Хар тамхи зөөвөрлөж буйгаа тухайн үедээ гэмт хэрэг гэж төдийлөн бодож байгаагүй ч тодорхой хугацааны дараа бид ойлгож, болихоор шийдсэн. Тиймдээ ч би Монгол руугаа, хүү рүүгээ яаран, яаран ирсэн. Ханийнхаа “Түрүүлээд очиж бай. Хүүтэйгээ хамт намайг тосоорой. Би ганц удаа явчихаад араас чинь очъё” гэсэн үгэнд итгэж, долоо хонов. Нөхрөөс маань сураг байдаггүй.

Гэнэтхэн нэг өдөр “Нөхөр чинь хар тамхи зөөвөрлөж яваад баригдсан, дотор нь үлдсэн хар тамхийг гаргах гэж байтал амиа хорлоод цонхоор үсэрчихлээ” гэх мэдээг дуулсан. Тэнгэр, газар хөмөрчих шиг л болсон. Тэгэхдээ бүр Хятадын эмнэлэгт гэхийг нь сонсоод ухаан самуурч, яах учраа ч олохгүй байсан. Өмгөөлөгч авъя гэхээр хар тамхитай холбоотой, буруутанд өмгөөлөгч олдох эсэх нь ч эргэлзээтэй.

Энэ мэдээ ганц надад ч хүндээр тусаагүй. Гэр бүлийнхэнд маань, тэр дундаа хадмуудад бүр ч хүнд байсан. Амиа хорлосон гэдэг мэдээтэй хамт хар тамхи зөөвөрлөж явсан гэдгийг мэдээд хадмууд намайг үзэн ядах нь улам нэмэгдсэн. Ханиа, хүүгийнхээ эцгийг алдсан би хадмууддаа “Хүүгийн минь толгойг залгисан, бузар эм” хэмээн элдвээр хараалгах нь энүүхэнд. Бухимдсан хүмүүс үс, гэзэгнээс зулгааж, зодно. Тэр бүхнийг хэрхэн тэвчсэнээ би одоо сайн санадаггүй юм. Яагаад ч юм бэ, би ханийнхаа үхэлд буруутай гэсэн бодол намайг ээрсээр хоног хугацаа ч өнгөрч өгөхгүй байв.

Тэгсэн хадмууд “Хятадын талаас 7000 доллар нэхсэн. Яах болж байна. Хэн нь явах вэ” гэж байна. Хэдийгээр би ирээд удаагүй ч цуглуулсан дорвитой мөнгө байсангүй. Ердөө гурван сая орчим төгрөг байлаа. Ашгүй ханийн маань ах, дүү нар элбэж, дэлбэж байгаад 4000 доллар цуглуулжээ. Намайг явна гэхийг сонсоод хадмууд учиргүй дургүйцэв. Гэсэн ч “Миний хайртай хүн, хань маань хүний газар үхчихээд байна. Би өөрөө явна. Үхвэл ч үхэг” гэж зөрсөөр хадам дүүтэй хамт дахиад л Хятадад очив.

Биднийг хар тамхитай тэмцэх газрын гурван хүн тосч уулзсан. Тэд “Танай нөхөр хар тамхи тээвэрлэж явсан. 70 боодлоос 69 ширхгийг нь гаргаж авсан. Үлдсэн нэгийг нь гаргуулахаар хувийн эмнэлэгт эмчилгээ хийж байтал цонхоор үсрээд амиа хорлочихсон” гэх тайлбарыг өгөв.

Хилийн шалган нэвтрүүлэх “скан”-аар шалгаад ч мэдэгддэггүй. Гэтэл тэд яаж манай хүнийг мэдсэн юм бол гэдэг тун хачирхалтай. Лавлаад асуухаар “Бидэнд мэдээлэл ирсэн. Түүний дагуу шалгасан” гэдэг. Тэгэхээр Хулан өөрөө матсан байхыг ч үгүйсгэхгүй.

Нөхөр маань баригдаад үхсэнийг мэдсэн л байж таараа. Багаар бодоход 600 грамм барааг нь тээвэрлээд явж байгаа хүнийг хайхрахгүй өнгөрнө гэж байхгүй шүү дээ. Хамт амьдарч, ижил дасал болсон, Алжир руу цуг явъя гэж гуйж байсан хэр нь над руу утсаар ч болтугай холбогдож, эмгэнэл илэрхийлсэнгүй. Тэгэхээр биднээс бүрмөсөн салахыг бодсон юм болов уу гэсэн бодол ч төрсөн.

Миний хань эх орондоо ирэх гэж, хүүгээ харахсан хэмээн ямар их яарч байлаа даа. Тийм байтлаа амиа хорлоно гэсэн бодол яаж төрөх вэ дээ. Тэгээд ч хар тамхи зөөвөрлөөд, гаргаж байх үед ганц ширхэг үлдэх тохиолдол байдаггүй. Манай нөхрийнх бол хэзээ ч үлдсэн гэж байгаагүй. Харин 30-40 ширхгийг залгисан хүмүүст нэг ширхэг үлдсэн гэдэг яриа сонсож л байсан.

