Олонхи эмэгтэйн хүсэл болсон эрүүл турах арга нь усан спортоор хичээллэх билээ. Энэхүү спортыг Монголд анх удаа санаачилж, бизнесийн түвшинд аваачсан хүн бол Б.Уянга. Чөлөөт сонины сэтгүүлчдээс “Усны гүнж” цол “хүртэж” Ука нэрээрээ танигдсан тэрээр ямагт олны анхаарлын төвд байдаг.
-Танд амжилт хүсье. “Акуа фитнес” төв байгуулагдаад зургаан жил болсон байна. Одоо бол бүсгүйчүүд маань усны гайхамшгийг мэдэрдэг болсон. Харин эрчүүд “биднийг ялгаварлалаа” гэсэн гомдол тээчихсэн явдаг. Тэгэхээр зөвхөн бассейнд сэлэх, усанд дасгал хийх хоёрын ялгааг мэдэрсэн нь таны энэ салбарт оруулсан бодит хувь нэмэр үү?
-Шинээр үүсгэн байгуулагдсан “Үндэсний мэдээ” сонины уншигчдадаа энэ өдрийн мэнд хүргэе. “Бизнес ток” булангийн анхны зочин болсондоо баяртай байна. “Акуа фитнес” төв байгуулагдсан цагаасаа бүсгүйчүүдийг чийрэгжүүлэх, тураах, эрүүлжүүлэх чиглэлээр үйл ажиллагаа явуулж ирлээ. Бид энэ жилээс эрчүүдэд зориулсан салбар нээсэн. Ер нь бол ялгаварлан гадуурхалт биш цаг хугацааны асуудал байсан л даа. Бид салбараа өргөтгөх, хүн бүрийг чийрэгжүүлэх боломжийг эрэлхийлж байгаа. Таны хэлсэнчлэн усан фитнесийн ачийг одоо бүх хүн мэддэг болсон. Би эрхэлж яваа ажлаа бизнес гэхээсээ илүү энэ спортод оруулж буй хувь нэмэр гэж боддог юм. Нөгөөтэйгүүр миний хобби, миний аз жаргал юм даа. Oзонжуулсан усаар тураах нь илүүдэл жингээ хасч чадалгүй шаналж байгаа олон хүнд шинэ дүр төрх, өөртөө итгэх итгэл, гоо сайхны шинэ мэдрэмж хайрладаг гэж боддог. Манай төвөөр үйлчлүүлээд сэтгэл хангалуун гарч байгаа үйлчлүүлэгчдээсээ сэтгэлийн таашаал эрч хүч авдаг. Бид тэр хүнд сэтгэлийн болоод бие бялдрын гоо сайхан бэлэглэж байгаа. Тиймээс ч өөрөөрөө бахархах сэтгэл төрдөг юм. Хамгийн гол нь би энэ бүхнийг чадлаа шүү дээ гэж бодохоор гоё санагддаг шүү.
-Таныг маш багаасаа спортоор хичээллэсэн гэдэг. Гэхдээ үүнийг амьдралын том зорилгоо болгоод явах санаа анх хэзээ төрсөн бэ?
-Таван настайгаасаа спортоор хичээллэсэн. Японд хэдэн жил суралцахдаа энэ спортоор хүмүүсийг чийрэгжүүлэн турааж болох юм байна гэдэг санаа төрсөн юм. Тэр үед усан фитнес монголоос бусад оронд хөгжчихсөн байлаа. Маш богино хугацаанд харьцангуй олон хичээллэгчтэй болсон явдал энэ спортын хэрэгцээ үнэхээр их байсны гэрч болов уу. Бид хүмүүсийг хурдан түргэн чийрэгжүүлэхийн тулд, илүүдэл жингээс нь салгахын тулд маркетинг, менежментийн бодлогыг ч оновчтой хийсэн гэж үздэг. Зөвхөн насанд хүрэгчид хичээллэх нь миний сэтгэл ханамж биш. Японд хөгжлийн бэрхшээлтэй хүүхдүүд усан спортын хүчээр эрүүлжиж байгааг харахад их сайхан санагдаж билээ. Одоо манай хичээллэгчдийн тодорхой хувийг хүүхдүүд эзлэх болсон. Саажилттай, хөдөлгөөний дутагдалтай хүүхдүүд усан фитнесийн хүчээр богино хугацаанд эрс сайжирдаг юм. Эцэг, эхчүүд үүнд маш их баярладаг.
