Эдгээр компанийн ажилчид өглөөний ургах нарнаас үдшийн бүрий хүртэл халуун хүйтнийг тэсвэрлэн хотынхоо өнгө үзэмжийг сайжруулахаар ажилладгийг хүн бүр мэднэ. Гэтэл эдгээр ТҮК-ийг татан буулгах шийдвэр гэнэт гарсан байна. Чухам юу болсон талаар “Баянгол тохижилт” компанийн захирал Д.Батсайханаас тодруулсан юм.

-Хувийн ТҮК-иудыг муу ажиллаж байгаа учраас татан буулгана гэсэн мэдээлэл байна. Та энэ талаар ямар бодолтйо байна вэ?

-Өнгөрсөн 2003 онд нийслэлийн хогны менежмент нэлээд хүндэрсэн. Улмаар нийслэлээс шийдвэр гаргаж, хогны менежментийг хувийн хэвшлийнхэнд шилжүүлж, төр хувийн хэвшлийнхний хамтын ажиллагаагаар хогны менежментийг сайжруулахаар тендер зарласан. Үүнд төвийн зургаан дүүрэг болон миний бие оролцож, менежментийн хувьчлалаар анх “Баянгол тохижилт” компанийг 2003 онд авсан. Тэр үед нийслэл маань мөнгөгүй, машин тэрэг нь хуучирсан маш хэцүү байхад нь бид хувийн хөрөнгөө оруулаад өнгөрсөн 2007 он хүртэл хувийн менежментээр явж ирсэн. Тэгээд 2007 онд хувийн менежментээ дүгнүүлж, үнэлүүлээд энэ компанийг тэр үеийн ханшаар мөнгийг нь бүрэн төлж авсан. Тэгэхээр бүрэн хувьчлагдсан компани гэсэн үг. Үүнээс хойш өдийг хүртэл үйл ажиллагаагаа тасралтгүй явуулж ирсэн. Энэ хугацаанд хүндрэлтэй зүйл маш их байсан. Тухайлбал өнгөрсөн 2006 онд нэг айл өрхөөс авах хог тээврийн тариф 2000 төгрөг байна гэж баталсан байдаг. Өөрөөр хэлбэл нэг айл өрх 30 хоногийнхоо хогийг 30 километр тээвэрлүүлэхэд 2000 төгрөг төлж байгаа нь өнөөдрийг хүртэл мөрдөж байгаа. Тухайн үед хог тээврийн тарифыг баталж байхад шатахууны үнэ 680 төгрөг байлаа. Харин өнөөдөр 1870 төгрөг болоод өсчихсөн байхад хог тээврийн тариф яг хэвээрээ байгаа. Өсгөхгүй байх тал дээр ч төр захиргааны байгууллагатай хийсэн хатуу гэрээ бий. Бид үүнийг ч биелүүлж байгаа. Өнгөрсөн 2006 онд нийслэлийн, улсын, хувийн хэвшлийнхний хөрөнгө оруулалтууд маш бага байсан. Харин өнөөдөр үүнээс найм дахин ихэссэн. Энэ нь юу хэлээд байна вэ гэхээр хогны гарах хэмжээ мөн адил найм дахин ихсэнэ гэсэн үг. Тэгэхээр 2006 онд нэг айл өрхөөс авдаг хог тээврийн мөнгө өнөөдөр хэвээрээ байхад хогны хэмжээ тухайн үеийнхээс даруй найм дахин ихэсчихээд байна. Энэ нь маш их хүндрэлтэй. Шатахууны үнийн өсөлт, хогны хэмжээ гэх мэт бүх юм өссөн. Бид иймэрхүү хүнд нөхцөлд ажиллаад л ирсэн. Гэтэл өнөөдөр нийслэлийн Өмчийн комисс “Та нар муу ажиллаж байна. Өмчөө хураалга” гэсэн. Уг нь бид энэ компанийнхаа мөнгийг 100 хувь төлж, хувийн компани болгоод, хувийнхаа өмчлөх гэрчилгээг авч хуулийн дагуу явж байсан. Гэтэл гэнэт хувийн өмчид халдаж “Буцааж авна. Өмчөө хураалга” гээд өнөөдөр комисс ирчихсэн тооллого хийгээд явж байна. Энэхүү үйлдлийг нь бид хэзээ ч хүлээн зөвшөөрөхгүй. Харин ажил үйлчилгээг нь улс авна, тендер зарлана гэх юм бол хүлээн зөвшөөрнө. Ер нь тэгээд хог тээврийн одоогийн тарифаар улс ч тэр, нийслэл ч тэр хувийн хэвшлийнхэнд маш олон удаа тендер зарлаж “Та нар оролцооч” гэсэн хүсэлтийг маш их тавьж байхад улсын ТҮК-иудаас өөр хоёрхон хувийн компани оролцож байсан. Гэвч “Бүтэхгүй ажил байна” гээд дундаас нь хаячихсан. Тэгэхээр бид хүчээр хувьчилсан компанийнхаа барьцаанд ашиггүй салбарт ажиллаж байхад одоо болохоор буцаагаад авна гээд байгаа юм. Хүнд байх үедээ бидэнд үүрүүлж, нийслэлийн төсвийн орлого багасаад ирэхээр “Мөнгөө төлөөд хувьчлаад аваач ээ” гэсэн хүсэлт тавихаар нь хувьчилж авсан. Одоо харин Улаанбаатар хот маань мөнгөтэй машин техниктэй болчихоод “Одоо та нар хэрэггүй. Яв. Хувийн чинь хөрөнгийг авна. Та нар гудамжинд гар” гэж байна. Бид энэ салбарт тэр дундаа нийслэлийнхээ цэвэр байдлын төлөө дээд тал нь 20 жил, доод тал нь арав гаруй жил явлаа.