Тиймээс Хятадын Ардын дээд шүүхэд “Та нарын буруугаас болж манай нөхөр үхсэн. Миний хүүхэд эцэггүй, би ханьгүй болчихлоо. Хэрвээ нөхөр маань хоригдоод, 10, 20 жилийн дараа гараад ирсэн бол бидэнд хүлээх сэтгэл, амьдын итгэл байсан. Гэтэл та нарын хариуцлагагүй байдлаас болж нөхөр маань амиа алдсан” гэсэн утгатай бичиг орчуулуулж хүргүүлсэн. Гэтэл биднээс 7000 доллар нэхэж байснаа “Бид харамсаж байгаа тул мөнгө авахаа болилоо. Та нарын өмнөөс бид төлсөн” гэж байгаа юм. Үнэхээр нөхөр маань амиа хорлосон бол тэд бууж өгөхгүй л байсан шүү дээ. Би учир ухаанаа мэддэг, жаахан илүү боловсролтой, хэнд, хаана хандахаа мэддэг, улс маань хүнийхээ хойноос анхаарал хандуулдаг байсан бол нөхрийн маань амийг нохой шиг гаргуунд нь гаргахгүй байсан байх даа.

Арга ядаж гайхахдаа “Дотор нь байгаа хар тамхийг гаргасан юм уу” гэж асуухад “Хүсвэл задлан хийж, гаргаж болно. Одоо хэр нь нөхрийн чинь дотор байгаа” гэж хэлж билээ. Учрыг нь олж, хужрыг нь тунгаах гэсэн ч хадмууд маань задлан шинжилгээ хийлгэхийг зөвшөөрөөгүй. Би ч тэднийхээ үгийг дагасан. Гэхдээ цагдаад баригдчихсан хүн мэдээж харуул, хамгаалалттай л байсан байж таарна. Гэтэл таван давхар байшингийн цонхоор үсрэх гэж байхад нь ямар ч арга хэмжээ аваагүйн дээр нэхэж байсан мөнгөө авахгүй гэсэн нь яалт ч үгүй Хятадын тал буруутай гэсэн бодол дагуулсаар л явна.

Нөхрийн маань биед маш том цооролт үүссэн байдаг. Нэгэнт задлан хийгээгүй болохоор яаж ч чадаагүй. Гэхдээ л таван давхрын цонхоор унасан гэх мөртлөө баруун хөл, гурван хавирга нь хугарсан байсан. Нүүр ам, толгой нь зүгээр байсан. Тэгэхээр нь унасан байх үеийнх нь зургийг харъя гэхэд манай хуульд хориотой гээд мөн л үзүүлээгүй.

Иймэрхүү байдлаар хар мөртэй хар тамхинаас болж ханийнхаа үхлийн шалтгааныг ч үнэн мөнөөр нь олж чадаагүй.

Тэр бүү хэл, нөхрийнхөө цогцсыг чандарлахад “Чи өөрөө бэлтгэх ёстой” гээд дүү бид хоёрыг нэг өрөөнд оруулчихаж билээ. Ханийнхаа хөрсөн цогцсыг өргөж, хувцаслан, улаан торон өлгийд хэрхэн хийснээ би одоо сайн санадаггүй юм.

Дараа нь Хятадын талаас нөхрийн маань чандрыг хайрцагт хийчихсэн өгөхөд зарим яс нь гүйцэд бутраагүй, бүлээнээрээ байсан.

Би хар тамхинаас л болж ханийнхаа халуун чандраас ясыг нь авч цуулж зогссоноо одоо хэр хар дарсан зүүд байгаасай гэж хүсдэг. Харамсалтай нь энэ бодит үнэн байсан.

Хорвоог хамтдаа туулна гээд, хэдхэн хоногийн өмнө араас чинь очно гэсээр инээгээд үлдсэн нөхөр маань энэ хайрцагт байгаа гэж бодох нь эрүүл ухаантай хүнд хэцүү гэдгийг зовлонг нь үзсэн хүмүүс л мэдэх байх. Шөнөжин хайрцагтай чандар тэвэрч, уйлж суухдаа би хар тамхи, тэр дундаа монголчуудаараа бизнес хийж буй Хулан, Халиун хоёрыг үзэн ядаж, өөрийгөө зүхэж хоносон.

Хайрцагтай чандар биш, халуун бүлээн амьтай хань ижлээ тэврээд хэвтэж байх хувь тавилан надад байсан. Гэтэл амьдрахын эрхээр, амар хялбараар мөнгө олох гэсэн хүсэл маань биднийг хүний орчлонгоос үүрд хагацууллаа. Ядуу тарчиг ч гэлээ бид гурав хоёр идэхгүй, хоосон хонохгүйгээр инээж, хөхрөн хамт байсан жаргалтай үе цөөнгүй байжээ. Гэсэн ч одоо харамсаж, дурсахаас өөр юу ч үлдсэнгүй.

