-"NTV" телевизийн таван жилийн ой тохиож буй энэ өдрүүдэд бид хоёр уулзаж байна. Тиймээс тус төлөвлөөд анх хэрхэн хөл тавьж байв. МҮОНТВ-ийг орхиж шинэ телевиз сонгосон нь хэр зөв сонголт байсан юм бол?

-"NTV" телевиз маань таван нас хүрч байна. Таван жилийн өмнө бас л арваннэгдүгээр сард "NTV"-гийн эфир албан ёсоор нээгдээд 6-7 хонож байхад нь би орж байсан. Тухайн үед гэр орныхон, найз нөхөд бүгд л "Чи хамгийн том телевизэд ажиллаж байж дөнгөж байгуулагдаж байгаа телевиз рүү очих гэлээ. Тэрэн шиг хэрэггүй зүйл байхгүй" гээд хориглож байсан. Би Монгол телевизэд ажлаа хийгээд яваад байж болох л байсан. Гэхдээ тэнд миний хүссэн зүйлээ хийх нөхцөл бололцоо хэр билээ. Харин энэ телевизэд илүү их уран бүтээлийн эрх чөлөө байгаа байх гэж бодоод л ирсэн.

-Тэгвэл анхнаас нь ажиллажээ. Харин Нандиагийн шоу нэлээд сүүлд гарч эхэлсэн шиг санагдана?

-Анх ороод "Хөөрхөн" нэртэй теле сэтгүүл бэлтгэж байгаад хагас жил ч болоогүй хүүхдээ төрүүлэхээр чөлөө авсан. Үндсэндээ хоёр жил ажиллаагүй. Хоёр хүүгээ төрүүлчихээд буцаж ажилдаа ороод Нандиагийн ток шоуг хөтөлсөн.

-Энэ телевизэд ирж өөрийгөө нээсэн гэдэгтэй санал нийлэх үү. Бусад телевизээс танай онцлог нь юу бол?

-Таван жилийн дараа одоо бодоход би зөв алхам хийжээ. Өөрийнхөө нэрээр нэрлээд нэвтрүүлэг хийх боломж тэр болгон олдохгүй. Бусад газрыг сайн мэдэхгүй л дээ. Ер нь "NTV" телевиз харьцангуй эрх чөлөөтэй. Хэрвээ чамд чадал байвал, хэрвээ чамд зүтгэл байвал юм хийх боломжийг "NTV"олгож өгч чаддаг. Манай захирал ч гэсэн хэлдэг. "NTV телевиз бол уран бүтээлчдэд мөрөөдлөө биел үүлэх талбар чинь байгаасай гэж хэлдэг. Юм бүтээх, нэвтрүүлэг хийх эрх чөлөөг сайн өгч чаддагаараа давуу талтай.

-Шоуг өөрийнхөө нэрээр яагаад нэрлэх болсон юм?

-Анх би "Wonder women" буюу хүчирхэг эмэгтэй гэсэн нэртэй ток шоуг хийх саналтай орж байсан. Тэгтэл нэвтрүүлгийн зохиол бусад зүйл болж байна. Харин англи нэртэй нэвтрүүлэг гаргамааргүй байна. Нэрээ соль гэсэн шаардлага тавьсан Бид ямар нэр өгөх талаар ярилцаж янз бүрийн нэр гарч ирсэн ч нэг л зохимжгүй санагдаад болдоггүй. Тэр дунд манай продюссер "Нандиагийн шоу" гэх юм уу гэсэн санал гарсан. Тухай үедээ жаахан эмээгээд "Яршиг өөрийнхөө нэрээр нэрлээд хүмүүс ч юу гэж бодох юм билээ. Юу хийж чаддаг гэж тэгж байгаа юм гэх болов уу" гээд аваагүй. Нэвтрүүлгийн бэлтгэл ажил, тайзны ажил дуусчихаад байхад нэргүй л яваад байсан. Тэгээд хамгийн сүүлдээ "Нандиагийн шоу" л гэж нэрлэе, яадгийн гээд зориглоод өгсөн.

-Телевизийн салбарт ажиллаад хэдэн жил болж байна. Сэтгүүлч мэргэжилтэй юу?