-Шүүхийн байгууллагад хандсан уу?

-Хандаж болох бүхий л байгууллагад хандсан. Одоо ямар шийдвэр гарахыг нь хүлээгээд байж байна.

-Хөрөнгийг чинь хураана гэсэн янз бүрийн мэдэгдэл ирсэн үү. Аль эсвэл, шууд ирээд л тооллого хийгээд эхлэв үү?

-Бидэнд албан ёсоор мэдэгдсэн юм байхгүй. Дөрөв хоногийн өмнө нийслэлийн Өмчийн харилцааны газар дэд дарга зурагтаар “ТҮК-иудын хувьчлалын цуцаллаа” гэж яриад л, үүний дараа өнгөрсөн даваа гараг комисс томилогдоод гэнэт ороод ирсэн. Тэгээд “Өмчөө хураалга. Шинэ захирал томилогдсон. Та нар гар” гэсэн.

-Та түрүүн ашиггүй гэж хэлсэн. Ер нь ашиггүй салбарт хөөгдөн барин ажиллах шаардлага байна уу. Ямар ч ашиггүй юм биш үү?

-Ямар ч ашиг байхгүй.

-Тэгээд яагаад энэ салбарт ажиллаад байгаа юм бэ?

-Энэ салбарт ажиллаад байгаа нь нэгэнт компаниа хувьчлаад авчихсан. Ажиллах арван жилийн гэрээтэй. Гэрээнийхээ дагуу л үйл ажиллагаагаа явуулж байна.

-Шүүхийн шийдвэр яаж гарах бол?

-Манай шүүхийн байгууллага үнэн, зөв шударга шийдвэр гаргана гэдэг итгэж байгаа. Яагаад гэвэл бидний хийж байгаа ажил амьдрал дээр ил харагддаг. Төр захиргааны байгууллагууд бидний өмнө хүлээсэн үүргээ маш муу биелүүлсэн. Бид маш бага төсөв мөнгөөр өнөөдрийг хүртэл авч яваагаа “Маш сайн ажилласан гэж” өөрсдийгөө дүгнэж байгаа. Манай компанийн үйл ажиллагаа хэвийн үргэлжилж байхад 2007 төр маш буруу үйл ажиллагаа явуулж манай ажиллагааг доголдуулсан. Жишээ нь дүүрэг болгонд “Хог хаягдлын сан”-г байгуулсан. Тэр нь аж ахуйн нэгж болон айл өрхүүдээс мөнгө хурааж, санхүүжүүлдэг зохион байгуулалтаар хийсэн. Гэтэл бидний хурааж байсан орлогоос тус сан нь улам дордуулсан. Иймэрхүү байдлаар гурван жил явж, сүүлдээ Захиргааны хэргийн шүүхээр орж “Сан гэдэг зүйл нь буруу юм” гэсэн дүгнэлт гарч татан буулгасан.