Тиймээс хар тамхитай нэг л удаа нэр холбогдсон бол эргээд тэрхүү эргүүлгээс гарах тун хэцүү шүү гэдгийг хүн бүр ойлгож, хол байгаасай гэж хүсэх байна. Магадгүй Хулан сайн тээвэрлэгчээсээ салах хэцүү, тэнд бариад байх бүр хэцүү байсан биз. Өөрийг нь бариад өгчих вий гэсэндээ нөхрийн минь амийг золиосолсон ч юм бил үү би мэдэхгүй юм.

Хулан, Халиун нар Хятадад нэлээд дээгүүрт бичигддэг хар тамхины сүлжээчид. Тэдний гар хөл бологсод хаа, сайгүй байдаг. Тиймээс амь нас, эрүүл мэндээрээ дэнчин тавьж, энэ сүлжээнийхэнтэй битгий холбогдоосой гэж залуусаас хүсье. Хажууд чинь байгаа ах дүү, гэр бүлийнхэнд чиний амь нас хамгийн эрхэм зүйл. Харин Хулан, Халиун хоёрт бол таны амь нас юу ч биш.

Өдгөө Хятадын шоронд шүүх хурлаа хүлээж байгаа хэдэн арван монголчууд бүгд Хулан, Халиун хоёрыг зүхэж суугаа. Тэд сайн сайхан бүхнийг амлаж, аваачаад эцэст нь харийн шоронд хатааж алдаг. Тэд тийм л хүмүүс.

Эх сурвалж: "Өглөөний сонин"

Би хар тамхинаас болж амиа алдсан ханийнхаа халуун чандраас ясыг нь авч, цуулж зогссон
Tweet
Bolod.mn

Сэтгэгдэл (11)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
тэр 2 хуухэн ч нилээн том гарууд бна л даа.Ийм зуйлд ороотсолдож болохгуэ л бхгуэ у.

2012-06-26 | 15:36:33 | 182.160.13.35 |

Зочин
одоо яаxав дэ тэнэг л байна . хар тамхи гэж мэдсээр байж

2012-06-26 | 09:46:14 | 202.179.2.86 |

Зочин
тэр 2 хуухнийг ягаад бариж чаддаггуй юмбэ улс мунгу амлаад бариулвал амархан ховлоно доо хумуус

2012-06-26 | 00:21:15 | 203.194.115.253 |

Зочин
тэр 2 хуухнийг ягаад бариж чаддаггуй юмбэ улс мунгу амлаад бариулвал амархан ховлоно доо хумуус

2012-06-26 | 00:21:13 | 203.194.115.253 |

Зочин
тэр 2 хуухнийг ягаад бариж чаддаггуй юмбэ улс мунгу амлаад бариулвал амархан ховлоно доо хумуус

2012-06-26 | 00:21:12 | 203.194.115.253 |

Зочин
тэр 2 хуухнийг ягаад бариж чаддаггуй юмбэ улс мунгу амлаад бариулвал амархан ховлоно доо хумуус

2012-06-26 | 00:21:10 | 203.194.115.253 |

Зочин
тэр 2 хуухнийг ягаад бариж чаддаггуй юмбэ улс мунгу амлаад бариулвал амархан ховлоно доо хумуус

2012-06-26 | 00:21:09 | 203.194.115.253 |

Зочин
Hvn vhched bhd hohino gehni hasha ym ghdee yah gj anhnasa iim teneg ym hii gesii.hj bg hvmvsin l buru shd.ymr nutsar tsvnhndni htsn bishde.bi bvr yuch oilgsngu.tgd ter 70n bodol gnv? Hool idj bgm shg zalgidg hergvv.

2012-06-25 | 23:30:20 | 218.186.17.248 |

Зочин
өөрөө унасан хүүхэд уйлдаггүй юм!!!

2012-06-25 | 19:32:21 | 202.179.7.122 |

Зочин
үнээн чи жаахан илүү боловсрол мэдлэгтэй байсан бол анхнаасаа ийм юманд орооцолдохгүй байсан байх.харин хар тамхи зөөгчдийн тухай унших болгонд таарах тэр Халиун Хулан гэдэг хүүхнүүдэд мөнгө л олж байвал монголчуудын амь амьдрал огт хамаагүй болчихсон ямар аймаар амьтад вэ.энэ олон хууртагдсан гэнэн тэнэг хүмүүсийн хараал зүхэл тусдаггүй юм байхдаа.

2012-06-25 | 14:35:26 | 49.0.138.125 |

Зочин
хугийн 2 эмэгтэйг ни тэгээд монгол улс бариж чадахгуй байгаа юм уу яагаад......!!!!;БУЗРИЙН 2 эмийг бариж абчраад шоронд хатаа.

2012-06-25 | 14:12:56 | 77.8.58.123 |

Мэдээ
Гадаад мэдээ
Видео