-Би 1999 онд Монгол телевизэд хүүхдийн нэвтрүүлэг анх хөтөлж байсан. Түүнээс хойш 12 жил өнгөрчээ. Хүүхдийн нэвтрүүлэг хөтөлж байхдаа хажуугаар нь Радио, телевизийн дээд сургуульд сурч, гуравдугаар курстээ "Өглөө" хөтөлбөрт хөтлөгчөөр орсон. Сурахын хажуугаараа ажилласаар байгаад л сургуулиа төгссөн, Дараа нь "NTV"-д орохын өмнөхөн Санхүү эдийн засгийн дээд сургуульд ороод бас л ажлынхаа хажуугаар сурсан. Радио, телевизийн сэтгүүлч, бизнесийн удирдлагын мэргэжилтэй. Санхүүд сурч байхдаа ажлаа хийнэ бас жирэмсэн их хэцүү байсан. Телевиз миний хүсч, мөрөөдөж байсан зүйл болохоор ажлынхаа хажуугаар хичээлдээ явахад хөнгөхөн байж. Гэтэл Санхүүгийн чиглэлээр сурсан чинь маш хэцүү, арай л гэж төгссөн. Энэ сургуульд сурч байхдаа би жил дараалан хоёр хүүхэд төрүүлсэн. Манай багш ямар сайндаа л "Чи ямар арчаагүй зохион байгуулалтгүй хүн бэ, ганц сургууль " төгсөх гэж хоёр хүүхэд гаргалаа" гэж намайг загнаж байсан юмдаг.

-Сэтгүүлч хүн яагаад эдийн засгийн чиглэлээр сурах сонирхол төрөв?

-Тэр үед ганц бие байсан болохоор зав ихтэй байсан. Өглөө хөтөлбөрт ажиллахад 7 цагт очоод 9 цаг гээд ажил дуусчихна. Гадуур сурвалжлагад гарвал өдөр 13 цаг гээд л ажил дуусчихна. Тэгээд үдээс хойш сайхан завтай яваад байсан. Хэтэрхий их завтай байх дэмий санагдаад ямар нэгэн сургуульд суръя гээд найз охинтойгоо зөвлөтөл Санхүүгийн чиглэлээр сурахыг зөвлөсөн. Энэ сургуульд сурсандаа их баяртай байдаг. Нэлээд зовсон ч чамгүй их зүйл сурч мэдсэн. Жижигхэн тооцоолол хийх, маркетингийн асуудал дээр ч одоо энэ ажил их хэрэг болж байгаа. Хүн юм сурахад илүүддэггүй гэдэг үнэн юм байна. Амьдрал дээр хэрэг болоод л байгаа.

-Дахин сурах бодол байна уу?

-Одоо сэтгүүл зүйгээрээ магистерт суръя гэж төлөвлөөд байгаа. Хүүхдүүд маань цэцэрлэгт яваад арай гайгүй болж байна. Тэднийгээ сургуульд орохоос өмнө магистрт суралцъя гэж бодоод байна.

-Нандиагийн ток шоу хоёр жилийн хугацаанд хичнээн хүнийг зочноор оролцуулав. Сонирхолтой хүмүүс хэн хэн байв?

-Нийтдээ 70-аад дугаар хийчихсэн байгаа. Нэг нэвтрүүлэгт доод тал нь хоёр, заримдаа бүр 6-7 зочин ордог. Нийтдээ 150-иад зочид орсон юм билээ. Сүүлийн үед манай нэвтрүүлэгт хүмүүс ярилцлага өгөх гэж ирэхдээ надаас өөр юм хүсдэг болчихсон юм шиг санагддаг. Бусад өдөр тутмын , хөтөлбөрүүдээр цаг үеийн мэдээллийг хангалттай хүргэдэг учраас миний нэвтрүүлэгт ирсэн хүмүүс өөрийгөө илүү нээх юмсан гэж хүсдэг болчихсон нь мэдэгдээд байгаа. Олон л мундаг хүмүүс орлоо. Ардын жүжигчин Н.Сувд, Ерөнхий сайдын эхнэрээс эхлээд жирийн сайхан хүмүүс ч нэлээд ордог. Нийгмийн цөөнх болсон ижил хүйстнүүдийн тухай, Дауны синдром өвчний тухай хийсэн нэвтрүүлгүүд хүмүүст нэлээд хүрсэн. Би жирийн хүмүүсийн жирийн амьдралын асуудлуудаар ярилцахыг хүсдэг. Хүн болган л надад хичээж ярилцлага өгдөг. Би ч гэсэн хичээдэг. Ярилцлагын жанрыг хүмүүс амархан л юм шиг бодоод байдаг. Би бол амархан гэж боддоггүй. Хүнээ их судалдаг, бэлддэг, боддог, ингэж асуувал тэгж хариулах болов уу гэж бодож байж ярилцлагуудаа хийдэг болохоор бүгд л их үнэ цэнэтэй. Өнгөрсөн хугацаанд ажиглаж байхад хүмүүс эгэл жирийн хүмүүс орсон, амьдралд ойрхон яриаг их сайхан хүлээж авдаг юм билээ. Тийм хүмүүс олоход хэцүү байдаг.

