Жишээлбэл, автын механикч хүн оройн цагаар юм нэхэх,балетчин боксоор хичээллэхэд гайхах зүйл огт биш. Дэлхийн улстөрчид, хамгийн харгис гэгддэг удирдагчид ч содон хоббитой. Жишээ нь Гитлер хүүхэлдэйн кинонд нугасгүй байсан гэдэг. Осама бин Ладен волейболын хорхойтон байж. Харин манай улсын улстөрчид ч хоббигоороо ялгарна. Тэр дундаа анд хорхойтой эрхмүүд цөөнгүй.

-Монгол Улсын Ерөнхийлөгч асан Н.Багабанди загасчлах хоббигоор “өвчилсөн” гэх. Сайн загастай газар, булан тохойг андахгүй мэддэг эрхэм одоо ч зав л гарвал уургаа үүрээд, усны гутлаа өмсөөд загасчлахаар голын эрэг барааддаг гэнэ лээ.
Титэм үгийг тэрлэдэг энэ эрхэм өвлийн хүйтэнд ч голын мөсийг нь цоолуулан дэгээ шидэж, хүйтнээс үл ажирдаг гэж байгаа. Түүний очих дуртай газрын нэг нь Увс аймгийн Хяргас нуурын Цагаан хад хэмээх газар. Энэ нуур загасаар баян. Тэрээр олон цаг өнгөрч байгааг үл ажран шөнө дөл болтол суух нь энүүхэнд гэнэ.

-Түүний энэ хобби Ерөнхий сайд асан С.Баярт халдсан гэх. Монгол Улсын Ерөнхийлөгчийн Тамгын газрын даргаар ажиллаж байхдаа төрийн тэргүүн Н.Баганбандийг даган анд хамтдаа явдаг байсан гэнэ. Тэгээд ч С.Баяр “Загасны” хэмээх Дулмаа докторын хүү шүү дээ. Тэрээр “Ээж минь загас үржүүлдэг ажилтай, харин би хороодог хоббитой” гэж олон жилийн өмнө хэвлэлд өгсөн ярилцлагадаа дурдаж байсан удаатай. Ээж А.Дулмаа нь “Загас үржүүлгийн эрдэм шинжилгээний төв”-ийг байгуулсан бөгөөд насаараа энэ үйлсэд зүтгэж байгаа буурай. Ийнхүү ээж нь загас өсгөж байхад хүү нь загас барих хоббитой.

-УИХ-ын гишүүн,МАН-ын бүлгийн дарга “Монголын тул” сангийн тэргүүн Н. Энхболдыг сайн загасчин төдийгүй мундаг анчин гэдэг. Түүнийг чоно агнахдаа аатай гэж ойрын хүмүүс ярьдаг юм билээ. Тэрээр Монголд төдийгүй дэлхийд ховордсон тул загасыг хайрлан хамгаалдаг учир дэгээнд нь тул орвол буцаагаад тавьдаг гэнэ лээ шүү.

-Чоно, бодон, үнэг, буга агнадаг улстөрчдийг нь ахисан шатны анчид гэж хэлж болохоор. Онгоц, нисдэг тэрэг хөлөглөн, уул тайга самнаж, дархан цаазтай газар гэж үл тоож авд гардаг нөхдүүдийг нь хүнд гарууд ч гэж хэлж болох юм.
Улстөрчдөөс хамгийн анх Ардчилсан намын угшилтай “симба” хэмээх Батаа нисдэг тэргээр үнэг хөөж улсын үнэтэй, цайтай зүйлийг эвдэлж хэмхэлсэн нөхөр. Баар ажиллуулж, газар тариалангийн бизнес эрхлэж огцом баяжсан “Симба” Батаа улстөрч болж, УИХ-д сууж байхдаа Батлан хамгаалах яамны өмч хөрөнгө болох Ми-8-г хөлөглөн зугаацаж, Сэлэнгэ аймгийн нутаг дэвсгэр дээр үнэг хөөж яваад нисдэг тэрэг унагааж байлаа. Хамгийн хачирхалтай нь улсын олон зуун сая төгрөгийн үнэтэй нисдэг тэргээр ан ав хийж, хувийн зугаа цэнгэл хөөцөлдөж яваад эвдэж гэмтээсэн энэ эр ямар ч хариуцлага хүлээгүй өнгөрсөн удаатай. Хохирлыг төлүүлсэн эсэх нь бүрхэг, эвдэрсэн нисдэг тэрэг хаана байгаа юм бүү мэд.

