бүтээл зохиогчийнхоо төгс илэрхийлэл байдаг гэдэг юутай үнэн үг вэ” гэж бодогдлоо. Учир нь, урлагийнхны “сахал” Пүүжээ хэмээн авгайлдаг энэ эрхмийн яриаг сонсож суухад

Улаанбаатарын үдэш намуухаан намуухан

Учирсан хоёрын яриа аядуухан... хэмээх дууны аялгуу сэтгэл дотор эгшиглэсээр байх мэт санагдсан билээ.

-Таныг ажиглаад байхад дуу цөөтэй, эгэл даруу хүн шиг санагддаг. Мөн ийм олон бүтээлийг өлгийдөн төрүүлчихээд хэтэрхий даруухан амьдраад байна уу даа гэж бодогдох юм?

-Би хийх ёстой зүйлээ л хийдэг болохоор ямар нэг агуу зүйл хийчихлээ гэж боддоггүй. Би угийн л дуу цөөтэй хүн шүү дээ. Надад бусдаас илүү баян тансаг эсвэл сүр дуулиантай амьдрах хүсэл төрдөггүй.

-Таны бодлоор хүний оюун ухаанаас төгс төгөлдөр бүтээл төрдөг үү?

-Оюун ухаан төгс төгөлдөр бүтээлийг бүтээдэг. Ганцхан хөгжим ч биш бүх л урлагт.

-Бусдын захиалгаар, эсвэл өөрийгөө хүчилж бичсэн хөгжим жинхэнэ бүтээл болж чаддаг болов уу?

-Өөрийн дураар бичигдээгүй цаг хугацаа болон ямар нэгэн зүйлд захирагдаж бичсэн бүтээл нь өөрийгөө хүчилж байгаа учраас санаанд тэр болгон хүрдэггүй юм. Тиймээс санаанд хүрсэн бүтээл болж чаддаггүй гэдэгтэй би санал нийлнэ.

Харин сэтгэлээ шингээж хийсэн бүтээлээ хүмүүст хүргэхэд урамтай байдаг. Ийм бүтээлээ хэчнээн жилийн өмнө зохиосон ч эргээд сонсоход хийморь сэргэдэг шүү.

-Таны сэтгэлийг хамгийн ихээр хөглөдөг зүйл юу вэ?

-Байгалийн гайхамшиг.

-Та ихэвчлэн шөнө сууж зохиолоо бичдэг гэсэн. Өдөр, шөнөгүй ажиллахаар их ядардаг байх даа?

-Шөнө суухад саад болох зүйлгүй нам гүм байдаг учраас бодол санаагаа төвлөрүүлж хөгжмөө бичихэд амар байдаг. Өөрөө өөртөө ажил ундруулж, санасан бодсоноо чөлөөтэй хийдэг болохоор ядардаггүй. Бичиж байгаа хөгжим маань надад байнга эрч хүч өгдөг байх. Мөн би цаг заваа сайн зохицуулахыг хичээдэг болоод байгаа.

-Та ямар үед эрх чөлөөгөө хамгийн дээд зэргээр мэдэрдэг вэ?

-Чөлөөт уран бүтээлч гэдгээрээ. Чөлөөт уран бүтээлч байх нь амралт, чөлөөт цаг, ажлаа өөрөө зохицуулах боломж олгодог. Уран бүтээлээ эрх чөлөөтэйгээр хийх нь өөрт минь байгаа хамгийн аз завшаантай зүйл гэж боддог. Харин тэр эрх чөлөөгөө уран бүтээлдээ л зориулдаг.

-Хүний амьдралд жаргал, зовлон хослон оршдог. Тэгвэл таныг хамгийн ихээр бачууруулдаг зүйл юу вэ?

-Амьдралынхаа жаргал зовлонг тэнцүүлээд амьдралд тохиолдох элдэв бэрхшээл зовлонг өөдрөг сэтгэлээр харж инээж баясч явна даа.

-Амьдралын өч төчнөөн асуудалд та бачуурдаггүй гэж үү?

