Мөн ноёдын зодоон харцад халгаатай ч гэлцдэг. Чухам алинд нь хамаарахыг үл мэдэх асуудал үүсээд удаж байгаа нь Хууль зүй, дотоод хэргийн сайд Ц.Нямдорж, нэгэнтээ Монгол Улсын Ерөнхийлөгч асан Н.Энхбаяр гэгч хоёр том “бухны” тулаан юм. Цагтаа хэн хэн нь Монгол Ардын хувьсгалт нам гэгч маш том “махны машин”-ны гол хөдөлгүүрүүд байсан. Тиймч учраас хамтарч өнхрөхдөө урамтай байсан биз. Ачлахаа ачилж, намнахаа намнаж явсан хоёр өнөөдөр буцаж эргэхгүй болтлоо буруу эргэлт хийчихсэнээ олонд зарлав, өнгөрсөн долоо хоногт.

Хэвлэл мэдээлэл том салбар. Ямартай л сайд, ялаа хоёрыг сониноор цохиж амийг нь өлхөн хөнөөчихдөг болсон энэ нийгэмд дөрөвдэх засаглал хэмээн өргөмжилдөг хэвлэл мэдээллийнхэн, тэр дундаа хэсэг бүлэг этгээдүүд “Ху намын хуучин бухнуудын тулаан”-ыг шүүрч аван дэвэргэж байгаа нь борооны түрүүч шороо боохойн түрүүч хэрээ гэдгийг санагдуулах болов. Ард түмэн гэдэг зарим нэгэн өөрсдийгөө эрхэмд тооцдог улстөрчдийн бодсончлон эргүү амьтад биш. Тиймээс нэгэн цагийн нягт нөхөрлөлтэй, өнөө цагийн хонь чонь болсон хоёр том улстөрчийн бичил талбайд зарласан цусгүй дайны төгсгөлийг чимээгүйхэн ажин сууж байгааг хэлэх юун.

Өөрийгөө Монгол Улсын гуравдахь Ерөнхийлөгч хэмээн монголчуудад байнга сануулах болсон Н.Энхбаярын хувьд зөөлөн суудлаасаа чимээгүйхэн гулсахдаа нэлээд хорссон нөхөр. Тийм ч учраас чимээгүй гэтэж ирээд шийрдэн зуудаг эрлийз банхарууд шиг араншин гаргаж, энд тэндхийн болсон болоогүй заримдаг шиг нөхдийг цуглуулан нэгэн цагт үнэн сэтгэлээсээ жигшдэг байсан гудамжны засаглалд ханцуй шамлан зүтгэх болсон этгээд гэдгээр нь монголчууд андахаа байгаад удаж байгаа. Харин Монгол төрийн хуулийг мэддэг хэмээн онгирч, гэртээ аваачиж тулж байгаад “хөнжилдөө хууль зассан” хэмээн гоочлуулж, “яадаг юм, чадаж байгаа зүйлд арга байхгүй” хэмээн шазуур зуун омойтсон шавилхан биетэй ч бэлчээр нь хол нөхрийг өнөөдөр захын нохой Ц.Нямдорж хэмээн хуцдаг гэхэд доромжилсон болохгүй билээ. Хэн хэн нь намдаа, төрдөө ч ард түмэндээ, тэр бүү хэл дайснууддаа ч хүлээн зөвшөөрөгдсөн, хүчтэй лидерүүд.

Гэтэл ийм хүмүүс хөнжил гудаснаас ялгаагүй хэрүүл хийж, тэрийгээ төлбөр төлөн хэвлэлүүдээр цацаж байгаа нь увайгүй гэхэд зөөлдөх гээд хударгагүй гэхэд хатуудчих гээд байх шиг санагдах. Нэг л их гомдсон хүний дүрд тоглосон Н.Энхбаярын мэдэгдэл өнөө л муу нохойд барьдаг мод шиг болсон цагдаа, хүчний байгууллагууд руу хандаж, үзүүрлээд Ц.Нямдоржийг хатгасан байхад эгээ л шүдээ чигчийж байгаад яриагүй байгаа даа хэмээн ярилцлага мэдэгдлийг өнөө цагийн Хууль зүй, дотоод хэргийн сайд хэвлэлд өгсөн байв. Естой л есөн шидийн юм болно гэж энэ л байх даа гэмээр.