-Олох уу эсвэл хүмүүс хандаад байна уу?

-Олно хандана.янз бүр. Хандах нь ховор доо. Яахав урлагийнхан, улс төрийнхөн бол нэлээд хандана шүү.

-Сонгууль дөхөөд ирэхээр хэвлэл, мэдээллийн хэрэгслүүд, гайгүй гэсэн нэвтрүүлгүүд улс төржөөд ирдэг. Нандиагийн ток шоу яах бол?

-Үнэхээр зарим нэвтрүүлэг бол болиоч ээ гэмээр л болдог. Бид тэгэхгүй л гэж ярьж байгаа. Мэдээж ганц нэг улстөрчдийг сардаа нэг удаа ч юм уу нэвтрүүлэгтээ оролцуулж болно. Гэхдээ шилдгүүд нь орох ёстой гэж бодож байгаа. Сонгууль эхлээгүй байгаа ч гэсэн би саяхан УИХ-ын гишүүн С.Оюунтай ярилцлага хийсэн. Гэхдээ тэр нь дауны синдром өвчний сэдвээр шүү дээ.

С.Оюун гишүүнийг шударга, үнэнч, улс төрд нэр хүндтэй ер нь л их зөв эмэгтэй юм даа гэдэг утгаар нь өөрөө санал тавьж оруулсан. Магадгүй сонгуулийн үеэр хүчирхэг чадалтай эмэгтэйчүүдийг дэмжиж нэвтрүүлэгтээ оруулах л байх.

-Нандиагийн шоугаар нийгэм рүү хандсан, аль нэг хувь хүний амьдралд гэрэл гэгээ нэмсэн, амьдралыг нь өөрчилсөн тохиолдол байгаа юу?

-Яг хэлж мэдэхгүй байна. 2010 оны долдугаар сард Маргад гэж хүүд бид шоугаараа дамжуулан үндэсний компаниудаас мөнгө цуглуулж өгсөн. Тэр хүүгийн ээж нь холбоотой байдаг. Хүүгийн бие нь 100 хувь эдгэрчихээгүй ч нэлээд сайжирчихсан гэнэ лээ. Ижил хүйстнүүдийн талаар хийсэн нэвтрүүлэг маань нийгэмд энә хүмүүсийг зөвөөр таниулах, хүмүүсийн сэт-гэхүйд өөр ойлголт өгсөн юм шиг байна лээ. Мән дауны хам шинжтэй хүүхдүү-дийн тухай нэвтрүүлэг хийсэн. Ийм хүүхдүүдийг хүмүүс мэдрэл муутай гэж ойлгоод байдаг. Гэтэл унэндээ бурхнаас 47 хоромсомтой заяачихсан адилхан л хүн. Гэхдээ жирийн хүүх-дүүдээс арай өөр харагдаж, арай удаан ойлгодог л юм билээ. Энэ мэт бага багаар ч гэсэн нийгмийн сэтгэл зүйд нөлөөлөхөөр юм хийх юмсан л гэж бодоод байдаг. Гэхдээ манай нэвтрүүлэг амралтын өдрөөр хүмүүст хүрдэг. Үзэгчид энэ нэвтрүүлгээс эрч хүч энерги олж авах гэж үздэг учраас бас хэтэрхий хүнд сэдэв рүү орохгүй.

Хааяа нэг асуудал хөндөнө үү гэхээс аль болох хөнгөн, хүмүүсийг тайвшруулж амраасан, хөгжөөсөн, нэгийг бодуулсан ярилцлага хийе л гэж боддог. Саяхан нэг зүйл намайг их эмзэглүүллээ. Солонгосын нэг найруулагч манайд ирээд Монголын телевизүүдийг дүрстэй радио байна гэж шүүмжилсэн байна лээ. Энэ үг надад их эмзэг туссан. Үнэхээр бид тэгж хэлүүлэхээр байгаа. Студид суугаад утас аваад л яриад байдаг. Үүнээс аль болох зайлсхийх хэрэгтэй.