-Хүний амьдралд янз бүрийн л зүйл тохиолддог. Гэвч тэр бүхнийг ганцхан надад л тохиолдож буй мэтээр хүлээж авч, өөрийгөө зовоогоод яах юм.

-Сэтгэл хөдлөл багатай хүн юм аа даа?

-Би тун амархан баярлаж, гомддог хүн шүү дээ. Баярлаж, гомдсон сэтгэлийн хөдөлгөөнөө сархдаар тайлдаг. Үүнийг маань ойлгох хүн байхад ойлгохгүй нэгэн ч бас бий.

-Ямар үед таны сэтгэл хамгийн ихээр хөдөлдөг вэ?

-Миний зохиосон дуу хөгжим хэн нэгэн дуучин, хөгжимчинд таалагдаж, хамтарсан бүтээл маань нийтийн хүртээл болж чаджээ гэж бодох үед сэтгэл хөдлөх байтугай юм болно.

-Шаналал зовлонгоо бусадтай хуваалцаж чаддаг уу?

-Би их хаалттай хүн. Тиймээс ихэвчлэн дотроо л хадгалдаг.

-Сэтгэлдээ хадгалаад явах нь хэцүү биш үү?

-Яг үнэнийг хэлэхэд их хэцүү. Гэвч би үүнд бүр дасчихаж. Өөрөө өөрийгөө тайвшруулаад сурчихсан гэх үү дээ.

Хэн нэгэнд гомдлоо гээд түүнийгээ ил гаргаж чаддаггүй. Тэгээд ч би барагтай зүйлийг хүндээр тусгаж, өөрийгөө шаналгаад байдаггүй.

-Манайхан гадаад үзэмжинд их анхаарал хандуулах болж. Таны хувьд?

-Үнэнийг хэлэхэд, эд хөрөнгө гэх мэт зүйлс миний анхаарлыг төдийлөн татдаггүй. Аливаа эд хөрөнгө үргэлж шинэ, тансаг, үнэтэй байх албагүй. Өөрт байгаагаараа л болгож явна.

-Хүмүүс нас ахих тусмаа амьдралд шунадаг гэдэг дээ. Таны хувьд юунд шунаж байх юм?

-Хүний амьдрал их богинохон гэж ярьдаг. Амьдралд шунах гээд байх юу байх вэ. Энэ богинохон хугацаанд арай ихийг хийж амжуулахсан даа гэсэн шунал л байх юм. Бодож санасан бүхнээ хийж амжуулаад ямар ч харамсал тээлгүйгээр энэ орчлонгоос буцвал сайхан аа.

-Шунал хаанаас үүдэлтэй байдаг юм бол?

-Хүн чаддаггүй зүйлдээ л шунадаг юм болов уу.

-Ингэхэд та одоо болтол хувьдаа машингүй юм уу?

-Надад жолооны үнэмлэх байхгүй, машин ч барьж үзээгүй.

-Яагаад вэ?

-Их хотын хөдөлгөөний энэ их ачаалалд би хувь нэмэр оруулаад юу хийх вэ дээ. Такси гэдэг бэлэн унаа байхад ажлын хажуугаар машин барьж стресстээд яах вэ. Гэргий маань жолооны үнэмлэхтэй. Гэвч би машин бариулах дургүй.

-Уран бүтээл таны амьдралд ямар нэгэн байдлаар нөлөөлдөг үү?

-Уран бүтээл, амьдралаа тэнцүүхэн авч явахгүй бол болохгүй гэж боддог болохоор аль алинд нь цаг, зав гаргахыг хичээдэг. Амьдрал гэснээс харин сүүлийн үед амралт чөлөөт цагаа ар гэртээ өнгөрөөх хоббитой болсон.

-Аливаа зүйл бүтээсэн эзнийхээ зан араншинг илэрхийлдэг гэдэг. Энэ талаарх таны бодол?

-Хүмүүс аливаа уран бүтээлчийг бүтээлээр нь дүгнэдэг. Тухайн хүний туурвисан бүтээлээс түүний дотоод сэтгэлийг харж болдог гэж хэлж болох байх. Гэвч уран бүтээлч бүр өөр өөрийн гэсэн онцлог аялгуу хөгөөрөө бусдаасаа ялгардаг.