Шөнийн харанхуйд зүүд нойрондоо төр улсаа төвхнүүлсэн шигээ нойрсож байсан экс Ерөнхийлөгчийг муу муу, мухрын хар овоохой шиг болсон цагдаа нар давхин очиж баривчлах гэсэн юм байх... Ингэхэд та минь, экс Ерөнхийлөгчийн энэ үгэнд итгэх хүн хэд байгаа бол. Миний мэдэхэд Монгол Улсын Ерөнхийлөгчөөр ажиллаж байсан эрхмүүд төрийн хамгаалалтад тарвалзаж, байшин шиг биетэй хамгаалагчдаар хүрээлүүлэн ханхалзаж байдаг биш бил үү. Харанхуй шөнөөр баривчлах гээд очиход нь хаана байсан юм бол доо Н.Энхбаярын хамгаалагчид нь гэх бодол өөрийн эрхгүй бодогдох юм.

Экс Ерөнхийлөгч, Хууль зүй, дотоод хэргийн сайдын хоорондын дайн ширүүсч, бие биенийхээ хөрөнгийг ээлжлэн илчилж, хэвлэл мэдээллээр хэн хэнийгээ авлигачин дээрэмчнээр цоллож, Монголын ард түмний нүдийг бөлтийлгөж, чихийг дэлдийлгэсэн. Насаараа төрд, тэр дундаа хууль хяналтын байгууллагыг толгойлж ажилласан Ц.Нямдорж яагаад тэнгэрт гартал хөрөнгөжив. Тиймээс энэ асуудал үнэхээр байгаа бол даруйхан сайдын суудлаас нь буулгаж, хууль хяналтын байгууллага, Авлигатай тэмцэх газраар шалгуулах хэрэгтэй гэсэн ховтой зэрэгцэн энэ л цагийг хүлээж анаж байсан цөөвөр чоно мэт заримдгууд өндийж, хоолойныхоо хэрээр бархирч байв. Мөрөөр нь мөшгиж, мөчийг нь тоолсон Н.Энхбаярын үйлдэлд уурласан сайд угаасаа ууртай байсныг хэлэх үү экс Ерөнхийлөгчийг өөрөөс нь илүү хөрөнгө идсэн, уусан хэмээн хэвлэлээр зарлаж ээлжит дайралтаа эхлэхэд итгэхээс илүүтэй “Хань татна аа гэж” хэмээн ёжлох нь дэндүү олон байсныг дурдах юун.

Монголчууд урт хэл хүзүү орооно гэдэг. Н.Энхбаярыг шүүхэд өгөхөөр болсноо Ц.Нямдорж мэдэгдэж, шүүхийн үүд сахиулж, шоронгийн хаалга татуулах болно хэмээн өөрийн эрхгүй заналхийлэл үнэртүүлсэн “амлалт”-ыг хэвлэлээр цацав. Магадгүй энэ үнэн бол, Монголд үнэхээр шударга ёс гэж байдаг бол төрөөс төрсөн тэрбумтнууд болох Ху намын хуучин кадрууд балрах нь гарцаагүй билээ. Гагцхүү тэр шударга ёс нь хаана унтаж байгааг даанч хэлээд өгөх хүн байхгүй нь гачлан юм даа...

Т.Тэргэл

"Дээдсийн амьдрал" сонин

Ху намын "хуучин бухнууд"-ын тулааны ялагч нь хэн бэ
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Нямка үг хатуутай ч үйлдэл зөөлөн. Санаж байнга уу-Гүндалай бид хоёрын нэг нь гарцаагүй шоронд орно гээд л. Хэдэн жилийн өмнө. Одоо хүртэл хэн нь ч суугаагүй л байна

2011-11-02 | 20:31:47 | 124.158.69.53 |

Мэдээ
Гадаад мэдээ
Видео