"Толгой"-нуудын талаар СУРАГ АЖИГ

2012-11-09

Оюутолгой, Тавантолгой Монгол Улсы гхөгжүүлнэ, монголчуудын амьдралыг дээшлүүлнэ гэж

гадаад, дотоодгүй л шуугьж байна. Үнэн шүү гээд дэмжих хэсэг байхад, эрс эсэргүүцэн зогсох өөр бусад нь ч байгаа. Ойрын үед монголчууд бид олон "толгой"-гоо тойроод нэлээд мэтгэлцлээ, Оюутолгой хүнийх болсон, Тавантолгой өрөнд орсон гэж багагүй шуугилаа. Өчигдөр ч бас багагүй сонинтой байсныг нэмж чимэлгүй тоймлон хүргэе.

ХЯТАДААС ЭРЧИМ ХҮЧ АВАХ ГЭРЭЭГ ҮЗЭГЛЭСЭН ТАЛААР МЭДЭЭ "ОЮУТОЛГОЙ РЕСОРСЕЗ"-ЫН ХУВЫЦААГ СУГА ӨСГӨВ

Оюутолгойн уурхайг эрчим хүчээр хангах талаар Хятадын компанитай хийсэн хэлэлцээр амжилттай болж, гэрээг үзэглэжээ. Ингэснээр уурхайн үйл ажиллагаагэхлүүлэх нөхцөл бүрдлээ гэсэн үг. Өвөр-Монголын эрчим хүчний корпорацтай хийсэн гэрээ ёсоор урд хөршөөс дөрвөн жилийн хугацаанд эрчим хүч импортлох юм.

Энэ талаар "Оюутолгой" ХХК-ийн Олон нийттэй харилцах албаны дарга Н.Бүрэнбаяраас тодруулахад, "Хятадын компани ойролцоогоор долоо хоногийн дараа эрчим хүчээ нийлүүлж эхлэх байх. Гэхдээ үйлдвэрлэлээ тэр дор нь эхлүүлэхгүй. Бүх зүйл хэвийн ажиллах эсэхийг нягтлан шалгах учир ойролцоогоор cap хагасын дараа баяжуулах тоног төхөөрөмжүүдээ асааж, ажиллуулж эхэлнэ. Нэгэнт эрчим хүчний асуудал шийдэгдсэн болохоор төлөвлөсөн ёсоор 2013 оны эхний хагаст бүтээгдэхүүнээ зах зээлд гаргана" гэсэн юм. Дашрамд дуулгахад, Оюутолгойг эрчим хүчээр хангах гэрээг үзэглэсэн талаар мэдээлэл олон нийтэд цацагдсан даруйд Торонтогийн хөрөнгийн бирж дээр "Оюутолгой Ресорсез" буюу хуучнаар "Айвенхоу Майнз" компанийн хувьцааны үнэ 10 хувиар огцом өсч, нэгж нь 8.95 канад долларын үнэд хүрчээ. Энэ ньтус компанийн хувьд өнгөрсөн дөрөвдүгээр сараас хойшхи хамгийн өндөр өсөлт юм байна. Харин "Рио Тинто" хувьцааны үнэ "Nasdaq" бирж дээр 2.0 хувиар өсч, өчигдрийн байдлаар 50.51 ам.долларын үнэтэй байлаа.

"ЧАЛЬКО" ОЮУТОЛГОЙГООС ХУВЬ ХҮРТЭХИЙГ ХҮСЭВ

"Чалько"-гийн хувьд "Айвенхоу Майнз"-ын охин компанийн хяналтын багцыг худалдаж авах санаа нь бүтэлгүйтсэн гээд Монголын баялгаас хүртэх хүслээ орхихгүй бололтой. Харин илүү дээгүүр санаархаж эхэлж байна гэхэд болно. Учир нь "Чалько" Оюутолгой төсөлд оролцох хүсэлтэй буйг тус компанийн тэргүүн дэд ерөнхийлөгч Лю Сянмин илэрхийлсэн талаар "Ройтерс" мэдээлжээ. Тэрбээр Тяньжинд болсон уул уурхайн бага хуралд оролцох үеэрээ "Хэрвээ "Рио Тинто" болон түүний хувь эзэмшигчид "Чалько"-г Оюутолгой төслийн үнэлэмжид нөлөөлнө гэж үзвэл оролцохоос татгалзахгүй. Биднийг хамтрагчаар сонгохгүй ч байж болно. Бид аль ч сонголтыг нээлттэй үлдээнэ" гэсэн байна. "Чалько"-гийн хувьд "Чайналько"-гийн охин компани бөгөөд "Чайналько" нь "Рио Тинто"-гийн 12 хувийг эзэмшдэг, хамгийн том хувь эзэмшигч. Цаашид ч хувиа нэмэх хүсэлтэй буйгаа нээлттэй илэрхийлдэг.

Улмаар "Рио Тинто" нь "Айвенхоу Майнз"-ын 58 хувийг, "Айвенхоу Майнз" Оюутолгойн 66 хувийг эзэмшдэг. Үүнээс харахад, "Чалько" шууд бусаар Оюутолгойтой хамааралтай, цаашид шууд болгох боломж байхыг ч үгүйсгэхгүй. Ийм боломж байгаа эсэхийг "Оюутолгой" ХХК-ийн олон нийттэй харилцах албанаас сураглахад, хариулах боломжгүй гээд, "Чалько" компаниас тодруулахыг зөвлөсөн юм.

"ЭРДЭНЭС-ТАВАНТОЛГОЙ" КОМПАНИ "ЧАЛЬКО"-ТОЙ БАЙГУУЛСАН ГЭРЭЭГЭЭ ЭРГЭЖ ХАРАХ ГЭНЭ

Манайхан эхлээд Оюутолгойн хөрөнгө оруулагчдаас, дараа нь "Эрдэнэс Тавантолгой"-н нүүрсийг худалдан авах "Чалько"-гоос тус тус 250 сая ам.долларыг баяр ёслолын байдалтайгаар гардаж авсан. Харамсалтай нь, эргэж баялаг бүтээхгүй зүйлд, өнөөх алдартай 21 мянгад зарцуулаад цацаад дууссан. Харин тухайн үед бодолцож үзээгүй асуудлуудаа сая гэнэт олж харсан бололтой. Учир нь, 250 сая ам.долларынхаа оронд нүүрс нийлүүлэхээр "Чалько"-той байгуулсан гэрээгээ манайхны хувьд хатуу нөхцөлтэй, муу гэрээ болсон гэж үзэн засч залруулахаар хэлэлцээ эхлүүлэх гэж буй талаар "Эрдэнэс-Тавантолгой" компанийн гүйцэтгэх захирал Я.Батсуурь мэдэгджээ.

Уг нь "Чалько"-той байгуулсан гэрээнийхээ дагуу нүүрсээ тонн тутмыг нь 70 ам.доллараар худалдаж байсан ч дэлхийн зах зээл дээр нүүрсний үнэ 20-30 хувиар унаснаар "Эрдэнэс-Тавантолгой"-г үнээ 56 ам.доллар болгон бууруулахад хүргэсэн гэнэ. Энэ нь тус компанийн хувьд олборлолтын зардлаа ч нөхөхөд хүрэлцэхгүй үнэ аж. Тиймээс гэрээгээ эргэн харах шаардлагатай байгаа талаараа "Чалько"-д мэдэгдээд байгаа бөгөөд тун удахгүй шийдтэй хариу авахаар болжээ.

“Үндэсний шуудан” сонин