Тиймээс л би ток шоунд оролцож байгаа зочиндоо нэг сорилт өгөөд ямар нэг даалгавар биелүүлдэгч юм уу, гаднаас ганц нэг сурвалжлага оруулж ирэх зэргээр өөрчилж хийхийг боддог.

-Нандиагийн ток шоуны нэг онцлог нь хөтлөгчийн хувцаслалт, гоёл чимэглэл гэж ойлгодог. Гоё гоё даашинз, чамин ээмэг зүүлтийг Нандиа өөрөө авдаг болов уу, эсвэл нэвтрүүлгийн ивээн тэтгэгчид сурталчилгааны зорилгоор хэрэглүүлээд буцаагаад авчихдаг болов уу гэж сонирхдог юм билээ?

-Даашинзуудаа бол би дандаа худалдаж авдаг. Манай эгч Канадад байдаг. Тэндээс өгч явуулдаг. Эндээс даашинз худалдаж авах юм бол нэлээд үнэтэй, доод тал нь 200-300 мянган төгрөг байгаа. Манай эгч үүнийг мэддэг учраас тэндээсээ гайгүй үнээр олоод явуулдаг л даа. Ээмэг зүүлтний хувьд "Наран" групптэй гэрээтэй ажилладаг. Миний хэрэгцээг хангадаг. Монголчууд өөрсдөө их ганган улс учраас гоё ганган хүнийг харах дуртай. Би хоёр жилийн өмнөөс Нандиагийн ток шоуг хөтлөхдөө дандаа л даашинз, туфль өмсөөд, үсээ гоё янзлаад орохыг хичээдэг. Өнөөдөр тэрийг дагаад манай бусад хөтлөгч нар туфль өмсч эхэлж байгаа. Би "Битгий түрийтэй гуталтай эфирт суу. Чи өөрөө муухай харагдана, үзэгчдэд ч таагүй харагдана" гэж телевизийнхээ шинэ хөтлөгч нарт хэлдэг.

Нэг үеэ бодвол телевизийн хөтлөгч нарын хувцаслалт өөр болчихсон. Хуучин яадаг байлаа даа. Жинсэн өмд, футболкатай суучихдаг байсан. Эфирийн соёл байх ёстой.

-Нандиагийн хамгийн чухал гоёл юу вэ?

Би жирийн үед бол юу ч хамаагүй өмсчихдөг. Эфирийнхээ хувцсанд л хамаг мөнгөө зардаг. Даашинз, туфль зэрэгт. Ер нь чанартай ганган гуталд л их дуртай. Гэхдээ манай телевизийнхэн төдийгүй сэтгүүлчдийн цалин хэцүү ш дээ. Хамаг мөнгө, цалингаа эфирийн хувцсанд өгөөд таарах юм даа гэж хааяа бодогддог. Яг үнэндээ миний цалин эфирийн үнэтэй хувцас авахад хүрэхгүй. Нөхрөөсөө, эгчээсээ авна. Хамгийн гол нь гэр бүлийнхэн намайг сайн дэмжих юм. Хэрвээ дэмждэггүй байсан бол би гоё хувцаслаж гарах боломжгүй, цаг зав зарцуулж ажлаа хийх боломжгүй. Ар гэрийнхэн аав, ээж нөхөр бүгд л дэмжиж байна.

-Уг нь хүн мөнгө олох гэж ажил хийдэг. Гэтэл бид олсон хэдэн төгрөгөө хувцсандаа ч зарж чадахгүй л байна. Магадгүй гэр бүлийнхэн тань цалин багатай ажлаа хаяач гэх тохиолдол байдаг уу?

-Телевизэд цалин багатай нь үнэн. Өөрийгөө хангалуун байлгаад байх цалин байхгүй. Миний хувьд ток шоу хийгээд одооноос л цалингаас гадна жаахан боломж олгож эхэлж байна. Гэр бүлийнхэн бол хаа очиж цалин бага боль гэж хэлдэггүй, их дэмждэг. Би тийм юм авмаар байна гээд нөхрөөрөө авахуулна. Заримдаа байх байхгүй үе гарна. Гэхдээ ямар ч байсан авъя гэсэн юмаа авч л байгаа юм. Нөхөр маань "нэвтрүүлэг нь сайхан харагдаж байна шүү, миний хайр, гоё нэвтрүүлэг хийжээ" гэдэг. Авч өгсөн даашинзыг нь эхнэр нь өмсөөд сайхан харагдвал нөхөрт маань мэдээж сайхан л санагддаг байх.