-Монгол Улсын Ерөнхийлөгч Ц.Элбэгдорж ан авд тун сонирхолтой нэгэн гэнэ. Загас барих, буу шагайх түүний хоббиг цэргийн сургууль төгссөнтэй нь зарим хүн холбон тайлбарладаг юм билээ. Одоогоос олон жилийн өмнө Монгол Улсын Ерөнхий сайдын үүрэг гүйцэтгэгч Ц. Элбэгдорж Дундговь аймгийн Адаацаг сумын Бага газрын чулууны ууланд амрахаар явжээ. Тэрээр дөрвөн бие хамгаалагч дагуулан, хоёр жип машинтай хотоос гарсан гэдэг. Харин хоёр хоногийн дараа Адаацаг сумаас зүүн хойш 13 километрт УБЗ 00-16 дугаартай “Ниссан Патрол” маркийн автомашин нь онхолдсон юм. Зүүн хойд талын дугуй нь зад буудаж онхолдсон энэ машиныг бензин аваад буцаж яваад осолдсон гэдэг ч ан хөөж явсан гэх хардлага давамгайлдаг. Хойд талын дугуй буудахад онхолдоно гэдэг нь машин хэт их хурдтай давхиж байсныг илтгэдэг гэх. Тухайн үед нутгийн иргэд “Ц.Элбэгдорж хар сүүлт хөөж байсан. Энэ ан авд оролцож байсан машин онхолдсон” гэж ярих нь ч бий. Энэ машинд сууж явсан сумын засаг дарга Г.Дашзэвэгийн давсаг нь хагарч, хэд хэдэн хавирга хугаран биед нь хүнд гэмтэл үүсч Улаанбаатар руу нисдэг тэргээр ирсэн ч дөрөв хоноод нас барсан харамсалтай хэрэг гарч байлаа.

Тэрээр ангийн хоббигоо одоог хүртэл орхиогүй бололтой. Сүүлийн үед хэвлэлүүдэд хэдхэн хоногийн өмнө Ерөнхийлөгч Ц.Элбэгдорж Минжийн хангай руу нисдэг тэрэг хөлөглөн бас л ан ав хийж байгаад ирсэн гэх мэдээллийг нийтлэх болов. Минжийн хангай руу нисдэг тэрэг хөлөглөсөн энэ ан авд Хилийн цэргийн штабын дарга, бригадын генерал Ц.Сэргэлэн, Зэвсэгт хүчний АДХЦ-ийн командлагч, бригадын генерал Т.Дашдэлэг нар оролцсон гэх. Тэднийг ан ав хийхээс гадна Минжийн хангайд нисдэг тэргээр очоод Буур, Минжийн голд загасчилсан хэмээн учир мэдэх хүмүүс ярьцгааж байхыг бодоход үнэний ортой биз ээ.

Шинэ цагийн баян, шинэхэн улстөрч Н.Номтойбаяр анд нугасгүй гэнэ. Түүний баавгай агнасан зураг ч facebook хуудсаар тараад удаж байна. Саяхан тэрээр дархан цаазтай газарт ой тайгыг самнаж чоно, бодон авласан гэнэ. Хувьдаа нисдэг тэрэгтэй компаниудын нэг бол МАК, Магнайтрейд компани гэдэг юм билээ. Тийм болохоор анд хоббитой Н.Номтойбаяр хүссэн үедээ л нисдэг тэрэг тэргээ хөлөглөн, зорьсон зүгтээ нисдэг байлгүй.
Жадамбаа генералын хүү, УИХ-ын гишүүн Ж.Энхбаяр ч ангийн хорхойтой нэгэн . Саяхан Ж.Энхбаяр, улсын заан Б.Соронзонболд болон найзуудтайгаа хамтаа ан хийсэн гэнэ. Мөн УИХ-ын гишүүн С.Бямбацогт ч нэлээд хэдэн жилийн өмнө тэх агнаж байсан гэх. Ийнхүү зарим улстөрчид анд хоббитой бол зарим нь амьтны хамраас цус гаргаж ч үзээгүй гэдэг ч харин хоёр хөлтэй “ан”-даа одтой гэнэ лээ шүү.

www.times.mn