-Энэ хугацаанд үйл ажиллагааны чиглэл хэр өргөжсөн бэ. Өрсөлдөгч бий болов уу?
-“Акуа фитнес” төвд хуурай, нойтон хоёр төрлийн саун, иогийн дасгал, балетын сургалт, гоо сайхны үйлчилгээ нэмэгдсэн байгаа. Бүсгүйчүүд цаг заваа хэмнэхийн зэрэгцээ бүх л үйлчилгээг нэг дороос авч болох тав тухтай орчин бүрдсэн. Өрсөлдөгчийн тухайд бол усан фитнес нэртэй газар нээгдсэн. Гэхдээ мэргэжлийн бус хүмүүс усан фитнесийн төв нэрээр хүмүүсийг татаж байгаа явдал надад таалагдаагүй. Дээр нь сэтгэл эмзэглүүлсэн. Эрүүл мэндтэй холбоотой учраас үүнд хүмүүс сонголтоо зөв хийгээсэй. Илүүдэл жинтэй хүн сард 4-5 кг хаях нормтой. Түүнээс хэтэрвэл эрүүл мэндэд хортой. Хүний биеийн жин, эрүүл мэндийн үзүүлэлт энэ бүгдийг сайтар хянаж, хийх дасгал, идэх хоол хүнсээ хэрхэн тохируулах тухай заавар зөвлөгөө өгнө. Тэгж байж л чийрэгжүүлэн тураах процес явагддаг. Мэргэжлийн бус хүн үүнийг сайн мэдэхгүй шүү дээ.
-Тураах цай, кофег борлуулагчид рекламдаад байна. Сүлжээний бүтээгдэхүүн ихээр орж иржээ. Үүнээс гадна хөдөлгөөнгүйгээр турах гэсэн хүмүүсийн заримынх нь сонголт байдаг. Энэ талаар та юу хэлэх вэ?
-Хоол идэх дуршил бууруулж турна гэдэг маш эрсдэлтэй алхам. Би үүнд эсрэг байр сууринаас ханддаг. Байж болшгүй зүйл гэж үздэг. Хоолны дуршил буурна гэдэг тархи мэдрэлд ч нөлөөтэй. Хоолоо хэт сойх биш илчлэг багатай хоол бага багаар идэж, чихэр, гаазтай ундаа хэрэглэхгүй байхыг манай төв зөвлөдөг. Усан фитнес биенд ямар нэгэн ядаргаа өгөхгүй.Хамгийн хялбар, кайфтай спорт шүү дээ. Арьс, гоо сайханд ч дээд зэргээр нөлөөлдөг. Биеийн аль хэсэгт илүүдэл өөх байгаа вэ, түүнийг яаж зохист хэмжээнд аваачих вэ гэдгийг зөвхөн спортын дасгал хөдөлгөөнөөр шийднэ. Бүсгүйчүүдэд би гэрийн нөхцөлд хийх дасгал хөдөлгөөнийг нь хүртэл зааж өгдөг.
-Та галбиржих дасгал хөдөлгөөнөөрөө DVD гаргасан байх аа. Одоо худалдаанд бий юу?
-DVD худалдаанд гараад дууссан. Тун удахгүй нээгдэх Aqua.mn сайтанд бүх дасгалыг байршуулна. Хүзүү, гар, бугалга, гэдэсний гээд төрөлжүүлсэн дасгалуудаас өөрт хэрэгтэйгээ сонгоод хичээллэхэд эмэгтэйчүүд маань илүүдэл жингийн проблемгүй байх болно.