-Дэрсхэн хоёр хүүтэй гэлээ. Хэд хүрч байна. Гэр бүл, нөхрийнхөө талаар яриач. Юу хийдэг залуу вэ?

-Би саяхан "TV ZONE" сэтгүүлд ярилцлага өгсөн юм. Тэр ярилцлагадаа нөхрийнхөө тухай ярьсан л даа. Тэгээд өглөө танай сонинд ярилцлага өглөө гээд гарсан чинь манай нөхөр "Чи өөрөө л од болох мөрөөрөө од бол. Намайг битгий энд, тэнд цоллоод яваад бай" гэсэн. Одоо яахав дээ. Асууж байгаа юм чинь. Манай нөхөр Лхагвасүрэнгийн Баасанбаяр гээд Хууль зүйн яаманд ажилладаг залуу бий. Бид 2 хүүтэй. Хөвгүүдийн маань том нь дөрөвтэй, бага нь гурван настай. Бид хоёр бие биенийхээ ажлыг дэмжээд, туслаад л явж байна. Миний хамгийн сайн шүүмжлэгч бол нөхөр маань. Ер нь телевизийн найруулагч шиг болчихоод байгаа.

-Таван жилийн өмнө"NTV"-д ирэхэд ганцаараа байсан Нандиа өнгөрсөн хугацаанд их зүйл амжуулжээ?

-Таван жил бол бага хугацаа биш юм. Өөрийнхөө амьдралаар жишээ болгоход би таван жилийн өмнө ганцаараа байсан бол өнөөдөр нөхөртэй, хоёр хүүхэдтэй дөрвүүлээ амьдарч байна. Бас энэ хугацаанд нэг сургууль төгслөө.

Миний амьдралд өөрчлөлт гараад амьдрал цэцэглэчихсэн байна. Тэрэн шиг телевизийн маань ч амьдрал цэцэглэж олон уран бүтээлүүдийг өнгөрсөн таван жилд хийсэн байна. Нэлээд хэдэн реалити шоуг манай телевиз хийсэн байна. Ганц хоёр киноны уран бүтээл дээр ажилласан байна. Уралдаант цэнгээнт нэвтрүүлгүүд хийсэн байна. Хамгийн гол нь манай телевиз уран бүтээлчдээ сайн дэмждэг. Уран бүтээлчдэд боломж олгож чаддаг. Өнгөрсөн таван жилийг бид анхдугаар таван жил гэж нэрлээд байгаа юм. Дараагийн таван жилд улам их бүтээлтэй амжилттай ажиллах байх гэж найдаж байгаа. Телевиз бол хамтын уран бүтээл. Нандиа ганцаараа хэзээ ч шоу хийхгүй. Танай сониноор дамжуулаад ток шоуныхаа багийнханд зураглаач, найруулагч, инженерүүддээ бүгдэд нь баярлалаа гэж хэлье. Хэрвээ Нандиагийн ток шоунд жаахан ч гэсэн амжилт байдаг бол тэр бүхэн манай багийнхны сэтгэл зүрхээ нэгтгэсний үр дүн юм шүү гэж хэлэх байна. Телевизийн таван жилийн ойн босгон дээр манай шоу дуутай болсон. Ток шоугаа хийсэн цагаас л дуутай болох юмсан гэж бодсон. Ямар дуу хийх вэ гэж удаан бодож явж байгаад шөнө зүүдэндээ нэрийг нь олсон. Бид нар чинь ажлаа зүүдэлдэг болчихдог юм байна. "Амьдрал нандин" гэдэг гоё нэрийг зүүдэндээ олж аваад найруулагчдаа хэлсэн. Тэгээд манай телевизийн залуу уран бүтээлч Ган-Очир гэдэг залууд нэрээ өгөөд дууны шүлэг бичээд өгөөч гэж санал тавьсан. Ган-Очир маань их хөөрхөн шүлэг бичсэн. Тэр шүлэгт нь одоо яг хит болоод байгаа залуу ая зохиогч Оки ая хийж, "Мотив" хамтлаг дуулсан. Удахгүй клиптэй болно.

Н.Нандинцэцэг : “Амьдрал нандин” гэдэг гоё нэрийг зүүдэндээ олж авсан
Tweet
Bolod.mn