Чуулганы танхимыг дайлаар мордож “буйдан”-тай эсэргүүцэл зарлаад ч парламентад бүлэгтэй болж чадаагүй ууган хүчнийхэн энэ удаад арай өөр арга эрэлхийлэхээр шийджээ.

Тэд энэ удаад улс төрийн ороо бусгаа цаг үеийн асуудлаар ялалтыг хаягласан намынхантай зөвшилцөх ажлын хэсэг байгуулан ажиллахаар болж, өчигдөр хуралдлаа. Гэхдээ хуралдаанаар хэлэлцсэн асуудлын талаарх мэдээллийг албан ёсоор хийсэнгүй.

Харин уг зөвшилцлийг амжилттай явуулж, бүлэг байгуулах, нэр бүхий гишүүдийн тангаргыг өргүүлэх зэрэг яаралтай асуудлыг түргэвчлэх шаардлагатай гэдэгт “гарц” хайсан мэдээтэй байна. Мөн Засгийн газраас арилжсан бондын асуудалд МАН-ын гишүүд нарийн хяналт тавих ёстой гэдэгт санал нэгджээ. Энэ талаарх мэдээллийг УИХ-ын гишүүн Ж.Энхбаяраас тодруулсан юм.

-Ээлжит бус хуралдаан зарласан нь цаг үетэй холбоотой юу. Хуралдаанаар ямар асуудал хэлэлцсэн бэ?

-Улс төрийн хүрээнд ялангуяа, парламентын төвшинд хэд, хэдэн чухал асуудлыг яаралтай хэлэлцэн шийдвэрлэх ёстой байгаа. Тиймээс парламентад хамгийн олон суудал бүхий хоёр нам санаачлага гаргаж, зөвшилцөх ёстой гэдэгт санал нэгдсэн. Тэр утгаараа манай намаас ажлын хэсэг байгуулан УИХ дахь Ардчилсан намын бүлэгтэй хэлэлцэж эхлээд байна.

Энэхүү зөвшилцлөөр маргаашийн (өнөөдөр) чуулганы нэгдсэн хуралдаанаар манай намын гишүүд бүлэгтэй болох асуудал орох байх гэдэгт тал талаасаа тохирсон гэж ойлгож байна. Бүлгээ байгуулахын тулд Төрийн байгуулалтын байнгын хороог хуралдуулах хэрэгтэй. Тэгэхээр манай намын зүгээс пүрэв гаригт хуралдах чуулганаар бүлгийн асуудлыг оруулья гэсэн саналтай байгаа.

-Тэгвэл танай намын гишүүд хэлэлцээрээс шалтгаалан чуулганы энэ долоо хоногийн хуралдаанд оролцох эсэхээ шийдэх нь гэж ойлгож болох уу?

-Хэрэв хоёр намын зөвшилцөл урагштай байвал чуулганы хуралдаанд оролцоно.

-Танай намын зүгээс АН-д өөр ямар асуудлыг зөвшилцөхөөр санал болгоод байна вэ?

-Ямартай ч манай намын зүгээс зөвшилцөх асуудлын жагсаалтаа гаргаад, Ардчилсан намд албан ёсоор тавьсан. Энэ хүрээнд ажил эрчимжих байх. Нэн тэргүүнд бүлэг байгуулах асуудал чухал байна. Цаашлаад, нэр бүхий гишүүдийн бүрэн эрхийн асуудал, мөн Засгийн газраас гаргасан бондод хяналт тавих гээд цаг үеийн асуудлууд багтаж байгаа.

-МАН, АН-ын хувьд, Өвөрхангайн тойрогт нэр дэвшин гишүүний түр үнэмлэхээ гардсан болон асуудал нь шүүхээр эцэслэгдээгүй байгаа эрхмүүдээс үүдэн үл ойлголцол үүсээд байгаа. Энэ асуудалд танай намын байр суурийг сонирхвол?

