Хүн худалдаалах гэмт хэрэг өсчээ

2011-10-13

Цагдаагийн ерөнхий газраас Монгол Улсад 2011 оны эхний есөн сарын байдлаар улсын хэмжээнд гарсан гэм хэргийн талаарх мэдээллийг өглөө.

Гэмт хэрэг гарах олон шалтгаан, нөхцөл байдгаас манай улсад ажилгүйдэл, ядуурал, нийгмийн дунд байгаа соггуурал зэрэгтэй холбон үзэх нөхцөл бүрэлдсэн байдаг аж. Ялангуяа нийслэлд цаг наргүй ажилладаг шөний цэнгээний газрууд болон согтууруулах ундаагаар үйлчилдэг байгууллагууд үүнд хамгийн их нөлөөтэй.

Нөгөө талаар хууль, тогтоомжийн хэрэгжилт сул байгаатай холбон үзэж болно. Өөрөөр хэлбэл, хууль, тогтоомжоор хүлээсэн үүрэг, хариуцлагаа биелүүлэх үйл ажиллагаа хаа хаанаа хомс байгааг цагдаагийн байгууллагынхан хэлж байна. Мөн тэд нийгмийн үнэт зүйлсийн үнэлэмж өөрчлөгдсөнтэй, амар хялбар аргаар мөнгө олох гэсэн байр суурь хүмүүсийн дунд зонхилж байгааг онцолж байв.

Улсын хэмжээнд энэ оны өсөн сарын байдлаар 14530 гэмт хэрэг бүртгэгджээ. Үүнийг өмнөх оны мөн үеийнхтэй харьцуулахад 19 хэргээр өссөн үзүүлэлттэй байна. Өөрөөр хэлбэл 0.1 хувиар өссөн байна. Гэмт хэргийн гаралтыг авч үзвэл, нийслэлд 51.5, аймаг орон нутагт 42.6, төмөр замд 0.6, бусад газар 0.3 хувь бүртгэгд¬жээ. Үүнд, 18 ба түүнээс дээш насны хүмүүст холбогдох 79 гэмт хэрэг гарчээ. Зарим аймгуудад энэ онд өмнөх оны мөн үеийнхтэй харьцуулахад буур¬сан бол зарим газарт өссөн байна.

Тухайлбал, нийслэлийн Сүхбаатар, Чингэлтэй, Баянгол, Хан-Уул дүүрэгт 4.9-7.7 хувиар, Иргэний агаарын тээвэрт 85.7 хувиар тус тус өссөн аж. Эдгээр тоо баримтаас харахад гэмт хэргийн гаралт нийслэлд хамгийн их байгаа нь ажиглагджээ.
Мөн улсын хэмжээнд бүртгэгдсэн нийт гэмт хэргийн 40.4 хувийг хөнгөн, 47.3 хувийг хүндэвтэр, 9.5 хувийг хүнд, 2.8 хувийг онц хүнд гэмт эзэлж байна. Харин гэмт хэргийн илрүүлэлт улсын хэмжээнд 56.9 хувьтай. Энэ нь өмнөх оныхоос 14.1 хувиар ахисан байна.

Харин нийслэлийн хэм-жээнд 57.8 хувийн илрүүлэлттэй байгаа бөгөөд 15 хувиар өссөн статистик тоо баримт байгаа юм.
Гэмт хэргийн гаралт нь жил бүр өөр өөр байдаг ба энэ жилийн байдлаар өмнөх оныхтой харьцуулахад дараах гэмт хэргүүд өссөн хандлагатай байна. Үүнд, бусдын амь насыг санаандгүй хөнөөх гэмт хэрэг 45.5 хувиар, хууль бусаар ашигт малтмал олборлох, хайх, ашиглах 33.3, ойн тухай хууль тогтоомж зөрчих хэрэг 32.5 хувь, хүнийг санаатай алах 26.4 хувь, хүчиндэх 23.6, танхайрах 19.1, зам тээврийн ослын үед жолооч үүргээ биелүүлэхгүй байх, зугтаах хэрэг 16, дээрэмдэх 7.1 хувиар өссөн нь цагдаагийн байгууллагын зүгээс анхаарах ёстой зүйл болоод байгааг хэллээ.

Түүнчлэн, энэ онд хүн худалдаалах гэмт хэрэг зургаа гарсан ба өнгөрсөн оныхоос таваар илүү, биеэ үнэлэхэд бусдыг татан оролцуулах, зохион байгуулалттай хэрэг 10 бүртгэгдсэн ба өнгөрсөн оныхоос зургаан хүнээр өссөн аж. Тухайлбал, иргэдийн зүгээс өгсөн "нэр бүхий дөрвөн хүүхдийг Турк улсад циркийн тоглолтоор авч яваад эргэн ирээгүй" гэх мэдээллийн дагуу Улсын мөрдөн байцаах газар шалгаж байгаа юм байна.

Мөн Т" гэгч 13 настай хүүхдийг ХБНГУ руу уран нугаралтаар явуулаад ирээгүй гэсэн иргэний гомдлын дагуу тус хоёр хэргийг 2010 оны 10 дугаар сарын 15-ны өдрийн Эрүүгийн хуулийн 113 дугаар зүйлийн гуравдугаарт заасны дагуу шалгаж байгаа гэсэн. Эдгээрээс гадна Хятадад биеийг нь үнэлж ашиг олох зорилготой, Эрээн хот руу дагуулж яваад биеийг нь үнэлүүлсэн гэх мэт хэргүүдийг шалгасаар байгаа ажээ.

Харин энэ онд хулгай, булаалт, залилан, хээл, хахууль зэрэг өгөх гэх мэт хэргүүд тодорхой хувиар буурсан байна. Гэмт хэрэг үйлдэгдсэн нөхцөл, байдлыг авч үзвэл улсын хэмжээнд согтуугаар үйлдэгдсэн хэрэг 3335 бүрт¬гэгджээ. Энэ нь өмнөх оныхоос 157 хэргээр буурсан үзүүлэлт юм.

Харин зохион байгуулалттай буюу үгсэн тохиролцсон гэмт хэрэг 26, хүүхэд оролцсон 422 хэрэг бүртгэгдсэн бол эмэгтэй хүн оролцсон хэрэг 1945, гэр бүлийн хүчирхийллийн улмаас үйлдэгдсэн гэмт хэрэг 291, галт зэвсэгээр үйлдэгдсэн гэмт хэрэг 21 бүртгэгдсэн байна.

Манайд гэмт хэргийн ихэнх хувь нь гэр, орон сууц, гудамж талбайд үйлдэгдсэн байдаг аж. Гэмт хэргийн улмаас нас барсан хүний тоо өмнөх жилийнхээс 9.5 хувиар буурсан бол гэмтсэн хүний тоо 14.1 хувиар өссөн. Ер нь гэмт хэргийн улмаас гэмтэж, хохирох явдал тогтвортой буурахгүй байгааг албаныхан хэлж байна.

Н.БЯМБАСҮРЭН