуулганаас тодорхойлсон нэн тэргүүний тулгамдсан асуудал болох эрүүл, аюулгүй орчины асуудлыг сонгон авч олон нийтийн санаачилгыг өрнүүлж байна.

Тийм ч учраас энэ жилийн хүүхдийн баяраар эрүүл аюулгүй, хамгаалагдсан орчин, нөхцлийг бүрдүүлэх олон нийтийн санал, санаачилгыг өрнүүлж, орон нутагт хүүхдэд ээлтэй болох зорилт дэвшүүлэн, аливаа баяр ёслолыг эрүүл цэвэр орчинд тэмдэглэн өнгөрүүлэх эхлэлийг тавьж, жишиг тогтоохыг гол зорилго болгож байна. Түүнчлэн энэ оноос эхлэн Хүүхдийн эрхийг хамгаалах олон улсын өдрийг тодорхой уриан дор тэмдэглэн өнгөрүүлэх бөгөөд дээрх бодлого, зорилттой уялдуулан “Эрүүл орчинд - Инээмсэглэж амьдарцгаая!” уриаг дэвшүүлж байна.

Мөн энэ удаагийн хүүхдийн баяраас эхлэн Хүүхдийн эрхийн баатар “Соосой”, “Бөмбөөлэй” амилуулан хүүхэд багачууддаа танилцуулахаар болж, орон даяар 6 дугаар сарын 1-ний өдөр 11.00 цагт баярын арга хэмжээг нэгэн зэрэг эхлүүлэх гэж байна.

Б.Ганбилэг