-Эрх зүйн талаасаа холбогдох маргаанууд нь шүүхээр эцэслэгдээгүй байна. Тийм учраас эцсийн шийдийг харах ёстой. Тэр утгаараа Сонгуулийн ерөнхий хорооноос “батламжлаад” байгаа нэр бүхий таван гишүүнийг тус тусад нь хэсэгчилж, тангараг өргүүлнэ гэсэн байр суурьтай байна. Нэг үгээр хэлбэл, бид АН-аас тус тойрогт өрсөлдсөн хоёр нэр дэвшигчийг хоёуланг нь тангараг өргүүлнэ гэдэгт эсрэг саналтай байгаа.

-Өвөрхангайн тойргоос хоёр намаас нэг нэг гишүүнийг гаргана гэсэн яриа байна. Энэ хэр үндэслэлтэй юм бэ?

-Ийм санал нэлээн дээр сонсогдож байсан. Гэхдээ одоо хэрхэх нь тодорхой бус л байна.

-Тэгвэл Увсын хоёр гишүүнийг эргүүлэн татна гэсэн мэдээлэлд ямар тайлбар өгөх вэ?

-Увсын гишүүдийн асуудал шүүхээр шийдэгдсэн гэж ойлгож байна.

-Та бүхэн “Чингис” бондын асуудалд хатуу хяналт тавихаа мэдэгдэж байсан. Энэ удаагийн хуралдаанаар энэ талаар хэлэлцсэн үү?

-Манай намын зүгээс энэхүү асуудалд хяналт тавьж ажиллахаа албан ёсоор мэдэгдсэн. Тийм ч учраас уг асуудлыг энэ удаагийн хуралдаанаар хэлэлцсэн. Энэ бол Монгол Улсын эдийн засаг, санхүүгийн томоохон асуудал. Тэр утгаараа бондонд олон хяналт байх учиртай. Ингэхийн тулд манай намын тухайд, эхний ээлжинд бүлэгтэй болох асуудлаар АН-тай зөвшилцөх ажлыг шуурхайлах ёстой.

Зүй нь бонд гэдэг маань өөрөө их хэмжээний өр. Хамгийн сүүлд гаргасан 1.5 тэрбум ам.долларын бондод өдөрт 270 сая төгрөгийн хүү төлж байна. Харин өмнө нь гаргасан Хөгжлийн банкны 580 сая ам.долларын бондод өдөрт 120 сая төгрөгийн хүү төлж байсан. Энэхүү бонд нь нийлээд нэг өдөрт 390 сая төгрөгийг алдаж байна.

Тэгтэл Засгийн газар Монголбанкинд хоёр их наяд төгрөгийн дотоод өртэй байгаа нь эдийн засгийн дотоод дахь өрийн дарамтыг улам өндөр болгож байгааг шүүмжлэхгүй, харахгүй өнгөрөхийн аргагүй юм. Тэр дундаа хамгийн бухимдалтай гол асуудал бол тэрхүү үнэт цаасыг юунд зарцуулах нь тодорхой бус байгаад л хамгийн их санаа зовоож байна.

Цаашлаад, энэхүү бондын хүүнд өдөрт 400 сая төгрөгийг хоосон төлж байна шүү дээ. Малын тоо толгойгоор жишвэл, багаар бодоход өдөрт 50 мянган хонь өрөнд төлж байна гэсэн үг юм. Эцэст нь хэлэхэд, төрийн нэрийг барьцаалж авч байгаа өр учраас тал талаасаа хяналттайгаар явуулах нь манай улсын эдийн засгийн хөгжилд чухал нөлөөтэй.

-Уг бондтой холбогдуулан Үндэсний аюулгүй байдлын зөвлөмж хүртэл гаргасан. Сөрөг хүчний хувьд, энэхүү зөвлөмжид үнэлэлт дүгнэлт хийсэн байх?