-Та уран бүтээлээрээ юуг илэрхийлэхийг зорьдог вэ?

-Өөрийнхөө бодож санаж явдаг зүйл, хүүхэд, залуу нас, хайр дурлал, нийгмийн асуудал гээд амьдралын бүхий л асуудлыг бусдад хүргэхийг хичээдэг.

-Таны зорилго, байгаа байдал хоёр хэр зөрдөг бол?

-Зорилго маань миний үйл хөдлөлөөс төдийлөн зөрдөггүй. Учир нь, би хүссэнээрээ байж чаддаг.

-Огт бүтдэггүй хүсэл танд байдаг уу?

-Уран бүтээлч хүний хувьд арвин их хүсэл мөрөөдөлтэй байдаг болохоор бүгдийг нь бүтээнэ гэж байхгүй нь мэдээж. Бүтэхгүй зүйл байлгүй яах вэ.

-Ингэхэд өнгөрсөн сард тоглолт хийхээр төлөвлөсөн байсан. Яагаад хойшлуулчихав?

-Тоглолтын заал захиалганд дарагдчихжээ. Би уг нь хоёр сарын өмнөөс захиалахаар хөөцөлдсөн боловч бүтсэнгүй. Тэгээд ч сонгууль дөхчихлөө. Тиймээс намар болтол хойшлуулахаар шийдсэн юм.

-Энэ таны анхны тоглолт байх аа. Яагаад тайлан тоглолт хийдэггүй юм бэ?

-Тоглолт хийе гэсэн бодол төрдөггүй байсан юм аа. Зохиосон дуунуудыг маань хүмүүс сонсож, миний бичсэн хөгжим бусдыг баясгаж л байвал болох нь тэр гэж боддог байлаа. Гэвч хүмүүс тоглолтын талаар яриад байхаар “Хийж байгаа зүйлээ хүмүүст тайлагнах ёстой юм байна” гэж бодсон. Тиймээс гурван жилийн өмнө цомгоо гаргасан. Одоо тоглолтоо хийхээр бэлтгэж байна. Тоглолтыг “On&Off” продакшн зохион байгуулж байгаа.

-Дуу гэдэг хөгжмийн зохиолч, яруу найрагч, дуучин гурвын хамтын бүтээл байдаг. Гэтэл ганцхан дуучин баяжаад л, нөгөө хоёр нь мөнгө ч үгүй, нэр алдар ч үгүй хоосон хоцроод байх шиг санагдах юм?

-Нэг үеэ бодвол хөгжмийн зохиолч, яруу найрагчийн аль аль нь зохих хэмжээний хөлсөө авдаг болсон.

Манайд ардын дуу шиг болтлоо нийтэд түгсэн олон сайхан дуу бий. Тэр дуунууд хойч үедээ уламжлагдан очиж байна. Шинэ залуу дуучид тэр дууг дахин амьдруулж, шинэ хөг аясаар баяжуулан, ард түмэнд хүргэж байна. Бид шинээр гарч ирж буй залуучуудаа чаддаг зүйлээрээ дэмжих ёстой. Тэдэнд тэр дуунууд таалагдаж байвал аваад дуулаг л дээ.

-Сэтгэлээрээ бас уран бүтээлээрээ бусдыг тэтгээд явахад амьдрал болоод байх юм уу. Хөрөнгө мөнгө, алдар нэр танд хэрэггүй гэж үү?

-Би хөгжмийн зохиолч гэдэг нэрээр дуудуулж явдагтаа баяртай байдаг. Аливаа хүнд чаддаг зүйл байхад уруудан доройтно гэж үгүй. Чаддаг зүйлээ хийгээд явж байхад амьдрал болоод л байна. Гишгэсэн мөрөө хожим эргээд харахад ч гэсэн өөрөөрөө бахархмаар амьдарч чадвал сэтгэл өөдрөг байна шүү дээ.

Эх сурвалж: "Өглөөний сонин"

Бодож санасан бүхнээ хийж амжуулаад харамсал тээлгүйгээр энэ орчлонгоос буцвал сайхан аа
Tweet
Bolod.mn