-Та арван жилийн гэрээ байгуулсан гэж ярилаа. Гэрээгээ хэзээ байгуулсан юм бэ. Хугацаа нь дууссан уу?

-Өнгөрсөн 2007 онд байгуулсан гэрээ л дээ. Одоо талдаа л орж байна.

-Тэгэхээр гэрээ дуусаагүй байхад иймэрхүү асуудал гарчихаж байгаа юм уу?

-Тийм ээ.

-Компанийн чинь бүх хөрөнгийг улс хураана гэсэн. Тэгэхээр танай компанид хэчнээн төгрөгийн эд хөрөнгө, машин техник байдаг вэ?

-Өнгөрсөн 2006 онд компаниа хувьчилж авахаар 360 гаруй сая төгрөг төлж байсан. Одоогийн үнэ ханшаар үнэлбэл маш өндөр л дөө. Би бол хэзээ ч компаниа үнэлүүлэн буцааж өгөхгүй. Шүүх шийдвэрээ үнэн зөв гаргана гэдэгт итгэж байгаа.

-Танай компани хэчнээн ажилчидтай вэ?

-200 гаруй ажилчинтай. Эдгээр хүний аж амьдралыг нь залгуулж явна гэдэг бол хэр баргийн компанийн хийгээд байдаг ажил биш. Хоёрдугаарт манай ажилчид үүрийн таван цагаас шөнийн 00 цаг хүртэл ажилладаг байхад “муу ажиллаж” байна гэх шал утгагүй шалтгаанаар хувийн ТҮК-иудыг татан буулгана гэж байгаад манай ажилчид маш их харамсаж, халаглаж байгаа.

-Ажилтнууд чинь сардаа хэчнээн төгрөгийн цалин авдаг вэ?

-Харилцан адилгүй. Хамгийн доод тал 600 мянган төгрөгөөс нэг сая 500 мянган төгрөгийн хооронд авдаг.

-Хувийн хэвшлийнхнийг татан буулгахыг та маш их эсэргүүцэж байгаа. Тэгэхээр та нар яг одоо юу хүсэж байна вэ?

-Нэгдүгээрт хувийнхаа эд хөрөнгийг улсад хураалгамааргүй байна. Хоёрдугаарт зөвшилцөж Улаанбаатар хотынхоо иргэдийг ая тухтай цэвэр орчинд амьдруулахыг л хүсэж байна. Ерөнхийдөө хамтарч ажиллахыг л хүсэж байна.

Ж.Баттуул

Төр хувийн өмчийг дээрэмдэж эхлэх нь
Tweet
Bolod.mn

Сэтгэгдэл (3)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
ямар ч ашиггүй тэгээд биднийг гоё амьдруулах гэнэ ха ха бид яахав өөрөөл гоё амьдр********даа

2014-03-20 | 18:49:23 | 103.26.194.9 |

Зочин
Батсайхаан чи Баянгол дүүрэгт ирээд юу хийсэн хүн бэ. Үгүй ядаж ажилчдынхаа бээлий, хэрэглэж байгаа ажлын хувцас энээ тэрээг шалгаж үзсэн үү. Баянгол дүүрэг хогондоо яаж дарагдаж байгааг та хороодоор яваад үз лүү. Таны амьдрал л сайжирсан уу гэхээс... Ажилчдын чинь цалин ямар байгаа билээ дээ.

2013-02-07 | 15:00:04 | 202.21.112.202 |

Зочин
за та нарийг монго авахаа мэддэг болохоос хог зоодгийг мэдэхгүй юм б.на

2013-02-07 | 10:53:20 | 182.160.40.146 |