-Энэхүү зөвлөмжийг зөв зүйтэй гаргасан байна лээ. Харин одоо нэн тэргүүнд анхаарах ёстой асуудал бол энэхүү бондыг хэрхэн, юунд зарцуулахаа нарийн тооцоолоход анхаарах ёстой. Эх орноо барьцаалж, зээл авчихаад бүдэг бадаг зүйл яриад сууж болохгүй шүү дээ.

-Сүүлийн үед МАН-ын гишүүд МАХН-МҮАН-ын “Шударга ёс” эвслийн бүлэгт орох нь гэсэн мэдээлэл гарах боллоо. Тэр ч бүү хэл 2004 онд болж байсан улс төрийн нөхцөл байдал давтагдаж, “62-ын бүдүүн бүлэг” энэ удаа улаантаж өнгөө хувиргах нь гээд шуугих болсон. Та бүхний дунд хэлж ярьсан, тохиролцсон юм бий юу?

-Улс төрийн түмэн хувилбар явагдаж байна. Энэ бүхнийг үгүйсгэж болохгүй л дээ. Хэрэв манай намд “Шударга ёс” эвслийн бүлэг албан ёсоор хамтарч ажиллая гэвэл яагаад болохгүй гэж… Бид ийм тохиолдолд хамтарч ажиллах болно.

О.Сэлэнгэ

Эх сурвалж: "Нийгмийн Толь"

Ж.Энхбаяр: МАХН-аас хүсэлт гаргавал яагаад хамтарч болохгүй гэж…
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
МАХН ЧИНЬ ХЭДХЭН ХОРЛОХ АЖИЛЛАГАА ЯВУУЛСАН ОЛИГАХУУДААС БОЛЖ 2 ХУВААГДСАН. 90 НАСТАЙ УЛС ТӨРИЙН ХАМГИЙН ТОМ ХҮЧНЭЭР УЧИРАА МЭДЭХГҮЙ, УЛС ТӨРИЙН БОЛОВСРОЛ МЭДЛЭГ БАЙХГҮЙ ЦӨӨН УВАЙГҮЙ НӨХӨД БАГАБАНДИ, ДАШЁНДОН, БАТБОЛД, БАЯР, ЭНХБОЛД ОРОЛДОЖ НЭР УСЫГ НЬ СОЛИНО ГЭЖ ХОЛИОН БАНТАНГ НЬ ХУТГАСАН АВИЛГАЛД ИДЭГДСЭН ААЛЗНУУД ХОЧТОЙ БОЛОГСОД ОВИЛГОГҮЙ НЯМДОРЖ XҮРЭЛСҮХ ГЭСЭН ЭТГЭЭДҮҮДЭЭР ТӨРӨӨ БАРИҮЛЖ ТЭД НАР НЬ ГАЛЗҮҮ ЮМ ШИГ ДАЙРААД НАМАА ДЭЭР НЬ ЖИРИЙН ГИШҮҮДИЙГ САМАРЧИХСАН. ҮҮНИЙГ НЬ ЭСЭРГҮҮЦЭН ЭНХБАЯР ДАРГА ТЭРГҮҮТЭЙ УХААЛАГ ТУЙЛБАРТАЙ ХЭСЭГ ГИШҮҮД ТӨРӨЛХ НАМАА АВРАН МАХН НЭРЭЭ Ч, ГИШҮҮДЭЭ Ч ХАМГААЛАН АВЧ ҮЛДЭЭСЭН БИЛЭЭ. МАХН МАН 2 УГШИЛ НЬ НЭГ НАМ ШҮҮ ДЭЭ! НИЙЛЖ ХАМТАРН АЖИЛЛАЖ УЛС ЭХ ОРОН АРД ТҮМЭНЭЭ ДЭМЖИН ХАМГААЛЖ САЙН АЖИЛЛАХ ХЭРЭГТЭЙ

2012-12-14 | 16:01:43 | 184.75.211.39 |

Мэдээ
Гадаад мэдээ
Видео