-Манайд үйл ажиллагаа явуулж буй бассейнууд эрүүл ахуйн шаардлага хангадаг эсэхэд үйлчлэгч нар эргэлздэг. Зарим томоохон бассейн усаа бараг сард нэг удаа сольдог гэсэн шүүмжлэлд өртдөг. Акуа фитнес төв энэ тал дээр хэр найдвартай вэ?
-Манайх хоногийн 24 цагийн эргэлттэй. Тэгэхээр цаг тутамд цэвэршиж байна гэсэн үг. Тус төвд хичээллэдэг хүн бүр эмнэлгийн нарийн шинжилгээнд хамрагддаг. Энэ тал дээр маш хатуу дэг жаягтай.
-Та өнгөрсөн жил амаржсан. Жирэмсэн үедээ фитнесээр хичээллэж байсан уу?
-Жирэмсэн үед усан спорт бүр ч илүү үр дүнтэй. Долоон сар хүртэл хичээллэж болно. Манай сайтанд жирэмсэн үед хийж болох дасгал хөдөлгөөнүүд тусгайлан байрших юм. Жирэмсэн эх усан фитнесээр хичээллэвэл хавагнахгүй, илүүдэл жин хуримтлагдахгүй, төрөхийн хүндрэл үүсэхгүй гээд давуу талууд бий. Манайд хичээллэж байсан эхчүүд төрөөд жаахан жин нэмчихвэл эргэн ирж хичээллэдэг.
-“Усны гүнж” нэрийг хэвлэлийнхэн танд хайрласан. Энэ нэр таалагдав уу. Жишээ нь, дуучин Алтанцэцэг “Хорхойд хоргүй од” нэрэндээ их хүндэтгэлтэй ханддаг. Сэрчмаа “Хайрын дууч шувуухай” гэхээр мэдээж уурлахгүй ш дээ?
-бодов.сурХэвлэлээр би чинь янз бүрээр бичигддэг. Буруу ташаа мэдээлэл гарсан бол залруулахыг хичээдэг. “Усны гүнж” гэчихээд элдвээр бичих нь тийм зохистой үйлдэл мөн үү. Бодох л ёстой асуудал. Аливаад оноож өгсөн нэрний цаана үүрэг хариуцлага ч бий. Ус өөрөө хатуудаа хатуу, зөөлөндөө зөөлөн. Усанд хүндэтгэлгүй хандаж болохгүй гэдэг миний логик бий. Ус өөрөө их сайхан энергитэй. Түүнээс авах эрч хүчийг юутай ч зүйрлэх аргагүй. Хүн тарьсан үрнээсээ ургац хураадаг.
-Усан спортыг хөгжүүлэх боломж бололцоо муу байна уу. Бусад спорттой харьцуулахад салбарлалт нэг л удаашралтай санагдах юм?
-Өртөг өндөртэй. Дүүрэг бүхэнд байгуулвал өнөөх л цаг завыг хэмнэх гээд байдаг. Манайх дүүргүүдэд салбарлах зорилготой байгаа. Баянзүрх дүүргээс энэ ажлыг эхэлнэ. Усан байгууламжийг нь шийдээд өгвөл хөдөө, орон нутагт ч багш нар бэлтгэж болохгүй гэх газаргүй. Эрүүл мэндийн байгууллагууд манайхыг хэр чадлаараа дэмждэг.
-“Акуа фитнес” нийгэмд хэр элгэмсүү вэ?
-Хууль ёсноос гажууд зүйл байхгүй. Төлөх ёстой татвараа төлөөд явж байгаа аж ахуйн нэгж. Манай нэг онцлог хүүхдийн төлөө “За” санд үйлчлүүлэгч нэг бүрийн төлбөрөөс 1000 төгрөг хандивладаг. Нэг ёсондоо үйлчлүүлэгчид маань хүүхдийн төлөө үйлсэд бага ч гэсэн хувь нэмрээ оруулж байна гэсэн үг. “Акуа фитнес” төв энэ үйл ажиллагааны зуучлагч гэж ойлгож болно. Дашрамд хэлэхэд манай төвтэй холбогдон зөвлөгөө авч, хичээллэхийг хүссэн хүмүүс 331014 хандаарай.